‘Boor Ban’en Rom u P’eowchen Got,’ Fa?
“Ereray rogon e piin ni boor ban’en ni kar kunuyed ke yoor ban’en rorad, machane de yoor ban’en rorad u p’eowchen Got.”—LUKE 12:21.
1, 2. (a) Mang ban’en ni ma pag e girdi’ farad ni bochan? (b) Mang ban’en nib mo’maw’ ma bay e riya’ riy ni thingari mada’nag e piin Kristiano?
MAGOW MACHAF e gathi kemus ni ba mit e fafel ni baadag e bitir; ya ku un rin’ u bayay ngu bayay ni boor e duw maku boor e nam ni yad ma rin’. Ni bod ni, fare magow gol ntay u lan e bin 19 e chibog u Australia, South Africa, Canada ngu Meriken e boor e girdi’ ni adag maku re n’ey e k’aring boor e girdi’ ni ngar paged e tabinaw rorad nge piin nib t’uf rorad ni fan e ngar gayed e pi machaf nib tolang puluwon u yu yang ndar nanged fan, nge yu yang nib kireb e girdi’ riy. Machane, boor e girdi’ ni ke m’agan’rad ngay ni ngar rin’ed e re n’ey ni bay e riya’ riy mar paged farad ni fan e ngar yognaged e pi n’ey nib tolang puluwon ni ir e yad be yim’ ni bochan.
2 Yugu aram rogon ni yooren e girdi’ e ngiyal’ ney e darur uned ko mit ney e maruwel ko magow gol nge machaf, ma thingar ra maruwelgad nib gel ni fan e nge yog e tin nib t’uf rorad. Ban’en nib mo’maw’ e re n’em ni ngan rin’ u lan e biney e m’ag. Rib mom ni nge magafan’uy ko ggan ni ngan kay, nge mad ni ngan chuw ngay, nge gin ni ngan par riy min pag talin e tin nib ga’ fan. (Roma 14:17) I pi’ Jesus reb e fanathin, ni be weliy rogon feni mom ko girdi’ ni ngar rin’ed e pi n’ey. Bay u Luke 12:16-21.
3. Mu weliy murung’agen fare fanathin ku Jesus ni bay ko Luke 12:16-21.
3 Fare fanathin ni weliy Jesus murung’agen e ku aram ban’en ni weliy u nap’an ni be weliy fan nib t’uf ni ngan ayuw ko chogow, ni aram e n’en ni kad weliyed ko fa binem e article ni ke yan. Tomuren ni ginangey u murung’agen e chogow, me weliy Jesus murung’agen be’ nib moon ni boor ban’en rok nde fel’ u wan’ e pi naun rok ni tafen e chugum nib sug ko pi n’en ni bay rok machane yan nge buthug ngki toy boch nib ga’ ngay ni fan e nge yog ni ki tay e chugum ngay ni boor. Nap’an ni finey ni ke fel’ rogon nrayog ni nge toffan me felfelan’ ko yafas rok, me yog Got ngak ni bayi aw e fan rok ma urngin e pi chugum ni ke yognag fare moon e bayi mil fan ku be’. Me puthuy Jesus e tin tomur e thin ngay ni gaar: “Ereray rogon e piin ni boor ban’en ni kar kunuyed ke yoor ban’en rorad, machane de yoor ban’en rorad u p’eowchen Got.” (Luke 12:21) Mange rayog ni ngad filed ko re fanathin ney? Uw rogon nrayog ni ngad fanayed e re thin n’ey ko yafas rodad?
Be’ nib Moon ni Bay e Magawon rok
4. Fare moon ko fanathin rok Jesus e gad ra yog nib miti mang girdi’?
4 Fare fanathin ni weliy Jesus e boor e nam ni yi manang riy. Kad guyed ni weliy Jesus fare fanathin ni gaar: “Be’ nib moon ni boor ban’en rok e immoy e binaw rok ni boor e ggan ni be yib ko woldug ni ba’ riy.” De yog Jesus ni fapi flaab ni yog ko fare pumoon e yognag u fithik’ e sasalap ara de puluw ko motochiyel ko am. Fan e re thin ney e, fare moon e gathi ir be’ nib kireb. Tin riyul’ riy, e rogon e n’en ni yog Jesus e, ba puluw ni ngan lemnag ni fare moon ni kan weliy murung’agen u lan fare fanathin e ba gel e maruwel ni ke tay. Rayog ni ngan nang ni ir be’ nib moon ni i gay rogon mi i ayuweg e tirok ni fan ko gabul nge langlath, nsana be lemnag e tabinaw rok ngay. Ere, faanra ngan lemnag e maruwel rok, ma sana ra yan i aw ni ir be’ ni ma maruwel nib gel.
