Rayog Nim K’adan’um Nge Mada’ ko Rran rok Jehovah, Fa?

“Ngam puthuyed nga rogon ni ke michan’med ngak Kristus . . . e k’adan’.”​—2 PETER 1:5, 6.

1, 2. Mange k’adan’, ma mang fan ni ba t’uf e re n’ey ko piin Kristiano?

FARE rran rok Jehovah nib ga’ e kari chugur. (Joel 1:15; Zefaniah 1:14) Gad e Kristiano ni kad dugliyed ni ngad pared ni gad ba yul’yul’ ku Got e gad be sonnag e ngiyal’ nra tamilang e gagiyeg rok Jehovah nib tolang. Ma ngiyal’ n’ey, e ra ud mada’naged e fanenikan, ma yibe darifannagdad, nge yam’ ni bochan’ e michan’ rodad. (Matthew 5:10-12; 10:22; Revelation 2:10) Ba t’uf e k’adan’ riy​—ni fare gelngin ni nge yog ni yan u fithik’ e gafgow. I fonownagdad apostal Peter ni gaar: “Ngam puthuyed nga rogon ni ke michan’med ngak Kristus e k’adan.” (2 Peter 1:5, 6) Ba t’uf e k’adan’, ya yog Jesus ni gaar: “En nra athamgil nge mada’ ko tomur e ra yog e yafos ngak.”​—Matthew 24:13.

² Ku ma yib e m’ar, kireban’, nge ku boch e skeng ngodad. Uw feni ri ra felfelan’ Satan ni faan gad ra pag e michan’ rodad! (Luke 22:31, 32) U daken e ayuw rok Jehovah, ma rayog ni ngad k’adedan’dad ko pi skeng ney. (1 Peter 5:6-11) Am lemnag boch ban’en ni ke buch rok boch e girdi’ ni be micheg nrayog ni ngad sonnaged e rran rok Jehovah u fithik’ e k’adan’ nge michan’ nib gel.

Dar Talgad ni Bochan e M’ar

3, 4. Mu weliy reb e kanawo’ nrayog ni ngad pigpiggad riy ku Jehovah u fithik’ e yul’yul’ ni yugu ra gadad ba m’ar.

³ Dar ma chuweg Got e m’ar rodad u daken e maang’ang e chiney, machane ma pi’ gelngidad ni ngad k’adedan’dad ko m’ar rodad. (Psalm 41:1-3) I yog Sharon ni gaar: “Gubin ngiyal’ ni gu ma fanay e wheelchair rog. Cerebral palsy ir e ke k’aring ni nge dab gu felfelan’ u nap’an ni ku gub bitir ke yib i mada’ ko chiney.” Nap’an ni ke fil Sharon murung’agen Jehovah nge pi n’en ni ke micheg nra par e girdi’ ndariy e m’ar rorad ma ir e yibnag e athap nga laniyan’. Yugu aram rogon nib mo’maw’ rogon e numon nge yan rok, mab felfelan’ ko machib ni ma tay. U lan 15 e duw ni ke yan me yog ni gaar: “Sana ra gel i yan e m’ar rog, machane pagan’ rog ku Jehovah nge tha’ u thilmow e ireray e n’en ni be teg ni gub fas. Ri gub felfelan’ ni gu bay u fithik’ e girdi’ rok Jehovah maku yibe pi’ e athamgil ngog ni gubin ngiyal’!”

⁴ I pi’ Paul e athamgil nga laniyan’ e pi Kristiano nu Thessalonika ni ngar pied e “athamgil ngak e piin ni yad be rus.” (1 Thessalonika 5:14) Pi n’ey ni ma mulegan’uy e rayog ni k’aring e kireban’. U nap’an e duw ni 1993, me yoloy Sharon ni gaar: “Kug par ni dalip e duw ni gub kireban’ . . . ni gowa dariy ban’en ni gub fel’ ngay. . . . Ma aram me pi’ e piin piilal e athamgil nge fonow ngog. . . . Me pi’ Jehovah e tamilangan’ u murung’agen rarogon e kireban’ u daken fare Wulyang Ntagil’ E Damit. Arrogon, ma ayuweg e girdi’ rok ma manang e n’en ni gad be lemnag.” (1 Peter 5:6, 7) Ka be pigpig Sharon ngak Jehovah u fithik’ e yul’yul’ e ngiyal’ ney ni be sonnag fare rran rok Jehovah nib ga’.

