Fan Ni Dabki N’uw Nap’an Me M’ay Urngin E Gafgow

“I Somol e ba yal’uw ma mmat’aw urngin e tin ni ma rin’.”​—DEUTERONOMY 32:4.

1, 2. (a) Mang fan ni rib t’uf rom fare athap ni bay rom ni ngam par ni manemus? (b) Mang e ma taleg laniyan’ boor e girdi’ ni nge mich Got u wun’rad ni ir e ke micheg e pi flaab ney?

GA BAADAG ni ngam lemnag rogon e par u Paradis, fa? Sana ga ma tafinaynag rogon ni ga ra milekag u fayleng i yan ni ga be fil murung’agen urngin miti yafos. Sana ga ma tafinaynag rogon ni ngam felfelan’ ni ngam maruwelgad boch e girdi’ ni gimed be ayuweg e fayleng ni nge mang paradis. Ara sana ga ma lemnag e salap ni ga ra tay ko rogon ni yoloy yaan ban’en, ara dimow naun, ara musik, ara yugu boch e maruwel ni dabiyog ni ngam un ngay e chiney ya ke yoor pa’. Demtrug rogon ma rib t’uf rom e athap ni n’en ni be yog e Bible e “bin riyul’ e yafos” ngay​—ni aram e par nrogon nib m’agan’ Jehovah ngay, ni aram e yafos ni manemus.​—1 Timothy 6:19.

² Dabi siy ni ga ma felan’ ngay ni ngam weliy murung’agen e re athap nem ni bay u Bible ni nge rung’ag boch e girdi’? Machane boor e girdi’ ni dabun e re athap nem. Yad ma tay ni re athap ney e ban’en nde riyul’, ara ba lik’ay ni fan ko girdi’ nib mom ni ngan bannagrad. Sana mo’maw’ ni nge riyul’ Got u wun’rad, ni ir e ke micheg e yafos ni manemus u Paradis. Mang fan? Mo’maw’ ni nge riyul’ e thin rok Got u wan’ boch e girdi’ ni bochan e kireb ni bay u fayleng. Yad ma lemnag ni faanra bay e Got, ma faanra gubin ban’en ma rayog rok, ma ir e ma t’ufeg e girdi’, me ere mang ni bay e kireb nge gafgow u fayleng. Yad ma lemnag ni dabiyog ni nge aw nib fel’ e kireb u wan’ Got​—ma faanra bay e Got nib fel’ e kireb u wan’ me ere bay boch ban’en ni dabiyog rok, ara dariy fan e girdi’ u wan’. Boch e girdi’ e ma lemnag nib puluw ni ngan lemnag ni aram rogon. Ya rib salap Satan ni ke tay laniyan’ e girdi’ u fithik’ e lumor.​—2 Korinth 4:4.

3. Mang deer nib mo’maw’ e rayog ni ngada ayuweged e girdi’ ngar nanged e fulweg riy, ma mang fan ni bay rogodad ni ngad rin’ed?

³ Gad e Mich Rok Jehovah e rayog ni ngada ayuweged e pi girdi’ ney ni ke bannagrad Satan, nge llowan’ ko fayleng. (1 Korinth 1:20; 3:19) Gad manang fan ni de mich e thin ko Bible u wun’rad. De mich u wun’rad ni bochan e ri dar nanged Jehovah. Sana dar nanged fithingan ara fan e ngochol rok, ma yad manang buchuuw ara ri dar nanged e pi fel’ngin ara murung’agen ni ma lebguy e pi n’en ni ke micheg. Gadad ba tow’ath ni bochan e ke tamilangan’dad. Yu ngiyal’ e ba fel’ ni ngada gayed rogon ni ngada ayuweged e piin ni “be par lanin’rad u fithik’ e lumor” ni ngar nanged e fulweg u reb e deer nib mo’maw’ ni ma fith e girdi’, “Mang fan ni ke pag Got e kireb nge gafgow be buch?” (Efesus 4:18) Som’on ma ngad lemnaged rogon i weliy nib manging’. Ma aram ma gad weliy boch rarogon Jehovah ni ke m’ug u rogon ni ke pithig e re magawon nem.

