Um Fol Ko Piin Ke Tayrad Jehovah Ni Ngaur Ayuweged E Saf Rok

1, 2. Mang nib ga’ fan ni ke taarebrogonnag Jehovah ir ngak be’ ni ma gafaliy e saf?

MA TAAREBROGONNAG Jehovah ir ngak be’ ni ma gafaliy e saf. (Ezek. 34:11-14) Ba ga’ fan e re n’ey ni bochan e be ayuwegdad ni ngad nanged rarogon Jehovah. Be’ ni ma gafaliy e saf e manang nib milfan ngak ni nge ayuweg e saf rok. Ere, ma pow’iyrad ko yungi n’en ni bay e pan riy nib galunglung nge ran (Ps. 23:1, 2); ma ma matanagiyrad ni rran nge nep’ (Luke 2:8); ma ma ayuwegrad ko gamanman ni maloboch (1 Sam. 17:34, 35); ma ma dibeyrad (Isa. 40:11); maku ma gay e tin ni ke malog u fithik’rad me ayuweg e tin ni ke maad’ad.​—Ezek. 34:16.

² Yooren e girdi’ rok Got kakrom e boch i yad e tachugol saf ma boch i yad e tamilay’. Ere, yad manang fan nrayog ni ngan taarebrogonnag Jehovah ngak be’ ni ma gafaliy e saf. Yad manang ni saf e ba mit e gamanman nib t’uf ni ngaun gafaliy ma yibe ayuweg nib fel’ rogon ya nge dabi buch ban’en rok. Ere, ku er rogon e girdi’ nib t’uf ni nge gafaliyrad Jehovah me ayuwegrad. (Mark 6:34) Ya faanra danga’, ma yad ra gafgow, maku yad ra par ndar nanged e n’en nib thil u thilin e tin nib fel’ nge tin nib kireb, mi yad malog ni bod rogon “bogi saf ndariy be’ ni be gafaliyrad.” (1 Ki. 22:17) Machane, ma pi’ Jehovah e tin nib t’uf ko girdi’ rok ya yad ba t’uf rok.

3. Mang e gad ra weliy ko re article ney?

³ Ku er rogodad ni gad manang fan ni kan taarebrogonnag Jehovah ngak be’ ni ma gafaliy e saf. Ka be pi’ Jehovah e tin nib t’uf ko pi tapigpig rok e ngiyal’ ney ni yad bod e saf. Chiney e ngad weliyed rogon ni ma pow’iy e pi saf rok e ngiyal’ ney me pi’ e tin nib t’uf rorad. Ku gad ra weliy rogon ni susun e ngaur folgad u rogon ni be pow’iyrad Jehovah ma be ayuwegrad.

KE MEL’EG FAEN NIB FEL’ ROGON NI MA GAFALIY E SAF BOCH E GIRDI’ NI NGAR MANGED TAAYUW ROK

4. Uw rogon ni ma ayuweg Jesus e pi saf rok Jehovah?

⁴ Ke dugliy Jehovah Jesus ni nge mang Lolugen e ulung ni Kristiano. (Efe. 1:22, 23) Jesus e ir ‘faanem nib fel’ rogon ni ma gafaliy e saf,’ ma bod e Chitamangin ya ma ayuweg ma ma t’ufeg e saf rok, ma kki ‘yim’ ni fan’ ngorad. (John 10:11, 15) Fare biyul ni maligach ni ke pi’ ni fan ngak urngin e girdi’ e ba tow’ath nrib manigil! (Matt. 20:28) Arrogon, ba m’agan’ Jehovah ngay ni “urngin e piin [nra] michan’rad ngak [Jesus] e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

5, 6. (a) Mini’ e ke tay Jesus ni nga i ayuweg e pi saf rok, ma mang e thingari rin’ e pi saf me yib angin e re ayuw ney ngorad? (b) Mang fan nsusun e ngaud folgad ko piin piilal u lan e ulung?