5. Mange mich riy nrayog ko piin Kristiano ni ngar k’adedan’rad ko mochuch?

⁵ Boch e Kristiano e yad ma gafgow ko mochuch ni bochan boch ban’en ni i buch rorad kakrom. Harley e be’ ni immoy u nap’an e bin l’agruw e mahl ko fayleng ma nap’an nra mol ma ma lik’aynag e cham ni un tay e ngiyal’ nem. Nap’an nra be mol, ma ma tolul ni gaar: “Mu kol ayuw!” Ma nap’an nra od, ma ke maluk ko athuw. Machane, me yog rok ni nge nameg reb e yafas nib m’agan’ Got ngay, me munmun ma be war ma be palog thilin fare lik’ay.

6. Uw rogon ni mada’nag reb e Kristiano e magawon ko lem rok?

⁶ Reb e Kristiano ni kan pirieg ni bay e m’ar rok ni bipolar disorder e pirieg ni ke mo’maw’ ni nge machib u mit e tabinaw i yan. Machane, i ul’ul ni bochan e yib i nang ni re n’em e ra ayuweg nge yog e yafas ngak nge piin ni yad ra motoyil ngak. (1 Timothy 4:16) Yu ngiyal’ ma dabiyog rok ni nge yog ni nge chubeg e bell ko mab, machane me gaar: “Munmun ma aram mi i yog ni gu gagiyegnag e lem rog, ma aram me yog ni gu wan ko bin migid e naun ko machib. I yog ni nggu ayuwegeg nggu par nib fel’ e michan’ rog ni bochan e gu ul’ul ko machib.” Muulung e ku reb e magawon, machane re walag ney e manang feni ga’ fan ni nguud chaggad e pi walag u taabang. Ere, athamgil ni ngii un ko pi muulung.​—Hebrews 10:24, 25.

7. Yugu aram rogon ni bay boch e girdi’ ni yad marus ni ngar nonad u fithik’ e girdi’ ara ngar uned ko muulung, ma uw rogon ni yad ma dag e k’adan’?

⁷ Boch e Kristiano e bay e m’ar rorad ni phobias​—marus nga ban’en nib pag rogon. Ni bod ni, sana yad marus ni ngar nonad u fithik’ e girdi’ ara ra uned ko muulung. Am lemnag rogon feni mo’maw’ rorad ni ngar pied e fulweg u nap’an e muulung ko pi Kristiano ara ngar pied e welthin ko fare Theocratic Ministry School! Machane, yad be k’adedan’rad, ma rib ga’ fan u wan’dad e wub ni yad ma tay nge pi n’en ni yad ma un ngay.

8. Mange n’en nri ra ayuwegey u nap’an ni bay e magawon u lanin’dad?

⁸ Toffan nge mol e rayog ni nge ayuweg be’ nge gel ko magawon ko lem rok. Ku rayog ni ngan gayiy e ayuw ko togta. Machane, n’en nri ma yib angin nrib fel’ e meybil ku Got u fithik’ e pagan’. Be gaar e Psalm 55:22, NW: “Mu paged e pi n’en ni ke tomalnagmed nga daken Jehovah, me ir e bayi ayuwegmed. Ya ri dabi pag e piin nib mat’aw nga u ra yoyowolgad.” U fithik’ urngin ban’en ma ngam “pagan’um ngak Somol u polo’ i lanin’um.”​—Proverbs 3:5, 6.

