Ma Pi’ Jehovah e “Kan ni Thothup Ngak e Piin ni Yad Ra Ning Ngak”
“Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare Kan ni Thothup ngak e piin ni yad ra ning ngak!”—LUKE 11:13.
1. Mingiyal’ e rib t’uf rodad e ayuw ko kan ni thothup?
‘RI DABIYOG rog ni nggu rin’ e re n’ey u gelngig. Ke mus ni bochan e ayuw rok e kan ni thothup e rayog rog riy ni nggu athamgiliy e re magawon ney.’ Kam mog e thin ni aram rogon fa? Ya boor e Kristiano ni aram rogon e thin rorad. Sana kam mog e re thin ney ni bochan e ka nog ngom ni ke yib e m’ar ngom ni rib ubchiya’. Ara sana nap’an ni kem’ e en ni mabgol rom. Ara sana nap’an ni ke tomal lanin’um ma yi ga be par ni ba kireban’um. Nap’an nra yib e gafgow ngom ma sana ga ra lemnag ni ga be par ni gab fas ni bochan e ke pi’ e kan ni thothup rok Jehovah ngom ba gelngiy ni ir e ba “th’abi gel ni yib rok Got ma gathi gadad e yib rodad.”—2 Korinth 4:7-9; Psalm 40:1, 2.
2. (a) Mang boch e magawon rok e tin riyul’ e Kristiano? (b) Mang boch e deer ni gad ra fil e fulweg riy u lan e re thin ney?
2 Ngiyal’ ney e ma yib e towasar nge togopluw rok e re fayleng nib kireb ney ngak e tin riyul’ e Kristiano. (1 John 5:19) Maku ma cham Satan ni Moonyan’ ngak pi gachalpen Jesus, ya be mahl Moonyan’ ngak e “piin ni yad be fol ko pi motochiyel rok Got ma yad ba yul’yul’ ko fare thin nib riyul’ ni yib i yog Jesus ngan nang.” (Revelation 12:12, 17) Aram fan ni rib t’uf rodad e ayuw ko kan ni thothup e ngiyal’ ney. Mang e rayog ni ngada rin’ed me mich ni ra yog e kan ni thothup rok Got ngodad? Ma mang fan nrayog ni nge mich u wan’dad nib m’agan’ Jehovah ngay ni nge pi’ gelngidad ko ngiyal’ nra yib e skeng ngodad? Fulweg ko gali deer ney e bay u l’agruw e fanathin rok Jesus.
Nguuda Meybilgad ni Gubin Ngiyal’
3, 4. Mang fanathin e weliy Jesus, ma uw rogon ni be yip’ fan e meybil?
3 Bay bayay ni yog reb i gachalpen Jesus ngak ni gaar: “Somol, mu fil rogon e meybil ngomad.” (Luke 11:1) Fulweg ni tay Jesus, e weliy l’agruw e fanathin ngak pi gachalpen. Bin som’on e fanathin e murung’agen ba pumoon ni ke yib e milekag nga tafen, ma bin l’agruw e fanathin e murung’agen ba matam ni i pi’ e n’en ni ke ning fak. Ngada weliyed e gali fanathin ney.