Ngan Fulweg e Re Deer Nem nib Fel’ Rogon

4, 5. Mang e thingar da rin’ed ko som’on u nap’an ni ra fith be’ ko mang fan ni ke pag Got ni nge gafgow e girdi’? Mu weliy.

⁴ Uw rogon ni gad ra fulweg u nap’an ni ra fith be’ ko mang fan ni ke pag Got be gafgow e girdi’? Sana gad ba adag ni ngada weliyed ko chi ngiyal’ nem e n’en ni buch u lan e milay’ nu Eden. Yu ngiyal’ e ba fel’ ni ngan weliy e re machib nem. Machane fel’ ni ngan kol ayuw. Ya sana ba t’uf boch ban’en ko machib ni ngan weliy ko som’on. (Proverbs 25:11; Kolose 4:6) Ngada weliyed dalip e n’en ni ra ayuwegdad ni ngada ayuweged boch e girdi’ u m’on ni ngada tamilangnaged e fulweg ko re deer nem.

⁵ Bin som’on, faanra ke magawon laniyan’ be’ ni bochan e ke yoor e kireb u fayleng, sana ke buch ban’en rok ara be’ nib t’uf rok. Ere ffel’ ni nge nang faanem ni ga manang rogon laniyan’. I fonownag apostal Paul e pi Kristiano ni gaar: “Mu uned ko felfelan’ ngak e piin ni kar felfelan’gad, mi gimed un ko meyor ngak e piin ni yad be yor.” (Roma 12:15) Faanra manang faanem ni ‘ga manang rarogon laniyan’’ ma ra motoyil ko machib. (1 Peter 3:8) Ma faanra manang faanem ni gad ma runguy ma ra motoyil ko thin rodad.

6, 7. Mang fan nib puluw ni ngada pininged e magar ngak e en ni ma deeriy ban’en ni bay u Bible?

⁶ Bin l’agruw, ngada pininged e magar ngak faanem ni bochan e ke fith e re deer nem. Boch e girdi’ e yad ma lemnag ni bochan ni kar fithed e re deer nem, e dariy e michan’ rorad ara kar darifannaged Got. Ma sana aram e n’en ni yog e tamachib nde riyul’ ngorad ni bochan e kar fithed fare deer. Machane gathi arrogon. Ya immoy boch e girdi’ nib gel e michan’ rorad kakrom ni ur fithed e re deer nem. I fith David ni ir e ke yoloy e psalm ni gaar: “O Jehovah, mang fan ni ga ma par ni gab mal’af romad? Mang fan ni kam mith u nap’an ni gamad ba gafgow?” (Psalm 10:1) Ki fith Habakkuk ni profet ni gaar: “Somol, uw n’umngin nap’an nthingar gu wenig ngom ni ngam ayuwegmad mfin mu rung’ag lungug ngam chuwegmad u fithik’ e gafgow ni yibe tay ngomad? Mang fan ni kam gagiyegnigeg ni ngug guy e gafgow nge kireb ni yibe rin’? Gafgow ni yibe tay ngak e girdi’ nge cham e gu be guy u toobeg i yan, ma gubin yang ni be yo’yoor lungun e girdi’ riy ma yad be tugthin.”​—Habakkuk 1:2, 3.

⁷ Gali cha’ nem e yow e girdi’ nib gel e michan’ rorow ma yow ma tay fan Got. Kan puwan’ ngorow ni bochan e kar fithew fare deer, fa? Danga’, ya ke tay Jehovah ni ngan yoloy e deer rorow ko Thin Rok. Be’ ni ke magawon laniyan’ ni bochan e ke yoor e kireb e ngiyal’ ney e sana ir be’ ni be gay e machib​—ma be gay e fulweg ni ke mus ni Bible e bay riy. Mu tay fanam i yan riy ni ba fel’ e piin ni yad be gay e machib u wan’ Jesus, ni yad e “piin ni kar pirieged u lanin’rad ni kar gafgowgad ndabi siy ni nge yog Got ngorad.” (Matthew 5:3) Ma gad ba tow’ath ni bochan e rayog ni ngada ayuweged e pi girdi’ ney ni ngar felan’gad ni bod ni ke micheg Jesus!

