Piin Ma Gafaliy E Saf, Mu Folwokgad Rok E En Nib Ga’ Ni Ma Gafaliy E Saf

1, 2. (a) Mang angin nra yib ni faan yira ayuweg e saf nib fel’ rogon? (b) Mang fan ni boor e girdi’ u nap’an Jesus ni yad bod e saf nde moy rorad e en ni be gafaliyrad?

RA PAR e saf nib fel’ rogon ni faanra i ayuwegrad e en ni be gafaliyrad nib fel’ rogon. I yog ba ken e babyor ni murung’agen rogon ni ngan chuguliy e saf ni, “faanra dabi tiyan’ be’ ko saf rok mi i pagrad ngaur pared u daken e flang ngaur ked e pan ma ra yan in e duw ma ke meewar fapi saf ma kar m’argad.” Machane, faanra i tiyan’ be’ ni ma gafaliy e saf nga i ayuweg e saf rok ma ra fel’ fithik’ i dow fapi saf mi yad par nib fel’ rogorad.

² Ku er rogon e ulung rok Got ni faanra i ayuwegrad e piin piilal nib fel’ rogon ma ra fel’ rogorad, ma faanra danga’, ma yad ra gafgow. Sana ra yib ngan’um ni immoy ba ngiyal’ ni taganan’ Jesus nga bogi girdi’ ni kar muulunggad ni bochan e “yad bod e saf nde moy rorad e en ni ma gafaliyrad.” (Matt. 9:36) Mang fan ni ke par e pi girdi’ nem ni yad bod e saf nde moy rorad e en ni ma gafaliyrad? Bochan ni piin ni kan tayrad ni ngar filed e Motochiyel rok Got ko girdi’ e ba gel e thin rorad, ma yad ma yog boch ban’en ni nge rin’ e girdi’ ndabiyog rorad, ma yad ma dake modingnaged yad. Pi tayugang’ ko teliw u Israel kakrom e ur pied “bogi n’en nib tomal” ko girdi’, ma da ur t’ufeged yad maku da ur ayuweged yad.​—Matt. 23:4.

3. Mang e susun ndab i pag e piin piilal talin u nap’an ni yad be ayuweg e pi saf rok Got?

³ Ku bay e maruwel nib ga’ fan ni ma rin’ e piin piilal ni Kristiano e ngiyal’ ney. Pi saf ni yad ma ayuweg e ba milfan ngak Jehovah nge Jesus ni ir ‘faanem nib fel’ rogon ni ma gafaliy e saf.’ (John 10:11) Kan chuw’iy e pi saf nib ‘tolang puluwrad’ ni pi’ Jesus nga ‘rachaen ni map’ ni ba ga’ fan.’ (1 Kor. 6:20; 1 Pet. 1:18, 19) Bochan nri ma t’ufeg e pi saf rok ma aram me pi’ e yafas rok ni fan ngorad. Thingar dabi pag e piin piilal talin ni yad be maruwel u tan pa’ Got nge Fak ni aram Jesus Kristus ni ir e “en ni Ga’ ni ma gafaliy e saf.”​—Heb. 13:20.

4. Mang e gad ra weliy ko re article ney?

⁴ Ere, uw rogon nthingari ayuweg e piin piilal ni Kristiano e pi saf rok Got? Kan pi’ e athamgil nga laniyan’ e girdi’ u lan e ulung ni ngar ‘folgad ko thin rok e piin ni yad be yog e thin rorad.’ Machane, kun fonownag e piin piilal ndab ur ‘suweyed e piin ni kan pi’rad ngorad ni ngar gafaliyed yad.’ (Heb. 13:17; mu beeg e 1 Peter 5:2, 3.) Ere, uw rogon ni nga i yog e piin piilal e thin ndab ur suweyed e piin ni kan pi’rad ngorad ni ngar gafaliyed yad? Ara uw rogon ni nga i ayuweg e piin piilal e pi saf rok Got ndab ra thum’gad nga wuru’ mat’awrad ni ke pi’ Got?

