Mu Pag e K’adan’ ‘Nge Maruwel u Fithik’am Nge Yan i Mus Nga Rogon’

1, 2. (a) Mang e rayog ni ngad filed ko k’adan’ ni tay Gideon nge fa 300 i salthaw nra uned ngak? (Mu guy e sasing ni bay u tabolngin e re article ney.) (b) Mang nrib ga’ fan e k’adan’ nrogon ni bay ko Matthew 24:13?

KARI ichngiy e mahl. Ma fapi salthaw nu Israel ni be pow’iyrad Gideon ni ir reb e Judge e ba polo’ reb e nep’ ni kar lol’oged e pi salthaw nu Midian nge yugu boch e salthaw ni toogor rorad u sogonap’an 20 e mayel! Baaray e n’en ni be yog e Bible ni buch ni migid: “Me yib Gideon nge fa 300 i pumoon ni salthaw rok ko lul’ ni Jordan ngar th’abed nga baraba’. Ma ke aw porowrad.” Yugu aram rogon, ma dawori gel Gideon nge fapi salthaw rok ko fare mahl, ya ka bay 15,000 e salthaw ni ngar mahlgad ngorad. Manang piyu Israel ni gathi aram e ngiyal’ ni ngar paged yad ni bochan e ke yoor e duw ni kar gafgowgad u pa’ piyu Midian ni toogor rorad. Ere, ulul Gideon nge pi salthaw rok ni ngar ‘lol’oged e pi toogor rorad’ nge taw ko ngiyal’ ni kar gelgad ngorad.​—Judg. 7:22; 8:4, 10, 28.

² Ku arrogodad e ngiyal’ ney ni gad be un nga reb e cham. Toogor rodad e aram Satan, nge re fayleng rok ney, nge rarogodad ndawor da flontgad. Bay boch i gadad ni ke yoor e duw ni ke un ko re cham ney, machane boor i gadad e ke yag ni nge gel ko re cham ney u daken e ayuw rok Jehovah. Machane, bay yu ngiyal’ ni bayi n’en ma ke aw parowdad ko cham ni gad be tay ngak e pi toogor rodad. Fa reb e ke chalbadad i sonnag e ngiyal’ ni nge yib e tomur ko re m’ag ney riy. Ere, dawor da gelgad ko re cham ney. I yog Jesus ni gadad e piin ni gad be par ko tin tomuren e rran e rib gel e skeng nra u darod u fithik’ nge gafgow nra un tay ngodad, machane ki yog ni faan gad ra athamgil nge mada’ ko tomur ma aram e rayog ni ngad gelgad ko re cham ney. (Mu beeg e Matthew 24:13.) Ere, mang e k’adan’? Mang e ra ayuwegdad ni ngad k’adedan’dad? Mang e rayog ni ngad filed rok boch e girdi’ ni yag ni ngaur k’adedan’rad? Ma uw rogon nrayog ni ngad paged e k’adan’ ni gad be tay ni ‘nge maruwel u fithik’dad nge yan i mus nga rogon’?​—Jas. 1:4.

MANG E K’ADAN’?

3. Mang e k’adan’?

³ Fare bugithin ni k’adan’ nrogon ni kan fanay u Bible e gathi kemus ni be yip’ fan ni ngad athamgilgad u fithik’ e pi skeng ara boch e magawon nib mo’maw’ ni gad ma mada’nag. Rogon ni gad ma k’adedan’dad e ba muun ngay rogon ni gad ma lemnag e pi skeng ni gad ma yan u fithik’. Be’ ni be k’adan’ u fithik’ boch ban’en nib mo’maw’ ni be mada’nag e be dag nder rus, ma be par nib mudugil, mab gum’an’. I yog reb e babyor ni k’adan’ e aram “reb e fel’ngin ni ma ayuwegdad ni ngad pared ni be l’agan’dad nga boch ban’en maku ma ayuwegdad ndabi mulan’dad u nap’an ni gad ra mada’nag boch e skeng. Ma ayuwegdad ni ngad pared ni gad ba mudugil ni ki mada’ ko ngiyal’ ni kad mada’naged boch e skeng nrib mo’maw’. Maku ma ayuwegdad ni ngad paged e pi skeng nem nge yan i par ni bogi ban’en ni kad gelgad riy me ayuwegdad ni ngad tedan’dad ko n’en ni gad be nameg, ma dab kud lemnaged e gafgow ni gad be yan u fithik’.”

