Mang Fan ni Ngaud Muulunggad Nga Taabang ni Fan ko Liyor ni Gad Ma Tay ngak Got?

1-3. (a) Uw rogon ni ke dag boch e Kristiano nri yad baadag ni ngar uned ko pi muulung ni gad ma tay? (Mu guy e sasing ni bay u tabolngin e re article ney.) (b) Mang e gad ra weliy ko re article ney?

NAP’AN ni ke gaman 17 e duw rok Corinna, min kol e chitiningin ngan fek nga reb e kalbus nib milfan nga Soviet Union ni yima fek e girdi’ ngay ni ngaun maruwel ngorad. Boch nga tomuren min kol Corinna ngan fek nga reb e binaw ni ka nog yu Siberia ngay ni bokum biyu’ e mayel palogin ko gin ni ma par riy. Nap’an nni fek e ngaram mu un maruwel ngak ni bod rogon reb e sib. Bay yu ngiyal’ ni yima tay u wen ko ngiyal’ nrib gel e garbeb ni nge maruwel nde gaman madan e ulum ni kan pi’ ngak ni nge chuw ngay ni nge tay nib magowel. Yugu aram rogon, me dugliy Corinna nge yugu reb e walag nib pin ni ur maruwelgow u taabang ni nga ranow ra unew nga reb e muulung.

² I yog ni gaar: “Gu chuwgow ko gin ni gamow ma maruwel riy ni ke blayal’, ma gamow yan u but’ ni 15 e mayel i yan nga bangi ban’en ni ma yib e train ngay. I chuw e train ko l’agruw e kolok ni tanirran, me yan u lan nel’ e awa nge yan i tal nga bangi ban’en, ma gamow og, mug warow u but’ ni nel’ e mayel nggu tawgow ko gin ni yima muulung riy.” Gur, bay angin e re milekag nem nra tew? I yog Corinna ni gaar: “Nap’an e muulung mug filed Fare Wulyang ko Damit ma gamad yon’ boch e tang ko muulung. N’en ni gu rin’ew e ri pi’ e athamgil nga lanin’mow me pi’ gelngimow.” Yugu aram rogon ni dalip e rran nga tomuren mfini sul Corinna nge fare walag ko maruwel rorow, machane de nang faen nib ga’ ko maruwel ni ka ranow nga bang.

³ Kab kafram i yib nrib ga’ fan u wan’ e girdi’ rok Jehovah e muulung ni yad ma tay. De n’uw nap’an nga tomuren ni sum e ulung ni Kristiano kakrom, me tabab pi gachalpen Jesus ni ngaur ‘muulunggad nga taabang.’ (Acts 2:42) Dabisiy ni ku arrogom ni ga baadag ni ga ma un ko pi muulung ni gad ma tay ni gubin ngiyal’. Machane, gubin e Kristiano ni yad ma mada’nag boch e magawon ni ma mo’maw’nag ngorad ni ngar uned ko muulung ni bod rogon e maruwel ni yad ma un ngay, ara bochan ni boor pa’ u puluwrad, ara ke aw parowrad. Ere, mang e ra ayuwegdad ni ngad gelgad ko pi magawon ney me yag ni nge dab ud paged e muulung?^[1] Uw rogon nrayog ni ngad ayuweged e piin ni gad ma fil e Bible ngorad ni ngar nanged feni ga’ fan ni ngaur uned ko muulung? Gad ra weliy ko re article ney ni faanra um un ko pi muulung ni gad ma tay ma: ra yib angin ngom, miki yib angin ngak yugu boch e girdi’, me felfelan’nag Jehovah.^[2]