Ngam K’adan’um ko Kireban’ ni Bochan e Ke Yim’ Be’ nib T’uf Rom

9-11. (a) Mange rayog ni nge ayuwegdad ngad gelgad ko kireban’ u nap’an nra yim’ be’ nib t’uf rodad? (b) Uw rogon nrayog ni nge ayuwegdad e n’en ni buch ku Anna ni ngad gelgad ko kireban’ ni bochan e ke yim’ be’ nib t’uf rodad?

⁹ Nap’an nra yim’ be’ u lan e tabinaw rodad nib t’uf rodad, ma rayog ni nge yibnag e kireban’ nib gel. Abraham e i par ni be yor ni bochan e yam’ ni tay leengin ni, Sarah. (Genesis 23:2) Mus ngak Jesus nib flont ma ki “yor” u nap’an ni yim’ Lazarus ni fager rok. (John 11:35) Ere dariy ban’en nrogon nra kireban’um u nap’an nra yim’ be’ nib t’uf rom. Machane, piin Kristiano e yad manang ni bay e fas ko yam’. (Acts 24:15) Ere, dar ma ‘kireban’rad ni bod e piin ndariy ban’en ni ke l’agan’rad ngay.’​—1 Thessalonika 4:13.

¹⁰ Uw rogon nrayog ni ngad gelgad ko kireban’ ni ma yib ni bochan e ke yim’ be’ nib t’uf rodad? Sana rayog ni nge ayuwegdad reb e fanathin. Gathi ri ma kireban’dad nib n’uw nap’an u nap’an nra yan’ reb e tafager rodad ko chur ni bochan e gad manang ni ka gad ra guy u nap’an nra sul. Yira lemnag ni aram rogon ko yam’ nra tay reb e Kristiano ma ra achignag e kireban’ rodad ya gad manang nrib mudugil ni yira faseg ko yam’.​—Eklesiastes 7:1.

¹¹ Pagan’ nib polo’ ngak fare “Got ni urngin mit e ayuw me ir e be yib rok ngodad” e ra ayuwegdad ni ngad k’adedan’dad ko mit ney e kireban’. (2 Korinth 1:3, 4) N’en ni ku ra ayuwegdad e ngad lemnaged e n’en ni rin’ Anna ni immoy ko bin som’on e chibog. Yib i yim’ e pumoon rok u tomuren medlip e duw ni kar mabgolgow. Nap’an ni ke gaman 84 e duw rok ma ka be pigpig ku Jehovah u tempel. (Luke 2:36-38) Rib mudugil ni mit ney e yafas e ayuweg ni nge gel ko kireban’ nge tawreng. Faan gad ra un ko pi n’en ni ma rin’ e Kristiano u gubin e rran, nib muun ngay ni ngan machibnag murung’agen fare Gil’ilungun, ma rayog ni nge ayuwegdad ngad gelgad ko mit ney e kireban’.

Ngan Gel ko Skeng nib Thilthil

12. Mange magawon nib l’ag rogon ko tabinaw ni ke gel e pi Kristiano ngay?

¹² Boch e Kristiano e thingar k’adedan’rad ko skeng nib l’ag rogon ko tabinaw. Ni bod ni, faanra ke un bagayow fa gali mabgol ko ngongol ndarngal, ma rib gel e gafgow nra yibnag nga lan e tabinaw! Bochan e kireban’, ma fa en ni mabgol ndariy ban’en ni rin’ nib kireb e sana dabiyog nra i mol maku sana ra i yor nib pag rogon. Mus nga bochi ban’en nib achig ni yira ngongliy ma ma k’aring e mochuch ma aram e yira oloboch riy. Fa en ni mabgol ndariy ban’en ni ke rin’ nib kireb e sana dabiyog ni nge abich, ma sana ra achig, ma aram e ra magawon laniyan’. Sana ra mo’maw’ ni nge un ko pi maruwel u lan e ulung. Maku reb e rib gel e gafgow nra tay e bitir!

13, 14. (a) Mang athamgil e ma pi’ fare meybil ku Solomon u nap’an fare madnom ko tempel nga lanin’um? (b) Mang fan ni gad ma yibilay e kan ni thothup?

