Ga Ra ‘Pag fare Kan ni Thothup Nge Mang Ir e I Gagiyegnag Pangim,’ Fa?
‘Mpaged fare kan ni thothup nge mang ir e i gagiyegnag pangimed, ma aram e dab um marod nga ar’aren lanin’med.’—GALATIA 5:16.
1. Uw rogon nrayog ni ngan taleg e magafan’ nri ni denen nib togopuluw ko fare kan thothup?
BAY reb e kanawo’ ni ngan taleg e magafan’ nri ni denen nib togopuluw ko kan ni thothup rok Got. Re kanawo’ nem e aram e ngan rin’ e n’en ni yog apostal Paul ni gaar: ‘Mpaged fare kan ni thothup nge mang ir e i gagiyegnag pangimed, ma aram e dab um marod nga ar’aren lanin’med.’ (Galatia 5:16) Faan gad ra pag gelngin Got ni nge pow’iydad, ma aram e dabi magawonnagdad e pi ar’ar ko dowef nib kireb.—Roma 8:2-10.
2, 3. Faan gad ra pag fare kan ni thothup nge mang ir e i gagiyegnag pangidad, ma mange ra rin’ ngodad?
2 Nap’an ni gad be ‘pag fare kan ni thothup nge mang ir e i gagiyegnag pangidad’, ma gelngin Got e ra k’aringdad ni ngad folgad ku Jehovah. Gad ra dag pi fel’ngin Got u nap’an e machib, ngu lan e ulung, ngu lan e tabinaw, nge ku yu yang. Ra m’ug ni be maruwel wom’engin fare kan thothup u fithik’dad u rogon e ngongol rodad ngak e en mabgol rodad, bitir rodad, piin ni gadad nga mich, nge yugu boch e girdi’.
3 Ngan pag ‘fare kan ni thothup nge gagiyegnag pangidad’ ma rayog ni ngad siyeged e denen. (1 Peter 4:1-6) Faanra be maruwel fare kan ni thothup u fithik’dad, ma rib mudugil ndab da rin’ed reb e denen ndabiyog i n’ag fan. Machane ku mang boch e kanawo’ nra yib angin ngodad ni faan gad ra pag e kan ni thothup nge gagiyegnag pangidad?
Mu Par ni Gab Chugur Ku Got nge Kristus
4, 5. Uw rogon ma ngan pag fare kan ni thothup nge gagiyegnag pangidad e ra rin’ ban’en ko lem rodad u murung’agen Jesus?
4 Bochan ni gad ma pag fare kan ni thothup nga i gagiyegnag pangidad, ma aram e rayog ni nge par nib chugur e tha’ u thildad Got nge Fak. Nap’an ni be weliy Paul murung’agen e pi tow’ath ko tirok Got ban’en, me yog ngak e pi Kristiano nu Korinth ni gaar: “Thingar mu nanged [piin ni ma ta’ fan e liyos kafram] ndariy be’ ni fare Kan ni Thothup rok Got e be pow’iy nrayog ni nge gaar, ‘Da yigi buch waathan Jesus!’ ma dariy be’ nrayog ni nge weliy ni nge gaar, ‘Jesus e Somol,’ ni faanra gathi fare Kan ni Thothup e ke pow’iy ke yog.” (1 Korinth 12:1-3) Re gelngin nra k’aring be’ nge gernag Jesus e ba mudugil ni ke yib rok Satan ni Moonyan’. Ere bochan ni gad e Kristiano ni kad paged fare kan ni thothup be gagiyegnag pangidad, ma ba mudugil u wan’dad ni faseg Jehovah Jesus ko yam’ me tolangnag ko tin ni ka ba’ ko pi n’en ni ke sunumiy. (Filippi 2:5-11) Ba mich u wan’dad fare biyul ni pi’ Kristus ma ke fel’ u wan’dad Jesus ni ir fare Somol ni ke tay Got ni nge mil fadad ngak.
