Toogor rok Kristus e Kan Nang

UW ROGON ni ga ra ayuwegem ni faanra kam nang ni be garer nib pay ba mit e m’ar ko gin ni ga ma par riy? Sana ga ra guy rogon nge par nib fel’ fithik’ i dowam mag par u orel ko piin nra afweg e miti m’ar ney ngom. Thingar kuda rin’ed ni aray rogon ko tirok Got ban’en. Be yog e Thin nu Bible ngodad ni fapi toogor rok Kristus ara antichrist e “ke taw ngaray nga fayleng.” (1 John 4:3) Faanra gad baadag ni ngad milgad ko “m’ar” ma thingari pow rodad e “piin ni bay rorad” ma gad par u orel rorad. Ri gad be pining e magar, ya boor e tamilang ni be pi’ e Bible u murung’agen e re n’ey.

Ere fare thin e be yip’ fan e piin ni yad be togopuluw ngak Kristus ara piin ni be yog ni yad Kristus ara owchen Kristus ni yad be ban. Mus ngak Jesus me yog ni gaar: “En ni gathi gamow nga bang e ri be togopluw ngog [ara toogor rok Kristus]; ma en nder un ngog i kun kunuy e aram e ri be wereg.”​—Luke 11:23.

Arrogon, i yoloy John murung’agen e pi toogor rok Kristus ni ke pag 60 e duw nga tomuren ni ke yim’ Jesus me fas ko yam’ nge yan nga tharmiy. Ere, yira nang fan e maruwel ko pi toogor rok Kristus u rogon ni yad ma magawonnag e piin ni gachalpen Jesus u fayleng.​—Matthew 25:40, 45.

Toogor rok Kristus e Toogor ko Kristiano

I ginang Jesus pi gachalpen ni fayleng ni polo’ e ra fanenikayrad. I gaar: “Bayi kolmed e girdi’ ngar pied gimed ngan gechignagmed, ma bay nthang e fan romed. Ma urngin e girdi’ ni bay ra fanenikayed gimed ni bochag. Ma aram e boor bogi profet ni yigoo bogi ban’en ni bay ra m’uggad ngar banniged boor e girdi’.”​—Matthew 24:9, 11.

Bochan ni yibe gafgownag pi gachalpen Jesus ‘ni bochan [Jesus],’ ma piin ni yad be gafgownagrad e rib tamilang ni yad e pi toogor rok Kristus. Pi “profet ni yugu ban’en,” ni boch ko piin ni ur moyed ni yad e Kristiano, e ku yad ba muun ko pi girdi’ ney. (2 John 7) I yoloy John ni “boor e pi toogor rok Kristus e dar moyed ko ba’ rodad e girdi’, aram fan ni kar paged gadad; ya faan mang e yad girdien e ba’ rodad e girdi’ ma kar pired rodad.”​—1 John 2:18, 19.

Fapi thin ni yog Jesus nge John e ri be dag nib tamilang ni fare toogor rok Kristus e gathi taa be’ ya boor e girdi’. Tin ni kub muun ngay e, bochan ni yad e profet ni bogi ban’en, ma n’en th’abi ga’ ni yad be nameg e aram e sasalap ko yurba’ i teliw. Mang boch e kanawo’ ni yad ma fanay?

Ban ko Teliw ni Yibe Garareg

I ginang Paul Timothy ni nge kol ayuw ko machib ko pi apostate, ni bod Himeneus nge Filetus “ya n’en ni yad be fil ngak e girdi’ e ra yan i bod rogon ba malad ni be longuy e ufin u dowey.” Miki ul’ul Paul ngay nge gaar: “Kar pagew kanawoen e tin nib riyul’ e thin yow be kirebnag rogon nib mich Kristus u wan’ boch e girdi’ ni bochan e yow be yog ni ka ni mu’ i faseg e yam’.” (2 Timothy 2:16-18) Ke m’ug ni, i machibnag Himeneus nge Filetus fare fas ko yam’ e be yip’ fan ban’en ni aram e piin Kristiano e kan mu’ i fasegrad ko yam’ nib fanathin. Riyul’, nrogon ni ma sap Got ngay e ra thap be’ ko yafas u nap’an ni ke mang reb i gachalpen Jesus, ni bod rogon ni yog Paul. (Efesus 2:1-5) Machane, fare machib ku Himeneus nge Filetus e dariy riy fare n’en ni ke micheg Jesus nra faseg e girdi’ ko yam’ u nap’an ni be gagiyeg u tan Gil’ilungun Got.​—John 5:28, 29.