¹³ Ma pi’ Jehovah e ayuw nib t’uf rodad u nap’an ni ma yib e skeng ni aram rogon ngodad. (Psalm 94:19) Kan dag ni Jehovah e ma fulweg taban e meybil ko girdi’ rok, ko meybil ni ta’ Solomon ni Pilung u nap’an e madnom ko tempel rok Jehovah. I meybil Solomon ku Got ni gaar: “Ma ngam motoyil ko meybil rorad. Ma ra bay e girdi’ rom nu Israel ni ke kolngan’rad mi yad pug pa’rad nga lang ni yad ba sap ko re tempel ney ni kar meybilgad, ma ga rung’ag e meybil rorad. Mu telim ngorad u tafenam u tharmiy, ma ga n’ag fan e kireb rorad u wun’um, ma ga ngongol. Ke mus ni gur e ga manang e lem rok urngin e girdi’. Ra be’ ma ga rin’ ngak nrogon e ngongol rok, ya re nam ney ni gur e mpi’ ngak pi chitamangirad ni kakrom e gubin ngiyal’ ni ngi i par e girdi’ rom riy ni bay madgun u wun’rad.”​—1 Kings 8:38-40.

¹⁴ Rib gel e ayuw nra yib ni faan yira yibilay e kan ni thothup. (Matthew 7:7-11) Fare wom’engin e kan ni thothup e ba muun ngay boch e fel’ngin ni bod rogon e felfelan’ nge gapas. (Galatia 5:22, 23) Ri ma fel’ lanin’dad u nap’an nra fulweg e Chitamangidad nu tharmiy taban e meybil rodad​—felfelan’ nge gapas laniyan’ e ma yon’ lon e kireban’!

15. Mang thin nu Bible e rayog ni nge ayuwegdad nge achig e magafan’ rodad?

¹⁵ Ra yib e magafan’ ni faanra ngan k’adan’uy ko mochuch. Machane sana rayog ni nge war boch e pi magafan’ ney ni faan yira lemnag fapi thin rok Jesus ni faani gaar: “Dabi magafan’med ko ggan nge garbod ni nge yog ngomed ni fan e ngam pired ni gimed ba fos, fa mad ni fan nga dowmed. . . . Ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.” (Matthew 6:25, 33, 34) I fonownagdad apostal Peter ni ngad ‘paged fan urngin e magafan’ rodad ngak Got, ya be lemnag rogodad.’ (1 Peter 5:6, 7) Ba puluw ni ngan athamgil ngan pithig e magawon. Machane, tomuren ni kad rin’ed e tin nrayog rodad, ma magafan’ ko fare magawon e dabiyog ni nge ayuwegdad ma meybil e ra ayuwegdad. I tang fare psalmist ni gaar, “Mu piem ngak Somol; mu pagan’um ngak, me ayuwegem.”​—Psalm 37:5.

16, 17. (a) Mang fan ndabiyog ni ngari chuw e magafan’ rodad? (b) Mange gad ra nang ni faan gad ra fol ko Filippi 4:6, 7?

¹⁶ I yoloy Paul ni gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’irchamed nge tafinay romed ngi i par rok Kristus Jesus.” (Filippi 4:6, 7) Pi fak Adam ndawora flontgad e dabiyog ni ngar siyeged e magafan’. (Roma 5:12) Fapi ppin ni Hittite ni leengin Esau e “kar karinged e amith nga laniyan’” e gallabthir rok Esau ni yow e girdi’ ku Got ni Isak nge Rebekah. (Genesis 26:34, 35) M’ar e sana ir e ki k’aring e magafan’ ngak boch e Kristiano ni bod Timothy nge Trofimus. (1 Timothy 5:23; 2 Timothy 4:20) I magafan’ Paul ngak e piin ni taareb e michan’ rorad. (2 Korinth 11:28) Machane “En ni Ma Rung’ag e meybil” e gubin ngiyal’ ni bay ni fan ngak e piin nib t’uf rodad.​—Psalm 65:2.