4 Me gaar Jesus ngak pi gachalpen: “Susun e ara’ rogon me yan bigimed nga tafen be’ ni fager rok ni lukngun e nep’ me gaar ngak, ‘Yugu mpi’ dalip yal’ i flowa ngog, ya bay kug fulweg dalip yal’ ngom. Be’ ni gamow fager e ke yib ni be milekag ma ke tal nggog nga tabinaw ma dariy ban’en ni gu ra pi’ nge kay’! Ma susun e aram rogon me fulweg fare fager rom lungum u naun ni gaar, ‘Dab kum magawonnigeg! Ya kug mu’ i man’nag e mab rog, ni kug molod pi fakag ndabkiyog ni gu suwon nggub gu pi’ ban’en ngom.’ Ere uw rogon? Nggog ngomed ni faanra dabi suwon nge pi’ e flowa ngom ni gimew fager, machane ra suwon nge pi’ urngin ban’en ngom ni kam ning ya da mu tamra’ ni mpar nguum wenig ngak.” Ma aram me weliy Jesus fan fare fanathin u rogon ni ngan meybil ni gaar: “Ere be lungug ngomed: Mu ninged, me yog ngomed; mu gayed, mi gimed pirieg; mu tugtuguyed e mab, min bing e mab ngomed. Ya gubin e girdi’ ni yad ra ning ban’en e ra yog ngorad, ma en nra gayiy ban’en e ra pirieg, ma mab e yira bing ngak e en nra tugtuguy.”—Luke 11:5-10.
5. Fare fanathin ni murung’agen fare moon ni yugu be wenig, e mang e be fil ngodad u rogon lanin’dad u nap’an ni gad ra meybil?
5 Re fanathin ney e murung’agen ba pumoon ni yugu be wenig, ma be tamilangnag rogon lanin’dad u nap’an ni gad ma meybil. Mu tay fanam i yan riy ni i yog Jesus ni ke yog ngak fare moon e n’en ni ke ning ni bochan e ‘de tamra’ ni nge par ngii wenig.’ (Luke 11:8) Re bugithin nem ni “yugu be wenig” e ke mus ni taa bayay ni m’ug u lan e Bible. Nni pilyeg u bugithin nu Greek ni ri fan e “dariy e tamra’.” De fel’ ni faanra dariy e tamra’ rok be’. Machane faanra de tamra’ be’ ara yugu be wenig ni bochan ban’en nib fel’, ma rayog ni nge aw ni ban’en nib fel’. Dariy e tamra’ rok ni nge wenignag ban’en nib t’uf rok. Be yog Jesus ni ngada boded fare moon ni dariy e tamra’ rok, ere nguuda weniggad u nap’an ni gad ra meybil. Ba adag Jehovah ni ‘nguuda ninged, ma nguuda gayed, ma nguuda tugtuguyed e mab.’ Ma aram e ra fulweg taban e meybil rodad me “pi’ e Kan ni Thothup ngak e piin ni yad ra ning ngak.”
6. Uw rogon e piin ni milekag u wan’ e girdi’ u nap’an Jesus?
6 I tamilangnag Jesus rogon ni nguuda meybilgad—ni yugu gad be wenig—machane ki tamilangnag fan ni dab da tamra’gad ni nguuda weniggad. Ra tamilang ni faan gad ra lemnag rogon fa piin ni ur motoyilgad ko fanathin rok Jesus u murung’agen fare moon ni yugu be wenig u rogon ni yad be sap ko yalen ni ngan ayuweg e milekag. Boor e thin u lan e Bible ni be tamilangnag ni ri ba ga’ fan u wan’ e pi tapigpig rok Got ni ngar ayuweged e milekag ni kar bad nga taferad. (Genesis 18:2-5; Hebrews 13:2) Ra dabi ayuweg be’ e milekag ni ke yib nga tafen ma rib gel e tamra’ riy. (Luke 7:36-38, 44-46) Ka bay e re n’en u wan’dad ma gad sul bayay ngada guyed e n’en ni yog Jesus.
7. Mang fan ni de tamra’ fare moon ni bay ko fanathin rok Jesus ni nge pug e fager rok?
7 Fa cha’ ko re fanathin nem e yib be’ nga tafen ni lukngun e nep’. Mmil fan ngak fare moon ni nge pi’ ban’en ni nge kay fare milekag ni ke yib nga tafen, machane “dariy ban’en ni nge pi’ nge kay.” U wan’ fare moon e thingari pi’ e ggan nge kay fare milekag ni ke yib nga tafen! Thingari gay e flowa, ni yugu de mutrug rogon. Ere ke yan nga tafen e fager rok ma dariy e tamra’ rok ni nge pug. Me pong fare moon ni gaar: “Yugu mpi’ dalip yal’ i flowa ngog.” Me par ni yugu be wenig nge mada’ ko ngiyal’ ni ke yog fare flowa ngak nib t’uf rok. Ma nap’an ni ke yog e flowa ngak ma rayog rok ni nge ayuweg fare milekag ni ke yib nga tafen.