Machib u murung’agen e fas ko yam’ ni be yip’ fan ban’en e boch nga tomren me machibnag yugu reb e teliw nib mich u wan’rad nrayog ni nge yib e tamilangan’ u reb e kanawo’ nib mo’maw’ ni ngan nang fan. Ni bod ni, ba mich u wan’rad ni gubin ban’en nu fayleng ma ba kireb, ma arfan ni Jesus e de yib nib girdi’ ya kemus ni yib u reb e dowef ni bod yaan dow e girdi’. Rogon ni kad guyed, e ri ireray e n’en ni ginangey apostal John riy.​—1 John 4:2, 3; 2 John 7.

Ku reb e ban, ni sum u boch e chibog nga tomuren, e machib ni yima yog e Trinitas ni thothup ngay, ni be yog ni Jesus e ku ir Got ni Gubin ma Rayog Rok maku ir Fak Got. U lan e babyor rok Dr. Alvan Lamson ni The Church of the First Three Centuries (Galesiya ko Dalip ni M’on e Chibog) e be weliy ni fare machib ko Trinitas “e sum u boch e machib nde taareb rogon ko machib rok Got ni i fanay piyu Jew nge Kristiano; ya garer, min uneg ko machib ko Kristiano, u daken e piin nib ga’ lungurad ko miti ney e machib rok Plato.” Mini’ e pi cha’ ney nib “Piin nib ga’ lungurad ko machib rok Plato”? Yad e bogi tamachib ni de riyul’ ni kar adaged e pi machib ko fa cha’ ni llowan’ nu Greece ni Plato.

Fare machib ko Trinitas e ir e ke k’aring ni nge sum e toogor rok Kristus, ya re machib ney e ke k’aring ni dabin nang murung’agen Got nib fel’ rogon me par e tha’ u thilrow Fak ndab nang fan. (John 14:28; 15:10; Kolose 1:15) Aygum lemnag, uw rogon ni nge ‘chugur be’ ku Got’ nrogon ni be yog e Bible, ni faanra dan nang murung’agen Got?​—James 4:8.

N’en ni ku be gelnag e maathuk laniyan’ ko pi n’ey e boor e piin ni yad ma piliyeg e Bible ni kar chuweged fithingan Got, ni aram Jehovah, u lan e tin kar pilyeged, ni yugu aram rogon ni 7,000 yay ni bay u lan e ken ni som’on e Bible! Ba tamilang, nra ngan gay rogon ni ngan thang murung’agen e En ni Gubin ma Rayog Rok me par ni ku dan nang fithingan e ba gel e dariy fan nra yib riy ngak Fa En ni Ta Sunumiy nge Thin rok ni kan thagthagnag. (Revelation 22:18, 19) Tin ni kub muun ngay e faanra ngan tay boch e liw ni bod rogon e Somol nge Got nga lon fare ngochol ma be dag ni kan darifannag fare meybil rok Jesus, ni faan bay bang riy ni be gaar: “Ngan tay fan fithingam nib thothup [ara, ngan thothupnag].”​—Matthew 6:9, The New English Bible.

Toogor rok Kristus e Ma N’ag Fan Gil’ilungun Got

Toogor rok Kristus e kar ra pasiggad ko “tin tomren e rran” ni ir e gad be par riy e ngiyal’ ney. (2 Timothy 3:1) Reb e kanawo’ ni ma fanay e pi cha’ ney ni yad ma bannag e girdi’ e yad ma chefeg e girdi’ nga orel u murung’agen e maruwel ku Jesus ni ir e Pilung ko fare Gil’ilungun Got, ni aram ba am ni bay u tharmiy ni ir e ra yon’ lon urngin e am ko re fayleng ney ni ga’ngin.​—Daniel 7:13, 14; Revelation 11:15.

Bod ni, boch e tayugang’ ko yurba’ i teliw e yad ma machibnag ni Gil’ilungun Got e ban’en ni bay u gum’irchaen e girdi’, ma ban’en ndariy u lan e Bible. (Daniel 2:44) Boch e girdi’ e ma yog ni ma maruwel Jesus u daken e pi am nge ulung ko girdi’. Machane, yog Jesus ni gaar: “Gin nsuwog e dariy u roy u fayleng.” (John 18:36) Arrogon, i Satan, gathi Kristus, e ir e be “gagiyegnag e girdi’ nu roy u fayleng” ma ir “fare kan nib kireb nu roy u fayleng.” (John 14:30; 2 Korinth 4:4) Re n’ey e be dag ni dab ki n’uw nap’an ma ra chuweg Jesus urngin e am ko girdi’ me par ni ir e ra Gagiyegnag e fayleng. (Psalm 2:2, 6-9; Revelation 19:11-21) Girdi’ e be yibilay e re n’ey ni nge buch u nap’an ni yad ma yog fare Meybil ku Somol, ni be gaar: “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’.”​—Matthew 6:10, King James Version.