⁵ Uw rogon ni ma dag e pi saf rok Faen nib Fel’ Rogon ni Ma Gafaliy e Saf, ni aram Jesus Kristus, nib mil farad ngak? I yog Jesus ni gaar: “Saf rog e yad ma rung’ag lungug, ma gu manangrad, ma yad ma lekeg.” (John 10:27) Re n’em ni yad ma rung’ag lungun Faen nib Fel’ Rogon ni Ma Gafaliy e Saf e be yip’ fan ni yad ma fol u rogon ni ma pow’iyrad. Re n’ey e kub muun ngay ni yad ma fol ko piin ni ke mel’egrad ni ngar manged taayuw rok. Ke yog Jesus nra ulul e pi apostal rok nge pi gachalpen ko fare maruwel ni tababnag. Maku yad ra ‘gafaliy e tin ni kab bitir e saf rok’ mi yad ‘fil’ boch ban’en ngorad. (Matt. 28:20; mu beeg e John 21:15-17.) Ere, nap’an ni garer fare thin nib fel’ ma be yoor pi gachalpen Jesus, ma aram me dugliy boch e Kristiano ni kar ilalgad ko tirok Got ban’en ni ngar ayuweged e ulung.​—Efe. 4:11, 12.   

⁶ Nap’an ni be non apostal Paul ngak e piin piilal ko ulung nu Efesus ko bin som’on e chibog, me yog ngorad ni gelngin Got nib thothup e ir e ke tayrad ni ngar “ayuweged” girdien e ulung rok Got. (Acts 20:28) Ku er rogon e piin piilal ni Kristiano e ngiyal’ ney ni kun dugliyrad u daken gelngin Got nib thothup. Ere, faanra ud folgad ko piin piilal ma aram e gad be tayfan Jehovah nge Jesus, ni yow e yow Ba Ga’ ko Piin Ma Gafaliy e Saf. (Luke 10:16) Arfan ni susun e ngaud folgad ko piin piilal. Machane, ku bay boch i fan ni ngaud folgad rorad.

7. Uw rogon ni ma ayuwegem e piin piilal ni nga i par e tha’ u thilmew Jehovah nib fel’?

⁷ Nap’an nra pi’ e piin piilal e athamgil nga laniyan’ e pi walag u lan e ulung ara ngar fonownaged yad, ma yad ma fanay e thin nu Bible nge pi kenggin e motochiyel riy. Fan ni yad ma rin’ e re n’ey e gathi bochan e ngar gagiyegniged pi walagrad ko n’en ni ngar rin’ed. (2 Kor. 1:24) Ya fan ni yad ma rin’ e re n’ey e bochan ni ngar ayuweged yad ni ngar dugliyed boch ban’en nib fel’ rogon, mi yad ayuweg e ulung ni nge par nib yaram mab gapas. (1 Kor. 14:33, 40) Be yog e Bible ni ma “matanagiy” e piin piilal lanin’dad. Re n’ey e be yip’ fan ni yad baadag ni ngar ayuweged e pi walag u lan e ulung ni nga i par nib fel’ e tha’ u thilrad Jehovah. Aram fan nnap’an ni yad ra guy reb e walag ni be n’en ni nge oloboch ara ke ‘rin’ ban’en nib kireb,’ mi yad gur ngar ayuweged. (Gal. 6:1, 2; Jude 22) Ere, ku aray boch i fan nib fel’ ni ngaud ‘folgad ko thin rok e piin ni yad be yog e thin rodad.’​—Mu beeg e Hebrews 13:17.