Ra T’uf Boor Ban’en—Ma Boor Ban’en ni Ngan Ning
8. Mang e ra k’aringdad ni nguuda yibilayed e kan ni thothup?
8 Re fanathin nem e ma tamilangnag fan ni nguuda weniggad u nap’an e meybil. Yugu be wenig fare moon ni nge yog e flowa ngak ya thingari yog ngak ni fan e nge rin’ e n’en ni ke mil fan ngak u nap’an ni yib e milekag nga tafen. (Isaiah 58:5-7) Faanra dariy e flowa rok ma dabiyog ni nge rin’ e n’en nib mil fan ngak ni nge rin’ ni aram e nge ayuweg e milekag. Ku arrogodad, ni gad manang ni thingari yog e kan ni thothup rok Got ngodad ni fan e ngada machibgad, ni ir e maruwel rok e tin riyul’ e Kristiano. Ere yugu gad ma meybil ngak Got ni gad be ning e kan ni thothup. (Zekariah 4:6) Faan manga dariy e kan ni thothup rodad, ma dabiyog ni ngada rin’ed e maruwel rodad. (Matthew 26:41) Ke tamilang u wan’um e re fanathin nem? Ra uda wenigniged fare kan ni thothup ni faanra tamilang u wan’dad ni thingari yog e kan ni thothup ngodad.
9, 10. (a) Mu weliy rogon ko mang fan ni rib t’uf ni ngauda ninged ngak Got ni nge pi’ e kan ni thothup ngodad. (b) Mang deer e ngada fithed gadad riy, ma mang fan?
9 Ngada weliyed e re fanathin nem nrogon e par rodad e ngiyal’ ney, mu lemnag e n’en ni ngam rin’ ni faanra m’ar be’ u tabinaw rom ni ke lukngun e nep’. Gur, ga ra pug reb e togta ya nge ayuwegem, fa? Sana dab mu pug ni faanra gathi rib gel e m’ar rok. Machane faanra be tal e gum’ircha’ rok, ma dabi siy ni dab mu tamra’ ni ngam pug e togta. Mang fan? Ya rib t’uf e ayuw nib papey. Ma ga manang nrib t’uf e ayuw rok be’ ni manang fan e m’ar. Ra dab mu ning e ayuw ma ra yim’ faanem. Ku arrogon e pi Kristiano ni gowa yad bay u thatharen e riya’. Ya bay Satan ni bod “ba layon ni be tolul” ni be guy rogon ni nge longuydad. (1 Peter 5:8) Rib t’uf rodad e kan ni thothup rok Got ni ngad pared nib gel e michan’ rodad. Ra dab da ninged e ayuw rok Got ma rayog ni ngada m’ad. Ere dab uda tamra’gad ni nguuda weniggad ngak Got ni nge pi’ e kan ni thothup rok ngodad. (Efesus 3:14-16) Ke mus e kanawo’ ni ra yib gelngidad riy ni nguuda ‘athamgilgad nge mada’ ko tomur.’—Matthew 10:22; 24:13.
10 Ere ri ba ga’ fan ni nguuda fithed gadad ko, ‘Ri uw rogon ni gu ma tiyan’ug ko meybil?’ Dab mu pag talin ni nap’an ni ra tamilang u wun’dad nib t’uf e ayuw rok Got rodad, ma aram e ngiyal’ ni rib t’uf ni ngad yibilayed e kan ni thothup rok Got ni nge yog ngodad.