4. Mang fan nrayog ni nga dogned ni t’ufeg e aram e n’en ni ma k’aring be’ ni nge k’adan’ u boch ban’en?

⁴ T’ufeg e aram e n’en ni ma k’aring reb e Kristiano ni nge k’adan’. (Mu beeg e 1 Korinth 13:4, 7.) T’ufeg rodad ngak Jehovah e aram e n’en ni ma k’aringdad ni ngad k’adedan’dad u fithik’ boch ban’en nib mo’maw’ ni ma pag ni ngad darod u fithik’. (Luke 22:41, 42) T’ufeg rodad ngak pi walagdad e ku ma ayuwegdad ni ngaud k’adedan’dad u fithik’ boch ban’en ni yad ma rin’ ndubdad. (1 Pet. 4:8) Ma t’ufeg rodad ngak e en mabgol rodad e ma ayuwegdad ni ngad k’adedan’dad u fithik’ e pi “gafgow” ni ma mada’nag urngin e mabgol ni kub muun ngay e piin nib fel’ e mabgol rorad. Ma re n’ey e ma ayuwegdad ni ngad gelnaged e tha’ u thildad e en mabgol rodad.​—1 Kor. 7:28.

MANG E RA AYUWEGEM NI NGAUM K’ADAN’UM?

5. Mang fan ni kemus ni yigoo Jehovah e rayog rok ni nge ayuwegdad ni ngad k’adedan’dad u fithik’ boch ban’en nib mo’maw’ ni gad ma yan u fithik’?

⁵ Mu wenig ngak Jehovah ni nge pi’ gelngim. Jehovah e ir fare Got ni “ma yib e gum’an’ nge athamgil laniyan’ rok ngodad.” (Rom. 15:5) Kemus ni yigoo ir e manang rogon e pi magawon ni gad ma yan u fithik’, nge rogon e par rodad, nge pi n’en ni gad ma lemnag, nge rarogodad ni girdi’. Kemus ni yigoo ir e rayog rok ni nge ayuwegdad ni ngad k’adedan’dad u fithik’ boch ban’en nib mo’maw’ ni gad ma yan u fithik’. Be gaar e Bible: “Piin ni bay madgun u wun’rad e ma pi’ ngorad e tin ni nge yog ngorad; ma rung’ag e tin ni yad ma wenignag ngak me ayuwegrad.” (Ps. 145:19) Ere, nap’an ni gad ra meybil ngak Got ni nge pi’ gelngidad nge yag nda k’adedan’dad, ma uw rogon nra fulweg taban e meybil rodad?

6. Uw rogon nrayog ni nge ayuwegdad Jehovah ni ‘ngad bad nga wuru’’ e pi magawon ni gad ma mada’nag nrogon ni ke micheg e Bible?

⁶ Mu beeg e 1 Korinth 10:13. Ke micheg Jehovah nnap’an ni gad ra meybil ngak ni nge ayuwegdad ni ngad k’adedan’dad u fithik’ e pi magawon ni gad be mada’nag, ma ra ‘pi’ e kanawo’ ngodad ni ngad bad riy nga wuru’ e pi n’em.’ Uw rogon ni ma rin’ Jehovah e re n’ey? Bay yu ngiyal’ ni sana rayog ni nge chuweg fare magawon. Machane, yooren e ngiyal’ e ma pi’ e kanawo’ ngodad ni ngad bad riy nga wuru’ e pi n’em, ni aram e ma pi’ gelngidad ni ngad ‘k’adedan’dad riy.’ Arrogon, ma pi’ Jehovah gelngidad ya nge yag nda “athamgiliyed urngin ban’en u fithik’ e gum’an’” nge felfelan’. (Kol. 1:11) Ma bochan nri manang urngin ban’en u rarogodad nib fel’ rogon, ma aram fan ndabi pag e magawon ni gad be yan u fithik’ ni nge thum’ nga wuru’ ndabkiyog ni ngad pared ni gad ba yul’yul’.

7. Mu tamilangnag fan nib t’uf rodad e pi n’en ni ma pi’ Got ngodad ni fan ko tirok ban’en ya nge yag nda k’adedan’dad u fithik’ boch ban’en nib mo’maw’ ni gad ma yan u fithik’.