8. Mang boch e machib ni yugu ban’en ni ir tapgin ni ma lemnag e girdi’ ni Got e ke k’aring e gafgow, ma uw rogon nrayog ni ngada ayuweged e pi girdi’ nem?

⁸ Bin dalip, e ngada ayuweged faanem ni nge tamilangan’ ni gathi Got e be k’aring e kireb ni bay u fayleng. Kan machibnag e girdi’ ni ngar lemnaged ni Got e be gagiyegnag e fayleng, ma ke m’ay i turguy rok Got urngin ban’en ni ma buch rorad, mab m’agan’ ngay ni ngada gafgowgad. Machane de puluw e machib ni aram rogon. Pi machib nem e ma darifannag Got, ma pi machib nem e ma tay nib mil fan ngak Got e pi kireb nge gafgow ni bay u fayleng. Ere thingar da fanayed e Thin Rok Got ni ngada yal’uweged e tin ni be oloboch e girdi’ riy. (2 Timothy 3:16) Gathi Jehovah e be gagiyegnag e re m’ag nib kireb ney, ya Satan ni Moonyan’ e be gagiyegnag. (1 John 5:19) Der ma turguy Jehovah e pi n’en ni ma buch rok e girdi’, ya ke pi’ Jehovah mat’awen e girdi’ ni ngar mel’eged e fel’ ara kireb, nge tin nib mat’aw ara tin nib kireb. (Deuteronomy 30:19) Ma dariy e ngiyal’ ni ma sum e kireb rok Jehovah; ya ma fanenikay e kireb ma ma runguy e piin ni yad ma gafgow ni dariy tapgin.​—Job 34:10; Proverbs 6:16-19; 1 Peter 5:7.

9. Mang boch talin e maruwel ni ke pi’ “fare tapigpig nib yul’yul’ mab gonop” ni fan ni ngan ayuweg e girdi’ ni ngar nanged fan ni ke pag Jehovah Got ni ngan gafgow?

⁹ Nap’an ni kam tay kenggin e machib rom ma ga ra pirieg ni ke yog ni nge fil faanem fan ni ke pag Got be gafgow e girdi’. Bay boch e babyor ni ke fal’eg fare “tapigpig nib yul’yul’ mab gonop” ni nge ayuwegem i machibnag e girdi’. (Matthew 24:45-47) U nap’an fare “Fol rok Got” District Convention ko duw ni 2005/06 min pi’ reb e babyor ni All Suffering Soon to End! (Dabki N’uw Nap’an Me M’ay Urngin e Amith nge Gafgow!) Faanra bay e re babyor nem nthin ko nam rom, ma mang fan ni dab mu beeg nge fel’ i nang fan rom e n’en ni bay riy? Ku bay fare ke babyor ni What Does the Bible Really Teach? (Mang e Ri Be Fil e Bible?) ni kan pilyeg nga 157 mit e thin, ma bay ba guruy riy ni be weliy e fulweg ko re deer nem. Mu fanay e pi talin e maruwel nem. Ya ma tamilangnag e pi babyor nem e n’en ni yog e Bible u rogon ni sum fare magawon u Eden ko mini’ e bay mat’awun ni nge gagiyeg, nge fan ni ke mel’eg Got e re kanawo’ ney ni nge pithig fare magawon riy. Mu tay fanam i yan riy ni nap’an ni ga be weliy e re thin ney ma ke mab e kanawo’ ni ngam weliy ban’en nib th’abi ga’ fan ni ngan nang. Aram e tamilangan’ u murung’agen Jehovah nge rarogon.

