“Mu Ayuweged Gimed rok Urngin Mit e Chogow”

“Bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem, ndemtrug rogon feni yoor ban’en rok.”​—LUKE 12:15.

1, 2. (a) Mange kam guy ni ir e baadag e girdi’ ma ba ga’ ni ir e yad be nameg e ngiyal’ ney? (b) Mange ra rin’ e mit ney e ngongol ngodad?

SALPIY, chugum, gilbuguwan, maruwel nib tolang puluwon, tabinaw​—ireray e pi n’en ni ma lemnag e girdi’ nra fel’ rogoy riy ara ra ayuwegey gabul nge langlath. Rib gagiyel ni gubin e nam ni tin nib fel’ rogon nge tin nib gafgow, ni n’en ni ma sap e girdi’ ngay e rogon ni nge yoor e chugum nge fel’ rogon. Machane, adag rorad ko tirok Got ban’en e ke war.

² Ireray e n’en ni i yog e Bible u m’on nra buch. Be gaar: “Tin tomren e rran e ri bay mo’maw’ ni ngan par nrogon e tin riyul’ ni girdien Kristus. Ya bayi par e girdi’ ni ke mus ni yad e yad be lemnagrad, ma kari gel e chogow rorad, . . . ma bayi t’uf e fafel rorad me tomur Got u wan’rad; ma bay ur dake yad be liyor ngak Got, machane bay ra pied keru’rad nga gelngin.” (2 Timothy 3:1-5) Rib mom nrayog ni nge thil e lem ko piin Kristiano nge bod e lem ko pi girdi’ ney mar uned ko mit ney e par ni bochan e yad ma par u fithik’rad ni gubin e rran. Mange rayog ni nge ayuwegdad ngad siyeged ndab da ‘folgad ko ngongol ni yibe rin’ u roy u fayleng’?​—Roma 12:2.

3. Mang fonow ni pi’ Jesus e ngad weliyed e chiney?

³ I fonownagdad Jesus u murung’agen e re n’ey. Ba ngiyal’ ni i non Jesus ngak e girdi’ ni be tamilangnag boch ban’en u murung’agen e bin nriyul’ e liyor me th’ab be’ nib moon e thin rok me gaar: “Tamachib, mog ngak walageg ni pumoon nge f’oth romow e n’en ni ke pag e chitamangimow romow.” I fulweg Jesus ni be non ngak fare moon nge piin ni be motoyil u daken reb e fonow nib gel. I ginangrad nib gel u murung’agen e chogow me gelnag e re ginang nem u daken ba fanathin nra pug e laniyan’ e girdi’. Thingar da fal’eged i yaliy e n’en ni yog Jesus ko re ngiyal’ i n’em ma gad guy rogon nrayog ni yib angin ngodad ni faan gad ra fanay ko yafas rodad.​—Luke 12:13-21.

Kan Ning Ban’en ni De Puluw

4. Mang fan nde fel’ ni ke th’ab fare moon e thin rok Jesus?

⁴ U m’on ni th’ab fare moon e thin rok Jesus, ma be non ngak pi gachalpen nge yugu boch e girdi’ ni be weliy murung’agen ni ngan ayuwegey ko ngongol nge lem nde yul’yul’, nge murung’agen e en nra weliy ni ir reb i girdien faen Fak e girdi’, nge murung’agen e ayuw ni ma yib ko kan ni thothup. (Luke 12:1-12) Ba mudugil ni ireray boch ban’en nib ga’ fan ni nge fal’eg i lemnag pi gachalpen Jesus. Machane, lukngun fare welthin nra k’aringey ni ngan fal’eg i lemnag e pi thin nem, me th’ab fare moon e thin rok Jesus me yog ngak ni nge pithig e magawon ni ke sum u lan e tabinaw rok ni bochan e chugum. Machane, bay ban’en nib ga’ fan nrayog ni ngad filed ko re n’ey.

