Mang Fan ni Ngan Poy fare Toogor rok Kristus?

“Ka nog ngomed ni bay yib e Toogor rok Kristus,” aray rogon ni kan thagthagnag ngak fare apostal kakrom. (1 John 2:18) Rib fel’ ni ngan nang e pi thin nem! Ke yoor e chibog, ni ke yan ni yig i lemnag e girdi’ fan. Mini’ fare toogor rok Kristus ara antichrist? Wuin e ra yib? Ra yib ma mang e ra rin’?

BOOR e girdi’ ni toogor rok Kristus ni kan yoloy fithingrad. Kakrom, ma pi ngochol nem ni “toogor rok Kristus” e ba muun piyu Jew ngay, nge fare Katolik papacy, nge pilung nu Roma. Bod u nap’an Emperor Fedrick II (1194-1250) ma ke dugliy ni dab ki un ko Crusade ni bochan fare galesiya, me tunguy Pope Gregory IX fithingan ni fare toogor rok Kristus min chuweg. En ni yib nga luwan Gregory, ni Innocent IV, mu kun chuweg. N’en ni rin’, e yog Federick ni Innocent e ir e toogor rok Kristus.

John ni apostal e kari mus e en i yoloy e Bible ni fanay fare bugithin ni “toogor rok Kristus.” L’agruw ko fapi babyor ni bay fithingan riy, e m’ug fare bugithin riy ni lal yay ni be m’ug riy ni taa be’ maku be m’ug ni yad boor. Pi verse ney ni be m’ug fare bugithin riy e kan yoloy nga lan e kahol ko bin migid e page. Pi verse ney, e rayog ni gad ra guy riy ni fare toogor rok Kristus e be’ ni ma lifith l’ugun ma ma bannagey, ke turguy ni nge kirebnag thilin e girdi’ nge Kristus nge Got. Fare apostal e ri be ta’ ir ngak pi walagen ni Kristiano ni gaar: “Pi tafager rog nri gimed ba t’uf rog, dabi pagan’med ngak urngin e piin ni yad be yog ni ba’ fare Kan ni Thothup rorad, ya ngam skengniged yad ngam nanged ko re kan ni ba’ rorad e yib rok Got fa danga’. Ya boor e profet ni yugu ban’en ni kar wergad nga urngin yang.”​—1 John 4:1.

Ki ginangey Jesus u murung’agen e piin ma bannagey ara profet ni googsur, ni gaar: “Ya [bay ra] bad ngomed ni yad bod e saf u wuru’ i dowrad, machane u fithik’ lanin’rad e ri yad bod e wolf ni ma k’ad. Gimed ra nangrad ko [ngongol] rorad.” (Matthew 7:15, 16) Ki ginang Jesus pi gachalpen u murung’agen e toogor rok ni be yip’ fan ban’en fa? Ngad guyed ko uw rogon ni gad ra poy ere ta cham ney ni ma ban.