Pagan’ u fithik’ e Tamilangan’ nib Puluw ko Tirok Got

BOCH e girdi’, e n’en ni be yog e Bible u murung’agen e t’ufeg nge runguy rok Got e be balyangan’rad riy ko uw rogon. Yad be fith ni be lungurad: Faanra Got e baadag ni nge chuweg e kireb, ma manang rogon ni nge rin’, ma bay gelngin ni ra rin’, me ere mang fan ni yugu be yoor e kireb i yan? Ma magawon rorad e rogon ni ngan puluwnag dalip i ban’en nib thil e: (1) Got e ba gel gelngin; (2) Got e t’ufeg mab fel’; ma (3) gafgow e ka be ulul i yan. N’en ni ka rogned e faanra bin tomur ko dalip i n’em e dabiyog ni nga nog ni de riyul’, me ere sogonapan e ba’ reb ko fagal ni baaram ni dabiyog ni nge riyul’. Rogon rorad, e reb e Got e dabiyog ni nge taleg e kireb ara dariy fan u wan’.

Boch e rran nga tomuren nni gothey fare World Trade Center u New York, ma bay reb e tayugang’ ko teliw ni goo yimnang u Meriken ni gaar: “Kan deeriyeg ni . . . bokum miriay yay u nap’an e yafas rog ko mang fan ni ke pag Got e kireb nge gafgow be buch. Ma ngari gog e riyul’ riy ni dagu nang e fulweg riy ni polo’, ya ki mus ngog ni dabiyog ni gu fulweg nib fel’ rogon.”

Rogon e n’en nnog ko re n’ey, e reb e professor ko theology e yoloy ni ke falan’ nga rogon e “theology nib fel’” ni be machibnag ere tayugang ko teliw ney. Miki weliy rogon e lem rok reb e llowan’ ni yoloy ni gaar: “Feni dabiyog ni ngan nang fan e gafgow e ku arrogon ni dabni nang fan Got.” Machane rriyul’ ni dabiyog ni ngan nang fan ni ke pag Got e kireb be buch?

Tabolngin e Kireb

Rib thil ko tini ma nga be yog e pi tayugang ko teliw, ni fare Bible e der dag yaan Got ni ke pag e kireb ma dabni nang fan. Reb e n’en ni kiy riy min nang fan fare deer ni murung’agen e kireb e ngan nang ni Jehovah de sunmiy ba fayleng nib kireb. I sunmiy e gal ni som’mon e girdi’ ni yow ba flont, ndariy e denen rorow. Me changar Jehovah ko maruwel rok ko pi n’en ni ke sunmiy meni pirieg ni “rib manigil.” (Genesis 1:26, 31) I m’agan’ ngay ni Adam nge Efa e ngar ga’ nagew fare Paradis nu Eden nga ga’ngin yang e fayleng ma ngar suguyew ko girdi’ nib falfalan’ u tan e ayuw ko t’ufeg rok nib th’abi ga’.​—Isaiah 45:18.

Kireb e tabab u ba kan nni sunmiy, ni yugu aram rogon ni sum ko som’mon ma ba yul’yul’ ku Got, me yan i sunmiy reb e lem ni ri adag ni nguun liyor ngak. (James 1:14, 15) Togopuluw rok e yibi m’ug u fayleng u nap’an ni wawliy e gal ni som’mon e girdi’ ni ngar unew ngak ko togopuluw ngak Got. Gonapan e ngar folgow ko fonow rok Got ni rib tamilang ni dabni kay ara nmath nga wom’engin fare ke gek’iyen e tamilangan’ ko fel’ nge kireb, me fek Adam nge Efa boch ngar kayew. (Genesis 3:1-6) Ma faanra rin’ew ni aram rogon, ma aram e gathi kemus ni dar folgow ku Got ya ku kar dagew ni yow baadag ni ngar parew rorow ni dakuriy rogon Got ngorow.

Ni Weliy Rogon Pangiy

Re togopuluw ney u Eden u murung’agen pangiy, e ba magawon ni rib ga’ fan ko palpalthib. Fare togopuluw ni tay e girdi’ e marwarnagan’uy ko be gagiyegnag Jehovah e pi n’en ni ke sunmiy nib fel’ rogon fa danga’. Gur ani Tasunmiy e bay mat’awun ni nge yog ni ngari i fol e girdi’ rok u urngin ban’en? Gur ra fel’ rogon e girdi’ ni faanra ur ngongolgad ni goo yad rorad?

Jehovah e fal’eg rogon e re magawon ney ni fan ko gagiyeg rok u ba kanawo’ ni dag ni dariy thibngin ma ba thabthabel rogon e t’ufeg rok, nge feni mat’aw, nge gonop rok, nge gelngin. Rayog ni nge fanay gelngin nge thang e re togopuluw nem ni papey. Re n’em e ba dake ba puluw, ni bochan ni bay mat’awun ni nge rin’ ni aram rogon. Machane ra rin’ ni aram rogon ma dabiyog ni nge pi’ e fulweg ko pi deer u rogon pangiy ni faan kan weliy. Maku reb e, ku yugu rayog rok Got ni nge fek owchen ko re denen nem. Binem e kanawo’ e sana ra lemnag boch e girdi’ e chiney ni ban’en ni bay e t’ufeg riy. Machane, ku arrogon e biney ni ku dabiyog ni nge pi’ e fulweg ko fare n’en ni yog Satan ni girdi’ e ra fel’ rogorad ni faanra yad e ngar gagiyegnaged yad. Maku reb e, gathi kanawoen ni aram rogon e ra k’aring e girdi’ nge chafegrad nga orel ko kanawo’ rok Jehovah? Ma angin e gafgow ni manemus.