5 Boch e piin ni ur dake Kristiano gad ko bin nsom’on e chibog C.E. e de mich u wan’rad ni yib Jesus nib girdi’. (2 John 7-11) Bochan ni mich u wan’ boch e girdi’ e re n’em ma aram me k’aringrad nge daki mich u wan’rad e tin riyul’ e machib u murung’agen Jesus, ni ir fare Messiah. (Mark 1:9-11; John 1:1, 14) Ngu uda paged fare kan ni thothup nge gagiyegnag pangidad e ra ayuwegdad ni nge dab da motoyilgad ngak e piin ni kar paged e tin riyul’ ara apostate. Machane kemus nfaanra uda pared ni gad ba od ko pi machib nib puluw nge rogon e lem ku Got u lan e Bible ma aram e rayog ngodad e gol nib gel rok Jehovah ma ud ‘pared ni gad be fol ko tin riyul’.’ (3 John 3, 4) Ere ngad dugliyed ni ngad siyeged ndab da motoyilgad ngak e piin ni kar paged e tin riyul’ yad be togopuluw ngay ya nge yog ni par nib fel’ e tha’ u thildad e Chitamangidad ni bay u tharmiy.
6. Mange pi fel’ngin ni ma sunumeg e kan ni thothup rok Got nga laniyan’ e piin ni yad ma pag e kan ni thothup nge gagiyegnag pangirad?
6 I tay Paul e meybil ko liyos nge nochi ulung ko teliw nib muun ko “tin nib kireb ni yima ar’arnag” ni bod e ngongol ndarngal nge ngongol ni puwlag. Machane i weliy ni gaar: ‘Ma piin ni kar manged girdien Kristus Jesus e kar lied e tin nib kireb ni be ar’arnag lanin’rad ni ke un ngay urngin e tin nib kireb ni yima yim’ ni bochan. Fare kan ni thothup e ir e ke fasegdad; ere thingari mang ir e i gagiyegnagdad.’ (Galatia 5:19-21, 24, 25) Mange pi fel’ngin ni ma sunumeg gelngin Got rok e piin ni yad ma par ma yad ma pag fare kan ni thothup nge gagiyegnag pangirad? I yoloy Paul ni, ‘fare kan ni thothup e ma sunumeg u lanin’dad e t’ufeg, nge felfelan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an’, nge t’ar laniyan’.’ (Galatia 5:22, 23) Ngad weliyed murung’agen rarogon wom’engin e kan ni thothup.
“Nge Bagadad Me T’uf Rok Bagadad”
7. Mange t’ufeg, ma mang boch i rarogon?
7 T’ufeg—e reb i wom’engin fare kan thothup—ba ga’ nib muun ngay e runguy nib gel nge lem nde siin ni fan ngak boch e girdi’, nib chagil ngay ba tha’ nib gel. Bible e be yog ni “Got e t’ufeg” ni bochan e ir e kari dag e re fel’ngin nem nrib fel’ rogon. I m’ug gelngin e t’ufeg rok Got nge Fak ngak e girdi’ u daken fare biyul ni pi’ Jesus Kristus. (1 John 4:8; John 3:16; 15:13; Roma 5:8) Gad ni pi gachalpen Jesus e gad ba gagiyel ko t’ufeg rok bagadad ngak bagadad. (John 13:34, 35) Tin nriyul’ riy, e kan motochiyelnag ngodad ni “nge bagadad me t’uf rok bagadad.” (1 John 3:23) Maki yog Paul ni t’ufeg e ba gum’an’ ma ba gol. Ma dar ma awan’, ma de tolangan’, ma de kireb daken, ara ke mus ni ir e ma lemnag ir. T’ufeg e de papey e damumuw ngak ara aw nga laniyan’ e n’en nib kireb ni kan rin’ ngak. Ba felfelan’ ko tin nriyul’ ma de fel’ u wan’ e ngongol nib kireb. T’ufeg e dabiyog ni nge pag ir ndab ki michan’, ma dab ki l’agan’, ma dab ki gum’an’. Maku, ireray ban’en nra par ndariy n’umngin nap’an.—1 Korinth 13:4-8.