ANGIN NRA YIB NGOM

4. Uw rogon ni ma ayuwegdad e pi muulung ni gad ma un ngay ni ngad filed murung’agen Jehovah?

⁴ Gad ma fil ban’en ko pi muulung ni gad ma un ngay. Gubin e pi muulung ni gad ma un ngay e ma ayuwegdad ni ngad filed murung’agen Jehovah ni ir e Got rodad. Mang e ga ma lemnag u nap’an ni gad ra fil murung’agen pi fel’ngin Jehovah ngu nap’an ni ga be motoyil ngak e pi walag ni yad be weliy gelngin feni t’uf Jehovah rorad? Dariy e maruwar riy ni ma k’aringem e re n’ey ni nge gel boch e t’ufeg rom ngak Jehovah. Maku reb e, pi welthin, nge demonstration, nge pi thin nu Bible ni yima beeg ma gad motoyil ngay e ma ga’nag e tamilangan’ rodad ko Thin rok Got. (Neh. 8:8) Am lemnag boch ban’en nrib manigil ni ga ma pirieg u gubin e wik u nap’an ni ga be fal’eg rogon reb e thin nu Bible ni ngam weliy u nap’an e Bible highlight ngu nap’an ni ga be motoyil ngak boch e walag ni yad be weliy boch ban’en ni kar filed ko pi thin nu Bible ni kad beeged ni fan ko fare wik!

5. Uw rogon ni ke ayuwegem e pi muulung ni gad ma un ngay ni ngam fol ko pi n’en ni kam fil u Bible ma ga mon’og ko machib?

⁵ Pi muulung ni gad ma un ngay e gad ma fil riy rogon ni ngad fanayed e pi kenggin e motochiyel nu Bible nga lan e yafos rodad. (1 Thess. 4:9, 10) Fare Fol Wulyang ko Damit ni gad ma tay e kan ngongliy rogon ni nge ayuweg e girdi’ rok Got ko tin nib t’uf rorad ko tirok Got ban’en. Bay reb e Fol Wulyang ko Damit ni kan tay ni ke ayuwegem ni ngam fal’eg i lemnag rogon e pi n’en ni ga be nameg ni ngam rin’, ara ngam n’ag fan e kireb ni ke rin’ reb e walag ngom, ara ngam mon’ognag rogon e meybil ni ga ma tay, fa? Fare muulung ni gad ma tay u lan e wik e ma ayuwegdad ni ngad mon’oggad ko machib. Gad ma fil riy rogon ni ngad machibnaged fare thin nib fel’ nge rogon ni ngad filed e pi kenggin e motochiyel nu Bible ngak e girdi’ nib fel’ rogon.​—Matt. 28:19, 20.

6. Uw rogon ni ma pi’ e pi muulung ni gad ma un ngay e athamgil nga lanin’dad me pi’ gelngidad ni ngad ululgad ko pigpig ni gad be tay?

⁶ Pi muulung ni gad ma un ngay e ma pi’ e athamgil nga lanin’dad. Re m’ag ney ni gad bay riy e rayog ni nge meewarnag e michan’ rodad, mi i k’aring e mochuch ngodad, miki muleg lanin’dad. Machane, pi muulung ni gad ma un ngay e ma pi’ e athamgil nga lanin’dad me pi’ gelngidad ni ngad ululgad ko pigpig ni gad be tay. (Mu beeg e Acts 15:30-32.) Boor e muulung ni gad ma un ngay ni yima weliy riy murung’agen rogon ni be lebug e pi yiiy u Bible. Ma re n’ey e ma ayuwegdad ni ngari mich u wan’dad nra lebug e pi n’en ni ke micheg Jehovah ni fan ngodad boch nga m’on. Machane, gathi kemus ni yigoo piin ni yad ma pi’ e welthin e yad ma pi’ e athamgil nga lanin’dad u nap’an e muulung. Ya nap’an nra pi’ boch e walag e fulweg mar tanggad u polo’ i gum’ircha’rad u nap’an e muulung, ma ma pi’ e athamgil nga lanin’dad. (1 Kor. 14:26) Kub gel e felfelan’ ni gad ma tay u nap’an ni gad ra sabethin e pi walag u m’on ngu tomuren e muulung ni bochan e gad manang ni yad e fager rodad nri yad ma lemnag rarogodad.​—1 Kor. 16:17, 18.