Bochan ni yad ma pi’ boch e ayuw ko pi maruwel ko am u roy u fayleng, ma boor e tayugang’ ko teliw, e yad ma togopuluw, maku yad ma gafgownag e piin ni yad ma weliy e thin nriyul’ u murung’agen Gil’ilungun Got. Fare babyor ko Bible ni Revelation e be weliy murung’agen be’ nib ppin ni ma chuway’ ngak​—“Babylon nib Gilbuguwan”—​ni ke “chingnag nga rachaen pi girdien Got, nge rachaen e piin nli’rad ngar m’ad ni bochan e ur pired ni yad ba yul’yul’ ngak Jesus.” (Revelation 17:4-6) Ku be fol chuway’ ngak ni be yip’ fan ban’en ni aram e be pi’ e ayuw ngak e pi “pilung” nu fayleng, ara piin ni yad ma gagiyegnag e pi am nu fayleng, nge yib e fel’ riy ngak. Re ppin ney e be yip’ fan ban’en ni aram e yurba’ i teliw ni googsur u fayleng. Ir bang nib ga’ ko fare ulung i toogor rok Kristus.​—Revelation 18:2, 3; James 4:4.

Yibe ‘Yim’ ni Bochan’ fare Toogor rok Kristus

Boor e piin ni yima yog e Kristiano ngorad e kar digeyed e bin nib puluw e ngongol ni bay u lan e Bible ni fan e ngar uned ko bin ni ke garer i ngongolen e girdi’. I weliy e Thin Rok Got u m’on murung’agen e re n’ey ni gaar: “Ya ba’ ba ngiyal’ ni bayi taw ngay me dabuy e girdi’ [girdi’ ni ma dake yad be pigpig ku Got] ni ngar motoyilgad ko bin nib riyul’ e machib, mi yad fol ko tin ni yad ba adag, ma bay u ranod nguur gayed i yan e piin ni nge machibnagrad ni yad e bay ra machibniged ngorad e tin ni ir e yad be yim’ ni bochan ni ngar rung’aged.” (2 Timothy 4:3) Pi cha’ ney ni yad be yog ni yad boch e tamachib machane yad be machibnag e thin ni googsur e kan weliy murung’agrad ni yad e “apostal ni goo bogi ban’en, ni yad be lifith l’ungunrad u murung’agen e maruwel ni yad be tay ma kar pilyeged yad kar boded yaan e tin riyul’ e apostal rok Kristus.” I ul’ul e Bible ngay nge gaar: “Tomur riy e ri bay ni pi’ wenegan ngorad nri bod rogon e pi n’en ni yad be rin’.”​—2 Korinth 11:13-15.

Maruwel rorad e muun ngay e “ngongol nib kireb,” ni ban’en ni dariy fan u wan’rad. (2 Peter 2:1-3, 12-14) Gathi gad be guy ni be yoor e pi tayugang’ ko teliw nge piin ni yad ma folwok rorad ni yad be un​—ara ke fel’ u wan’rad—​boch e ngongol ni gathi ngongolen e Kristiano, ni bod rogon e par ko pumoon nge pumoon ara ppin nge ppin nge ngongol ndarngal u wuru’ e mabgol? Wenig ngom yugu mu fek bochi tayim ngam taareb rogonnag e pi ngongol ney ko n’en ni be yog e Bible u Levitikus 18:22; Roma 1:26, 27; 1 Korinth 6:9, 10; Hebrews 13:4; nge Jude 7.

“Mu Skengniged Yad”

Rogon e n’en ni ka fin da weliyed, e thingar da folgad ko thin rok John ni apostal ni dab da sapgad ko n’en ni ke michan’dad ngay ni gowa dariy fan. I ginangey ni gaar: “Dabi pagan’med ngak urngin e piin ni yad be yog ni ba’ fare Kan ni Thothup rorad, ya ngam skengniged yad ngam nanged ko re kan ni ba’ rorad e yib rok Got fa danga’. Ya boor e profet ni yugu ban’en ni kar wergad nga urngin yang.”​—1 John 4:1.

