Ri Ma Lemnag Jehovah E Pi Pilibthir Ni Tapigpig Rok

“Yi Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed.”​—HEB. 6:10.

1, 2. (a) Ga ra guy be’ nib manna’ chugen ma mange ra yib ngan’um? (b) Uw rogon ni ma lemnag Jehovah e piin pilibthir?

NAP’AN ni ga ra guy e piin pilibthir u lan e ulung ni ke manna’ chugurad, ma ma yib ngan’um reb e thin ni bay u Bible ko babyor rok Daniel fa? I piliyeg Jehovah e changar ku Daniel me guy yaan ni be’ nib manna’ chugen. Me yoloy Daniel ni gaar: “Nap’an ni ku gu be changar, min tay e pi chiya ni nge yan i par e piin ni pilung ngay. Faanem ni kab kakrom i yib ni immoy e yan i par nga daken reb. Ma mad rok e bod feni wechwech e ayis ni ma mul u lang nga but’, ma piyan lolugen e bod e tin th’abi klin bunuen e saf.”​—Dan. 7:9.

² Bunuen e saf e ba wechwech ramaen. Ere chugey ni ke manna’ nge fare thin ni “Faanem ni kab kakrom i yib ni immoy” e aram Got nib gel feni kakrom mab ga’ e gonop rok, l’agruw ni bay rogon ni ngarda ted fan nib gel. Uw rogon Faanem ni kab kakrom i yib ni immoy, ni Jehovah, ni ma changar ko piin pilibthir ni pumoon nge ppin nib yul’yul’? Thin rok Got e be yog ni “llug ni ke manna’ e ba teeliyaw nib gamog ni faanra kan pirieg ni be yan u kanawoen e tin mmat’aw.” (Prov. 16:31, NW) Arrogon, faanra ba yul’yul’ e Kristiano nib manna’ chugen, ma ke m’ug nib gamog u p’eowchen Got. Ga ma lemnag pi walagem ni pumoon nge ppin ni bod rogon ni ma lemnagrad Jehovah, fa?

Mang nib Ga’ Farad?

3. Mang nib ga’ fan ngodad e piin pilibthir ni walagdad?

³ U fithik’ e pi tapigpig rok Got ni kar pilibthirgad e bay boch i yad ni gothon fare Governing Body ko Pi Mich Rok Jehovah ni ur lekaged e ulung kafram ma boch i yad e ka ma lekag e ulung e chiney, ma boch i yad e pioneer nge tamachib ko Gil’ilungun​—yad e walag ni pumoon nge ppin nib yul’yul’ u lan e ulung rodad. Sana ga manang boch i yad nib pasig ni i machibnag fare thin nib fel’ ni ke yoor e duw ni ke yan ma ke dag e kanawo’ nib fel’ ni ke ayuweg e piin fel’ yangaren ke fel’ rogorad. Boch i walagdad ni kar pilibthirgad e immoy e maruwel nib gel ni ur ted u lan e ulung ma kar athamgilyed u fithik’ e gafgow ni yibe tay ngorad ni fan ko fare thin nib fel’. Jehovah nge “fare tapigpig nib yul’yul’ mab gonop” e yow be pining e magar ko maruwel ni kar ted kafram nge mada’ ko chiney ni fan ko Gil’ilungun.​—Matt. 24:45.

4. Mang fan ni thingar da ted fan ma gad yibilay e piin Kristiano ni kar pilibthirgad?

⁴ Piin kar pilibthirgad ni yad ba yul’yul’ e bay rogon ni nge pining boch e pi tapigpig rok Jehovah Got e magar ngorad min tay farad. Tin riyul’ riy, e Motochiyel rok Got ni kan pi’ u daken Moses e be puthuy e runguy nge tay fan ngak e piin pilibthir ko madgun Jehovah. (Lev. 19:32) Thingar da meybilgad ni fan ko piin ni walagdad nib yul’yul’ mad pininged e magar ngak Got ko maruwel ni kar ted. I yibilay apostal Paul urngin e girdi’ ni ur maruwelgad u taabang.​—Mu Beeg e 1 Thessalonika 1:2, 3.