⁷ Mu gelnag e michan’ rom u daken e pi n’en ni ma pi’ Got ngodad ni fan ko tirok ban’en. Bay reb e burey ni ka nog e Mount Everest ngay ni aram e re burey nth’abi tolang ni bay u roy u fayleng. Faanra nge yan be’ nga daken e re burey nem mab t’uf ni nge kay boch ban’en ni boor nga urngin ban’en ni ma kay e girdi’, ya faanra danga’ ma dabiyog ni nge yan i taw nga p’ebugul. Ere, ku arrogon ni faanra nge yag ni ngad athamgilgad ngad tawgad ko n’en ni gad be nameg, ma gubin e rran nib t’uf ni ngaud maruwelgad ko pi n’en ni ke tay Got nra ayuwegdad ni fan ko tirok ban’en. Thingar da ted e tayim ni fan ko beeg Bible, nge fol Bible ni yigoo gadad, nge pi muulung ni gad ma un ngay, ma gad rin’ ni gubin ngiyal’. Ya ireray “fare ggan nra par ndabi kireb nge mada’ ko yafos ndariy n’umngin nap’an,” ma ir e ra gelnag e michan’ rodad.​—John 6:27.

8, 9. (a) Nap’an ni gad ra mada’nag boch e magawon nib mo’maw’, ma aram e mang e yibe skengnag rodad nrogon ni kan tamilangnag ko Job 2:4, 5? (b) Nap’an ni ga ra mada’nag boch e skeng, ma mang e ngam lemnag?

⁸ Dab mu pagtalin e yul’yul’ rom ngak Got. Nap’an ni gad ra mada’nag boch e magawon nib mo’maw’, mab gel e gafgow ni gad ma tay. Machane gathi kemus aram, ya ku yibe skengnag rogon e yul’yul’ rodad ngak Got. Machane, n’en ni gad ma rin’ u nap’an ni gad ra mada’nag e pi skeng ney e aram e n’en ni ma dag ko gad be tay ni Jehovah e ir fare Pilung Nth’abi Tolang u Ga’ngin e Palpalth’ib fa danga’. Mang fan? Ya baaray rogon e moning ni tay Satan ngak Jehovah u nap’an Job. I yog ni gaar: “Be’ nib girdi’ e ra pag urngin ban’en ni fan e nge ayuweg e pogofan rok. Machane ga ra gad paam ngak [Job] nge amith downgin, ma ra yog nga owchem e thin nib togopluw ngom.” (Job 2:4, 5) Ere, ke yog Satan ndariy be’ ni ma pigpig ngak Jehovah ni bochan e ba t’uf Jehovah rok. Ere gur, ke thil Satan? Dawori thil, ya boor e chibog nga tomuren nnon’ nga fayleng ma ka “ma egnag pi walagdad ni ma [yan] i sak’iy nga p’eowchen Got ngi i thibthibnagrad ni rran nge nep’.” (Rev. 12:10) Mus ko ngiyal’ ney ni ka be yog ni be pigpig e girdi’ ngak Got ni bochan e pi n’en ni be yag riy ngorad. Ri baadag ni ngad meewargad u fithik’ e pi skeng ni gad ma mada’nag ma dab kud ted fan mat’awun e gagiyeg rok Got.

⁹ Ere, nap’an ni ga ra mada’nag boch e magawon nrib mo’maw’, ma baaray ban’en ni ngam lemnag. Ngam lemnag ni Satan nge pi moonyan’ rok e yad ba mang nga bang, ma kar pared ni yad be fal’eg i yaliyem ni ngar guyed ko mang e ga ra rin’, maku yad be yog ndabiyog ni ngam par ni gab mudugil. Machane, bay Jehovah nge Fak ni ir e be gagiyeg e chiney, nge piin ni kan dugliyrad ni ka ranod nga tharmiy, nge bokum biyu’ e pi engel ni yad be pi’ e athamgil nga lanin’um, ma yad ba felfelan’ ngay ni yad be guyem ni ga be athamgil ni ngam par ni gab yul’yul’ ngak Jehovah. Ku bay Jehovah ni be gaar ngom: “Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.”​—Prov. 27:11, BT.

10. Uw rogon ni ngam folwok rok Jesus ni aram e ngaum par ni ga be lemnag e pi tow’ath nra yag ngom ni bochan e k’adan’ ni ga be tay?