5. Mange magawon rok fare moon ko fare fanathin rok Jesus?
5 Yugu demtrug rogon, ma i pining Jesus fare moon ko fare fanathin ni be’ nib flaab, ni be yip’ fan ni be’ ni boor e chugum rok. Machane, rogon ni weliy Jesus, e bay e magawon rok fare moon. Boor e tin ni yognag fa gi but’ ni tafen ko tin ni finey, ni ke yoor ko tin nib t’uf rok ara tin nrayog ni nge ayuweg. Ere mang e gomanga rin’ mab fel’?
6. Mang boch ban’en ni ngan mel’eg ni ma mada’nag e pi tapigpig rok Got e ngiyal’ ney?
6 Boor e pi tapigpig rok Jehovah e ngiyal’ ney ni bay e magawon rorad ni bod rogon fare moon ni boor ban’en rok. Tin riyul’ e Kristiano e yad ma athamgil ni ngar pared ni yad ba yul’yul’, ma yad ma maruwel nib gel, maku yad ma tiyan’rad ko maruwel rorad. (Kolose 3:22, 23) Demtrug ko yad ma un ko maruwel ara bay e siyobay rorad, mab fel’ rogorad, maku yad ba salap ko n’en ni yad ma rin’. Nap’an ni yira ognag boch e maruwel nib tolang puluwon ngorad ara boch ban’en nrayog ni nge ayuweg nge ga’ e siyobay rorad, ma thingar ra dugliyed ban’en. Ngar tolanggad ko maruwel rorad ara ngar ga’naged e siyobay rorad, fa? Ku arrogon, ni boor e fel’ yangaren ni yad e Pi Mich ni yad ba llowan’ u skul. Angin ni ma yib riy e, yima pi’ boch e awards ara scholarhips ngorad ni ngan yan nga boch e skul nib tolang. Ngar folwokgad rok boch e girdi’ ngar feked e pi n’em ni kan ognag ngorad, fa?
7. Uw rogon ni pithig fare moon ko fanathin ku Jesus e magawon rok?
7 Ra ngad sulod ko fare fanathin ni weliy Jesus, ma mang e rin’ fare moon u nap’an ni yognag e binaw rok boor ban’en ndakuriy bang ni nge tay wom’engin e woldug rok ngay? I dugliy ni nge buthug e pi naun rok ni tafen e ggan ngki toy boch ni ba ga’ boch nge tay wom’engin e woldug rok ngay ni ke yoor nge ku boch ban’en nib fel’. Re n’em e yibnag e pagan’ ngak ma aram me gaar u wan’: “Mu gog ngog u lanin’ug ni lungug, Ba fel’ waatham! Ke yog ngom urngin e tin nib fel’ ni ba’ fan ngom nra par ni boor e duw. Mpagan’um, nguum abich ma ga be garbod, ma ga be rin’ e tin ni gab adag!”—Luke 12:19.
Mang Fan ni “Balyang”?
8. Mang ban’en nib ga’ fan nde tiyan’ fare moon ko fare fanathin rok Jesus ngay?
8 Rogon ni yog Jesus e n’en ni nameg fare moon e ke mus ni yibnag e pagan’ nde riyul’. Be m’ug ni gowa ba puluw, machane bay ban’en ndariy riy—n’en nib m’agan’ Got ngay. Fare moon e kemus ni yigoo ir e be lemnag ir, rogon ni nge par nib pagan’ ma be abich ma be garbod, ma be rin’ e tin nib ba adag. I lemnag ni bochan e boor e “tin nib fel’” rok ma aram e ra par ni “boor e duw.” Machane ba kireban’, ya de buch e tin ni lemnag. Bod rogon e n’en ni ke yog Jesus ni, “bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem.” (Luke 12:15) U lan e re nep’ nem, ma urngin ban’en ni ke maruweliy fare moon e goo m’ay, ya gaar Got ngak: “Ri gab balyang! Nep’ ney e ra aw e fan rom; me mini’ e bayi fek urngin e pi n’ey ni kam tay ni fan ngom?”—Luke 12:20.