BAYI “FEKRAD NI KE UCHUCHUMIYRAD”

5. Mang e gad ra fil u murung’agen Jehovah ko fare thin ni bay ko Isaiah 40:11?

⁵ I weliy Isaiah ni profet murung’agen Jehovah ni gaar: “Bay i ayuweg fare ran’ i saf rok ni bod rogon be’ ni ma gafaliy e saf; bayi kunuy fapi pi fak e saf nga taabang, mi i fekrad ni ke uchuchumiyrad; pi chitiningirad e bay i pow’iyrad Somol nib saf’og.” (Isa. 40:11) Re thin ney e be tamilangnag rogon ni ma pi’ Jehovah e tin nib t’uf rok e pi walag u lan e ulung ni kar meewargad ara ba t’uf ni ngan ayuwegrad. Manang Jehovah e tin nib t’uf ko pi walag u lan e ulung mab felfelan’ ngay ni nge pi’ ni bod rogon be’ ni ma gafaliy e saf ni manang e n’en nib t’uf ko pi saf rok nreb nge reb ma gubin ngiyal’ nrayog ni nge pi’. Nap’an ni gad ra mada’nag e skeng ara magawon nib mo’maw’ ma ma ayuwegdad Jehovah ni “ir e Chitamangiy nrib tarunguy e girdi’.” Ma ayuwegdad ni bod rogon be’ ni ma gafaliy e saf ni ma tay fak e saf nga lan e mad rok ya nge chuchugur ngak.​—2 Kor. 1:3, 4. 

6. Uw rogon nrayog ni nge folwok e piin piilal rok Jehovah?

⁶ Rayog ni nge fil e piin piilal ban’en ko Chitamangidad ni bay u tharmiy! Thingari tiyan’ e piin piilal ngar pied e tin nib t’uf ko pi saf rok Jehovah ni bod rogon ir. Faanra yad manang e magawon rorad, ma aram e rayog ni ngar nanged e ngiyal’ nge rogon ni ngar pied e athamgil nga lanin’rad mar ayuweged yad ko tin nib t’uf rorad. (Prov. 27:23) Ba tamilang nthingari fel’ e numon u thilin e piin piilal nge pi walag u lan e ulung. Yugu aram rogon ni yad ma kol ayuw ndab ra magawonnaged e maruwel rok boch e girdi’, machane yad ma tedan’rad ko pi n’en ni yad ma guy ara yad ma rung’ag ni be yog e girdi’ u lan e ulung mar guyed rogon ni ngar “ayuweged e piin ni yad ba war.”​—Acts 20:35; 1 Thess. 4:11.

7. (a) Mang e i rin’ e piin ni un tayrad ni nga u rogned e thin ko girdi’ rok Got u nap’an Ezekiel nge Jeremiah? (b) Mang e rayog ni ngad filed ko n’en ni rin’ Jehovah ko piin ni u rogned e thin ko girdi’ rok ndar yul’yul’gad?

⁷ Am lemnag e n’en ni i rin’ e piin ni kan tayrad ni nga u rogned e thin ko girdi’ rok Got u nap’an Ezekiel nge Jeremiah. De fel’ e pi girdi’ nem u wan’ Jehovah ni bochan e da ur ayuweged e saf rok nib fel’ rogon. Ke wer e pi saf nem ni bochan e dariy be’ ni i tiyan’ ngorad. Pi girdi’ nem ni u rogned e thin e ngiyal’ nem e da ur pied e tin nib t’uf ko girdi’ rok Got ni bochan e goo yad e ur lemnaged yad ma kar pared ni “yad e yad be ayuwegrad.” (Ezek. 34:7-10; Jer. 23:1) Pi girdi’ nem ni i fanenikay Got e ngongol rorad kakrom e rayog ni ngan taareb rogonnagrad ko pi tayugang’ ko Pi Yurba’ i Teliw ko Kristiano ni Googsur. Machane, ku be tamilangnag feni ga’ fan ni nga i tiyan’ e piin piilal ko pi saf rok Jehovah mu ur ayuweged yad u fithik’ e t’ufeg.

“KUG DAG NGOMED E N’EN NI NGUUM RIN’ED”

8. Uw rogon ni dag Jesus e kanawo’ nib fel’ ni nge folwok e piin piilal riy u rogon ni ngaur fonownaged e pi walag u lan e ulung?

⁸ Bay yu ngiyal’ nib mo’maw’ rok boch e girdi’ u lan e ulung ni nge tamilang u wan’rad e n’en ni baadag Jehovah ni ngar rin’ed ni bochan e dawor da flontgad. Ere, rayog ni ngar dugliyed boch ban’en nde puluw ko n’en ni be yog e Bible, ara ur rin’ed boch ban’en ni be m’ug riy ndawor ra ilalgad ko tirok Got ban’en. Ere mang e nge rin’ e piin piilal ko pi walag ney? Ba t’uf ni ngar folwokgad rok Jesus u rogon ni i k’adan’ u puluwon pi gachalpen u nap’an ni ur luaged e thin ko mini’ rorad e nge par nib tolang u Gil’ilungun Got. Yugu aram rogon ma de puwan’ Jesus ngorad, ya i fonownagrad ma be fil ngorad rogon ni ngaur daged e sobut’an’. (Luke 9:46-48; 22:24-27) Ku immoy ba ngiyal’ ni luknag e rifrif u ayrad ni bochan e nge fil ngorad rogon ni ngaur daged e sobut’an’. Re fel’ngin ney e kub t’uf ni nga i dag e piin piilal ni Kristiano.​—Mu beeg e John 13:12-15; 1 Pet. 2:21.