¹⁷ Nap’an ni gad be sonnag fare rran rok Jehovah, ma bay e ayuw ni be yib ngodad rok fare “Got ni ir e be pi’ e gapas.” (Filippi 4:9) Jehovah “e ma runguy e girdi’ ma ma kireban’ ngorad,” ma “ri ma n’ag fan e kireb,” ma ‘manang ni gadad e fiyath.’ (Exodus 34:6; Psalm 86:5; 103:13, 14) Ere ngad ‘dogned ngak e wenig rodad,’ ya angin e re n’ey e ra ‘pi’ Got e gapas nga lanin’dad’​—ni gapas ni kab gel ko lem ko girdi’.

18. Uw rogon nrayog ni ngad ‘guyed’ Got nrogon ni bay ko Job 42:5?

¹⁸ Nap’an ni yira fulweg taban e meybil rodad, ma gad ra nang ni bay Got rodad. Tomuren ni gel Job ko skeng ni yib ngak, me gaar: “Ug par ni ke mus ni tin ni ke weliy e girdi’ ngog e gu manang, ma chiney e kug guyem [Jehovah] nga owcheg.” (Job 42:5) U daken e changar ko tamilangan’, michan’ nge pining e magar, ma rayog ni ngad lemnaged e pi n’en ni ke rin’ Got ngodad ma gad ‘guy’ nib fel’ rogon. Re tha’ nem ku Got nib chugur e ma yibnag e gapas nga gum’irchadad nge lanin’dad!

19. Mange ra buch ni faan gad ra ‘pag urngin e pi n’en ni be magafan’dad ngay nga daken Jehovah’?

¹⁹ Faan gad ra ‘pag urngin e pi n’en ni be magafan’dad ngay nga daken Jehovah,’ ma rayog ni ngad k’adedan’dad ko skeng u fithik’ e gapas laniyan’ maku ra par e lem rodad nib gel. Gad ra pirieg e puf rogon u lan gum’irchadad ni be yip’ fan ban’en. Ma dabi par nib wagagey lanin’dad ni bochan e magafan’.

20, 21. (a) Mang gapas laniyan’ e ma yibnag e n’en ni buch ku Stephen u nap’an ni yira mada’nag e togopuluw? (b) Mu weliy ban’en ni ke buch e ngiyal’ ney ni be dag e re gapas nem u nap’an ni yibe k’adan’ ko skeng.

²⁰ I dag Stephen ni ir reb i gachalpen Jesus e gapas laniyan’ u nap’an ni be k’adan’ ko skeng nni tay ko michan’ rok. U m’on ko yay ni tomur ni machib, ma urngin e piin ni yad bay u Sanhedrin nra guyed “owchen ni ke bod rogon owchen ba engel.” (Acts 6:15) Rarogon owchen e ba gapas​—ni bod rogon owchen e engel, ni mol’og rok Got. Tomuren ni gagiyelnag Stephen e kireb ko fapi tapuf oloboch ni bochan e yam’ ni tay Jesus, “me ri gel e damumuw rorad ngak nguur wochar’iyed nguwelrad ngak u fithik’ e damumuw.” Me Stephen “nib sug ko fare kan ni thothup e sap nga lang me guy e flaab rok Got nge Jesus nib sak’iy u ba’ nib mat’aw rok Got.” I par Stephen nib gel e michan’ rok nge mada’ ko yam’ ni bochan e re n’em ni pig e changar rok. (Acts 7:52-60) Yugu aram rogon ni dar ma pig e changar rodad nguud guyed boch ban’en, ma rayog ni nge yog ngodad e gapas rok Got u nap’an ni yibe gafgownagdad.