5. N’en ni fith fare moon e be dag e mang u murung’agen?

⁵ Yima yog ni “rarogon be’ e ma m’ug ko gin ni ma sor e lem rok ngay u nap’an ni be motoyil ko fonow ko thin rok Got.” Nap’an ni be weliy Jesus murung’agen boch ban’en nib ga’ fan u murung’agen tirok Got, ma fare moon e sana be lemnag rogon e n’en nra rin’ me yog ngak e fel’ rogon u boch ban’en nra yog e salpiy riy. Fan ni ke gun’gun’ fare moon u murung’agen e magawon rok e dan weliy. Sana be gay rogon ni nge fanay Jesus ni bochan e Jesus e bay mat’awun ma goo yimanang nib fel’ rogon ni ma turguy ban’en. (Isaiah 11:3, 4; Matthew 22:16) Yugu demtrug rogon ma, fare deer ni fith e be dag ni bay ban’en ni be magawonnag laniyan’​—de ga’ fan u wan’ e tirok Got ban’en. Gathi be dag e re n’ey nib manigil ni nge bagadad me fal’eg i yaliy ir? Ni bod e pi muulung ko Kristiano, nib mom ni ma yan yan e tafinay rodad ko n’en ni ngad rin’ed u tomren e muulung. Ni susun e ngad tedan’dad ko n’en ni yibe yog ma gad lemnag boch e kanawo’ nrayog ni ngad fanayed e pi thin nem riy nge yog nda mon’ognaged e tha’ u thildad e Chitamangidad u tharmiy, ni aram Jehovah Got, nge pi Kristiano ni taareb e michan’ rodad.​—Psalm 22:22; Mark 4:24.

6. Mang fan nde rin’ Jesus e n’en ni wenignag fare moon ngak?

⁶ Yugu demtrug e n’en ni k’aring fare moon nge wenig ngak Jesus ni nge ayuweg, ma de rin’ Jesus. Ya n’en ni rin’ Jesus e gaar ngak: “I mini’ e ke pi’ mat’awug ni nggu turguy e tinir, ara nggu f’oth romew e n’en ni ke pag e chitamangimew romew?” (Luke 12:14) I yog Jesus e pi thin nem ni be yip’ fan ban’en ni manang e girdi’, ya rogon ni be yog fare Motochiyel Rok Moses e, pi tapuf oloboch e ir e ngar pithiged e magawon ni aram rogon. (Deuteronomy 16:18-20; 21:15-17; Ruth 4:1, 2) Machane, Jesus e ka be magafan’ nga boch ban’en ni kab ga’ boch fan​—ni aram e nge machibnag e tin nriyul’ ni murung’agen fare Gil’ilungun me fil ngak e girdi’ e tin nib m’agan’ Got ngay. (John 18:37) Gathi ma unan’dad nga boch ban’en nde ga’ fan ya gad ma fanay e tayim rodad nge gelngidad ni ngad machibniged fare thin nib fel’ ngak e girdi’ ngad ‘pingeged yad ngar manged pi gachalpen.’​—Matthew 24:14; 28:19.

Mu Ayuw ko Chogow

7. Mange n’en ni kari fal’eg Jesus i yaliy?

⁷ Bochan nrayog rok ni nge nang e n’en ni bay u gum’irchadad, ma manang Jesus nib bay ban’en nib muun ko n’en ni ning fare moon. Gathi kemus ni yog ndabi rin’, ya ki gaar Jesus: “Mu ayuwgad mi gimed guy rogomed rok urngin mit e chogow; ya bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem, ndemtrug rogon feni yoor ban’en rok.”​—Luke 12:15.

8. Mange chogow, ma mang boch ban’en nrayog ni nge buch ko piin nib chogow?

⁸ Chogow e gathi kemus ni ngan adag ni nge yog e salpiy ara boch ban’en, ni bay fan ara bay ban’en ni ngan fanay ngay. Ya ba muun ngay e ‘lem nib pag rogon ni nge fel’ rogoy ara nge yoor e chugum ara ngan chogownag e chugum ku be’, bod rogon ni yog reb e dictionary. Kub muun ngay e lem nder gaman u wan’um e tin ni bay rom, piin nib chogow e ma gay rogon ni nge yog boch ban’en ngorad​—sana tin ni fen boch e girdi’—​ni fan e kemus ni yad baadag ni nge yog ngorad, ni yugu demtrug ko bay fan ngorad fa danga’ ara n’en nra rin’ ngak boch e girdi’. Be’ nib chogow e ma pag e n’en ni ba adag ni nge gagiyegnag e lem rok nge ngongol rok nge yan i mada’ ko ngiyal’ ni fapi n’em e ke mang got rok. Mu lemnag ni taarebnag apostal Paul be’ nib chogow ngak be’ ni ma meybil ko liyos, ndariy e f’oth rok ko Gagiyeg Rok Got.​—Efesus 5:5; Kolose 3:5.

