Ba T’uf e K’adan’ u Nap’an e Machib
1 I felfelan’ apostal Paul ko machib ni tay nib pag 30 e duw. Machane ki yib e magawon ngak. (2 Kor. 11:23-29) Yugu aram rogon ma de tal ko machib ni i tay. (2 Kor. 4:1) Ya manang ni kemus ni Jehovah e rayog ni nge pi’ gelngin nge ulul ko machib ni be tay. (Fil. 4:13) I weliy Paul murung’agen e k’adan’ ni tay u fithik’ e yul’yul’ ni gaar: “Um folwokgad rog, ni bod rogon ni gu be folwok rok Kristus.”—1 Kor. 11:1.
2 Ngan K’adan’uy ko Skeng: Gubin e rran ni ma moningnag ma be togopuluw e girdi’ nu tabinaw ara tabon e maruwel ara skul ngak e pi walagdad u lan e ulung. (Matt. 10:35; John 15:20) Sana aram e n’en ni be buch rom. Maku reb e sana kam m’ar fa bay boch ban’en ni yibe waliyem ngay ni be skengnag e michan’ rom. Kanawo’ nib fel’ ni ke dag e pi tapigpig nib yul’yul’ rok Got kakrom keb i mada’ ko chiney ni gad ma beeg murung’agen e rayog ni nge ayuwegdad.—1 Pet. 5:9.
3 Faanra ka “don’ed nga dakendad urngin e talin e cham” ni ke pi’ Got ngodad ma rayog ni nge yib gelngidad nge yog nda ululgad ko machib ni gad be tay. (Efe. 6:10-13, 15) Kub t’uf ni ngad meybilgad ni ngan pi’ gelngidad nge yog nda k’adedan’dad. Be pi’ Got gelngin nib thothup ni nge ayuwegdad ngaud k’adedan’dad ko skeng ni ma yib ngodad. (2 Kor. 6:4-7) Thingar da folgad ko thin rok Got nge yog nda gelgad ngak Satan nge re fayleng rok ney. (Ps. 119:24, 85-88) Faanra ud beeged e Bible u gubin e rran ma rayog ni ngari fel’ e tha’ u thildad Jehovah ni bod bbitir ni ke yoloy e chitamangin bangi babyor ngak ma yugu be sul u daken nga i beeg. Fol Bible ni gad ma tay ni gubin ngiyal’ e ra pi’ e gonop ngodad nge yog nda gelgad ko skeng ni ma yib ngodad me ayuwegdad nge yog nda pired ni gad ba yul’yul’ ngak.—Prov. 2:10, 11.
4 Faanra Mu K’adan’um Ma Yira Tow’athnagem: Ra felfelan’ Jehovah ngodad maku ra tow’athnagdad ni faan gad ra k’adedan’dad u fithik’ e yul’yul’ ngad lebuguyed e maruwel rodad ni machib ni bod ni rin’ Paul. (Prov. 27:11) Ngaud athamgilgad ko machib ni gad be tay mad micheged ni michan’ rodad “ni ban’en ni kab tolang puluwon ko gol” e ka be par nib gel.—1 Pet. 1:6, 7.