Am lemnag e pi n’en nib fel’ ni ke rin’ boch e piin “nde manan’rad” ni ma par u lan fare binaw nu Beroea u lan e bin nsom’on e chibog. Kar ‘motoyilgad ko thin rok Got ni kar uthumed telrad ngay, ma gubin e rran ni ur gayed u lan e babyor nib thothup ni ngar guyed ko riyul’ e tin ni ke [yog Paul nge Silas] fa.’ (Acts 17:10, 11) Arrogon, yugu aram rogon nri yad baadag ni ngar filed, ma pi girdi’ nu Beroea ney ra guyed rogon ni nge mich ni pi n’en ni kar rung’aged e yib u lan e Bible.

Ku arrogon e ngiyal’ ney, piin Kristiano e darur folgad ko tin ni ma lemnag e girdi’ ni yoor nib puluw machane yad ma tor nga daken e thin nriyul’ ni bay u Bible. I yoloy apostal Paul ni gaar: “Baaray e meybil rog ngak Got ni fan ngomed: gu be yibil ngak Got ni ngi i gel feni t’uf Got nge girdi’ romed i yan, mi gimed nang e bin riyul’ i fan e thin rok Got nge yog ni ngam nanged e tin nib mat’aw ko tin nde mat’aw.”​—Filippi 1:9.

Faanra kam rin’ ni aray rogon, ma ga nameg ni ngam nang e ‘thin rok Got nge yog ni ngam nang e tin nib mat’aw ko tin nde mat’aw’ ni aram e ngam nang e n’en nri be fil e Bible. Piin ni yad ma folwok rok piyu Beroea e dawori sor laniyan’rad ko ‘machib ni sum ko girdi’’ ni be machibnag e pi toogor rok Kristus. (2 Peter 2:3) Machane, gathi ka yad e sib ni bochan fare thin nriyul’ u murung’agen e bin nriyul’ e Kristus nge piin riyul’ ni yad ma folwok rok.​—John 8:32, 36.

[Box/​Picture on page 4]

MANG E BE YOG E BIBLE U MURUNG’AGEN E TOOGOR ROK KRISTUS

“Pi fakag, ke chugur nga tungun! [tomuren e ngiyal’ ko fapi apostal], ka nog ngomed ni bay yib e toogor rok Kristus; me ere chiney e boor e toogor rok Kristus ni ke yib i m’ug.”​—1 John 2:18.

“Ere mini’ e en ni be lifith l’ugun? En ni ir e be yog ni Jesus e gathi ir faanem i Kristus. Ereram e cha’ ni ir e Toogor rok Kristus yi ir e dabun e en ni Chitamangiy nge en ni Fak.”​—1 John 2:22.

“Ma en nra weliy nde riyul’ e re bugithin ney ni murung’agen Jesus, e dariy rok fare Kan ni Thothup ni yib rok Got. Ya re kan ni baaram ni ba’ rok e ke yib rok e Toogor rok Kristus; kam rung’aged ni bay yib, me ere chiney e ke taw ngaray nga fayleng.”​—1 John 4:3.

“Boor e piin ni yad be bannag e girdi’ ni kar wergad u fayleng, ni girdi’ ndarir weliyed ni Jesus Kristus e yib i ngal’ ni be’ nrayog ni nge yim’. Ra aram rogon be’ ma ir be’ ni be bannag e girdi’, ma aram e ir e Toogor rok Kristus.”​—2 John 7.

[Box/​Pictures on page 5]

CHA’ NI MA SASALIYEBNIGEY NI BOOR YAAN

Fare bugithin ni “toogor rok Kristus” ara antichrist e fan ngak urngin e girdi’ ni yad ma togopluw ko thin ni be yog e Bible ni murung’agen Jesus Kristus, nge ngak urngin e girdi’ ni ma togopluw ko Gil’ilungun, nge girdi’ ni ma gafgownag pi gachalpen Jesus. Maku ba muun ngay e girdi’, nge ulung, nge fapi nam ni ma yog ni yad Kristus ara piin ni ma micheg ni ngar rin’ed ban’en ni ke mus ni Kristus e bay rogon ni nge rin’​—ni aram e nge gagiyegnag ni nge aw e gapas nge pagan’ u fayleng.

[Credit Line]

Augustine: ©SuperStock/​age fotostock

[Picture on page 7]

Thingar da ‘fal’eged i yaliy e Thin nu Bible ni gubin e rran’ ni bod rogon piyu Beroea