9. Mang boch e kanawo’ ni ra m’ug e chogow riy? Mu weliy boch e kanawo’.

⁹ I ginangey Jesus ni ngan siyeg “urngin mit e chogow.” Boor mit e chogow. Fa bin tomur ko fa Ragag i Motochiyel e weliy boch e pi ney, i gaar: “Dab mu guy e naun rok be’ me awan’um ngak faanem ni bochan e kam chogownag e naun rok. Dab mu guy e ppin rok, ara pi sib rok, ara garbaw rok, ara donkey rok, ara ban’en ni fen faanem me awan’um ngak ni bochan e kam chogownag e tin ni ba’ rok.” (Exodus 20:17) Bible e be weliy murung’agen boor e girdi’ ni kar denengad nib ubchiya’ ni bochan e chogow. Satan e ir e som’on ni chogownag ban’en nib mil fan ku be’​—sorok, ta fan, nge mat’awun Jehovah ni kemus ni yigoo ir e ba mil fan ngak. (Revelation 4:11) I chogownag Efa mat’awun ni nge turguy e tin ni baadag, ma ban ni kan ta’ ngak ko re n’ey e ke tababnag e girdi’ ko denen nge yam’. (Genesis 3:4-7) Fapi kan nib kireb e bogi engel ni daki fel’ u wun’rad mat’awrad ma aram mar “thum’gad nga wuru’ i mat’awrad ni pi’ Got ngorad, mi yad pag e gin ni yad ma par riy” ni bochan ban’en nde mil fan ngorad. (Jude 6; Genesis 6:2) Kum lemnag Balaam, Achan, Gehazi, nge Judas. De fel’ u wan’rad e tin ni bay rorad, ma aram mar paged e chogow ni fan ko chugum nge k’aringrad ngar fanayed mat’awrad nde fel’ rogon, me fekrad i yan ko magothgoth.

10. Uw rogon nthingar da “ayuwgad” nrogon ni tay Jesus chilen?

¹⁰ Rib puluw ni weliy Jesus fare ginang u murung’agen e chogow u daken fapi thin ni “mu ayuwgad”! Mang fan? Ya rib mom ko girdi’ ni ngar guyed yugu be’ ni be chogow, machane ba mo’maw’ ni nga rogned ni yad e yad ba chogow. Arfan ni yog apostal Paul ni “chogowen e salpiy e ir lik’ingin urngin mit e kireb.” (1 Timothy 6:9, 10) I weliy James ni ir reb i gachalpen Jesus ni ar’ar nib kireb e nap’an ni ra gel me diyen “nge gargeleg e denen.” (James 1:15) Rogon nib puluw ko n’en ni tay Jesus chilen ni aram e, thingar da ‘ayuwgad,’ ndab da fal’eged i yaliy yugu boch e girdi’ ngad guyed ko yad ba chogow fa, ya ngad fal’eged i yaliyed gadad ngad guyed ko n’en ni kad ted nib ga’ fan u wun’dad, ya nge yog nda ayuwgad rok “urngin mit e chogow.”

Yafas ni Boor Ban’en Riy

11, 12. (a) Mang ginang e pi Jesus u murung’agen e chogow? (b) Mang fan nib t’uf ni ngad folgad ko fonow rok Jesus?

¹¹ Machane ku bay reb i fan nthingar da ayuwgad ko chogow. Am guy e n’en ni yog Jesus ko migid: “Bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem, ndemtrug rogon feni yoor ban’en rok.” (Luke 12:15) Rib ga’ fan ni ngad fal’eged i lemnag e re n’ey ko biney e tayim ni gad bay riy ni girdi’ e yad ma taareb rogonnag e fel’ rogon ko felfelan’. U daken e pi thin nem, e be tamilangnag Jesus riy ni yafas ni bay fan ma ra fel’ rogoy riy e gathi be tor nga daken e chugum, ni yugu demtrug oren ni bay rodad.

¹² Machane, bay boch e girdi’ ni dabi m’agan’rad ngay ni aray rogon. Sana yad ra lemnag ni chugum e ra yibnag e felfelan’ nga lan e yafas rodad. Ere, boor e tayim rorad ni yad ma pi’ nga boch ban’en ni ma ayuwegrad ni nge yog ngorad urngin e chugum ni yad baadag. Yad ma lemnag ni re n’ey e ir e ra fal’eg e yafas rodad nge manigil. Machane, darur nanged fan fapi thin ni yog Jesus.