9. Mang fan ni ka nog nib balyang fare moon ko fare fanathin?
9 U roy e kad bad riy ko gin nth’abi ga’ fan ko fare fanathin rok Jesus. I yog Got ni fare moon e bbalyang. Fare Exegetical Dictionary of the New Testament e be weliy ni rarogon fare thin nu Greek ni fanay e “ri be yip’ fan ni der nang fan.” I yog fare jibiki ni lan e re fanathin ney, e kan tay ni Got ni be fanay fare thin ni nge gagiyelnag “feni dariy fan e n’en ni lemnag faen nib flaab.” Fare thin e gathi be sor fan ku be’ ni de yoor e llowan’ rok, machane be sor fan ku “be’ ni ma siyeg ni nge tor ku Got.” N’en ni weliy Jesus u murung’agen fare moon ni boor ban’en rok e ra yibnag ngan’dad e n’en ni yog ko pi Kristiano u lan e bin nsom’on e chibog ko ulung nu Laodicea, u Asia Minor ni gaar: “Ke lungum u lanin’um, ‘Ke yoor ban’en rog ni ke fel’ rogog, ya urngin e tin ni nge yog ngog e ke yog ngog.’ Machane da mu nang gelngin e gafgow ni kam tay nge rogon yaam ni kari mu gafgow! Ya kam gafgow, ma dakuriy e mad u dakenam, ma kam malmit.”—Revelation 3:17.
10. Mang fan ni nge yoor e “tin nib fel’” e dabi dugliy ni ngan par ni “boor e duw”?
10 Thingar da fal’eged i lemnag e n’en ni be fil e re n’ey ngodad. Rayog ni ngad boded fare moon u lan fare fanathin ni ngad maruwelgad nib gel ni fan e ngad yognaged e “tin nib fel’” machane dab da rin’ed e tin nib t’uf nra ayuwegdad ngad pired ni “boor e duw”? (John 3:16; 17:3) Be gaar e Bible: “Chugum nib tolang puluwon e ra m’ay fan ko rran ko damumuw,” ma “ra mul nga but’—e en ni ke pagan’ ko salpiy rok.” (Proverbs 11:4, 28, NW) Ere, uneg Jesus e bin ntomur e ginang rok ko fare fanathin ni gaar: “Ereray rogon e piin ni boor ban’en ni kar kunuyed ke yoor ban’en rorad, machane de yoor ban’en rorad u p’eowchen Got.”—Luke 12:21.
11. Mang fan nib m’ay fan ni nge tay be’ e athap nge pagan’ rok nga daken e chugum?
11 Nap’an ni yog Jesus ni “ereray rogon,” ma be dag ni n’en ni buch ko fare moon ko fare fanathin e ku ra buch ko piin ni yad ra tay e yafas rorad—athap rorad nge pagan’ rorad—nga daken e chugum. N’en nib oloboch e ‘gathi ri bochan e ngan kunuy boor ban’en’ ya oloboch e de yog ni ‘yoor ban’en rodad u mit Got.’ Ki pi’ James ni apostal reb e ginang ni ku taareb rogon ko biney ni gaar: “Mu telmed ngog, gimed e piin ni be lungumed, ‘Daba’ ara gabul e ngad milekaggad nga reb e binaw ngad siyobaygad riy u lan reb e duw me yog e salpiy ngodad ni pire’.’ Me mus ko n’en ni bay yib ngomed gabul ma da mu nanged.” Mang e thingar rin’ed? “Ere baaray e n’en ni susun e ir e nga mogned: ‘Faanra mm’agan’ Somol ngay, ma bay da pired nguud rin’ed e tiney nge tinem.’” (James 4:13-15) Yugu demtrug feni fel’ rogon be’ ara feni yoor ban’en rok, ma gubin ni yigoo m’ay fan ni faanra de yoor ban’en rok u mit Got. Ere, mange be yip’ fan ni nge yoor ban’en rodad u mit Got?
Nge Yoor Ban’en Rodad u Mit Got
12. Mange gad ra rin’ me yoor ban’en rodad u mit Got?
12 U lan e thin rok Jesus, ma ngan par ni boor ban’en u mit Got e ba thil ko nge yoor ban’en rodad, ara nge yoor e chugum rodad. Ere, be yog Jesus ni n’en ni nge magafan’dad ngay ko yafas e gathi flaab ko chugum ni boor ara felfelan’ ko tin ni bay rodad. Ya, thingar da fanayed e tin ni bay rodad u reb e kanawo’ nra mon’ognag, me gelnag e tha’ u thildad Jehovah. Faan gad ra rin’ ni aray rogon ma ra k’aringdad ni nge yoor ban’en rodad u mit Got. Mang fan? Bochan e ra bing e kanawo’ ko flaab ni boor rok Got ngodad. Be yog e Bible ngodad ni gaar: “Fare tow’ath ni yib rok Jehovah e ir e ra fel’ rogon be’ riy, ma de puthuy e amith ngay.”—Proverbs 10:22, NW.