8. Mang fan ni thingar da daged e t’ufeg ko piin ni gad ma pigpig ku Jehovah u taabang?
8 Faan gad ra pag e kan ni thothup rok Got nge yibnag e t’ufeg nga lanin’dad, ma re fel’ngin nem e ra m’ug ko tha’ u thildad Jehovah nge piin ni yad ba migid ngodad. (Matthew 22:37-39) I yoloy apostal John ni gaar: “En ndariy e t’ufeg rok e kab yam’. En ni be fanenikay walagen ni girdien Kristus e be’ ni ma thang e fan ko girdi’; ma gimed manang ni be’ nib ta thang e fan ko girdi’ e dawori yog e yafos ndariy n’umngin nap’an ngak.” (1 John 3:14, 15) Be’ nib ta thang e fan e rayog ni nge pirieg bang ndariy e riya’ riy u lan e mach rok piyu Israel ni yima nab ngay ni ke mus ni faanra de fanenikay e en ni ke li’ kem’. (Deuteronomy 19:4, 11-13) Faanra be gagiyegnagdad e kan ni thothup, ma gad ra dag e t’ufeg ngak Got nge piin ni gad ma pigpig u taabang, nge ku boch e girdi’.
“Felfelan’ ni Ma Pi’ Somol Ngomed e Bay i Pi’ Gelngimed”
9, 10. Mange felfelan’, ma mang boch i fan ni ngan felfelan?
9 Jehovah ir “fare Got nib felfelan’.”(1 Timothy 1:11, NW; Psalm 104:31) Faen Fak e baadag ni nge rin’ e tin nib m’agan’ e Chitamangin ngay. (Psalm 40:8; Hebrews 10:7-9) Ma “felfelan’ ni ma pi’ Somol ngodad e bay i pi’ [gelngidad].”—Nehemiah 8:10.
10 Fare felfelan’ ni ke pi’ Got ngodad e ma k’aringdad nge fel’ u wan’dad u nap’an ni gad ra rin’ e tin nib m’agan’ Got ngay ni mus ko ngiyal’ ni kad mada’naged e gafgow, kireban’, nge togopuluw. Uw feni rib gel e felfelan’ ni ma yibnag e “tamilangan’ rok Got” ngodad! (Proverbs 2:1-5) Tha’ u thildad Got e be tor nga daken e tamilangan’ rodad nib puluw nge michan’ rodad ngak nge fare biyul ni pi’ Jesus. (1 John 2:1, 2) Nga kun mang bang ko fare ulung i walag u ga’ngin yang e fayleng e ku reb i tapgin e felfelan’. (Zefaniah 3:9; Haggai 2:7) Athap rodad ni fan ko fare Gil’ilungun nge fare tow’ath ni ngad wereged fare thin nib fel’ e ma yibnag e felfelan’ ngodad. (Matthew 6:9, 10; 24:14) Maku ban’en ni ma yibnag e felfelan’ ngodad e fare athap ko yafas ni manemus. (John 17:3) Bochan ni bay ba athap rodad nib fel’ ni aram rogon, ma thingar ‘da pared ni gad ba felfelan.’—Deuteronomy 16:15.
Ngan Gapas Min Gum’an’
11, 12. (a) Uw rogon ni ga ra weliy ko mange gapas? (b) Mang angin e gapas rok Got ni ma yib ngodad?
11 Gapas—ku reb i wom’engin e kan ni thothup—ni lem nib pagan’ nge puf rogon ndariy ban’en ni nge magawonnagey. Chitamangidad ni bay u tharmiy e ir e Got ko gapas, ma kan micheg ngodad ni: “Ra pi’ Jehovah gelngin ngak e girdi’ rok u fithik’ e gapas.” (Psalm 29:11; 1 Korinth 14:33) I yog Jesus ngak pi gachalpen ni gaar: “Nggu tay e gapas nge par romed; nggu pi’ e gapas rog ngomed.” (John 14:27) Uw rogon nra ayuweg e re n’em pi gachalpen?
12 Gapas ni pi’ Jesus ngak pi gachalpen e yibnag e pagan’ nga gum’ircharad nge lanin’rad me warnag e marus rorad. Yib e gapas ngorad ko ngiyal’ ni yog ngorad fare kan ni thothup ni kan micheg. (John 14:26) U tan gelngin fare kan ni thothup e gad ma pirieg e “gapas rok Got” riy, ni ir e ma yibnag e pagan’ nga gum’irchadad nge lanin’dad. (Filippi 4:6, 7) Maku, kan ni thothup rok Got e ma ayuwegdad ni ngad pared ni ba gapas lanin’dad maku bay e gapas u thildad nge boch e girdi’.—Roma 12:18; 1 Thessalonika 5:13.
13, 14. Mange gum’an’, ma mang fan nthingar ud daged?