¹⁰ Mu par ni ga be lemnag e pi tow’ath nra yag ngom ni bochan e k’adan’ ni ga be tay. Susun e ga be yan u fithik’ e garger i yan mag malog. Ka rim rus ya da kum nang e gin ni ngam sor ngay. Machane, ga manang ni faan ga ra yan buchuuw, mab mudugil ni ga ra guy ba pa’ e kanawo’ nrayog ni nge ayuwegem ni ngam taw ko gin ni ga be sor ngay. Ere ku arrogodad ni bay yu ngiyal’ ni bayi n’en ma da kud nanged e n’en ni ngad rin’ed ni bochan e magawon ni gad be mada’nag. Mus ngak Jesus ni ki mada’nag boch e magawon nrayog ni nge k’aring ni nge lem ni aray rogon. Ya rib ‘gel e fanenikan ni tay e pi tadenen ngak,’ mu kun tamra’nag, ma ri kub gel e amith ko yam’ ni tay u “daken” fare ley i gek’iy. Ere, dariy e maruwar riy ni ireray boch ban’en ni mada’nag Jesus u fayleng nrib gel e gafgow ni tay riy! Yugu aram rogon me k’adan’ u fithik’ e gafgow nni tay ngak ni “bochan e felfelan’ ni be sonnag.” (Heb. 12:2, 3) I par Jesus ni be lemnag angin nra yib ni bochan e k’adan’ ni be tay ni aram e ra gagiyelnag feni thothup e ngachal rok Got me tayfan mat’awun e gagiyeg rok. De n’uw nap’an e gafgow ni tay Jesus, machane tow’ath ni ke yag ngak u tharmiy e ban’en nra par ndariy n’umngin nap’an. Ku arrogon e pi magawon ni ga be mada’nag e ngiyal’ ney nrayog nrib gel e gafgow ni ga be tay riy. Machane, dab mu pagtalin ni pi magawon ney e gathi ra par ndariy n’umngin nap’an, ya bayi chuw.

PIIN NI UR “K’ADEDAN’RAD”

11. Mang fan nsusun e ngaud lemnaged e n’en ni ke buch rok e piin ni ur “k’adedan’rad” kakrom?

¹¹ Pi magawon ney e gathi gad be athamgiliy ni yigoo gadad. Ya nap’an ni be pi’ apostal Peter e athamgil nga laniyan’ e pi Kristiano ni ngar k’adedan’rad u fithik’ e pi magawon ni be k’aring Satan ni nge yib ngorad, me gaar: “Um pired nib mudugil e michan’ romed ngak Kristus mi gimed togopluw ngak fare moonyan’, ya gimed manang ni piin ni yad be par u roy u fayleng ni polo’ ni Kristus e ke michan’rad ngak e gafgow ni be yib ngomed e ku ir e be yib ngorad.” (1 Pet. 5:9) Pi n’en ni ke yag ni nge athamgiliy e piin ni ur “k’adedan’rad” e be fil ngodad rogon ni ngad pared ni gad ba mudugil, maku be micheg ngodad nrayog ni nga darod u fithik’ e pi n’ey nga wuru’, ma faan gad ra par ni gad ba yul’yul’ ma yira tow’athnagdad. (Jas. 5:11) Chiney e ngad weliyed murung’agen e piin ni ke yag ni ngar k’adedan’rad u fithik’ boch ban’en ni ur mada’naged.^[1]

12. Mang e gad ra fil ko fapi kerubim ni faani tayrad Got ko fare milay’ nu Eden?

¹² Pi kerubim. Pi n’en ni i rin’ boch e engel ni i m’ug ko girdi’ kakrom e rayog ni nge fil ban’en ngodad u rogon ni ngaud k’adedan’dad u boch e maruwel ni yima pi’ ngodad nib mo’maw’. I fek Jehovah Got e “kerubim nge bangi sayden ni be daramram ni urngin yang ni be chel ngay, nge ta’ ko ngek ko gi woldug nem nu Eden. Gali n’ey e nge ta’ e girdi’ u urel nge dabi chugur be’ ko fare ke gek’iy ni ma pi’ e yafos.” ^[2] (Gen. 3:24) Ba mudugil nde sunmiy Got e pi kerubim ni ngar rin’ed e re maruwel ney! Ya bin riyul’ riy e de lemnag Jehovah nra denen e girdi’ mar togopuluwgad ngak. Yugu aram rogon, ma dariy bang u Bible ni be yog ni i gun’gun’ e pi engel nni pi’ e re maruwel ney ngorad ni ngar rin’ed. Ya gad manang ni kerubim e boch e engel nib tolang e liw rorad. Machane, pi engel nni pi’ e re maruwel nem ngorad e dariy ba ngiyal’ ni chalbarad fe mulan’rad. Ya ra athamgilgad ni ngar rin’ed e maruwel ni kan pi’ ngorad u lan boor ko 1,600 e duw nge yan i mada’ ko ngiyal’ ni ke m’ay u ba ngiyal’ u nap’an ni yib fare Ran nge Tharey e Fayleng.