Mang e Ma K’aringdad ni Ngada Meybilgad u Fithik’ e Pagan’?
11. Uw rogon ni fanay Jesus fare fanathin u murung’agen e matam nge fak ni fan ko meybil?
11 Fare fanathin rok Jesus u murung’agen fare moon ni yugu be wenig e ma gagiyelnag rogon laniyan’ e en ni be meybil—ni ir be’ nib michan’. Bin migid e fanathin e ma tamilangnag rogon laniyan’ e en ni be motoyil ko meybil—ni ir Jehovah Got. I fith Jesus ni gaar: “Rayog ni nge pi’ bigimed e pi matam ba porchoyog ngak fak ni faanra ning fak e nig ngak? Ara pi’ e skorpion ngak ni faanra ning ba pifak e nimen ngak?” Ma aram me tamilangnag Jesus fan e fanathin rok ni gaar: “Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ fare Kan ni Thothup ngak e piin ni yad ra ning ngak!”—Luke 11:11-13.
12. Uw rogon fare fanathin u murung’agen ba matam ni motoyil ko n’en ni be ning fak e be dag rogon feni m’agan’ Jehovah ngay ni nge fulweg taban e meybil rodad?
12 Re n’ey ni murung’agen ba matam ni be pi’ e n’en ni be ning fak e be dag Jesus riy rogon e lem rok Jehovah u murung’agen e piin ni yad ma meybil ngak. (Luke 10:22) Som’on, e ngam guy e n’en nib thil riy. De taareb rogon ko fare pumoon ni bay ko bin som’on e fanathin ni dabun ni nge pi’ e ayuw ni yibe ning, ma Jehovah e ba thil ya bod ba matam ni rib m’agan’ ngay ni nge pi’ e n’en ni be ning fak. (Psalm 50:15) Ki tamilangnag Jesus rogon nib m’agan’ Jehovah ngay ni nge pi’ e pi n’en ni gad ra ning. Be yog ni faanra rin’ be’ nib sobut’ ban’en ma ka ba ga’ e n’en ni ra rin’ be’ nib tolang. Ya be yog Jesus ni faanra ba matam nib girdi’ nib “kireb” ya ba tadenen, e ma pi’ e tow’ath nib fel’ ngak fak me ere Chitamangidad nu tharmiy ni ka ba ga’ e runguy rok e ku ra pi’ e kan ni thothup ngak girdien e tabinaw rok ni yad ma liyor ngak!—James 1:17.
13. Mang e rayog ni nge pagan’dad ngay u nap’an ni gad ra meybil ngak Jehovah?
13 Mang e gad ra fil ko re fanathin nem? Rayog ni nge pagan’dad ngay ni faan gad ra ning e kan ni thothup rok e Chitamangidad nu tharmiy, ma ra fulweg taban e meybil rodad. (1 John 5:14) Ma faan gad ra meybil ngak ni boor yay ma dabi gaar Jehovah: “Dab kum magawonnigeg! Ya kug mu’ i man’nag e mab rog.” (Luke 11:7) Danga’, ya be gaar Jesus: “Mu ninged, me yog ngomed; mu gayed, mi gimed pirieg; mu tugtuguyed e mab, min bing e mab ngomed. Ya gubin e girdi’ ni yad ra ning ban’en e ra yog ngorad, ma en nra gayiy ban’en e ra pirieg, ma mab e yira bing ngak e en nra tugtuguy.” (Luke 11:9, 10) Arrogon, ra fulweg Jehovah e “meybil rodad ko rorran ni gad ra pining.”—Psalm 20:9; 145:18, NW.
14. (a) Mang lem ni de puluw e ma magawonnag e piin ni keb e skeng ngorad? (b) Nap’an nra yib e skeng, ma mang fan ni thingar da meybilgad ngak Jehovah u fithik’ e pagan’?