13. Mange bin nib thabthabel rogon ni ngan sap ko yafas nge chugum?

¹³ Gathi ngan fal’eg i lemnag ko ba fel’ fa ba kireb ni nge yoor e chugum, ya n’en ni be tamilangnag Jesus e yafas ku be’ e gathi ni ngongliy ko “pi n’en ni ir e mmil suwon ngak faanem,” ni aram, e tin ni bay rok ban’en. Gad gubin ni gad manang ni ngad pired ni gad ba fas ara ngad ted e yafas rodad nib fel’ rogon, e gathi ri boor ban’en nib t’uf riy. Kemus ni n’en nib t’uf e buchuuw e ggan, mad ni ngan chuw ngay, nge bang ni ngan par riy. Piin nib fel’ rogorad e boor e pi n’ey ni bay rorad, ma piin nib gafgow e ba gel e maruwel nthingar ra tiyed me yog e pi n’ey ngorad. Machane, mang e ba thil riy, ya demtrug ko gad ba flaab ara gad ba gafgow​—machane urngin ban’en ma taareb rogon u nap’an tomren e yafas. (Eklesiastes 9:5, 6) Ere, nge yib fan nge angin e yafas, e dabiyog ma ri dabi par ni fan ko pi n’en ni bay rok ara nge yognag be’. Ra tamilang e re n’ey u nap’an ni gad ra fal’eg i yaliy e miti yafas ni be weliy Jesus murung’agen.

14. Mange rayog ni ngad filed ko fare thin ni fan ko “yafas” ni bay u Bible?

¹⁴ Nap’an ni yog Jesus ni “yafos ku be’ e gathi ni ngongliy ko pi n’en ni ir e mmil suwon ngak faanem ,” ma fare thin ni fanay u roy ni “yafas” ko Gospel rok Luke (Greek, zo·eʹ) e be yip’ fan e bin nri ir e yafas, gathi rarogon e par rodad.a I yog Jesus ni yugu demtrug ko gad ba flaab ara gad ba gafgow, ara gad ma par u fithik’ e fel’ rogon fa gafgow, ma dariy gelngidad ngad gagiyegniged n’umngin nap’an ni ngad pired, ara ka gad ra guy e gabul fa. I yog Jesus ko Welthin ni tay u daken e Burey ni gaar: “Mini’ e aromed nrayog ni ku ra mun in e rran ngak ko biney e tamilang ni faanra i magafan’ ngay?” (Matthew 6:27) Rib tamilang ni be dag e Bible ni kemus ni yigoo Jehovah ‘e yib e yafas rok,’ ma kemus ni yigoo ir e rayog ni nge pi’ ngak e piin ni yad ba yul’yul’ e “bin nriyul’ e yafos” ara “yafas ndariy n’umngin nap’an,” yafas ndariy e rofen nra mus, ndemtrug ko yafas u tharmiy fa roy u but’.​—Psalm 36:9; 1 Timothy 6:12, 19.

15. Mang fan ni boor e girdi’ ni yad ma tay e pagan’ rorad ko chugum?

¹⁵ Thin rok Jesus e tamilangnag feni mom ko girdi’ ni nge thil rogon e lem rorad ko yafas. Yugu demtrug ko ba flaab ara ba gafgow be’, ma gubin e girdi’ ni dawora flontgad ma taareb rogorad. I gaar Moses: “Ya ke mus ni medlip i ragag e duw n’umngin nap’an, ma be mada’ ko meruk i ragag ni faanra ba gel fithik’ i downgin bagamad; machane ke mus ni n’en ni be fek e pi duw nem i yib ngomad e magafan’ nge gafgow; der ma n’uw nap’an me chuw e biney e tamilang u owchemad, ni aram e da kug moyed.” (Psalm 90:10; Job 14:1, 2; 1 Peter 1:24) Bochan e re n’ey, ma piin ndawora fal’eged e tha’ nib fel’ u thilrad Got e ba ga’ ni ma af ngorad fare lem ni “mmarod nguud abichgad ma gadad be garbod, ya bayi gabul ma kad m’ad”, ni yog apostal Paul. (1 Korinth 15:32) Ma boch e girdi’ ni yad ma lemnag ni yafas e ba ngoch nap’an ma de mudugil, e yad ma gay rogon ni ngar pirieged e pagan’ u daken e chugum. Sana yad be lemnag ni nge yog e chugum ni boor nrayog i guy e ra gelnag e pagan’ rorad. Ere, maruwel ni yad ma tay e ma yibnag e fel’ rogon ma ma yoornag e chugum rorad, mi yad oloboch ngar taarebnaged rogon ko pagan’ nge felfelan’.​—Psalm 49:6, 11, 12.