7. Mang nib ga’ fan ni ngaud muulunggad nga taabang?

⁷ Nap’an ni gad ra un ko muulung ma ma ayuwegdad gelngin Got nib thothup. I yog Jesus Kristus ni gaar: “Faanra ba’ telim me ere mmotoyil ko n’en ni be yog fare Kan ni Thothup [“gelngin Got nib thothup,” NW] ngak e pi galesiya!” (Rev. 2:7) Arrogon, ma pow’iy Jesus e ulung ni Kristiano u daken gelngin Got nib thothup. Rayog ni nge ayuwegdad gelngin Got nib thothup ni ngad siyeged e pi n’en nib kireb ni yima waliydad ngay, ma gad machib ndab da rusgad, ma gad dugliy boch ban’en nib fel’ rogon. Ere, aram fan nthingar ud athamgilgad ndab da paged e muulung ya aram e gin nrayog ni nge pi’ Got gelngin nib thothup riy ngodad ni nge ayuwegdad.

ANGIN NRA YIB NGAK YUGU BOCH E GIRDI’

8. Uw rogon ni gad ma ayuweg e pi walag u daken e pi muulung ni gad ma un ngay, nge pi fulweg ni gad ma pi’, nge pi tang ni gad ma un i yon’ u nap’an e muulung? (Kum guy fare thin ni kenggin e “Gubin Ngiyal’ ni Ma Chuw ni Kari Felfelan’.”)

⁸ Muulung ni gad ma un ngay e aram e gin nrayog ni ngad daged riy ngak pi walagdad ni yad ba t’uf rodad. Am lemnag e pi magawon ni be mada’nag boch e walag ko ulung rom. Dariy e maruwar riy ni aram fan ni yol apostal Paul ni gaar: “Ere nge bagadad ma ngi i lemnag bagadad”! Tomuren ni yog Paul e re n’ey me yog ni faanra ‘dab da paged e muulung rodad’ ma aram e rayog ni ngaud rin’ed e re n’ey. (Heb. 10:24, 25) Faanra um un ko pi muulung ni gad ma tay, ma aram e ga be dag ngak pi walagem ni ga ma lemnagrad, ma ga baadag ni ngaum non ngorad, ma ga be tay e tayim ni fan ngorad. Maku reb e, pi fulweg ni ga ma pi’ u nap’an e muulung nge pi tang ni ga ma un i yon’ e ma pi’ e athamgil nga laniyan’ e pi walag.​—Kol. 3:16.

9, 10. (a) Mu weliy rogon nra ayuwegdad fare thin rok Jesus ni bay ko John 10:16 ni ngad nanged feni ga’ fan ni ngaud muulunggad pi walagdad nga taabang. (b) Faanra ud uned ko muulung ni gubin ngiyal’, ma uw rogon nrayog ni ngad ayuweged e piin ni ke n’agrad chon e tabinaw rorad?

⁹ Pi muulung ni gad ma un ngay e ma ayuwegdad ni ngad pared pi walagdad nib taareban’dad. (Mu beeg e John 10:16.) I taarebrogonnag Jesus ir ngak be’ ni ma gafaliy e saf, me taarebrogonnag pi gachalpen ngak ba ulung i saf. Am lemnag e re n’ey: Faanra bay l’agruw e saf u daken e burey, ma bay l’agruw u lan e loway, ma bay yugu reb u bang, ma gur, rayog ni nga dogned ni pi saf nem e yad be par u taabang? Dabiyog, ya ba ga’ nib ulung i saf e yad ma par u taabang u tan pa’ taabe’ ni be gafaliyrad. Ere, ku arrogodad ndabiyog ni ngad leked e en ni be Gafaliydad ni faanra ud palognaged gadad ko ulung. Ba t’uf ni ngad muulunggad e pi walagdad nga taabang ni gad “taab ran’ i saf” ni ‘taabe’ e be gafaliydad.’

¹⁰ Nap’an ni gad ra un ko muulung, ma aram e gad be ayuweg e pi walag ni ngar pared nib taareban’rad. (Ps. 133:1) Bay boch e pi walag u lan e ulung ni ke n’agrad e gallabthir rorad nge pi walagrad. Machane, ke micheg Jesus nra pi’ reb e tabinaw ngorad u lan e ulung nra t’ufegrad me ayuwegrad. (Mark 10:29, 30) Ere, faanra um un ko muulung ni gubin ngiyal’, ma rayog ni ngam mang matam, nge matin, nge walag ni pumoon nge ppin ngak e pi walag ney ni kan n’agrad u taferad! Gathi ra pi’ e re n’ey e athamgil nga lanin’dad ni nge dab ud paged e pi muulung rodad?