14 Fare fanathin rok Jesus u murung’agen fare matam e ku ma tamilangnag ni ka ba ga’ e runguy rok Jehovah ko runguy rok e gallabthir ni girdi’. Ere dab da lemnaged ni ke puwan’ Jehovah ngodad u nap’an ni ke yib e magawon ngodad. Ya aram e n’en ni ba adag Satan ni ngada lemnaged, ya ir e toogor rodad ni th’abi kireb. (Job 4:1, 7, 8; John 8:44) Dariy ban’en u lan e Bible ni be yog ni ra pi’ Jehovah e magawon ngodad. Ya Jehovah e ‘dabi waliydad ngad denengad.’ (James 1:13) Dabi pi’ e porchoyog ara skorpion ngodad, ni be yip’ fan ni dabi pi’ e magawon ngodad. Chitamangidad nu tharmiy e ra pi’ e “tin nib fel’ ban’en ngak e piin ni yad ra ning ngak.” (Matthew 7:11; Luke 11:13) Faanra ri ba tamilang u wan’dad ni ba ga’ e runguy rok Jehovah ma rib m’agan’ ngay ni nge ayuwegdad ma re tamilangan’ nem e ra k’aring ni ngada meybilgad nib michan’dad. Ma faan gad ra meybil nib mich u wun’dad ni ba adag Got ni nge ayuwegdad ma thin rodad e ra bod e thin rok e en ni yoloy e psalm ni gaar: “Rriyul’ ni ke rung’ag Got; ke motoyil ko meybil rog.”—Psalms 10:17; 66:19, NW.
Rogon ni Kan ni Thothup e Taayuw Rodad
15. (a) Mang e micheg Jesus u murung’agen e kan ni thothup? (b) Mang reb e kanawo’ ni ma ayuwegdad e kan ni thothup riy?
15 U m’on ni yim’ Jesus ma i sul u daken e thin ni ke micheg u lan e pi fanathin rok. I weliy murung’agen e kan ni thothup u nap’an ni yog ngak e pi apostal rok ni gaar: “Bay gu wenig ngak e en ni Chitamangiy, nge pi’ reb e Taayuw ngomed, ni aram fare Kan ni Thothup ni ma dag e tin riyul’, me par romed ndariy n’umngin nap’an.” (John 14:16) Ere i micheg Jesus ni fare kan ni thothup ni ir fare Taayuw e ra ayuweg pi gachalpen ni gad ba muun ngay e ngiyal’ ney. Mang reb e kanawo’ ni ma yib e ayuw riy ngodad e ngiyal’ ney? Ma ayuwegdad e kan ni thothup ni ngada k’adedan’dad u fithik’ e skeng. Uw rogon? I yib boch e skeng ngak apostal Paul me weliy ngak e pi Kristiano nu Korinth rogon ni yib e ayuw rok e kan ni thothup ngak. Ngada weliyed e thin ni yoloy ngak piyu Korinth.
16. Uw rogon ni taareb rogodad Paul?
16 Som’on me tamilangnag Paul ngak e pi Kristiano nu Korinth ni ke yib e “liliy ngak nib gel e amith riy” ni gowa ba rachangal ni ke kan ngak. Ma aram me yog ni gaar: “Nga dalip yay ni kug meybil ngak Somol [Jehovah] u murung’agen e re n’ey ni gu be wenig ngak ni nge chuweg rog.” (2 Korinth 12:7, 8) Yugu aram rogon ni i wenig Paul ngak Got ni nge chuw e re magawon nem rok, ma ki par rok. Sana bay reb e magawon rom ni taareb rogon ko magawon rok Paul. Ma sana ku um meybil nib pagan’um ngak Jehovah ni nge chuweg e re magawon nem rom. Yugu aram rogon ni umu meybil ni boor yay ma ka bay e re magawon nem rom. Be yip’ fan ni der ma fulweg Jehovah taban e pi meybil rom, ma dabi ayuwegem e kan ni thothup, fa? Ri danga’! (Psalm 10:1, 17) Mu tay fanam i yan ko n’en ni yog Paul.
