Rogon ni i Maruwel Gelngin Got nib Thothup ko Bin Som’on e Chibog nge Ngiyal’ Ney
“Taab [“gelngin Got nib thothup,” NW] e be rin’ urngin e pi n’ey.”—1 KOR. 12:11.
1. Mang e gad ra weliy ko re article ney?
NAP’AN e Pentekost ko duw ni 33 C.E. me buch boch ban’en nni gin ngay. (Acts 2:1-4) Ireram e rofen ni puog Got gelngin nib thothup nga daken e pi tapigpig rok me fanay e re gelngin nem ni nge pow’iy e pi tapigpig rok u yugu reb e kanawo’ nib thil. Kad weliyed ko fa binem e article rogon ni i ayuweg gelngin Got nib thothup e pi tapigpig rok ni ngar rin’ed boch e maruwel nib mo’maw’. Machane mang e ba thil u rogon ni i maruwel gelngin Got nib thothup u m’on ni sum e ulung ni Kristiano ngu tomuren? Ma uw rogon ni ma yib angin e ayuw ni ma pi’ gelngin Got nib thothup ngak e pi Kristiano e ngiyal’ ney? Ireray e n’en ni gad ra weliy ko re article ney.
“I Gag e Tapigpig rok Somol!”
2. Uw rogon ni ke guy Maria angin gelngin Got nib thothup?
2 Nap’an ni puog Got gelngin nib thothup nga daken e pi tapigpig rok ni kar muulunggad ko thal ni nga lang u reb e naun u Jerusalem, ma immoy Maria u fithik’rad. (Acts 1:13, 14) Machane, u m’on riy ma ke guy angin gelngin Got nib thothup u boch e kanawo’, ya ngal’uweg Jehovah e yafas rok fak nga yin ndawori nang e pumoon.—Matt. 1:20.
3, 4. (a) Uw rogon e lem rok Maria ko n’en ni yog Got ngak ni nge rin’? (b) Uw rogon nrayog ni ngad folwokgad rok?
3 Mang fan nni pi’ e binem e tow’ath ngak Maria? Tomuren ni weliy fare engel ngak e n’en nib m’agan’ Jehovah ngay ni nge rin’, me gaar: “‘I gag e tapigpig rok Somol; nggu yodor ni bod ni ka mog.’ Ma aram me chuw fare engel rok nge yan.” (Luke 1:38) Thin ni yog Maria e be m’ug riy ko ba miti mang girdi’. Fulweg rok e be tamilangnag nib m’agan’ ngay ni nge rin’ e tin nib m’agan’ Got ngay. De par nga i fith fare engel ko mang e ra yog e girdi’ u murung’agen e diyen ni ke tay ara rus nri daki adag Josef ni ngar mabgolgow. Nap’an ni yog ni ir e tapigpig rok Jehovah ma aram e ke dag nri be pagan’ ngak Jehovah.
4 Bay yu ngiyal’ ni ga ma lemnag ni kaygi yoor e maruwel ni ga be rin’ ni fan ko pigpig ngak Jehovah ndabkiyog rom? Ba fel’ ni nge bagadad me fith ir ni nge gaar, ‘Ba pagan’ug ngak Jehovah nra pithig e re magawon ney nrogon nib m’agan’ ngay, fa? Ba m’agan’ug ngay ni nggu rin’ e pi n’en ni baadag Jehovah ni nggu rin’, fa?’ Rayog ni nge mich u wan’um nra pi’ Got gelngin nib thothup ngak e piin ni ma pagan’rad ngak ma yad ma rin’ e tin nib m’agan’ ngay.—Acts 5:32.
Gelngin Got nib Thothup e Ayuweg Peter
5. Mang boch e kanawo’ ni i guy Peter rogon ni i maruwel Gelngin Got nib thothup riy u m’on ko Pentekost ko duw ni 33 C.E.?