5. Uw rogon nra fel’ rogodad ko chag ni gad ma tay ngak e piin pilibthir ni ma liyor ngak Jehovah?

⁵ Ra fel’ rogon urngin e girdi’ u lan e ulung ni bochan e yad be chag ngak e Kristiano ni kar pilibthirgad. Piin ni kar pilibthirgad ni yad ba yul’yul’ ko liyor rorad e ke yoor e tamilangan’ rorad ni bochan e fol Bible, nge fal’eg i yaliy ban’en, nge n’en ni ke buch rorad. Kar filed rogon ni ngar gum’an’gad mu ur daged ni yad be thamiy e kireban’ rok boch e girdi’, ma ma yib e felfelan’ ngorad u nap’an ni yad ra fil ko bin migid e mfen e tin kar nanged. (Ps. 71:18) Pi fel’ yangaren, mu gonopgad ngam feked ere tamilangan’ ney ni bod ni gimed be l’ing e ran u lan ba luwed nib toar.​—Prov. 20:5.

6. U rogon ni ngam dag ngak e piin pilibthir nriyul’ nib ga’ farad u wan’um?

⁶ Ga ma yog ngak e piin pilibthir ni yad ba t’uf rom ni bod rogon ni yad ba t’uf rok Jehovah? Reb e kanawo’ e nga mog ngorad gelngin ni yad ba t’uf rom nge ferad yul’yul’ nge rogon feni ga’ fan u wan’um e tin yad ma lemnag. Maku reb e ngiyal’ ni ga be fol ko fonow rorad e ga be dag nriyul’ ni ga be tay farad. Boor e Kristiano ni ke pilibthir ni ma yib ngan’rad e fonow nib fel’ ni yog ngorad rok boch e pilibthir nib yul’yul’, nge rogon ni ur folgad riy me fel’ rogorad u nap’an e yafas rorad.a

Ngan Sumunguy nib Fel’ Rogon

7. Mini’ e ke tay Jehovah ni bin m’on e maruwel rok e nge ayuweg e piin pilibthir?

⁷ Ke pi’ Got ngak chon e tabinaw rok e piin ke pilibthir ni bin m’on e maruwel rorad e ngar ayuweg e pilibthir rorad. (Mu Beeg e 1 Timothy 5:4, 8.) Jehovah e ma felfelan’ ko pi tabinaw ni yad ma ayuweg e girdi’ rorad ni ke pilibthir ma yad ma t’ufegrad ni bod ir ni ma t’ufeg e pilibthir. Ma ayuweg Got e tabinaw ni aray rogon ma ra tow’athnagrad ko maruwel ni yad be tay.b

8. Mang fan ni nge dag e ulung ni yad ma lemnag e piin pilibthir ni Kristiano?

⁸ Ma felfelan’ Jehovah u nap’an nra ayuweg e ulung e piin ni pilibthir nib yul’yul’ ko tin ba t’uf rorad ma dariy be’ u tabinaw rok ntaareb e michan’ rorow ara baadag ni nge ayuweg. (1 Tim. 5:3, 5, 9, 10) Girdi’ ko ulung e ngar daged ni ‘yad ma t’ufeg pi walagrad ma yad ma runguy’ e piin pilibthir. (1 Pet. 3:8) Rogon e lem rorad ngak e piin ni pilibthir u lan e ulung e rib fel’ rogon ni ke weliy Paul ni faani yog nra gafgow bayang i dowey “ma urngin e yu yang ni ka ba’ e yad ma un ngak ko gafgow.” (1 Kor. 12:26) Ra ngan dag e runguy ngak e piin pilibthir ma be dag e n’en ni fan fare fonow rok Paul ni gaar: “Nge bigimed me ayuweg bigimed nge un i fek gilban faanem, ereray rogon ni gimed ra rin’ ma aram e kam folgad ko fare motochiyel ni pi’ Kristus.”​—Gal. 6:2.