13. Uw rogon ni ma ‘fel rogoy’ ko pi tow’ath rok Jehovah?
13 Nap’an nra pi’ Jehovah e tow’ath ngak e girdi’ rok, ma ma pi’ e tin nth’abi fel’. (James 1:17) Ni bod ni, nap’an ni pi’ Jehovah ngak piyu Israel bang ni ngar pared riy, me pi’ “ba ngi binaw nib sug ko milik nge t’ay e ngul.” Yugu aram rogon ni fare nam nu Egypt e kan weliy rarogon ni aram rogon, ma fare nam ni pi’ Jehovah ngak piyu Israel e ba thil u reb e kanawo’. I yog Moses ni aray ba “nam ni Jehovah ni Got romed e be ayuweg.” Fan e re thin nem e, ra fel’ rogorad ni bochan e ra ayuwegrad Jehovah. N’umngin nap’an ni par piyu Israel ni yad ba yul’yul’ ku Jehovah, me flaabnagrad me felfelan’rad u reb e kanawoen e yafas nib gagiyel nib tolang ko pi nam nib liyegrad. Arrogon, tow’ath rok Jehovah e aram e n’en nra “fel’ rogon be’ riy”!—Numbers 16:13; Deuteronomy 4:5-8; 11:8-15.
14. Mange ma felfelan’ e piin ni boor ban’en rorad u mit Got ngay?
14 Fare thin ni nge “yoor ban’en u mit Got” e ku rayog ni nge yip’ fan ni thingari dabi magafan’ be’ nga rarogon u mit e girdi’, machane thingari magafan’ nga rarogon u mit Got. Piin ni boor ban’en rorad e ba ga’ ni ma magafan’rad nga rarogorad u mit e girdi’. Ba ga’ ni ma m’ug e re n’ey u rogon kanawoen e yafas rorad. Yad baadag ni nge yog e girdi’ e sorok ngorad ni bod rogon ni ke yog e Bible ni “tin nra guy e girdi’ ma yad baadag ni nge yog ngorad.” (1 John 2:16) Ba thil, ya piin ni boor ban’en rorad u mit Got e yad ba felfelan’ ni bochan e yad ba fel’ u wan’ Got ma ma dag e gol nib gel ngorad mab fel’ thilrad Jehovah. Re n’em e ma yibnag e felfelan’ nge pagan’ ngorad ni kab gel ko felfelan’ ni ma yibnag e flaab ko chugum. (Isaiah 40:11) Fare deer ni bay e, Mange thingar da rin’ed ya nge yoor ban’en rodad u mit Got?
Boor Ban’en u Mit Got
15. Mange thingar da rin’ed ya nge yog ni yoor ban’en rodad u mit Got?
15 U lan fare fanathin ku Jesus, ma fare moon e ke maruwel nib gel ni fan e nge yoor ban’en rok, ma aram e kan nog nib balyang. Ere, faanra nge yoor ban’en rodad u mit Got, ma thingar da athamgilgad ni ngad maruwelgad nib gel ma gad un ko bin nth’abi ga’ fan e maruwel mab ga’ angin u mit Got. Reb ko pi n’ey e motochiyelnag Jesus ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg.” (Matthew 28:19) Ngad fanayed e tayim rodad, nge gelngidad, nge fadad salap, ni gathi fan ni ngad mon’oggad, machane ngad fanayed ko maruwel ni machib nge ngan pingeg e girdi’ ngar manged pi gachalpen Jesus e rayog ni ngan taareb rogonnag ko salpiy ni fan ko siyobay. Piin ni kar rin’ed ni aray rogon e kar t’ared wom’engin e tirok Got ban’en nib fel’, ni bod rogon ni ke m’ug ko re n’en ni baaray ni buch ku be’.—Proverbs 19:17.
16, 17. Mang boch ban’en ni ke rin’ boch e girdi’ ni be dag kanawoen e yafas ni boor ban’en ku be’ riy u mit Got?
