Mu Fil Ngak e Bitir Rom Ngar Pied e Fulweg

PERLA nu Mexico e kam nang nap’an ni kab bitir, ma chitiningin e ma ayuweg nge fal’eg rogon ni nge pi’ reb e fulweg nib ngoch u nap’an e fol Wulyang Ntagil’ e Damit. Ma chiney e bay reb e pagel ni fak Perla ni lal e duw rok. Uw rogon ni ayuweg? “Som’on e gu ma fal’eg rogon e Wulyang Ntagil’ e Damit. Ngiyal’ ni gu ma rin’, e gu ma changarnag reb e paragraph ni ra nang e bitir rog fan, nrayog ni weliy ko thin rok. Ma aram mu u gu fal’egew i beeg e bin baaram ni ma yog ni ‘birog e paragraph.’ Mu gog ngak ni nge weliy nrogon ni ke nang fan. Mu ug filew rogon ni nga i yog. Gamow ma fek ban’en ni bod ga’ngin e microphone ya nge nang rogon i kol ko ngiyal’ ni nge weliy ban’en. Ri gu ma felfelan’ ya dawori yan reb e muulung nde pi’ e fulweg ara de tining pa’ nga lang. Ba ga’ ni yu ngiyal’, e ma yan ko en ni nge fil e Wulyang Ntagil’ e Damit u m’on ni nge tabab e muulung nge yog ngak e bin ni nge pi’ e fulweg.”

Jens, ni reb e piilal ni ma ayuweg reb e ulung ni ma non ni Hindi, e bay l’agruw e pagel ni fak, ni l’agruw nge aningeg e duw rorow. Nap’an ni yow ra fal’eg leengin rogorow ko muulung nge fakrow ma yad ma fanay reb e kanawo’ ni fil Jens rok e gallabthir rok. I gaar: “Kugu turguyew e gin rayog ni nge nang fagal bitir fan. Ma gamow yog ngorow e tin ba ga’ fan ko fare article, ma tomuren ma gamow fith ngorow e pi deer ni gamow be lemnag ni ngar fulwegew u nap’an e muulung. Boor yay ni gamow ma gin nga rogon ni yow ma pi’ e fulweg. Rogon ni yow ma weliy e ri be dag feni kari tamilang u wan’row. Angin, e fulweg ni yow ma pi’ e riyul’ ni be n’uf Jehovah ma rogon e michan’ rorow e be m’ug ko thin rorow.”