9. Mange magawon nrayog ni yib ngak be’ ni ke pilibthir?

⁹ Mange magawon ko piin pilibthir? Bochi yad e ba mom ni nge magar. Rayog ni ngar lemnaged ndabkiyog boch ban’en rorad​—ni bod ni ngan guy e togta nge ngan pi’ puluwon boch ban’en nge ngan klinnag e naun nge ngan fal’eg e ggan. Bochan ni piin ni pilibthir e ke kireb ngorngorrad ko abich nge garbod, ma yad ma lemnag nda ki t’uf ni ngar abichgad ara ngar garbodgad nrogon nib t’uf nga dowrad. Ku taareb rogon ko tirok Got ban’en ni yad ma un ngay. Bochan ni ke bu’gol e changar ma ke kireb teliy ma rayog ni nge mo’maw’nag e beeg babyor nge motoyil u nap’an e pi muulung ko Kristiano, maku rayog ni nge pi’ magaran ni ngan fal’eg rogoy ngan un ngay. Ere, mange rayog ni ngan rin’ ko piin pilibthir?

Uw Rogon ni Ga Ra Pi’ e Ayuw

10. Mange nge rin’ e piin piilal nge yog nni pi’ e ayuw ko piin pilibthir?

¹⁰ Boor e ulung ni yima ayuweg e pilibthir riy u boch ban’en. Pi walag ni pumoon nge ppin e yad ma ayuwegrad ko chuway’, nge lum, nge klin. Yad ma ayuwegrad ko fol Bible, min fekrad ko muulung, nge rogon ni nguur uned ko machib. Pi mich ni ka yad ba pagel e yad ma ayuwegrad ko maaf. Faanra piin ni pilibthir e dabiyog ni ngar chuwgad u tabinaw, ma rayog ni ngar motoyilgad ko welthin u telephone, ara ni recordnag fare welthin min pi’ ngorad. Faanra rayog, ma piin piilal e yad ra fal’eg boch e yaram nge yog nni ayuweg e piin pilibthir u lan e ulung ko tin ba t’uf rorad.c

11. Mu weliy rogon ni ayuweg ba tabinaw reb e pilibthir.

¹¹ Piin Kristiano e ku rayog ni ngar daged e gol nge t’ufeg. Tomuren nke yim’ leengin reb e pilibthir ni pumoon, ma dabkiyog ni nge pi’ puluwon fare naun ni i par riy. Re moon nem nge ppin rok e ur filew e Bible ngak reb e tabinaw​—nib matam nge ba matin nge l’agruw i rugod ni fakrow—​ni bay e tabinaw rorad nib ga’. Mar pied ngak l’agruw e singgil ni nge par riy. U lan 15 e duw ni ur abichgad u taabang, muur felfelan’gad u taabang, ma ur daged e t’ufeg ngorad u taabang. Boor ban’en ni fil e piin bitir ko michan’ rok fare pumoon, ma rib ga’ e felfelan’ ni ur pied ngak. Nap’an ni gaman 89 e duw rok fare moon me yim’. Fare tabinaw e ka yad be pining e magar ngak Got ni bochan e pi tow’ath ni ke yog ngorad ni bochan e ur chaggad fare moon. Ke yog e tow’ath ngorad ni bochan ni kar ayuweged reb i gachalpen Jesus Kristus.​—Matt. 10:42.d

12. Mange rayog ni ngam rin’ed nge nang e pi walag ni pilibthir ni yad ba t’uf romed?

¹² Sana dabiyog rom ni ngam ayuweg reb e walag nib pilibthir ni bod ni rin’ ere tabinaw ney, machane rayog ni ngam ayuwegrad u boch e kanawo’ ni bod ni ngam fekrad ko muulung fa machib. Rayog ni ngam piningrad nga tabinaw rom ara ngam fekrad ngam marod nga bayang ni faanra rayog rorad. Rayog ni ngam man ngam guyrad u nap’an ni kar m’argad. Maku, ngam ayuwegrad ni bod e piin piilal. U n’umngin nap’an ni ka be yog rorad ni ngaur dugliyed boch ban’en, ma susun ni ngan lemnagrad u nap’an ni yibe dugliy boch ban’en ni bay rogon ngorad. Mus ko piin ni ke marongon ma rayog ni ngar thamiyed ni faanra un tayfarad.

