Rogon ni Ngam Nang Fan e Thin nu Bible
1. Mu Ning e Ayuw Ngak Got
Ninfa ni be’ ni ma par u Italy e gaar: “Immoy ba ngiyal’ ni gu ma beeg e Bible u m’on ni nggu mol, ya gu manang ni Thin rok Got. Yugu aram rogon ni gathi ri gu baadag i beeg, machane gu baadag ni nggu nang ko mang e bay riy. Ere, kug lemnag ni nggu beeg ni ga’ngin. Som’on e ba mom, ma faani munmun mug pirieg yu yang riy nib mo’maw’ ni nggu nang fan, ma aram mu gu tal.”
KAA buch rom ni aray rogon? Boor e girdi’ ni ke buch rorad. Machane, rogon ni kad guyed ko fa binem e thin e baadag Jehovah ni ngad nanged fan e Thin rok. Ere, uw rogon ma ga nang fan? N’en nsom’on ni ngam rin’ e ngam ning e ayuw ngak.
Pi apostal rok Jesus e goo yimanang “ndariy e skul rorad” ni bochan e dar uned ko skul ko teliw rok piyu Jew. (Acts 4:13) Machane, ke micheg Jesus ngorad nrayog ni ngar nanged fan e Thin rok Got. Uw rogon? I weliy Jesus ni gaar: “Bay i ayuwegmed . . . [“gelngin Got nib thothup,” NW] ni en ni Chitamangiy e bayi l’og nge yib ni owcheg, ma bayi fil urngin ban’en ngomed, me ayuwegmed nge mit ngomed urngin e tin ni kug weliy ngomed.” (John 14:26) I fanay Got gelngin nib thothup ni nge sunmiy e fayleng nge urngin ban’en nib fas ni bay riy. (Genesis 1:2) Ki fanay Got gelngin ni nge thagthag nga laniyan’ 40 e girdi’ ni ngar yoloyed e Bible. (2 Peter 1:20, 21) Ere, ku aram e re gelngin nra ayuweg e piin ni yad baadag ni ngar nanged fan e thin nu Bible.
Uw rogon nra ayuwegem gelngin Got nib thothup? Thingar mu ning ni gubin ngiyal’ nib pagan’um nra pi’ ngom. I yog Jesus ni gaar: “Mu ninged, me yog ngomed . . . yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere en ni Chitamangiy ni bay u tharmiy e ri ra pi’ [“gelngin nib thothup,” NW] ngak e piin ni yad ra ning ngak!” (Luke 11:9, 13) Ra pi’ Jehovah gelngin nib thothup ngak e piin ni yad ra ning u fithik’ e yul’yul’. Re gelngin nem e ra ayuwegem ni ngam nang fan e thin ni bay u Bible ni kan thagthagnag nga laniyan’ e girdi’ ni yugu aram rogon ni ke yan bokum biyu’ e duw ni kan yoloy. Ku rayog ni nge pi’ gelngin Got nib thothup e gonop ngom ya nge yog nim fol ko thin ni ga be beeg u Bible.—Hebrews 4:12; James 1:5, 6.
Gubin ngiyal’ ni ngam beeg e Bible mag meybil ngak Got ni nge pi’ gelngin nge ayuwegem ngam nang fan e Thin rok.