5 U m’on ko Pentekost ko duw ni 33 C.E., me guy apostal Peter rogon ni i maruwel gelngin Got nib thothup ni bod rogon ni buch rok Maria. Ke pi’ Jesus mat’awrad e tin ni ka bay e apostal ni ngar tulufed e moonyan’ ni ke ying ko girdi’. (Mark 3:14-16) Yugu aram rogon nde yoor ban’en u murung’agen ni be weliy e Bible machane be m’ug ni maruwel Peter nga mat’awun nni pi’ ngak. Maku nap’an ni pining Jesus Peter ni nge yan ngak u daken e ran u lan fare Lipath nu Galile, me yog ni nge rin’ ni bochan gelngin Got nib thothup. (Mu beeg e Matthew 14:25-29.) Ere ba tamilang ni i taga’ Peter nga daken gelngin Got nib thothup ni nge ayuweg nge rin’ boch ban’en nib mo’maw’. Ma de n’uw nap’an nga tomuren miki ayuwegrad e re gelngin nem ni ngkur rin’ed boor ban’en.
6. Mang e ayuweg gelngin Got nib thothup Peter ni nge rin’ u nap’an e Pentekost ko duw ni 33 C.E. ngu tomuren?
6 Nap’an e Pentekost ko duw ni 33 C.E. min pi’ gelngin Peter nge boch e girdi’ ni ngar nonad ni thin ko piin ni kar bad nga Jerusalem. Ma nga tomuren me sak’iy Peter nga lang nge welthin ko fapi girdi’ ni kar muulunggad. (Acts 2:14-36) Immoy yu ngiyal’ ni i rus Peter, ara i rin’ boch ban’en nda i lemnag. Machane, nap’an ni yib gelngin Got nib thothup ngak ma daki rus ni nge machib ni yugu aram rogon ni un gafgownag ma yibe yog ngak ni nge tal ndab ki machib. (Acts 4:18-20, 31) I pi’ Got e tamilangan’ ngak u daken gelngin nib thothup. (Acts 5:8, 9) Miki pi’ gelngin ni nge faseg be’ ni ke yim’.—Acts 9:40.
7. Mang boch e machib rok Jesus ni fini tamilang u wan’ Peter u tomuren ni kan dugliy?
7 Boor ban’en ni i machibnag Jesus u m’on ko Pentekost ni nang Peter fan. (Matt. 16:16, 17; John 6:68) Machane, immoy ban’en ko machib rok Jesus nda i tamilang u wan’ u m’on ko Pentekost. Bod nda i nang Peter ni yira faseg Kristus ko yam’ nib kan u tomuren dalip e rran ni ke yim’. Maku da i nang ni Gil’ilungun Kristus e bay u tharmiy. (John 20:6-10; Acts 1:6) Ku de nang Peter ni bay boch e girdi’ ni yad ra un ko gagiyeg u Gil’ilungun Got u tharmiy. Nap’an nni taufenag nga gelngin Got nib thothup min dugliy nra yan nga tharmiy, mfin aram e ngiyal’ ni nang fan e pi machib rok Jesus nem.
8. Mang tamilangan’ e bay rok e piin kan dugliyrad nge “yugu boch e saf”?
8 Pi n’en nda i tamilang u wan’ pi gachalpen Jesus e fini tamilang u wan’rad u tomuren nni puog gelngin Got nib thothup nga dakenrad. Re gelngin ney e thagthagnag nga laniyan’ e piin nra yoloyed e Pi Babyor ko Bible nni Yoloy Nsom’on ni Thin ni Greek ni ngar tamilangnaged e tin riyul’ u murung’agen e n’en nib m’agan’ Jehovah ngay. (Efe. 3:8-11, 18) Ngiyal’ ney e ku rayog ni nge fil e piin ni kan dugliyrad nge “yugu boch e saf” murung’agen e pi n’ey mar nanged fan. (John 10:16) Ba ga’ fan u wan’um e pi n’en ni be tamilangnag gelngin Got nib thothup ni bay ko Thin rok Got, fa?