RA FELFELAN’NAG JEHOVAH

11. Uw rogon ni ma ayuwegdad e pi muulung ni gad ma un ngay ni ngad pied ngak Jehovah e n’en nthingar da pied ngak?

¹¹ Nap’an ni gad ra un ko muulung ma aram e gad be pi’ ngak Jehovah e n’en nthingar da pied ngak. Bochan ni Ir e Ke Sunmiydad, ma aram fan ni bay rogon ni ngad pininged e sorok nge magar ngak, ma gad tayfan. (Mu beeg e Revelation 7:12.) Nap’an ni gad ra meybil, ara da tanggad, ara da weliyed murung’agen Jehovah u nap’an e pi muulung rodad, ma aram e gad be liyor ngak. Ma aram e n’en ni bay ni thingar da rin’ed ni fan ngak Jehovah. Rib ga’ fan u wan’dad fare tow’ath ni bay rodad ni aram e ngad ted fan e En ke rin’ boor ban’en ni fan ngodad.

12. Ra uw rogon u wan’ Jehovah ni faan gad ra fol ko fare thin ni ke tay chilen ni aram e ngan un ko muulung ni gubin ngiyal’?

¹² Ku bay fan ni ngad folgad rok Jehovah. Ke tay chilen ngodad ndab da paged e muulung ni bochan e kad chugurgad nga tungun e re m’ag ney. Faanra ud folgad ko re motochiyel ney, ma ra felfelan’ Jehovah ngodad. (1 John 3:22) Manang rogon e athamgil ni gad ma tay ni ngaud uned ko pi muulung rodad ma kub ga’ fan u wan’.​—Heb. 6:10.

13, 14. Uw rogon ni ma chugur thildad Jehovah nge Jesus u nap’an ni gad ra un ko muulung?

¹³ Faanra ud uned ko muulung ma aram e gad be dag ngak Jehovah ni gad baadag ni ngad chugurgad ngorow Fak. Nap’an ni gad ra un ko muulung, ma ma fonownagdad Jehovah u daken e Thin rok ni aram e Bible. (Isa. 30:20, 21) Mus ko piin ndarur pigpiggad ngak Jehovah e nap’an ni yad ra un ko muulung ma ma lungurad: “Riyul’ ni ba’ Got romed u roy!” (1 Kor. 14:23-25) Ma fanay Jehovah gelngin nib thothup ni nge pow’iy e pi muulung ni gad ma tay, ma pi n’en ni gad ma fil u nap’an e muulung e ir e ke yib rok. Ere, nap’an ni gad ra un ko muulung ma aram e ngiyal’ ni gad ma motoyil ko pi n’en ni ma fil Jehovah ngodad, ma gad nang gelngin nri gad ba t’uf rok. Ma re n’ey e ma chugurnagdad ngak.

¹⁴ I yog Jesus ni gaar: “Gin nra gak l’agruw fa dalip ni’ ngay u fithingag, e aram e gu ba’ rorad ko gin’em.” (Matt. 18:20) Bay rogon e re thin ney ni yog Jesus ko ulung rodad. Bochan ni Kristus e ir lolugen e ulung, ma aram fan ni be yog e Bible ni ma “yan u fithik’” e girdi’ rok Got ni kar muulunggad. (Rev. 1:20–2:1) Aygum lemnag e re n’ey! Ya gubin ngiyal’ ni ma pi’ Jehovah nge Jesus gelngidad u nap’an e pi muulung ni gad ma un ngay. Ere, ga be lemnag ma mang e ma lemnag Jehovah u nap’an nra guydad ni gad be athamgil ni ngad chugurgad ngorow Fak?