9. Mang lem e immoy ko pi apostal rok Jesus nib t’uf ni ngan yal’uweg?

⁹ Ba thil rogon ni i lemnag Jesus e maruwel ko piin ni yad ma ayuweg e saf rok Got nga rogon ni i lemnag James nge John. Immoy bayay ni guy e gal apostal ney rogon ni nge pi’ Jesus reb e tagil’ ngorow nib tolang u Gil’ilungun. Machane ke yal’uweg Jesus e lem rorow me gaar: “Gimed manang ni pi pilung e ba ga’ lungurad u puluwon e girdi’, ma piin ni yad be yog e thin rorad e yad be gagiyegnagrad. Machane gimed e gathi ereram rogon e n’en ni ngam rin’ed. Faanra ba adag bigimed ni nge mang ir e ba tolang, ma ir e thingari mang tapigpig romed ni gimed gubin.” (Matt. 20:25, 26) Ba t’uf ni nge chuweg e pi apostal fare lem ni bay rorad ni aram e yad baadag ni ngar “suweyed” e piin ni kan pi’ ngorad ni ngar gafaliyed yad ara nge ‘ga’ lungurad u puluwrad.’

10. Uw rogon e ngongol ni baadag Jesus ni nga i dag e piin piilal ko pi saf rok Got, ma mang e rin’ Paul nib fel’ ni ngan folwok riy?

¹⁰ Baadag Jesus ni nge ayuweg e piin piilal ni Kristiano e pi saf rok Got ni bod rogon ni ma ayuwegrad. Thingari m’agan’rad ngay ni ngar pigpiggad ngak pi walagrad u lan e ulung ma gathi ngar suweyed yad. Ku aram rogon apostal Paul ni i ngongol u fithik’ e sobut’an’ ya yog ko piilal ko ulung nu Efesus ni gaar: “Gimed manang rogon e maruwel ni gu tay u n’umngin nap’an ni gu par romed, ko chirofen ni som’on ni gu taw ko nug nu Asia. U fithik’ e gafgow ni yib ngog ni bochan e makath ni tay piyu Israel e gu ngongliy e maruwel rog u fithik’ nrogon e tapigpig rok Somol, ni gu rin’ u fithik’ e sobut’an’.” Baadag Paul ni nga i ngongol e piin piilal u fithik’ e sobut’an’ mi yad maruwel nib gel ni fan ngak pi walagrad. I gaar: “Kug dag ngomed u fithik’ urngin ban’en nra un maruwel nib gel ni ara’ rogon ma thingar da ayuweged e piin ni yad ba war.” (Acts 20:18, 19, 35) I yog Paul ko ulung nu Korinth ni gathi ir e nge yog ngorad e n’en ni ir e thingari mich u wan’rad, ya be ayuwegrad u fithik’ e sobut’an’ ni fan ko felfelan’ rorad. (2 Kor. 1:24) Ba fel’ ni nge folwok e piin piilal rok Paul ngaur ngongolgad u fithik’ e sobut’an’ ma yad be maruwel nib gel.

“THINGARI DABI PAG E THIN ROK GOT”

11, 12. Uw rogon nrayog ni nge ayuweg reb e piilal reb e walag ni nge dugliy ban’en?

¹¹ Thingar dabi pag reb e piilal e “thin rok Got ni ir e nge pagan’uy ngay, ma ba puluw ko tin ni yibe machibnag ngak e girdi’.” (Tit 1:9) Machane, thingari rin’ e re n’ey u “fithik’ e sumunguy.” (Gal. 6:1) Reb e piilal nib fel’ rogon ni ma ayuweg e girdi’ rok Got e der ma towasariy e pi walag u lan e ulung ni ngar ngongolgad u rogon ni be lemnag nib puluw, ya ma ayuwegrad ni ngar dugliyed boch ban’en nib puluw nga rogon nib t’uf Jehovah rorad nge Thin rok. Rayog ni nge tamilangnag reb e piilal boch i kenggin e motochiyel u Bible nsusun e nge fal’eg reb e walag i lemnag u m’on ni nge dugliy ban’en nib ga’ fan. Rayog ni nge dag ngak e n’en ni kan weliy u boch e babyor rodad nib puluw ko magawon rok. Ku rayog ni nge pi’ e athamgil nga laniyan’ fare walag ni nge fal’eg i lemnag e n’en nra rin’ e pi n’en nra dugliy ko tha’ u thilrow Jehovah. Ku rayog ni nge tamilangnag ngak feni ga’ fan ni nge meybil ngak Got nge ning e ayuw ngak u m’on ni nge dugliy e n’en ni nge rin’. (Prov. 3:5, 6) Tomuren ni kar weliyew e pi n’ey u taabang, me pag fare piilal fare walag nge mang ir e dugliy e n’en ni nge rin’.​—Rom. 14:1-4.