I ‘Sugnag’ Gelngin Got nib Thothup Paul
9. Mang e ke yog ni nge rin’ Paul u daken gelngin Got nib thothup?
9 Sogonap’an reb e duw nga tomuren e Pentekost ko duw ni 33 C.E., mu kun dugliy be’ nga gelngin Got nib thothup. Cha’nem e Saul ni yib i mang Paul. Boor ban’en ni i ayuweg gelngin Got nib thothup ni nge rin’ ni ka bay angin ngodad e ngiyal’ ney. Nni thagthagnag nga laniyan’ ni nge yoloy 14 ken e babyor u Bible. Ki ayuweg gelngin Got nib thothup ni nge nang fan me yoloy murung’agen e athap ko piin ni yad ra yan nga tharmiy ni kar manged kan ndab kur m’ad, ni bod rogon ni ayuweg Peter. Ku re gelngin nem e ayuweg Paul ni nge golnag e m’ar, me tuluf e moonyan’, me faseg e yam’. Machane ku bay ban’en nib ga’ fan ni ayuweg gelngin Got nib thothup ni nge rin’ ni aram e n’en ni be rin’ e pi tapigpig rok Got e ngiyal’ ney, machane gathi yad be rin’ u daken e maang’ang.
10. Uw rogon ni ayuweg gelngin Got nib thothup Paul nge yog ni welthin?
10 I ‘sugnag’ gelngin Got nib thothup Paul nge non nde rus nib togopuluw ngak be’ ni ma togopuluw ko bin riyul’ e liyor. Immoy reb e tayugang’ nu Cyprus ni i motoyil ngorow ma aram me mich e tin riyul’ u wan’ ni bochan e kari “gin ko tin ni ke rung’ag ni murung’agen” Jehovah. (Acts 13:8-12) Ere ba tamilang ni manang Paul feni ga’ fan gelngin Got nib thothup u nap’an ni yibe weliy murung’agen e tin riyul’. (Matt. 10:20) Boch nga tomuren me wenignag ko ulung nu Efesus ni ngaur yibilayed ya nge yog ‘ni pi’ Got ngak e tin ni ba adag ni nge weliy.’—Efe. 6:18-20.
11. Uw rogon ni i pow’iy gelngin Got nib thothup Paul?
11 Gathi kemus ni i ayuweg gelngin Got nib thothup Paul ni nga i non ya ku immoy yu ngiyal’ ni i taleg ndabi non u boch e binaw. Nap’an ni tabab ko milekag nga boch e binaw ni be machib miki pow’iy gelngin Got nib thothup. (Acts 13:2; mu beeg e Acts 16:6-10.) Ka be pow’iy Jehovah fare maruwel ni machib u daken gelngin nib thothup. Gubin e pi tapigpig rok Jehovah ni yad ba yul’yul’ e yad ma athamgil ni ngar weliyed e tin riyul’ ndab ra rusgad ma yad ba pasig ni bod Paul. Yugu aram rogon ni gathi ri kab gagiyel rogon ni ma pow’iyey Got e ngiyal’ ney ni bod u nap’an Paul, machane ba pagan’dad ni be fanay Jehovah gelngin nib thothup ni nge ayuweg e girdi’ ni ngar nanged e tin riyul’.—John 6:44.
“Ba Thilthil Rogon e Tin Nrayog rok Be’ nge Be’”
12-14. Taareb rogon ni ma maruwel gelngin Got nib thothup u daken e pi tapigpig rok, fa? Mu weliy.
12 Ri ma yib e athamgil nga lanin’dad u nap’an ni gad ra beeg murung’agen rogon ni tow’athnag Jehovah e piin ni kan dugliyrad ko bin som’on e chibog. Dab mu pagtalin e n’en nni thagthagnag nga laniyan’ Paul nge yog u daken gelngin Got nib thothup e ngiyal’ nem ni gaar: “Boor mit e salap ni ma yog ngak e piin ni girdien Kristus, machane taab [“gelngin Got nib thothup,” NW] e be yib rok. Boor kanawoen ni yima pigpig, machane taab Somol e yibe pigpig ngak. Ba thilthil rogon e tin nrayog rok be’ nge be’ ko pigpig, machane taab Got e be pi’ e salap ngak urngin e girdi’ ni fan nga urngin e pigpig.” (1 Kor. 12:4-6, 11) Arrogon, rayog ni nge maruwel gelngin Got nib thothup u daken e pi tapigpig rok nib thilthil rogon ya nge yog ni lebug e n’en nib m’agan’ ngay. Re gelngin ney e ma pi’ Got ngak girdien fa “chi ulung” rok Kristus nge “yugu boch e saf” rok. (Luke 12:32; John 10:16) Machane, gathi taareb rogon ni ma pow’iy e girdi’ u lan e ulung.