Nge Fel’ e Yafas Nga M’on

16. Mange de tor puluwon e yafas ngay?

¹⁶ Sana riyul’ ni ngan par nib fel’ rogoy​—nge yoor e ggan, mad, naun, nge ku boch ban’en e rayog ni nge fal’eg e yafas ara rayog e tafalay nib fel’ me n’uwnag boch nap’an e yafas rok. Machane, riyul’ ni mit ney e yafas e bay fan ma ra pagan’uy ngay, fa? Puluwon e yafas e gathi ma yan u n’umngin nap’an e yafas ku be’ ara urngin e chugum nra yog ku be’ ara nge felfelan’ be’ riy. I tamilangnag apostal Paul e riya’ ni faanra pagan’uy ko pi n’ey nib pag rogon. I yol ngak Timothy ni gaar: “Mog ngak e piin ni boor ban’en rorad ko biney e tamilang ndab ra ufanthingad, ma dabi l’agan’rad ko pi n’em nde mudugil, ni aram e pi n’en ni ma fel’ rogoy riy ko biney e tamilang, machane nge l’agan’rad ngak Got ni ir e ba gol ni be pi’ urngin ban’en ngodad ni be fel’ rogodad riy.”​—1 Timothy 6:17.

17, 18. (a) Mang boch ban’en ni rin’ boch e girdi’ nib l’ag rogon ko chugum nra yib angin ni faan gad ra folwok riy? (b) Mang fanathin ku Jesus e yira weliy ko bin migid e article?

¹⁷ De gonop ni faanra nge tay be’ e athap rok nga daken e fel’ rogon ni bochan e “de mudugil.” Job nib patriarch e be’ nib fel’ rogon, machane nap’an ni buch e n’en ni buch rok, ma de yog ni nge ayuweg e fel’ rogon rok; ya gubin ni m’ay u lan taareb e nep’. Tha’ nib fel’ u thilrow Got e ir e ayuweg u fithik’ e skeng nge gafgow ni yib ngak. (Job 1:1, 3, 20-22) Abraham e ku de pag e fel’ rogon rok ni nge k’aring ndabi rin’ e n’en nib mo’maw’ ni ke yog Jehovah ngak ni nge rin’, ma kan tow’athnag ke mang “chitamangin boor e nam.” (Genesis 12:1, 4; 17:4-6) Pi n’ey nge ku boch ban’en e ba ga’ fan ni ngad folwokgad riy. Yugu demtrug ko gad e piin bitir ara pilibthir, ma ba t’uf ni ngad fal’eged i yaliyed gadad ngad guyed e n’en ni ir e rib ga’ fan ko yafas rodad nge n’en ni ir e be tor e athap rodad ngay.​—Efesus 5:10; Filippi 1:10.

¹⁸ Ba ga’ fan maku be fil ban’en ngodad fa in bugithin ni yog Jesus u murung’agen e chogow nge bin nriyul’ e yafas. Machane, ku bay boch e fonow ni ki pi’ Jesus, ni aram e weliy ba fanathin nra k’aringey ni ngan fal’eg i lemnag ban’en. Uw rogon ni ba ga’ fan e re fanathin nem ko yafas rodad e ngiyal’ ney, ma mang e rayog ni ngad filed riy? Bin migid e article e ra pi’ e fulweg ko re n’ey.

[Footnote]

Mange Fulweg Rom?

• Mange gad ra fil ko n’en ni rin’ Jesus nde rin’ e n’en ni yog be’ nib moon ngak ni bay u fithik’ fa ulung i girdi’?

• Mang fan nthingar da ayuwgad ko chogow, ma uw rogon ni ngad rin’ed?

• Mang fan ni yafas e de yib ko chugum?

• Mange ra k’aring nge yib fan e yafas me pagan’uy ngay?

[Picture on page 5]

Mang fan nde rin’ Jesus e n’en ni wenignag be’ nib moon ngak?

[Picture on page 5]

Chogow e rayog ni nge yib angin nib kireb

[Pictures on page 7]

Uw rogon ni sap Abraham nib fel’ rogon ko chugum?