15. Faanra ud uned ko muulung, ma uw rogon ni gad be dag ngak Got ni gad baadag ni ngad folgad rok?

¹⁵ Gad ra un ko muulung ma aram e gad be dag ni gad be tayfan mat’awun Got ko gagiyeg. Yugu aram rogon ni ke tay Jehovah chilen ngodad ni ngaud uned ko muulung, machane der ma towasariydad ni ngad rin’ed e re n’ey. (Isa. 43:23) Ere, aram fan nib milfan ngodad ni ngad daged ngak Jehovah gelngin feni t’uf rodad u polo’ i gum’ircha’dad nge rogon ni gad be tayfan e gagiyeg rok. (Rom. 6:17) Bod ni, sana be guy rogon e en nib ga’ ko maruwel rodad ni nge towasariydad ni ngad yoornaged e tayim ni gad be maruwel riy ma dabkiyog ni ngad uned ko muulung ni gubin ngiyal’. Fa reb e be yog e am ngodad ndab kud muulunggad nga taabang, ya faan gad ra rin’ ma yira bakkingnagdad, ara ni kalbusnagdad, ara ni gafgownagdad. Fa reb e gad baadag ni ngad rin’ed boch ban’en ni ngad felfelan’gad ngay ko bin ni ngad uned ko muulung. Demtrug rogon e magawon ni gad be mada’nag, ma taab n’en e bay nthingar da lemnaged. Re n’em e: Mini’ e ngad pigpiggad ngak? (Acts 5:29) Faan gad ra dugliy ni ngad ted fan mat’awun e gagiyeg rok Jehovah ma aram e gad ra felfelan’nag.​—Prov. 27:11.

UM MUULUNGGAD E PI WALAG NGA TAABANG

16, 17. (a) Uw rogon ni kad nanged nrib ga’ fan e muulung u wan’ e pi Kristiano ko bin som’on e chibog? (b) Uw rogon u wan’ reb e walag ni ka nog George Gangas ngak e pi muulung ni gad ma tay?

¹⁶ Pi Kristiano kakrom e gathi kemus ni taaboch i ngiyal’ u tomuren fare maang’ang ni buch ko Pentekost ko duw ni 33 C.E. e ur muulunggad riy nga taabang. Ya “ur pired ni . . . ke taareban’rad [ara “yad be muulung nga taabang,” NW].” (Acts 2:42) Fare thin ni Greek ni kan pilyeg ni “ur pired” e be yip’ fan ban’en ni yibe rin’ u fithik’ e athamgil u lan ba ngiyal’ nib n’uw nap’an. Gathi gubin ngiyal’ nib mom ni nga i muulung e pi Kristiano nem nga taabang ni bochan e ur med u tan e gagiyeg rok piyu Roma maku i togopuluw e pi tayugang’ ko teliw rok e pi Jew ngorad. Yugu aram rogon, ma ur athamgilgad ni ngaur muulunggad nga taabang.

¹⁷ Boor e pi tapigpig rok Jehovah e ngiyal’ ney ni kar daged nrib ga’ fan u wan’rad e pi muulung ni ma tay e pi Kristiano u taabang. George Gangas nreb e walag nib pag 22 e duw ni i pigpig ni ir reb i girdien fare Ulung ni Ma Pow’iyey e yog ni gaar: “I gag e rib gel e felfelan’ ni gu ma tay ko pi muulung ni gad ma tay pi walagdad u taabang, maku aram reb e ban’en nri ma pi’ e athamgil nga lanin’ug. Rug baadag ni gu ma yib ko gin ni yima muulung riy nib papey, mug chuw ni tomur ni faanra rayog. Nap’an ni gamad ra non boch e pi tapigpig rok Got ma rib gel e felfelan’ ni gu ma tay. Ra gu bay u fithik’rad ma gowa bod ni gu bay u fithik’ girdien e tabinaw rog, ara u lan fare paradis ni be yip’ fan ban’en.” Ki ulul ngay ni gaar: “Rug baadag u polo’ i gum’irchaeg ni ngaug un ko pi muulung ni yima tay ni gubin ngiyal’.”

18. Uw rogon e pi muulung ni gad ma tay u wan’um, ma mang e kam dugliy ni ngam rin’?

¹⁸ Aray rogon ni ga ma lemnag e pi muulung ni gad ma tay ni ngad liyorgad riy ngak Jehovah, fa? Faanra aray rogon e lem rom, me ere mu dugliy u wan’um ni ngam athamgil ni ngaum un ko muulung ni gubin ngiyal’. Ya faan ga ra rin’ ni aray rogon, ma aram e ba taareban’mew David ni Pilung ni faani yog ni gaar: “A Somol, ba t’uf rog fare naun ni ga ma par riy, ni fa gin tagil’im nib maluplup’.”​—Ps. 26:8, BT.