Dabi Pag Jehovah Talin e Maruwel Romed

13. Mang nib ga’ fan ni nguun yan nga laniyan’ e pilibthir ni Kristiano?

¹³ Rib ga’ fan ni ngan dag ni yibe yan nga laniyan’ e piin pilibthir. Piin pilibthir e ma kireban’rad nga boch ban’en ndabkiyog ni ngar rin’ed ni bod kafram ni yad ba gel ma kab fel’ fithik’ i dowrad. Bod rogon reb e walag ni ppin ni i pigpig ku Jehovah ni polo’ e tayim u lan 50 e duw ma ke yib e m’ar ngak ma ke mo’maw’ rok ni nge un ko muulung. Nap’an nra taarebnag rogon e ngiyal’ nib pasig ko machib kafram nge ngiyal’ ney ndabkiyog rok, me tabab ko meyor. Me sap nga but’ ni be yor me gaar, “Dakuriy ban’en nrayog ni gu ra rin’ e chiney.”

14. Mange bay ko psalms nrayog ni pi’ e athamgil nga laniyan’ e pilibthir ni tapigpig rok Jehovah?

¹⁴ Faanra gur reb e pilibthir, ma kaam lem ni aram rogon, fa? Ara kam lemnag ba ngiyal’ nke pagem Jehovah, fa? Aram rogon ni thamiy fare psalmist u nap’an nke yoor e duw rok me meybil ku Jehovah ni gaar: “Dab mu pi’ keruum ngog e chiney ni kug pilibthir, dab mu n’ageg e chiney ni kugu meewar. A Got chiney ni kug pilibthir ma ke mat lolugeg e dab mu n’igeg.” (Ps. 71:9, 18) Riyul’ ni dabi n’ag Jehovah e an ni yoloy ere tang nem maku dabi n’agem. Ma reb e tang e ke weliy David rogon ni ma pagan’ ko ayuw rok Got. (Mu beeg e Psalm 68:19.) Rayog ni nge pagan’um ni faanra gur reb e pilibthir ni Kristiano nib yul’yul’, ma bay Jehovah rom nra ayuwegem ni gubin ngiyal’.

15. Mange rayog ni nge ayuweg e pilibthir ngi i par laniyan’rad nib mudugil?

¹⁵ Urngin ban’en ni kam rin’ed gimed e pilibthir ni Pi Mich Rok Jehovah kafram nge chiney ni fan e ngan pining e sorok ngak Got e ri dabi pagtalin. Be gaar e Bible: “Yi Got e gathi ba laniyan’. Gathi bayi pag talin e maruwel ni kam ngongliyed.” (Heb. 6:10) Ere, ba kireb ni ngam lemnag ni bochan e kam pilibthir ma dakuriy fam u wan’ Jehovah. Mu guy rogon nge dab kum lem ni aram rogon. Ngam felfelan’ ko tow’ath rom nge athap rom ko gabul nge langlath! Bay e athap rodad ko ‘gabul nge langlath’​—ni bin th’abi fel’—​ma pi n’ey e ke micheg e En Tasunmiy nra pi’ ngodad. (Jer. 29:11, 12; Acts 17:31; 1 Tim. 6:19) Mu lemnag e athap rom, mi i par lanin’um nib gel ni bod ni ka gab pagal, ma dab um lemnag ndakuriy fam u lan e ulung!e

16. Mang fan ni lemnag reb e walag ni pilibthir ni nge tal ko maruwel ko piilal, ma uw rogon ni ke pi’ boch e piilal e athamgil nga laniyan’?