13 Bod ni piin piilal e yima dugliyrad u daken gelngin Got nib thothup. (Acts 20:28) Machane, gathi gubin e girdi’ ni kan dugliyrad nga gelngin Got nib thothup e yad ma un i yog e thin u lan e ulung. Ere mang e be yip’ e re n’ey fan? Be yip’ fan nib thilthil rogon ni ma maruwel gelngin Got nib thothup u daken e girdi’ u lan e ulung.
14 Fare gelngin ni ma micheg nga laniyan’ e piin ni kan dugliyrad ni ke pofrad Got ni ngar manged pi fak e ku aram e re gelngin ni fanay Jehovah ni nge faseg Fak me yan nga tharmiy nib kan. (Mu beeg e Roma 8:11, 15.) Ku aram e re gelngin ni maruwel Jehovah ngay me sunmiy e palpalth’ib. (Gen. 1:1-3) Ku aram e re gelngin ni maruwel Jehovah ngay nge pi’ e salap ngak Bezalel ni nge fal’eg e tabernacle. Maku re gelngin nem e pi’ gelngin Samson ni nge rin’ boch ban’en ndariy be’ nrayog rok, miki pi’ gelngin Peter ni nge yan u daken e ran. Ere ba thil e bin ni nge pow’iydad gelngin Got nib thothup ko bin ni ngan dugliydad nga gelngin Got nib thothup. Ya bin ni baaray ni ngan dugliy be’ nga gelngin Got nib thothup e aram reb e kanawo’ ni ma maruwel gelngin Got nib thothup riy. Yigoo Got e ma mel’eg e en ni nge dugliy nga gelngin nib thothup.
15. Yugu bay i dugliy Got e girdi’ nga gelngin nib thothup ndariy n’umngin nap’an, fa? Mu weliy.
15 Kab kakrom i yib ni boor e kanawo’ ni ma maruwel gelngin Got nib thothup u daken e pi tapigpig rok ni yad ba yul’yul’, ni tabab u bokum biyu’ e duw u m’on ndawori tabab Got i dugliy e girdi’ nga gelngin nib thothup. I tabab Got i rin’ e re n’ey ko Pentekost ko duw ni 33 C.E., machane bay n’umngin nap’an me mus. Yugu aram rogon maku ra i maruwel gelngin Got u daken e girdi’ rok ya nge yog ni ngar rin’ed e tin nib m’agan’ ngay ndariy n’umngin nap’an.
16. Mang e be rin’ e pi tapigpig rok Got e ngiyal’ ney u daken gelngin nib thothup?
16 Mang e be rin’ e pi tapigpig rok Got e ngiyal’ ney u daken gelngin nib thothup? Fulweg riy e bay ko Revelation 22:17 ni gaar: “[“Gelngin Got nib thothup,” NW] nge fare pin ni nge mabgol e lungurow, ‘Moy!’ Urngin e girdi’ ni yad ra rung’ag e re bugithin ney e thingar ki lungurad, ‘Moy!’ Moy i gur e en ni ke yib e belel ngom; ngam fek fare ran ko yafos nib tow’ath ni yira pi’ ngak e en ni ba adag ni nge yog ngak.” Pi Kristiano e ngiyal’ ney e yad be pining e “en ni baadag” ni nge fek fare ran ko yafas. Ma pi Kristiano ni kan dugliyrad e yad e yad ba m’on ko re maruwel ney. Yugu aram rogon ma ka be un yugu boch e saf i rin’ e re maruwel ney. Ka re gelngin nem e be pow’iy e re ulung ney. Ma yad gubin ni kan taufenagrad nga “fithingan e Chitamangiy nge Fak nge [“gelngin Got nib thothup,” NW ]” ni aram e pow riy ni kar ognaged yad ngak Jehovah. (Matt. 28:19) Yad gubin ni yad be pag gelngin Got nib thothup ni nge pow’iyrad, me m’ug wom’engin ko ngongol rorad. (Gal. 5:22, 23) Piin ni yad ba muun nga yugu boch e saf e yad bod e piin ni kan dugliyrad. Yad ma pag gelngin Got nib thothup ni nge ayuwegrad. Maku yad ma athamgil ni nga i par nib beech e ngongol rorad u mit Got.—2 Kor. 7:1; Rev. 7:9, 14.