8. Uw rogon ni ma ayuweg e piin piilal e ulung rok Got?

⁸ Apostal Paul ni ku ir reb e piilal u lan e ulung e yol ngak e pi walag nu Kolose ni gaar: “Mu guyed rogomed ya ri kolmed be’ ngam manged kalbus rok ni be’ ni be maruwel ko gonop rok e girdi’ nge sabanban ndariy rogon nga bayang, ni yib ko machib ni sum rok e girdi’ ni yibe fil ngak reb e mfen nge reb, ma ki yib ko pi kan ni yad be gagiyeg u lan e gin’en ni ba’ urngin ban’en nu lan e lang riy nib muun e fayleng ngay, ma gathi Kristus e yib rok.” (Kol. 2:8) Re thin ney e ku be tamilangnag reb i fan ni ngaud folgad ko pi fonow nu Bible ni ma pi’ e piin piilal. Yad ma ayuweg e pi walag ko piin ni yad ma guy rogon ni ngar warnaged e michan’ rorad. I weliy apostal Peter murung’agen e “pi profet ni goo bogi ban’en” nge pi “tamachib ni goo bogi ban’en” ni yad ma guy rogon ni ngar ‘waliyed e piin nib meewar e lem rorad’ ni ngar rin’ed boch ban’en nib kireb. (2 Pet. 2:1, 14) Piin piilal e ngiyal’ ney e ku thingar ra fonownaged e pi walag ko pi n’ey. Boor ban’en ni yad manang ni bochan e kar ilalgad ko tirok Got ban’en. Maku reb e, u m’on ni kan dugliyrad ni ngar manged boch e piilal, ma ke m’ug ni kari tamilang e pi machib nu Bible u wan’rad ma rayog rorad ni ngar filed ko girdi’. (1 Tim. 3:2; Titus 1:9) Bochan ni kar ilalgad ko tirok Got ban’en, mab fel’ rogon ni yad ma lemnag boch ban’en, ma bay e gonop ko thin nu Bible rorad, ma aram fan nrayog ni ngar pow’iyed e pi walag nib fel’ rogon.

FAEN NIB FEL’ ROGON NI MA AYUWEG E SAF ROK E MA DURUW’IYRAD MA MA AYUWEGRAD

9. Uw rogon ni ma pow’iy Jesus e ulung ni Kristiano e ngiyal’ ney ma be pi’ e tin nib t’uf rorad?

⁹ Ma fanay Jehovah e ulung rok ni nge skulnag me pow’iy e pi Kristiano ni kan dugliyrad nge pi walag u ga’ngin yang e fayleng. Boor e fonow nu Bible ni yima pi’ ngodad u daken e pi babyor rodad. Maku reb e, bay yu ngiyal’ ni ma pi’ e ulung rok Got e fonow ko piin piilal u daken boch e babyor ni yima pi’ nge yan ngorad ara u daken e piin ni yad ma lekag e ulung. Ireray boch e kanawo’ ni ma pow’iy Got e pi saf rok nib fel’ rogon.

10. Mang e ba milfan ko piin piilal ni ngar rin’ed u nap’an nra malog be’ ko ulung?

¹⁰ Ba milfan ko piin piilal ni ngar ayuweged e pi walag u lan e ulung, nib ga’ ni piin ni ke war e michan’ rorad ara piin ni kar rin’ed reb e denen nib ubchiya’. (Mu beeg e James 5:14,  15.) Sana bay boch i yad ni kar maloggad ma kar talgad ni dakurur uned ko muulung nge machib. Faanra aray rogon ni ke buch rok reb e walag u lan e ulung ma ra athamgil e piin piilal ni nga ranod ra guyed e re walag nem mi yad ayuweg ni nge sul ko ulung. I yog Jesus ni gaar: “Er rogon e Chitamangimed nu tharmiy nde adag bagayad e nochi bitir ney ni nge malog.”​—Matt. 18:12-14.

SUSUN NI NGE UW ROGON U WAN’DAD E OLOBOCH KO PIIN PIILAL?

11. Mang fan nrayog ni nge mo’maw’ ngak boch e walag ni ngar folgad ko piin piilal?

¹¹ Jehovah nge Jesus e rib fel’ rogon ni yow ma Gafaliy e Saf rorow. Machane, piin ni kar tew ni ngar ayuweged e girdi’ u lan e ulung e dawor ra flontgad. Re n’ey e rayog ni nge mo’maw’nag ngak boch e walag ni ngar folgad ko piin piilal. Sana yad ra gaar u wan’rad: ‘Piin piilal e dawor ra flontgad ni bod gadad. Ere mang fan ni ngan fol ko fonow ni yad ma pi’?’ Riyul’ ni dawori flont e piin piilal. Machane, dab ud sapgad ko pi n’en ni yad ma oloboch riy nge pi meewar rorad.