¹⁶ Mu lemnag Johan ni ke gaman 80 e duw rok ma ka be par nib yul’yul’ ni be ayuweg Sannie ni leengin ni ke m’ar.f Boch e walag ni ppin e yad ma thilthil i ayuweg Sannie me yog ni un Johan ko muulung nge machib. Yugu aram rogon ma kari aw parwon Johan, me lemnag ndabkiyog ni nge ulul ko pigpig ni reb e piilal ko ulung. I non ni ke sugnag e lu’ owchen ni gaar, “Mang fag ni gag reb e piilal? Dabkiyog ni nggu un ko maruwel ko piilal u lan e ulung.” Boch i walagen ni piilal e kar micheged ngak ni rib ga’ fan e tin i rin’ nge tin i turguy. Ka rogned ngak ni nge ulul ko maruwel ko piilal nrogon nrayog rok. Ke athamgil laniyan’ Johan, me ulul ko pigpig ni reb e piilal, ma ke mang tow’ath ko ulung.

Ri Ma Lemnagey Jehovah

17. Mange ke micheg e Bible ngak e pi Kristiano ni kar pilibthirgad?

¹⁷ Thin nu Bible e be tamilangnag ni ku rayog ko piin pilibthir ni ngar ululgad ko pigpig ku Jehovah ni yugu aram rogon ni boor e magawon. I yog fare Psalmist ni gaar: ‘Yad bod e gek’iy nni yung nga lan e naun rok Somol . . . ni ke pilibthir ma ku ma k’uf ma ku be par ni kab galunglung ma kub gel.’ (Ps. 92:13, 14) Yugu aram rogon ni gafgow apostal Paul ko m’ar, ‘ma ri de mulan’ ni yugu aram rogon ni be meewar e dowef rok i yan.’​—Mu beeg e 2 Korinth 4:16-18.

18. Mang fan nib t’uf ni ngan ayuweg e piin pilibthir u lan e ulung nge piin ma ayuwegrad?

¹⁸ Ngiyal’ ney e bay boch e pilibthir ni ka be par ni bod e “gek’iy ni kab dammal.” Machane magawon ko m’ar nge pilibthir e rayog ni nge k’aring e magafan’, ni mus ngak e piin ni bay e girdi’ rorad nra ayuwegrad. Ma piin ma pi’ e ayuw e ku ma aw parowrad. Girdi’ u lan e ulung e ba milfan ngorad ni ngar daged e t’ufeg ngar ayuweged e piin pilibthir nge piin ma ayuwegrad. (Gal. 6:10) Ayuw ni aram rogon e gathi kemus ni nga nog ni, ‘ngam pared ndabi yib e ulum ngomed ma ba fel’ rogomed ko abich’ ma dabni ayuwegrad nrogon ni ngan rin’.​—Jas. 2:15-17.

19. Mang fan nrayog ni nge pagan’ e piin pilibthir ni Kristiano ni yad ba yul’yul’ ko gabul nge langlath?

¹⁹ Nap’an nra pilibthir e Kristiano ma rayog ni nge lich e maruwel rorad, machane ka rogon ni yad ba t’uf rok Jehovah. Machane, urngin e pi Kristiano ney nib yul’yul’ e rib ga’ farad u owchen, ma ri dabi pagrad. (Ps. 37:28; Isa. 46:4) Jehovah e ra ayuwegrad mi i pow’iyrad u n’umngin nap’an ni ka yad ba fos.​—Ps. 48:14.

[Footnotes]

Uw Rogon ni Ga Ra Fulweg?

• Mang fan ni nguum lemnag nib ga’ fan e piin pilibthir ni Kristiano ni yad ba yul’yul’?

• Uw rogon ni ngad daged e runguy ngak e pi walagdad ni kar pilibthirgad?

• Mange ra ayuweg e pi tapigpig rok Jehovah ni kar pilibthirgad nge par nib fel’ lanin’rad?

[Pictures on page 22]

Girdien e ulung e ri yad ma lemnag e piin pilibthir