Mu Tiyan’um ko Pi Fel’ngin Jehovah

10. Mang fan ni boor e girdi’ nib mo’maw’ ni ngar nanged fan ni ke pag Got e gafgow, ma mang boch ban’en nra ayuwegrad ni nge tamilangan’rad?

¹⁰ Nap’an ni ga be ayuweg e girdi’ ni ngar nanged fan ni ke pag Jehovah ni nge gagiyeg e girdi’ u tan pa’ Satan, ma guy rogon ni nge tamilang pi fel’ngin Jehovah u wun’rad. Manang e girdi’ ni ba gel Got; ya yima pining e Got ni Gubin Ma Rayog Rok ngak. Machane mo’maw’ rorad ni ngar nanged fan ni de fanay Got gelngin ni nge taleg e tin nde mat’aw nge gafgow nib papey. Ya de tamilang u wun’rad boch i fel’ngin Jehovah ni aram e thothup, mat’aw, gonop nge t’ufeg. Ma m’ug e pi fel’ngin Jehovah ney u reb e kanawo’ nib fel’ rogon. Aram fan ni yog e Bible ni gaar: “Ngongolen e ba fel’ ma ba yal’uw.” (Deuteronomy 32:4) Uw rogon nrayog ni ngam gagiyelnag e pi fel’ngin ney u nap’an ni ga be fulweg e pi deer ni ba ga’ ni yima deeriy u murung’agen e re n’ey? Ngada weliyed boch e pi deer nem.

11, 12. (a) Mang fan ni dariy kanawoen ni nge n’ag Got fan e denen rok Adam nge Efa? (b) Mang fan ni dabi pag Jehovah ni nge par e denen ni manemus?

¹¹ Rayog rok Jehovah ni nge n’ag fan e denen rok Adam nge Efa, fa? Dariy kanawoen ni nge n’ag Got fan e denen rorow. Adam nge Efa e yow ba flont, ma kar turguyew u fithik’ e tamilangan’ ni ngar togopluwgow ko gagiyeg rok Jehovah ma ngar folgow rok Satan. Ma dariy e kalngan’ ko pi tatogopuluw nem. Ma piin ni ma fith ko mang fan ni de n’ag Jehovah fan e denen rorow, e bin riyul’ riy e yad be fith ko mang fan ni de thilyeg e motochiyel rok nge fel’ u wan’ e denen nge togopluw. Fulweg ko deer rorad e bay rogon nga reb i fel’ngin nrib ga’ fan nga rarogon Jehovah​—ni feni thothup.​—Exodus 28:36; 39:30.

¹² Ma tamilangnag e Bible rogon fene thothup Jehovah ni bokum yay. Machane buchuuw e girdi’ ko re fayleng ney nib kireb e manang fan e re fel’ngin Jehovah ney. Jehovah e bbeech, mab machalbog, mab dar ko urngin e denen. (Isaiah 6:3; 59:2) Ke fal’eg Jehovah e kanawo’ ni ngan n’ag fan e denen, ara ngan chuweg, machane dabi tay ni nge par e denen ni manemus. Faan manga ra m’agan’ Jehovah ngay ni nge par e denen ni manemus, ma dariy kanawoen ni ngada athapeged ni nge fel’ e re fayleng ney. (Proverbs 14:12) Nap’an nra taw ko ngiyal’ ni ke dugliy Jehovah ma ra sulweg urngin ban’en nge thothup bayay. Rib mich ni ra yodor, ya aram e n’en nib m’agan’ e En nib Thothup ngay.

13, 14. Mang fan ni de thang Jehovah fapi tatogopuluw u Eden?