12, 13. (a) Mang boch e oloboch ni i rin’ boch e pumoon ni i tayrad Jehovah kakrom ni ngar pow’iyed e girdi’ rok? (b) Mang fan ni ke n’igin Jehovah ni ngan tay murung’agen e oloboch ko pi girdi’ ney nga Bible?

¹² Be weliy e Bible murung’agen e oloboch ni i rin’ boch e pumoon ni fanayrad Jehovah kakrom ni ngar pow’iyed e girdi’ rok. Nni dugliy David ni nge mang pilung me pow’iy piyu Israel. Machane, boch nga tomuren me denen ni aram e ra parew reb e ppin ni gathi mabgol rok me li’ e pumoon ko re ppin nem nge yim’. (2 Sam. 12:7-9) Kum lemnag e n’en ni buch rok apostal Peter. Yugu aram rogon ni boor e maruwel ni i rin’ u lan e ulung ni Kristiano ko bin som’on e chibog, maku boor e oloboch ni i rin’. (Matt. 16:18, 19; John 13:38; 18:27; Gal. 2:11-14) Gad manang ni ka nap’an ni denen Adam nge Efa ma dariy be’ ni ke par nib flont, ya kemus ni yigoo Jesus.

¹³ Mang fan ni ke n’igin Jehovah ni ngan tay murung’agen e oloboch ko pi girdi’ ney nga Bible? Reb i fan e, bochan ni nge m’ug riy nrayog ni nge fanay boch e pumoon ndawor ra flontgad ni ngar pow’iyed e girdi’ rok. Bin riyul’ riy e kab kakrom i yib ni ireray e n’en ni ma rin’. Ere, susun ndab da fanayed e pi meewar ko piin piilal ni nge mang tawey ngodad ya ngaud gun’gun’naged yad ara dab ud folgad rorad, ya baadag Jehovah ni ngaud ted farad ma gad be fol rorad.​—Mu beeg e Exodus 16:2, 8. 

14, 15. Mang e rayog ni ngad filed u rogon ni i yog Jehovah e n’en ni nge rin’ e girdi’ rok kakrom?

¹⁴ Rib ga’ fan ni ngaud folgad ko piin ni yad ma yog e thin rodad e ngiyal’ ney. Am lemnag rogon ni i non Jehovah ko girdi’ rok kakrom u nap’an ni ur moyed u ba ngiyal’ ni ke mo’maw’ e par riy. Nap’an ni chuw piyu Israel u Egypt ma i yog Got e n’en ni ngar rin’ed u daken Moses nge Aron. Ku bay boch ban’en ni yog ni ngar rin’ed ya nge yag nra mageygad ni yad ba fas u nap’an e bin ragag e gafgow ni pi’ nga Egypt. I yog ngorad ni ngar ted reb e abich ngemu’ mi yad li’ reb e saf ngar feked boch i rachaen ngar acheyed nga ruw raba’ i langan e mab nge nga daken langan e mab ko naun rorad. Da nog e pi thin ney ngorad u daken ba lam ni yib u tharmiy, ya thingar ra motoyilgad ko piin piilal u Israel ya yad e piin ni i yog Moses ngorad e n’en ni nga rogned ko girdi’ ni ngan rin’. (Ex. 12:1-7, 21-23, 29) Ke fanay Jehovah Moses nge pi pumoon nem ni ngar manged tamol’og rok ni nga rogned lungun ko girdi’ rok. Ere, ku er rogon e ngiyal’ ney ni ma fanay Jehovah e piin piilal ni Kristiano ni ngar rin’ed e re maruwel ney.