17. Uw rogon ni fulweg Jehovah taban e meybil rok Paul?
17 I fulweg Got e meybil rok Paul ni gaar: “Ayuw rog ngom e ke mus e taare n’en ni ir e thingari yog ngom; ya gelngig e rib gel ko ngiyal’ ni gab meewar.” Me gaar Paul: “Ere kari gu felfelan’ ni nggu uf ko meewar rog, ni fan e nggu thamiy rog ni ke yib gelngin Kristus ngog ni nge mang yoror rog.” (2 Korinth 12:9; Psalm 147:5) Ere thamiy Paul e re ayuw nem u daken Kristus, ayuw rok Got nib gel ni gowa ba tento ni be yororiy Paul. Ku arrogon e ngiyal’ ney ni aram rogon ni ma fulweg Got taban e meybil rodad. Ma yororiy Got e pi tapigpig rok.
18. Mang fan nrayog rodad ni ngada k’adedan’dad u fithik’ e skeng?
18 Ba tento e der ma taleg e n’uw ni be aw ara nifeng ni be thow, machane fare tento e ma yororiy e girdi’ riy ko n’uw nge nifeng. Ku arrogon e “ayuw u daken Kristus” ni der taleg e skeng ara magawon ni ma yib ngodad. Machane ma ayuweg e michan’ rodad ni nge gel ko togopluw ni ma yib rok e re fayleng ney nge pilung riy ni Satan. (Revelation 7:9, 15, 16) Ere rayog ni nge mich u wan’um ni manang Jehovah e magawon rom ni mus ko ngiyal’ ni de chuweg fare magawon rom, ma ra fulweg taban e ‘meybil rom’ ni ga be pi’ u fithik’ e meyor. (Isaiah 30:19; 2 Korinth 1:3, 4) I yol Paul ni gaar: “Yi Got e dabi thilyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabkiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.”—1 Korinth 10:13; Filippi 4:6, 7.
19. Mang e ngam turguy ni nguun rin’, ma mang fan?
19 Riyul’ ni ngiyal’ ney ni “tin tomren e rran e ri mo’maw’ ni ngan par nrogon e tin riyul’ ni girdien Kristus.” (2 Timothy 3:1) Aram rogon e pi tapigpig rok Got, machane gathi be yip’ fan ni dabiyog ni ngan par nrogon e tin riyul’ ni girdien Kristus. Mang fan? Ya bay e ayuw ni yib rok e kan ni thothup rok Got ni ma yororiydad, mab m’agan’ Jehovah ngay ni nge pi’ e kan ni thothup ngak e piin ni yad ma ning ni yugu yad be wenig mab pagan’rad ngay ni ri ra pi’ Got. Ere ngada turguyed ni nguuda meybilgad ni gad be wenignag e kan ni thothup ni gubin e rran.—Psalm 34:6; 1 John 5:14, 15.
Uw Rogon ni Ga Ra Fulweg?
• Mang e thingar da rin’ed ya nge yog e kan ni thothup rok Got ngodad?
• Mang fan nrayog ni nge pagan’dad ni ra fulweg Jehovah taban e meybil rodad ni gad be ning e kan ni thothup?
• Uw rogon ni ma ayuwegdad e kan ni thothup ni nguuda k’adedan’dad u fithik’ e magawon?
[Picture on page 9]
Mang e rayog ni ngada filed ko fanathin rok Jesus u murung’agen fare moon ni yugu be wenig ni bochan e ke yib e milekag nga tafen?
[Picture on page 10]
Yig ga ma wenig ni nge yog e kan ni thothup rok Got ngom, fa?
[Picture on page 11]
Mang e gad be fil u murung’agen Jehovah ko fare fanathin u murung’agen fare matam ni ma runguy fak?