¹³ Rayog rok Jehovah ni nge thang e pi tatogopuluw nem u Eden me tabab bayay, fa? Bay gelngin ni nge rin’; ma dabi n’uw nap’an ma ra fanay gelngin ni nge thang urngin e kireb. Ma fith boch e girdi’: “Mang fan ni de thang e kireb u nap’an ni ke mus ni dalip e pi tadenen u fayleng? Faan manga thangrad ko ngiyal’ nem ma ra siyeg e denen nge pi gafgow ni gad be guy u fayleng e chiney, fa?” Ere mang fan ni rin’ Jehovah e n’en ni ke rin’? Be gaar Deuteronomy 32:4: “Ir e ba yal’uw ma mmat’aw urngin e tin ni ma rin’.” Jehovah e ir e th’abi mat’aw. Ma “Somol e ba t’uf rok e tin nib mat’aw.” (Psalm 37:28) De thang Jehovah e pi tatogopuluw u Eden ya ba t’uf rok e tin nib mat’aw. Mang fan ni de thangrad?

¹⁴ Bochan e togopluw ni tay Satan, me sum e magawon ko ba mat’aw e gagiyeg rok Got fa danga’. Bochan e ba mat’aw Jehovah ma thingari pithig e re magawon nem nrogon nib mat’aw. Bpuluw ni ngan thang e pi tatogopuluw nem, machane faan manga thangrad ko chingiyal’ nem ma dab ni pithig fare magawon nrogon nib mat’aw. Faan manga thangrad ma ra micheg Jehovah nib gel ngorad, machane dan togopluw nga gelngin Jehovah. Miki yog Jehovah ngak Adam nge Efa e n’en nib m’agan’ ngay. I yog ngorow ni ngar diyengow nge sug e fayleng nga pi fakrow, ma ngar ayuwegew e fayleng ma ngar suweyew e tin nu fayleng ban’en. (Genesis 1:28) Faan manga thang Jehovah Adam nge Efa, ma ra aw nib m’ay fan e pi n’en nib m’agan’ ngay ni fan ko girdi’. Rogon fene mat’aw Jehovah e dabi pag ni nge yodor, ya gubin ngiyal’ ma ra lebug e pi n’en nib m’agan’ ngay.​—Isaiah 55:10, 11.

15, 16. Uw rogon nrayog ni ngada ayuweged e girdi’ ni yad ma weliy yugu boch e kanawo’ ni ngan “pithig” fare magawon ni sum u Eden?

¹⁵ Bay be’ ni kab llowan’ ngak Jehovah ni rayog rok ni nge pithig fare magawon, fa? Bay boch e girdi’ ni ma weliy rogon ni ngar “pithiged” fare magawon u Eden. Machane nap’an ni yad be weliy, ma gathi gowa yad be yog ni bay yugu boch e kanawo’ ni kab fel’ boch ni ngan pithig fare magawon riy? Sana gathi yad ba kireb, machane dar nanged Jehovah nge fene ga’ e gonop rok. Nap’an ni yol apostal Paul ngak e pi Kristiano u Roma, me weliy fene toar e gonop rok Got, miki weliy “e tin riyul’ nib mith” ni ir e n’en nib m’agan’ Jehovah ngay ni aram e ra fanay Gil’ilungun e Messiah ni nge thapeg e girdi’ nib yul’yul’ ma nge tay nib thothup fithingan. Ma uw rogon e gonop rok Got u wan’ Paul? U tungun e babyor rok fare apostal e gaar: “I Got nri taareb, ni ke mus ni ir e ba gonop e ngan ta’ fan u daken Jesus Kristus ndariy n’umngin nap’an! Amen.”​—Roma 11:25; 16:25-27.

¹⁶ Manang Paul ni Jehovah e “ke mus ni ir e ba gonop”​—ma ir e th’abi llowan’. Mini’ u fithik’ e girdi’ nib tadenen e rayog rok ni nge lemnag reb e kanawo’ ni kab fel’ boch ni ngan pithig fare magawon riy​—ni reb e magawon ni dariy e mo’maw’ riy ni bod fene mo’maw’ fare togopuluw ko gonop rok Got? Ere thingar da ayuweged e girdi’ ni ngar ted fan Got ni bod rogon ni gad ma liyor ngak fare Got nib ‘gonop.’ (Job 9:4) Nap’an ni ra tamilang u wun’dad fene gonop Jehovah ma rayog ni ngada pagedan’dad ni birok Jehovah e kanawo’ e ir e bin th’abi fel’.​—Proverbs 3:5, 6.