Um Ning Gelngin Got nib Thothup
17. Uw rogon nrayog ni ngad micheged ni bay gelngin Got nib thothup rodad?
17 Ere demtrug ko ga be athapeg e yafas ni manemus u tharmiy ara fayleng, ma rayog ni nge pi’ Jehovah fare gelngin “ni ir e ba th’abi gel” ngom ya nge yog ni um par ni gab yul’yul’ me yog e re tow’ath nem ngom. (2 Kor. 4:7) Rayog ni ngaun moningnagem ni bochan e ga be machibnag fare thin nib fel’ ni murung’agen Gil’ilungun Got. Machane, dab mu pagtalin ni faanra yibe yog e thin nib kireb ngom ni fan e gur girdien Kristus, ma ga ra par ni gab felfelan’ ya bay gelngin Got nib thothup rom.—1 Pet. 4:14.
18, 19. (a) Uw rogon nra ayuwegem Jehovah u daken gelngin nib thothup? (b) Mang e kam dugliy ni ngam rin’?
18 Gelngin Got nib thothup e aram e tow’ath rok Got ni ma pi’ ngak e piin ni yad ma ning ngak u fithik’ e yul’yul’. Gathi kemus nra yoornag e salap rom, ya ku ra ayuwegem ni ngam adag ni ngam pigpig ngak Got nrogon nrayog rom. “Yi Got e gubin ngiyal’ ni be maruwel u fithik’ i lanin’med ni be pingeg lanin’med ni nge m’agan’med ngay ni ngam folgad ko tin ni be finey.” Gelngin Got nib thothup ngki chag ko athamgil ni gad be tay ni ngad ‘weliyed e thin rok Got ni murung’agen e yafos ndariy n’umngin nap’an,’ e ra ayuwegdad ni ngaud ‘ngongolgad ni ba’ madgun Got u wan’dad mu ud t’ongad ko marus nge mada’ ko ngiyal’ ni ka darod ngak Got.’—Fil. 2:12, 13, 16.
19 Ere mu rin’ gubin e maruwel ni ke pi’ Jehovah ngom nrib fel’ rogon, mag salap riy, mu um ning e ayuw ngak. (Jas. 1:5) Ra ayuwegem ni ngam nang fan e Thin rok, mag athamgil u fithik’ e magawon, mu um machibnag fare thin nib fel’. “Mu ninged, me yog ngomed; mu gayed, mi gimed pirieg; mu tugtuguyed e mab, min bing e mab ngomed,” ma re n’ey e ba muun ngay ni ngam ning gelngin Got nib thothup. (Luke 11:9, 13) Ere um wenig ngak Jehovah ni nge ayuwegem ngam bod e pi tapigpig rok ni yad ba yul’yul’ ni i pow’iyrad gelngin nib thothup.
Rayog ni Ngam Weliy?
• Uw rogon ni ngad folwokgad rok Maria min tow’athnagdad?
• Uw rogon ni i pow’iy gelngin Got nib thothup Paul?
• Uw rogon ni ma pow’iy gelngin Got nib thothup e pi tapigpig rok e ngiyal’ ney?
[Picture on page 26]
Gelngin Got nib thothup e ayuweg Paul ni nge gel ko pi kan nib kireb
[Picture on page 28]
Ngiyal’ ney e ma ayuweg gelngin Got nib thothup e pi Kristiano ndemtrug e athap rorad