¹² Kemus ni yigoo Thin Rok Got e ke pi’ mat’awun e piin piilal ni ngar ayuweged e ulung rok Got. Ere, aram fan nrib t’uf ni ngar fanayed e thin riy nib fel’ rogon mi yad pi’ e fonow nib puluw ngay. Ra rin’ e piin piilal e re n’ey, ma ra ayuwegrad ni nge dab ra thum’gad nga wuru’ mat’awrad ni ke pi’ Got. Bin riyul’ riy e kemus ni kan tayrad ni ngar ayuweged e saf rok Got, ya ra be’ u lan e ulung ma ra weliy ngak Jehovah nge Jesus rogon e pi n’en ni i dugliy.​—Gal. 6:5, 7, 8. 

NGE “FEL’ PANGIMED YA NGUUR FOLWOKGAD ROMED”

13, 14. Uw rogon ni nge dag reb e piilal e kanawo’ nib fel’ ni nge folwok e pi walag u lan e ulung riy?

¹³ Tomuren ni yog apostal Peter ngak e piin piilal ndab ra ‘suweyed e piin ni kan pi’rad ngorad ni ngar gafaliyed yad’ me pi’ e athamgil nga lanin’rad ni ‘ngar pired nib fel’ pangirad ya ngaur folwokgad rorad.’ (1 Pet. 5:3) Uw rogon nrayog ni nge par reb e piilal nib fel’ pangin ya nge yag ni folwok e girdi’ u lan e ulung rok? Am lemnag l’agruw ban’en nthingari rin’ reb e walag ni pumoon ni be nameg ni nge “mang reb e girdi’ ni ngi i tay murung’agen” e girdi’ u lan e ulung. Som’on e susun ni ir be’ nib “tamilangan’” ma “thingari yog rok ni gagiyegnag girdien e tabinaw rok nib fel’ rogon.” Ere, faanra bay e tabinaw rok reb e piilal, ma thingari yag rok ni nge gagiyegnag nib fel’ rogon, ya “faanra de nang be’ rogon ni nge gagiyegnag girdien e tabinaw rok, me ere uw rogon me yog ni nge ayuweg e ulung rok Got?” (1 Tim. 3:1, 2, 4, 5, NW) Ra nge mang reb e walag ni pumoon reb e piilal u lan e ulung, ma thingari par nib tamilangan’ ni aram e thingari tamilang fan e pi kenggin e motochiyel u wan’ me nang rogon ni nge fol riy. Susun ni ku ir be’ nrayog ni nge par nib gapas laniyan’ u nap’an ni ke sum reb e magawon nib ga’, maku ma fal’eg i lemnag ban’en nib fel’ rogon u m’on ni nge dugliy e n’en ni nge rin’ ngay. Faanra i guy e girdi’ u lan e ulung e pi fel’ngin ney ko piin piilal, ma aram e rayog ni nge pagan’rad ngorad.

¹⁴ Ku ma dag e piin piilal e kanawo’ nib fel’ ni ngan folwok riy u rogon ni yad ma pi’ e ayuw ko machib ni bod rogon ni rin’ Jesus. Fare maruwel ni ngan machibnag fare thin nib fel’ ni murung’agen Gil’ilungun Got e aram reb e maruwel nrib ga’ fan ni i rin’ Jesus u nap’an ni immoy u fayleng. Ki dag ngak pi gachalpen rogon ni ngan rin’ e re maruwel ney. (Mark 1:38; Luke 8:1) Ngiyal’ ney e rib felfelan’ e pi walag u lan e ulung ni ngaur machibgad e piin piilal u taabang, ya yad ma guy farad pasig ko re maruwel ney ma boor ban’en ni yad ma fil rorad u rogon ni ngar filed ban’en ko girdi’. Faanra i fanay e piin piilal e tayim rorad nge gelngirad ni ngar machibnaged fare thin nib fel’ ni yugu aram rogon ni boor pa’ u puluwrad, ma ma pi’ e athamgil nga laniyan’ e pi walag u lan e ulung ni ngkur pasiggad ko machib. Ku rayog ni nge dag e piin piilal e kanawo’ nib fel’ ni nge folwok e pi walag riy u rogon ni yad ma fal’eged rogorad ni fan ko pi muulung ni gad ma tay, nge rogon ni yad ma pi’ e fulweg, nge rogon ni yad ma pi’ e ayuw nga boch e maruwel ni yima rin’ ni bod rogon e klin ni yima tay u Kingdom Hall nge ku boch e maruwel.​—Efe. 5:15, 16; me beeg e Hebrews 13:7.