13 Gum’an’ e kub l’ag rogon ko gapas, ni bochan e gad be gum’an’ ko n’en ni ma k’aring e damumuw ara oloboch ya gad be athapeg ni ngan fal’eg ban’en nge fel’. Got e ba gum’an’. (Roma 9:22-24) Mus ku Jesus ma ki dag e re fel’ngin ney. Rayog ni nge yib angin ngodad ni bochan e yoloy Paul ni gaar: “Erfan ni ke runguyeg Got, ni bochan e nge yog ni dag Kristus Jesus feni gum’an’ u puluwog, i gag e en nth’abi tadenen u fithik’ e pi tadenen, ni nge dag ngak e piin ni bayi mich Jesus u wun’rad nga tomreg me yog e yafos ndariy n’umngin nap’an ngorad.”—1 Timothy 1:16.
14 Fel’ngin e gum’an’ e ma ayuwegdad ni ngad k’adedan’dad u nap’an nra yog ara rin’ boch e girdi’ ban’en ngodad ni dubdad. I fonownag Paul e pi Kristiano ni yad ni gaar: “Um pired nib gum’an’med rok urngin e girdi’.” (1 Thessalonika 5:14) Bochan e gad gubin ndaworda flontgad ma gad ma oloboch, ba mudugil ni gad baadag ni nge k’adan’ e girdi’ u puluwdad, ma ngar gum’an’gad u nap’an ni gad ra oloboch. Gad gubin ma ngad athamgilgad ngad “athamgiliyed urngin ban’en u fithik’ e gum’an’.”—Kolose 1:9-12.
Mu Dag e Gol nge Fel’ Ngak e Girdi’
15. Mu weliy fan e gol, ma ga weliy boch rarogon.
15 Ma m’ug e gol u nap’an ni gad ma dag nib ga’ fan yugu boch e girdi’ u wan’dad u daken e thin nib sumunguy nge thin nrayog ni nge ayuweg be’ nge ngongol nib fel’. Jehovah e ba gol, maku arrogon Fak. (Roma 2:4; 2 Korinth 10:1) Pi tapigpig rok Got nge Kristus e thingar ra daged e gol. (Mikah 6:8; Kolose 3:12) Mus ko piin ni gathi rib fel’ e tha’ u thilrad Got ni kar daged e “gol nib pag rogon.” (Acts 27:3; 28:2, NW) Ere, rib mudugil ni rayog ni ngad daged e gol ni faan gad ra “pag e kan ni thothup nge pow’iydad.”
16. Mang boch ban’en nsusun ni nge k’aringdad ngad daged e gol?
16 Rayog ni ngad daged e gol ni mus ko ngiyal’ ni kad damumuwgad ni bochan e ke yog be’ boch e thin ara ke rin’ be’ boch ban’en ngodad nra kirebnag lanin’dad. I gaar Paul: “Faanra mu damumuwgad, ma dab mpaged e damumuw romed nge fekmed nga fithik’ e denen; ma dab mpired ni gimed ba damumuw nge polo’ reb e rran. Dab mu binged e kanawo’ ngak moonyan’. Machane um golgad ngomed, me bigimed me munguy ngak bigimed, mu um n’aged fan u wan’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.” (Efesus 4:26, 27, 32) Ba puluw ni ngan dag e gol ngak e piin ni ke yib e skeng ngorad ni kar gafgowgad riy. Arrogon, ba Kristiano ni piilal e dabi dag e gol ni faanra de pi’ e fonow u lan e Bible ni bochan e dabun ni nge kirebnag laniyan’ be’ ni ke riya’ ya ke chugur ni nge pag “urngin mit e fel’, nge mat’aw, nge tin riyul’.”—Efesus 5:9.
17, 18. Mang fan e fel’ ngak e girdi’, ma uw rogon ni ngad daged e re fel’ngin ney u lan e yafas rodad?
17 Fel’ ngak e girdi’ e ba fel’ngin nib fel’, maku ba gafarig nib fel’, ara fel’ngin ni ngan par ni yib fel’. Urngin ban’en u murung’agen Got ma ba fel’. (Psalm 25:8; Zekariah 9:17) Jesus e ku bay fel’ngin nib fel’ maku ba fel’ e gafarig rok. Machane, de fel’ u wan’ ni ngan pining ni ir e ba “Fel’” u nap’an ni kan pining fare “Tamachib Ni Gab Fel’” ngak. (Mark 10:17, 18) Riyul’ e re n’ey ni bochan ke nang ni Got e ir e en nib fel’ rogon ni ke dag e re fel’ngin ney.