Nge Fel’ u Wan’uy Fel’ngin Jehovah nib Gagiyel

17. Uw rogon ni ra gel e tamilangan’ u rogon e t’ufeg rok Jehovah ma rayog ni ayuweg e piin ni ke magawon lanin’rad ni bochan e ke pag Got e gafgow be yib?

¹⁷ “Got e t’ufeg.” (1 John 4:8, NW) Pi thin nem nib gagiyel u Bible, e be dag e re fel’ngin Jehovah, ni baaram nib gagiyel ni ir e yi ba adag u fithik’ pi fel’ngin Got, ma ir e bin ni ma fal’eg laniyan’ e piin ni ke magawon lanin’rad ni bochan e ke yoor e kireb. Ke dag Jehovah e t’ufeg u rogon ni ke pithig e magawon ni sum ni bochan e denen. T’ufeg rok Jehovah e ke k’aring ni nge pi’ e athap ngak pi fak Adam nge Efa, me pi’ ngorad e kanawo’ ni ngar chugurgad ngak, ma ngar fel’gad u wan’ Got. (Genesis 3:15) Ke pag Got ni ngar chuchugurgad ngak u daken e meybil me bing e kanawo’ ngorad ni nge fel’ thilrad Got. (John 3:16) T’ufeg e ke k’aring Got ni nge k’adan’ u puluwon e girdi’, ma nge mab e kanawo’ ngak boor e girdi’ ni ngar pied keru’rad ngak Satan mar mel’eged Jehovah ni nge mang Pilung rorad.​—2 Peter 3:9.

18. Gad ba tow’ath ni bochan e ke tamilang e mang u wun’dad, ma mang e gad ra weliy ko bin ni migid e thin?

¹⁸ I non reb e pastor ngak boch e girdi’ ni kar muulunggad ni ngar madnomnaged e puguran u reb e cham ni yib ko nam rorad ni gaar: “Dada nanged fan ni ke pag Got ni ngii gafgow e girdi’.” Ba gafgow ya de nang faanem fan! Gathi gad ba tow’ath ni bochan e gad manang fan? (Deuteronomy 29:29) Ma gad manang ni dabki n’uw nap’an me chuweg Got e gafgow, ya ir be’ nib gonop, mab mat’aw, ma ma t’ufeg e girdi’. Ma aram e n’en ni micheg ni ra rin’. (Revelation 21:3, 4) Machane uw rogon urngin e girdi’ ni kar m’ad ni ke bokum miriay e duw e chiney? Dariy e athap rok e pi girdi’ nem ni bochan e kanawo’ ni ke fanay Jehovah ni nge pithig fare magawon ni sum u Eden, fa? Danga’. T’ufeg rok Got e ke k’aring ni nga ki pi’ e kanawo’ ngorad, ma rayog e re kanawo’ nem ni bochan e yad ra fas ko yam’. Aram e n’en ni gad ra weliy ko bin ni migid e article.

Uw Rogon ni Ga Ra Fulweg?

• Mang e rayog ni nga dogned ngak be’ ni ra fith ko mang fan ni ke pag Got ni nge gafgow e girdi’?

• Uw rogon ni ke m’ug nib thothup Jehovah ma ir ba mat’aw u rogon ni i ngongol ko fapi tatogopuluw u Eden?

• Mang fan ni ngada ayuweged e girdi’ ni nge tamilang u wun’rad fene gel e t’ufeg rok Jehovah?

[Picture on page 3]

Mu guy rogon ni ngam ayuweg e piin ni ke magawon lanin’rad ni bochan e gafgow u fayleng

[Pictures on page 5]

I deeriy David nge Habakkuk Got u fithik’ e yul’yul’