¹⁵ Dabisiy ni ku ra yib ngan’um yu ngiyal’ ni ki fanay Jehovah boch e girdi’ ara engel ni nga rogned boch e thin ko girdi’ rok nra ayuwegrad. Ere, ba tamilang nib m’agan’ Got ngay ni nge pi’ mat’awun boch e girdi’ ni nga rogned e thin ko girdi’ rok. Pi tamol’og ney e u ranod ko girdi’ u daken fithingan Got mi yad yog ngorad e n’en nib t’uf ni ngar rin’ed ya nge yag nra mageygad ni yad ba fas u nap’an nra yib reb e magawon nib ga’ ngorad. Ere, ku rayog ni nge rin’ Jehovah ban’en ni aray rogon ni fan ko girdi’ rok u nap’an e Armageddon. Yugu aram rogon, ma piin piilal ni ke pi’ Jehovah mat’awrad e ngiyal’ ney ni ngar rin’ed boch e maruwel ni fan ko ulung rok e thingar ra kol ayuwgad ndab ra thum’gad nga wuru’ mat’awrad ni kan pi’.

“YAD TAAB RAN’ I SAF MA TAABE’ E BE GAFALIYRAD”

16. Mang fare ‘lam’ nib t’uf ni ngad motoyilgad ngay?

¹⁶ Girdi’ rok Jehovah e “yad taab ran’ i saf” ma “taabe’ e be gafaliyrad” ni aram Jesus Kristus. (John 10:16) I yog Jesus ngak pi gachalpen nra moy rorad “nge yan i mada’ nga tomren e fayleng.” (Matt. 28:20) Chiney ni ke mang Pilung e ir e be gagiyegnag urngin ban’en nra buch u m’on ko ngiyal’ nra yib riy ni nge thang e re fayleng rok Satan ney. Ere, faanra ngad pared u fithik’ e pi saf rok Got ndabi buch ban’en rodad, mab t’uf ni ngad motoyilgad nga ‘lungun nga fiti keru’dad’ ni be yog ngodad e re kanawo’ ni ngad leked. Re ‘lam’ ney e ba muun ngay e n’en ni ma yog Got ngodad u daken gelngin nib thothup nrogon ni bay u lan e Bible, nge n’en ni ku ma yog Jehovah nge Jesus ngodad u daken e piin ni kar dugliyew ni ngar manged e piin ni ngaur gafaliyed e saf rorow.​—Mu beeg e Isaiah 30:21; Revelation 3:22.

17, 18. (a) Mang e be magawonnag e pi saf rok Got, ma mang e rayog ni nge pagan’dad ngay? (b) Mang e yira weliy ko bin migid e article?

¹⁷ Be yog e Bible ni Satan e yugu be yan ni “bod ba layon ni be tolul, ni be gayiy be’ ni nge longuy.” (1 Pet. 5:8) Yugu be yan ni be lek e pi saf rok Got ni bod rogon ba gamanman ni maloboch ni ke yim’ ko bilig ni be sonnag e ngiyal’ ni nge longuy reb e saf ni ke meewar ara ke malog. Ere, aram fan ni ngaud pared ni gad ba chugur ko ulung rok Got nge piin ni yad ma ‘gafaliy e saf maku yad e yad ma ayuweg lanin’dad.’ (1 Pet. 2:25) Be weliy e Revelation 7:17 murung’agen e piin ni yad ra magey ni yad ba fas u tomuren fare gafgow nib ga’ ni gaar: “Fare Fak e Saf [Jesus] . . . e ir e bay i gafaliyrad ni bod e en ni ma gafaliy e saf, me pow’iyrad ko fapi alublub ni bay e ran ko yafos riy; ma bay n’ag Got e lu’ u owcherad.” Riyul’ nrib manigil e n’en ni kan micheg ngodad!

¹⁸ Chiney ni kad mu’gad i weliy feni ga’ fan e maruwel ko piin piilal ni Kristiano ni yad e piin ni yad ma gafaliy e saf rok Got, e ba fel’ ni ngad fithed gadad ni nge lungudad, Uw rogon ni nga i ayuweg e piin piilal e saf rok Jesus nib fel’ rogon? Gad ra weliy e fulweg ko re deer ney ko bin migid e article.