18 Gelngidad ni ngad rin’ed e tin nib fel’ e ma magawon ni bochan e denen ni ke af ngodad. (Roma 5:12) Machane, rayog ni ngad daged e re fel’ngin ney u nap’an ni gad ra meybil ngak Got ni nge ‘fil e tin nib mat’aw ngodad.’ (Psalm 119:66) I yog Paul ngak e piin taareb e michan’ rorad u Roma ni gaar: “Rib mich u wun’ug nri gimed ba gol ma gimed ba llowan’.” (Roma 15:14) Be’ ni Kristiano ni piilal ko ulung e thingari mang be’ ni “ba adag e tin nib fel’.” (Titus 1:7, 8) Faanra uda pared ni be gagiyegnagdad e kan ni thothup ku Got, ma yira nangdad ni bochan e gad ba fel’ ngak e girdi’ ma dabi pag Jehovah tildad ni bochan e ‘tin nib fel’ ni gad ma rin’.—Nehemiah 5:19; 13:31.
‘Michan’ nib Riyul’’
19. Mu weliy fan e michan’ nrogon ni bay ko Hebrew 11:1.
19 Michan’—e ku ir reb i wom’engin fare kan thothup e—“aram e ke pagan’dad ko pi n’en ni ir e ke l’agan’dad ngay, ma ke michan’dad ko pi n’en ndarud guyed nga owchedad.” (Hebrews 11:1) Faanra bay e michan’ rodad, ma ba mudugil u wan’dad ni gubin ban’en ni ke micheg Jehovah e dariy e maruwar riy nra lebug. Mich ko pi n’en nib riyul’ machane danir guy e rib gel ni ka nog ni michan’ e ba taareb rogon ko re n’em. Ni bod rogon, ni pi n’en ni bay ni kan sunmiy e be micheg ngodad ni bay ba Tasunmiy. Ireray e re miti michan’ ni gad ra dag ni faan gad ra pag e kan ni thothup nge gagiyegnag pangidad.
20. Mang fare “denen ni ke m’agdad ni ke chichiiy pa’ rodad,” ma uw rogon nrayog ni ngad siyeged e ar’ar ko dowef?
20 Ra dariy e michan’ ma taareb rogon ko “denen ni ke m’agdad ni ke chichiiy pa’ rodad.” (Hebrews 12:1) Ba t’uf ni ngad taga’gad nga daken e kan ni thothup rok Got ma gad siyeg e ar’ar ko dowef, nge chugum, nge machib ni googsur nrayog ni nge kirebnag e michan’ rodad. (Kolose 2:8; 1 Timothy 6:9, 10; 2 Timothy 4:3-5) Kan ni thothup e ma yognag e michan’ ngak e pi tapigpig rok Jehovah e ngiyal’ ney ni bod rogon e pi tapigpig u m’on ko Kristiano nge ku boch e girdi’ ni kan tay murung’agrad nga lan e Bible. (Hebrews 11:2-40) Ma “bin nriyul’ i rogon nib mich Kristus u wan’uy” e rayog ni nge gelnag e michan’ rok boch e girdi’.—1 Timothy 1:5; Hebrews 13:7.
Ngan Dag e Sumunguy nge T’ar Laniyan’
21, 22. Mang fan e sumunguy, ma mang fan nsusun ni ngad daged e re fel’ngin ney?
21 Sumunguy e ma m’ug ko ngongol. Reb i fel’ngin Got e sumunguy ko ngongol. Gad manang e re n’ey ni bochan e Jesus, ni ir be’ ni ma ngongol u fithik’ e sumunguy, e ba fel’ rogon ni i dag rarogon Jehovah. (Matthew 11:28-30; John 1:18; 5:19) Ere, mange ba t’uf ni ngad rin’ed ni gad e pi tapigpig rok Got?