13. Mang e ayuweg Job nge yag ni athamgil u fithik’ e pi skeng ni i mada’nag?

¹³ Job ni be’ nib yul’yul’. Faanra ke yog reb i girdien e tabinaw rom ara fager rom boch e thin nra k’aringem ni nge mulan’um, ara ke yib ba mit e m’ar ngom nib ubchiya’, ara ke kireban’um ni bochan e ke yim’ be’ nib t’uf rom, ma rayog ni nge ayuwegem e n’en ni buch rok Job. (Job 1:18, 19; 2:7, 9; 19:1-3) Yugu aram rogon nde nang Job ko mini’ e i k’aring e magawon ngak, machane dariy ba ngiyal’ ni mulan’. Mang fan? Ya reb riy e bochan ni ir be’ ni “ba yul’yul’ ngak” Got. (Job 1:1) I dugliy Job u wan’ ni yugu demtrug ko be mada’nag e magawon fa danga’, ma nge par nib yul’yul’ ngak Jehovah. I ayuweg Got Job ni nge lemnag e pi n’en nib manigil ni ke rin’ ni fan ngak u daken gelngin nib thothup. Ku manang Job nra chuweg Jehovah e magawon rok ko ngiyal’ nib m’ag ni nge rin’ riy. (Job 42:1, 2) Ma aram e n’en ni buch. I “gagiyegnag Somol Job nge yoor ban’en rok bayay, me gagiyegnag nge sul ngak Job urngin ban’en ni immoy rok ni ruw yay e ke mun ngay.” I “yim’” Job nrib felfelan’ nga rogon e par ni i tay.​—Job 42:10, 17.

14. Uw rogon ni pi’ Paul e athamgil nga laniyan’ boch e girdi’ ko k’adan’ ni i tay nrogon ni bay ko 2 Korinth 1:6?

¹⁴ Apostal Paul. Ga be mada’nag e togopuluw ara be gafgownagem e piin ni dubrad e tin riyul’, fa? Gur reb e piilal u lan e ulung ara gur reb e walag ni ga ma lekag e ulung ni ga be lemnag ni kaygi yoor e maruwel nib milfan ngom nthingar mu rin’, fa? Faanra ga be lem ni aray rogon, ma ngam fal’eg i lemnag e pi n’en ni i buch rok Paul. Boor “ban’en” ni i mada’nag ni i gafgow riy. Ya un togopuluw ngak, ma gubin ngiyal’ ni i par ni be magafan’ ko pi walag u lan e ulung. (2 Kor. 11:23-29) Yugu aram rogon ma de pag ir. Ere, n’en ni rin’ e pi’ e athamgil nga laniyan’ yugu boch e girdi’. (Mu beeg e 2 Korinth 1:6.) Nap’an ni ga ra mada’nag boch e magawon nib mo’maw’, ma dab mu pagtalin ni k’adan’ ni ga be tay e rayog ni ngki pi’ e athamgil nga laniyan’ yugu boch e girdi’.

GA RA PAG E K’ADAN’ ‘NGE MARUWEL U FITHIK’AM NGE YAN I MUS NGA ROGON,’ FA?

15, 16. (a) Uw rogon ni nge “maruwel” e k’adan’ u fithik’dad nge yan i mus nga rogon? (b) Mu weliy boch e magawon ni gad ma mada’nag ni be dag rogon nrayog ni ngad paged e k’adan’ “nge maruwel u fithik’dad nge yan i mus nga rogon.”