16 Am lemnag e n’en ni buch rok reb e Kristiano ni pumoon u lan reb e nam nu Asia. Re moon nem e ma maruwel ni ma ngongliy e computer mab fel’ puluwon e re maruwel rok nem. Machane, maruwel rok e ma fek ba ga’ yang ko tayim rok ma aram me k’aring ni nge magawon laniyan’ ko tirok Got ban’en. Tomur riy, ma de gay rogon ni nge mon’og ko maruwel rok, ya tal riy me tababnag reb e maruwel u kanawo’ ni ma pi’ e ice cream ni chuway’ ya nge yog ni tay boor e tayim ni fan ko tirok Got ban’en nge ku boch ban’en nib mil fan ngak ni thingari rin’. Piin ni ur maruwelgad u taabang kafram e ur moningniged, machane mang e buch? I gaar: “Tin riyul’ riy e, kab fel’ rogog ko salpiy e chiney ko ngiyal’ ni baaram ni ug maruwel ko computer. Ke yibnag e felfelan’ ngog ni bochan e dariy e mochuch nge magafan’ rog ni bod rogon e bin ni ug un ngay e maruwel kafram. Ma bin nth’abi ga’ fan riy, e chiney e kari chugur thilmow Jehovah.” N’en ni ke rin’ e re Kristiano ney e bungnag rogon ni nge un ko machib u polo’ e tayim rok, ma chiney e be pigpig ku Jehovah ko branch ofis ko Pi Mich Rok Jehovah ko nam rok. Pi tow’ath rok Jehovah e ir e ‘ma yoornag ban’en rok be’ u mit Got.’
17 Ku reb e be’ nib ppin ni ilal u ba tabinaw ni skul e ir e th’abi ga’ fan u wan’ e girdi’ riy. I un ko skul nib tolang u France, Mexico, nge Switzerland ni ir e k’aring nge yog ni yog ngak e maruwel nib fel’. I yog ni gaar: “Boor ban’en rog; ke tay e girdi’ fag ma boor ban’en nra fel’ rogog riy ni kan ognag ngog, machane u lanin’ug e gowa dariy ban’en rog, ni ir ban’en nde fel’ lanin’ug ngay.” Ma aram me fil murung’agen Jehovah. Me gaar: “Nap’an ni gu mon’og ko tirok Got ban’en, ma lem rog ni nggu rin’ e tin nib m’agan’ Jehovah ngay nge nggu pi’ puluwon e n’en ni ke pi’ ni fan ngog e ayuwegeg ni nge tamilang u wan’ug e n’en ni nggu rin’—ni aram e nggu pigpig ngak u polo’ e tayim rog.” I tal ko maruwel rok ma de n’uw nap’an nga tomuren min taufenag. U lan fa 20 i duw ni ke yan ma be pigpig ngak Jehovah u polo’ e tayim rok u fithik’ e felfelan’. I gaar: “Bay boch e girdi’ ni be lemnag ni kug adbey e n’en ni ir e gub cheg riy, machane kar guyed ni gub felfelan’, ma yad baadag e pi motochiyel ni gu ma fol riy u lan e yafas rog. Gubin e rran ni gu ma meybil ngak Jehovah ni nge ayuwegeg ni nge sobut’ e lem rog nge yog ni gu fel’ u wan’.”
18. Bod Paul, uw rogon nrayog ni ngad pired nib yoor ban’en rodad u mit Got?
18 Saul ni mang apostal Paul, e bay e maruwel nrayog ni nge yog ngak nib fel’. Machane, tomur riy me yoloy ni gaar: “Urngin ban’en ma kug matheeg ngay ni kari yan i aw ni lus ni bochan e bin ni ka ba ga’ fan e nggu nang Kristus Jesus ni ir e Somol rog.” (Filippi 3:7, 8) U wan’ Paul, e fapi fel’ rogon ni ke yog ngak u daken Kristus e kab ga’ ko tin nrayog ni nge ognag e fayleng. Taareb rogon, nfaan yira nameg e yafas ni ngan par ni yib yul’yul’ ngak Got, ma ku gad ra felfelan’ nga reb e yafas ni boor ban’en rodad u mit Got. Thin rok Got e be micheg ngodad ni gaar: “Um par ni bay madgun Somol u wan’um, ma ba sobut’an’um, me yoor ban’en rom, ma ga par ni yibe ta’ fam, me n’uw nap’am.”—Proverbs 22:4.
Rayog ni Ngam Weliy?
• Mange magawon rok fare moon ko fare fanathin rok Jesus?
• Mang fan ni ka nog nib balyang fare moon ko fare fanathin rok Jesus?
• Mange be yip’ fan ni ngan par ni boor ban’en rodad u mit Got?
• Uw rogon nrayog ni ngad pired ni boor ban’en rodad u mit Got?
[Picture on page 9]
Mang fan ni ka nog nib balyang fare moon ni boor ban’en rok?
[Picture on page 10, 11]
“Fare tow’ath ni yib rok Jehovah e—ir e ra yoornag ban’en rok be’ u mit Got riy”
[Picture on page 13]
Uw rogon ma kanawo’ nra mab ngodad ko maruwel nib fel’ e rayog ni nge mang ba skeng ngodad?