NGAN “AYUWEG E PIIN NI YAD MMEEWAR”

15. Mang boch i fan ni ma yan e piin piilal i guy e pi walag u lan e ulung?

¹⁵ Be’ nib fel’ rogon ni ma gafaliy e saf e ma gur ni nge ayuweg e saf rok ni ke maad’ad ara ke m’ar. Ku er rogon e piin piilal nib t’uf ni ngar gurgad ngar pied e ayuw ngak e piin ni ke t’uf ni ngan ayuwegrad ko tirok Got ban’en. Sana ba t’uf ni ngan ayuweg boch e walag ni kar pilibthirgad ara kar m’argad ngan pi’ e tin nib t’uf ko par rorad, machane n’en nth’abi t’uf ni ngan rin’ ngorad e ngan ayuwegrad ko tirok Got ban’en min pi’ e athamgil nga lanin’rad. (1 Thess. 5:14) Piin fel’ yangaren e rayog ni ku yad be athamgil ni ngar gelgad ko “tin ni ma ar’arnag” e piin fel’ yangaren. (2 Tim. 2:22) Ere, ma ayuweg e piin piilal e pi walag u lan e ulung ni aram e yad ma yan ra guyed yad ngaur pied e athamgil nga lanin’rad. Ireray e ngiyal’ ni yad ma guy rogon ni ngar nanged salaprad, nge magawon ni yad be mada’nag mi yad fanay e thin nu Bible ni ngar pied e athamgil nga lanin’rad. Faanra gur e piin piilal ngar ayuweged pi walagrad ko tin nib t’uf rorad, ma aram e rayog ni ngar siyeged boch e magawon nib ga’.

16. Faanra ke t’uf e ayuw rok reb e walag u lan e ulung ni fan ko tirok Got ban’en, ma mang e rayog ni nge rin’ e piin piilal?

¹⁶ Uw rogon ni faanra bay e magawon rok reb e walag u lan e ulung nib ga’, ma ke magawonnag e tha’ u thilrow Jehovah. I yog James ni ir be’ ni yoloy reb e babyor u lan e Bible ni gaar: “Ba’ be’ u fithik’med nib m’ar? Faanra ba’ ma nge pining e piin ni yad piilal ko galesiya ngar bad ngak, ngar yibiliyed ngak Got mi yad liyef e gapgep nga daken u fithingan Somol. Re meybil ney ni yira tay u fithik’ e michan’ ngak Got e ra golnag fare m’ar; i Somol e ra chuweg e m’ar rok, ma pi denen ni ke ngongliy e ra n’ag Got fan.” (Jas. 5:14, 15) Mus ni faanra der ning fare walag e ayuw ngak e ‘piin piilal’ ma nap’an ni yad ra nang ni bay e magawon rok, mab t’uf ni ngar gurgad ngar ayuweged. Ma nap’an ni yad ra meybil fare walag u taabang ara nap’an ni yad ra yibilay fare walag, ma aram e be m’ug ni yad e piin ni yad ma gafaliy e saf rok Got nib fel’ rogon, ma yad be pi’ e athamgil nga laniyan’ walagrad ni nge ulul ko pigpig ni be tay ngak Got.​—Mu beeg e Isaiah 32:1, 2. 

17. Mang angin nra yib ni faanra i folwok e piin piilal ko “en ni Ga’ ni ma gafaliy e saf”?

¹⁷ Jesus Kristus e ir e “en ni Ga’ ni ma gafaliy e saf,” ma ma athamgil e piin piilal ni Kristiano ni ngar folwokgad rok ko pi n’en ni yad ma rin’ u lan e ulung rok Jehovah. Ma fel’ rogon e pi saf rok Got u rogon e ayuw ni yad ma pi’ ngorad ni fan ko tirok Got ban’en ma yad be pigpig ngak ni yad ba yul’yul’. Ere, bochan e pi n’ey ma gad be pining e magar nge sorok ngak Jehovah ni ir e En Th’abi Ga’ ni Ma Gafaliy e Saf.