22 Bochan ni gad e Kristiano, ma thingar da ‘sumunguygad ngak urngin e girdi’.’ (Titus 3:2) Gad ma dag e sumunguy u nap’an ni gad be machib. Piin ni ke bung rogorad e kan fonownagrad ni ngar yal’uweged reb e Kristiano ni ke oloboch “u fithik’ e sumunguy.” (Galatia 6:1) Gad gubin nrayog ni ngad ayuweged nge taareban’uy me yib e gapas nga thilin e Kristiano u daken e ‘sobut’an’ nge sumunguy.’ (Efesus 4:1-3) Rayog ni ngad daged e sumunguy ni faanra gubin ngiyal’ ma gad be pag fare kan ni thothup ni nge gagiyegnag pangidad ma nguud t’ared lanin’dad.
23, 24. Mange t’ar laniyan’, ma uw rogon ni ma ayuwegdad?
23 T’ar laniyan’ e ma ayuwegdad ni ngad ted nib fel’ e lem rodad, nge numon rodad, nge ngongol rodad. I par Jehovah nib ‘n’uw nap’an ni ke th’ab gulungan’ ngii k’adan’ u puluwon piyu Babylon ni ra gothey yu Jerusalem. (Isaiah 42:14) Ki ‘dag Fak e kanawo’’ ni ngad folwokgad riy u nap’an ni i t’ar laniyan’ u nap’an ni yibe gafgownag. Ma ki fonownag apostal Peter e pi Kristiano ni ngar ‘puthuyed e k’adan’ ko t’ar laniyan’ rorad.’—1 Peter 2:21-23; 2 Peter 1:5-8.
24 Piin piilal ni Kristiano e thingar ur t’ared lanin’rad. (Titus 1:7, 8) Tin nriyul’ riy e, piin ni ma gagiyegnagrad fare kan ni thothup e rayog ni ngar t’ared lanin’rad mar siyeged e ngongol ndarngal, nge thin ni kireb, ara tin nde m’agan’ Jehovah ngay. Faan gad ra pag e kan ni thothup rok Got ni nge ayuwegdad nguuda t’ared lanin’dad, ma ra gagiyel ni bochan rogon ni gad ma non nge rogon e ngongol ni gad ma tay.
Nguum Pag fare Kan ni Thothup Nga i Gagiyegnag Pangim
25, 26. Uw rogon ma faan gad ra pag fare kan ni thothup nge gagiyegnag pangidad ma ra rin’ ban’en ko tha’ u thildad nge par rodad ko gabul nge langlath?
25 Faan gad ra pag fare kan ni thothup nga i gagiyegnag pangidad, ma gad ra mang boch e tamachib ko fare Gil’ilungun nib pasig. (Acts 18:24-26) Gad ra mang boch e girdi’ nib fel’ i chag ngak, ma piin ni yad ba yul’yul’ ku Got e yad ra adag ni ngaur chaggad ngodad. Ku rayog ni ngad pied e athamgil nga laniyan’ boch e tapigpig rok Jehovah ni bod rogon e piin ni kar paged e kan ni thothup be pow’iyrad. (Filippi 2:1-4) Gathi ereram e n’en ni baadag urngin e Kristiano ni ngar rin’ed?
26 De mom ni ngan pag fare kan ni thothup nga i gagiyegnag pangiy u lan e re fayleng ney ni be gagiyegnag Satan. (1 John 5:19) Machane, bokum milyon e girdi’ ni yad be rin’ ni aram rogon e ngiyal’ ney. Faanra pagan’dad ngak Jehovah u polo’ gum’irchadad, ma gad ra felfelan’ ko yafas e chiney ma aram e rayog ni nga u darod ko kanawo’ nib mat’aw ko En ni Ma Pi’ e kan ni thothup ngodad.—Psalm 128:1; Proverbs 3:5, 6.
Mange Fulweg Rom?
• Uw rogon ma ngan ‘pag fare kan ni thothup nge mang ir e i gagiyegnag pangidad’ e ra rin’ ban’en ko tha’ u thildad Got nge Fak?
• Mang fapi wom’engin e kan ni thothup?
• Mang boch e kanawo’ ni ngan dag riy fapi wom’engin e kan ni thothup rok Got?
• Uw rogon ma ngan pag fare kan ni thothup nge gagiyegnag pangiy e ra rin’ ban’en ko yafas rodad nge par rodad ko gabul nge langlath?
[Picture on page 19]
Kan ni thothup rok Jehovah e ma mon’ognag e t’ufeg ni fan ngak e piin ni taareb e michan’ rodad
[Picture on page 20]
Mu dag e sumunguy u daken e thin nge ngongol nib fel’