¹⁵ Ni thagthagnag nga laniyan’ James ni nge yoloy ni gaar: “Mu paged e k’adan’ ni gimed be tay ni nge maruwel u fithik’med nge yan i mus nga rogon.” Uw rogon ni ma “maruwel” e k’adan’ u fithik’dad nge yan i mus nga rogon? Ma ayuwegdad ni ngad ‘pired ni kad yal’uwgad, ni aram e ke yan i mus nga rogodad ndakuriy ban’en ndad gamangad riy.’ (Jas. 1:4) Pi skeng ni gad ma mada’nag e ma gagiyelnag e pi n’en ni gad ba meewar riy ara boch ban’en u rarogodad nib t’uf ni ngad thilyeged. Machane, faan gad ra athamgil u fithik’ e pi skeng nem ma aram e gad be fil rogon ni nge m’ug boch i fel’ngin e Kristiano ko ngongol rodad ni bod rogon e gum’an’, nge marunguy, nge ngaud daged ni gad be pining e magar ko pi n’en ni ke rin’ be’ ni fan ngodad.

¹⁶ Bochan ni k’adan’ e ma maruwel u fithik’dad me ayuwegdad ni ngad pared ni gadad boch e Kristiano ni kar da yal’uwgad, ma aram fan ni dubdad ni ngad togopuluwgad ko pi kenggin e motochiyel rok Jehovah ni bochan e nge chuw e magawon rodad. Bod ni, faanra ga ma lemnag boch e ngongol nib alit, ma mang e susun ni ngam rin’? Mmeybil mag guy rogon ni ngam siyeg e mit ney e lem ko bin ni ngam rin’ e pi n’en ni ga be lemnag. Faan ga ra rin’ ni aray rogon ma aram e ga be fil rogon ni ngaum t’ar lanin’um u boch ban’en nib kireb. Ma uw rogon ni faanra ga be mada’nag e togopuluw u tabinaw? Mu athamgil ni ngam ulul ko pigpig ni ga be tay u fithik’ e yul’yul’ ko bin ni nge mulan’um. Ya angin nra yib ngom e aram e ra gel e pagan’ rom ngak Jehovah. Dab mu pagtalin ni: Faanra ngam par ni gab fel’ u wan’ Got, ma thingar um k’adan’um.​—Rom. 5:3-5; Jas. 1:12.

17, 18. (a) Mu susunnag feni ga’ fan ni ngad athamgilgad nge mada’ ko tomur. (b) Mang e ba pagan’dad ngay e chiney ni gad be chugur i yan ko tomur?

¹⁷ Gathi taa bochi ngiyal’ e ngad athamgilgad, ya thingar da athamgilgad nge yan i mada’ ko tomur. Baaray rogon nrayog ni ngan susunnag: Mu susunnag ba bowoch ni ke palpal. Faanra nge magey e piin ni ur moyed u lan fare bowoch ndab ra m’ad, ma thingar ra nonggad ko binaw. Faanra bay bagayad ni yigi nong buchuuw me tal, ma ra limoch nge yim’. Ku taareb rogon ngak e en ni ke nong ke chugur ko binaw me tal, ya ku ra limoch nge yim’. Ere ku arrogodad e ngiyal’ ney ni faanra gad baadag ni ngad uned nga lan e bin nib beech e fayleng, ma thingar da athamgilgad. Ere, ngad lemgad ni bod apostal Paul ni faani gaar: “Aram fan nder mulan’dad.”​—2 Kor. 4:1, 16.

¹⁸ Ba pagan’dad nra ayuwegdad Jehovah ni ngad athamgilgad nge mada’ ko tomur ni bod Paul. I yog u Roma 8:37-39 ni gaar: “Kad gelgad u fithik’ e pi n’ey ni gubin! Ya rogon ni gadad ba t’uf rok e mmudugil u wun’ug ndariy ban’en nrayog ni nge daregdad riy, ndemturug ko yam’ ara yafos; ara pi engel ara yugu boch e kan ni be gagiyeg u tharmiy ara gelngin e kan; ara tin ni bay e chiney ara tin ni bay yib; ara bin nu lang e tamilang ara bin nu ar e tamilang​—dariy ban’en u fithik’ urngin e tin ni ke sunumiy Got nrayog rok ni nge daregdad u rogon ni gadad ba t’uf rok Got ni ke yog ngodad u daken Kristus Jesus ni ir e Somol rodad.” Riyul’ ni bay yu ngiyal’ ni ma aw parowdad u fithik’ e pi magawon rodad. Machane manga yugu da athamgilgad nge mada’ ko tomur, ya nge yag nda boded Gideon nge fapi salthaw rok ni faan nni weliy murung’agrad nni gaar: “Ke aw porowrad, machane ka yad be lol’og e toogor rorad.”​—Judg. 8:4.