²¹ Am lemnag rogon e lem rok boch e Kristiano ni un gafgownagrad nge mada’ ko yam’ u pa’ e pi Nazi u nap’an e bin l’agruw e Mahl ko Fayleng. U nap’an ni be weliy bagayad e n’en ni buch rok u tagil’ e puf oloboch, me gaar: “Yam’ ni ngan tay ngomad e ke m’ay i dugliy. Gu motoyil, ngemu’ ma tomren ni kug gog fapi thin ni lungug ‘mu par ni gab yul’yul’ nge mada’ ko yam’,’ nge ku buchuuw e thin rok e Somol rodad, ma aram me m’ay fare puf oloboch. Machane dab mu lemnag e tinem e chiney. Ya gubin ngiyal’ ni bay e gapas u lanin’ug ndariy be’ ni manang gelngin!” Reb e Kristiano ni kan dugliy ni ngan li’ ngem’ ni ngan th’ab k’angan e yol ngak e gallabthir rok ni be gaar: “Ke lukngun e nep’. Ka bay e tayim rog ni nggu thilyeg e lem rog. Ah! Ku rayog ni nggu par ni gub felfelan’ u lan e re fayleng ney u tomren ni kug togopuluw ko Somol rodad? Ri dabiyog! Machane chiney e rayog ni nge pagan’mew ni kug pag e re fayleng ney u fithik’ e felfelan’ nge gapas laniyan’.” Dariy e maruwar riy ni ma ayuweg Jehovah e pi tapigpig rok nib yul’yul’ ngak.

Rayog nim K’adan’!

22, 23. Mange ke mudugil u wan’dad u nap’an ni gad be sonnag fare rran rok Jehovah u fithik’ e k’adan’?

²² Sana dabi yib e skeng ni aray rogon ngom. Machane, ba puluw e n’en ni yog Job u nap’an ni gaar: “Girdi’ ni gargeleg e ppin, e ba ngoch nap’an e yafas rok ma ba sug ko gafgow.” (Job 14:1) Sana gur reb e gallabthir ni ga ma maruweliy nib gel ni ngam pi’ ko bitir rom e fonow ko tirok Got ban’en. Thingar ra gelgad ko skeng ni ma yib ngorad u skul, machane uw feni ri ga ra felfelan’ u nap’an ni yad ra par nib mudugil u mit Jehovah ma yad be fol ko pi motochiyel rok nib mat’aw! Sana ga be mada’nag boch ban’en nib mo’maw’ nge towasar u taban e maruwel. Machane, tiney nge ku boch ban’en e rayog i k’adan’uy riy, nbochan ni ‘gubin e rran ni ma fek Jehovah gilbadad.’​—Psalm 68:19.

²³ Sana ga ra lemnag ni taareb rogom ngak e yug girdi’, machane dab mu pagtalin ni dabi pag Jehovah talin e maruwel rom nge t’ufeg ni kam dag nga fithingan nib thothup. (Hebrews 6:10) U daken e ayuw rok, ma rayog ni ngam gel u nap’an ni yira skengnag e michan’ rom. Ere mu uneg ko meybil rom ni ngam rin’ e tin nib m’agan’ Got ngay. Ma aram e rayog ni nge pagan’um nra tow’ath ma ra ayuwegem Jehovah u nap’an ni ga be sonnag fare rran rok u fithik’ e k’adan’.

Uw Rogon ni Ga Ra Fulweg?

• Mang fan nib t’uf ko piin Kristiano ni ngar k’adedan’rad?

• Mange rayog ni nge ayuwegdad ni ngad gelgad ko m’ar nge kireban’ ni ma yib ni bochan e ke yim’ be’ nib t’uf rodad?

• Uw rogon ni ma ayuwegdad e meybil ni ngad gelgad ko skeng?

• Mang fan nrayog ni ngad sonnaged fare rran rok Jehovah u fithik’ e k’adan’?

[Picture on page 25]

Faan gad ra taga’ ngak Jehovah ma aram e rayog ni ngad k’adedan’dad u nap’an ni ke yim’ be’ nib t’uf rodad

[Picture on page 27]

Meybil u polo’ i gum’irchadad e ra ayuwegdad ni ngad gelgad u nap’an ni kan skengnag e michan’ rodad