U fithik’ e gonop rok Jehovah, ma ke pag e girdi’ ni nguur rin’ed e tini yad be lemnag ni ba’ nap’an. Ni yugu aram rogon ni fan e re n’eney e kan pag e kireb ni nga i par ni bay nap’an, ma aram e rayog ko girdi’ ni ngar daged ko rayog ni ngar gagiyegnaged yad rorad ni dabi un Got ngorad, ni nguur pired u tan e tirorad e motochiyel ko tinib mat’aw nge tinib kireb. Ere mang angin ni ke m’ug? Chepin e girdi’ e kan par ni yibe mahl, nge ngongol ni de mat’aw nge togopuluw, nge gafgow. Urngin e pi togopuluw ni kan tay ngak ni ke m’ug ni dariy angin e ra pithig fare magawon ni sum u Eden ni ri taab yay ma kemus.

Ma aram nap’an, me dag Got e t’ufeg rok ni pi’ Fak, ni Jesus Kristus, nge pi’ e yafas rok nib girdi’ ni ba maligach nge biyuliy e girdi’. Aram tapgin ma ke bung rogon e girdi’ ni piin ra fol e ngar chuwgad u tan e gechig ko denen nge yam’ ni angin ni de fol Adam. Fare biyul e ke bing e kanawo’ ko yafas ni manemus ni fan ngak e piin ni ke michan’rad ngak Jesus.​—John 3:16.

Ke pagan’dad ya ke micheg Jehovah ni gafgow ni be tay e girdi’ e ra m’ay. “Dabki n’uw nap’an me yan e piin nib kireb nga bayang,” aray rogon ni yoloy fare psalmist. “Ra mu gayiyrad, ma dab mu piriegrad; machane piin ni yad mmunguy e bay ra pired u daken e nam u fithik’ e gapas ni yad ba falfalan’.”​—Psalm 37:10, 11.

Pagan’ Nge Falfalan’ Gabul nge Langleth

Pi yiiy ko Bible nem ni ke lebug e ke dag ni tayim rok Got ni nge taleg e m’ar, nge kireban’, nge yam’ e ke chugur. Mu fal’eg i lemnag feni fel’ yaan e pi n’en ni bay yib ni faan nni piliyeg e changar rok apostal John nge guy. I yoloy ni gaar: “Ku guy reb e tharmiy ni biech nge reb e fayleng nib biech; ya fa bin som’mon e tharmiy nge bin som’mon e fayleng e ke yan nga bang, ma day e dakuriy. . . . Mi Got bay i par rok e [girdi’]. Ma bayi n’ag urngin e lu’ u owcherad, ma yam’ e dakuriy, maku e ri tay e kireban’ ara ma yor ara amith ni dakuriy. Fa tin kakrom ban’en e ke chuw.” Ma reb e thin ni be ta’ gelngin ni ri ba’ fan ni nge pagan’uy ko pi n’en ni kan micheg ney, e nog ku John nni gaar: “Mu yoloy, ya pi thin ney e rib mich ma ba riyul’.”​—Revelation 21:1-5, NW.

Uw rogon fa bokum bilyon i girdi’ ni yad ba fel’ ni kar m’ad ni ka nap’an fare togopuluw u Eden? I micheg Jehovah ni ra fulweg nge faseg e piin ni yad bay e chiney ni kar molod ni yad ba yam’. Apostal Paul e gaar: “Bay e athap rog ngak Got . . . ni bay e fas ko yam’ ko piin ni ba mat’aw nge piin ni de mat’aw.” (Acts 24:15, NW) Pi cha’ ney e bay e athap rorad ni ngar pired u lan ba fayleng “ni nge par e piin ni yad ba mat’aw riy.”​—2 Peter 3:13, NW.

Ri bod rogon ba matam ni rib fel’ ni pag fak ngan sey ni rib amith ni faanra manang ni ra fel’ rogon riy ni dariy numngin nap’an, ku arrogon ni ke pag Jehovah e girdi’ ngar pirieged e kireb ni bay u fayleng ni ba’ n’umngin nap’an. Machane, bay e tow’ath ni manemus ni be sonnag urngin e piin ni yad be guy rogon ni ngar rin’ed e tin nib m’agan’ Got ngay. I weliy Paul ni gaar: “Ya tin ni sunmeg Got e turguy Got ni nge m’ay fan, ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’, ni aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.”​—Roma 8:20, 21.

Re n’ey e rriyul’ nib thin nib biech​—gathi fa tin ni gad ma guy u television ara gadad ma poy ko simbung ya thin nib fel’. Aram fare thin ni th’abi fel’ ni yib ko “fare Got ko urngin e pagan’,” ni ri ma runguydad.​—2 Korinth 1:3, NW.

[Pictures on page 6]

Tayim e ke dag ni girdi’ e dabiyog ni ngar gagiyegnaged yad nib fel’ rogon ni de moy Got riy

[Credit Lines]

Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo