Ga Ra Yul’yul’ Ma Ra Felfelan’ Jehovah

“Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.”​—PROV. 27:11.

1, 2. (a) Mang togopuluw ni tay Satan ni be weliy fare babyor ni Job murung’agen? (b) Mang e be dag ni ku be gathibthibnag Satan Jehovah u tomren e n’en ni buch rok Job?

KE PAG Jehovah Satan ni nge skengnag e yul’yul’ rok Job. Ke gafgow Job ya ke yim’ e gamanman nge bitir rok ma ke yib e m’ar ngak nib gel. Machane gathi ke mus ni yigoo Job e be lemnag Satan ni nge skengnag e yul’yul’ rok. Be gaar Satan: “Be’ nib girdi’ e ra pag urngin ban’en ni fan e nge ayuweg e pogofan rok.” Re thin ney ni yog Satan e ku fan ngak gubin e girdi’ ni be pigpig ngak Got ma tomren ni yim’ Job ma ka be ulul e re togopuluw ney.​—Job 2:4.

² Gonap’an 600 e duw u tomren e skeng ni yib ngak Job, me yog Solomon ni gaar: “Fakag, mu gonop, ma gu ra felfelan’; ya bay e fulweg ni gu ra yog ko en be gathibthibnageg.” (Prov. 27:11) Ba tamilang ni ngiyal’ nem e ku be togopuluw Satan nga mat’awun Jehovah. N’en ni dag ngak apostal John, e ke guy ni be gafgownag Satan e pi tapigpig rok Got u tomren ni kan chuweg Satan u tharmiy. Ke buch e re n’ey u ba ngiyal’ u tomren ni ke tabab Gil’ilungun Got ko duw ni 1914. Ku arrogon e ngiyal’ ney ko tin tomren e rran ko re fayleng nib kireb ney ni ku be guy Satan rogon ni nge dabki par e pi tapigpig rok Got ni yad ba yul’yul’!​—Rev. 12:10.

3. Mang e gad ra fil nib ga’ fan ko fare babyor ni Job?

³ Am mu lemnag dalip ban’en nib ga’ fan ni gad be fil ko fare babyor ni Job. Som’on, skeng ni yib ngak Job e be dag ko mini’ e toogor ko girdi’ ma be togopuluw ko girdi’ rok Got. Re toogor nem e Satan ni Moonyan’. Bin l’agruw, demtrug ko mang skeng nra yib ngodad ma ngad pared nib fel’ thildad Got ma rayog ni ngad pared ni gad ba yul’yul’ ngak. Bin dalip, faanra yib e togopuluw ngodad ma aram e yibe skengnagdad u boor e kanawo’, ma ra ayuwegdad Jehovah ni bod rogon ni ayuweg Job. Ma ayuwegdad Jehovah u daken e Thin rok nge ulung rok nge gelngin ni ma pi’ ngodad.

Mu Ayuw ko Toogor Rom

4. Mini’ e nge non’ e kireb nga daken ko pi kireb nu fayleng?

⁴ Boor e girdi’ e de mich u wan’rad ni bay Satan. Yad manang ko mang e be buch u fayleng machane dar nanged ni Satan ni Moonyan’ e be k’aring e pi n’ey. Riyul’ ni girdi’ e ma ngongliy e pi n’ey ni ma gafgow e girdi’ riy. Fa gal ga’ rodad ni Adam nge Efa e kar dugliyew ni de t’uf ni nge gagiyegnagrow e en ni Sunmiyrow. Kafram i yib nge mada’ ko chiney ma pi mfen ko girdi’ e der yog ni ngar ayuweged yad. Moonyan’ e ir e bannag Efa ni nge togopuluw ngak Got. I ir e be gagiyegnag e re fayleng ney nge kireb ko girdi’. Bochan ni Satan e ir e “fare kan [“got,” NW] nib kireb nu roy u fayleng,” aram fan ni girdi’ nu fayleng e yad be dag e ngongol ni​—ufanthin, tugthin, awan’, chogow, sasalap, nge togopuluw. (2 Kor. 4:4; 1 Tim. 2:14; 3:6; mu beeg e James 3:14, 15.) Pi ngongol ney e ma k’aring e cham nge fanenikan nge wagagey u thilin e am maku ireray e ngongol ni ma rin’ e pi yurba’ i teliw. Ma pi ngongol ney e kari gafgownag e girdi’ nu fayleng.

5. Mang e gad baadag ni ngad rin’ed ko tamilangan’ ni ke yog ngodad?

⁵ Rib ga’ fan ni bay e tamilangan’ ko tapigpig rok Jehovah! Gad manang ko mini’ e be k’aring e pi kireb ney u fayleng. Ere gad ba pasig ni ngad uned i machibnag e girdi’ ko mini’ pilungen e kireb nge toogor rodad, fa? Gadad ba felfelan’ ni gadad be fol rok e bin riyul’ e Got ni Jehovah, ma gad be weliy ngak e girdi’ nra thang Got Satan me chuweg e gafgow ko girdi’, fa?

6, 7. (a) Mini’ lik’ingin e togopuluw ni ma yib ngak e tin riyul’ e tapigpig rok Got? (b) Uw rogon ni ngad folwokgad rok Elihu kakrom?

⁶ Satan e gathi kemus ni ir e lik’ingin urngin e magawon u fayleng ya ku ir e ku be k’aring ni ngeb e togopuluw ngak e girdi’ rok Got. Ri baadag ni nga i skengnagdad. I yog Jesus Kristus ngak apostal Peter ni gaar: “Simon, Simon! Mmotoyil! Kan pi’ mat’awun Satan ni nge skengnagmed ni gimed gubin, ni bod rogon be’ ni girdien e woldug ni be chuweg fiteyru’ wom’engin e wheat.” (Luke 22:31) Maku arrogodad, ni gad be lek luwan ay Jesus ni ku ra yib e skeng ngodad nib thil thil. I taarebrogonnag Peter Satan nga “ba layon ni be tolul, ni be gayiy be’ ni nge longuy.” Me gaar Paul: “Urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.”​—1 Pet. 5:8; 2 Tim. 3:12.

⁷ Uw rogon ni ngad daged ni gad manang e bin riyul’ e toogor rodad u nap’an ni keb e gafgow ngak reb e walagdad u lan e ulung? Dabda paloggad rok e cha’ nem ni ke gafgow, ya ngad boded Elihu kakrom ni non ngak Job ni fager rok u fithik’ e t’ufeg. Ngaud ayuweged walagdad ni nge dabi gel Satan ngak. (Prov. 3:27; 1 Thess. 5:25) N’en ni gad be nameg e ngaud ayuweged walagdad ni nge par nib yul’yul’ ku Got ndemtrug e skeng nra yib ngak. Gad ra rin’ ni aram rogon ma aram e gad be felfelan’nag Jehovah.

8. Mang fan ni de yog rok Satan ni nge k’aring Job ni nge dabki n’uf Jehovah?

⁸ Bin som’on e li’ Satan e pi gamanman rok Job ngar m’ad. Pi gamanman nem e rib ga’ fan ko tabinaw rok Job ya ma yib e salpiy riy ngak. Maku ma pi’ ni maligach. Bod ni tomren ni ke fal’eg Job rogon pifak me “li’ e gamanman nge pi’ ni maligach ngak Got ni fan e nge n’ag Got fan e denen rok pi fak ngar machalboggad. Gubin yay ni i rin’ ni aray rogon, ya be lemnag nrichey ma ke denen bagayad ni gomanga ke yog bbugithin nib tagan ngak Got.” (Job 1:4, 5) Ere ma pi’ Job e gamanman ni maligach u gubin ngiyal’. Machane nap’an ni kan li’ ngem’ e pi gamanman rok ma dabkiyog ni nge pi’ e maligach. Dakuriy e “tin nib th’abi fel’” rok Job ni fan ko liyor ngak Jehovah. (Prov. 3:9) Machane ku rayog ni nge n’uf Jehovah ko thin rok!

Mu Fal’eg Thilmew Jehovah

9. Mang e rib ga’ fan ko yafas rodad?

⁹ Demtrug rarogodad ma ku rayog ni ngad maruweliyed ni ngari fel’ e tha’ u thildad Jehovah. Demtrug rogon e skeng nra yib ngodad, ma rayog ni ngad pared nib yul’yul’ ngak Jehovah ma gad felfelan’nag ni faanra ffel’ e tha’ rodad ngak. Boch e girdi’ e dar rusgad ni ngar pared nib yul’yul’ ngak Got ni yugu aram rogon ni de yoor e tamilangan’ rorad ko thin riyul’.

10, 11. (a) Uw rogon ni par Valentina nib yul’yul’ u nap’an e skeng? (b) Mang e fulweg nib tamilang ni ke pi’ ngak Satan?

¹⁰ Mu lemnag e n’en ni buch rok Valentina Garnovskaya, ni ir reb e Mich rok Jehovah u Russia ni ke par nib yul’yul’ ni bod Job ni yugu aram rogon ni yib e skeng ngak nib gel. Nap’an ni ke gaman 20 e duw rok Valentina ko duw ni 1945 me yan reb e walag ni pumoon i machibnag. L’agruw yay ni ke sul fare pumoon ni ngar weliyew murung’agen e Bible, ma aram e dakur mada’gow bayay. Machane, me tabab Valentina ni nge machibnag e piin buguli yoror rok. Ma bochan e machib ma aram mi nin’ nga kalbus ni meruk e duw. Tomren ni kan pag u kalbus ko duw ni 1953 me ki ulul i wereg e machib, ma aram min kol bayay min tay nga kalbus ni ragag e duw. Tomren in e duw ni ke yan min fek nga yugu reb e kalbus, mu rom e mada’nag e pi walag ni ppin riy ni bay ba ken e Bible rorad. Reb e rran, me dag reb e walag ni ppin e Bible ngak Valentina. Kari felfelan’ Valentina u nap’an ni guy e re Bible nem! Ya bin som’on e Bible ni guy e aram e Bible rok fare walag ni pumoon ni i machibnag ko duw ni 1945!

¹¹ Nap’an e duw ni 1967 min pag Valentina u kalbus min taufenag ni aram ke dag ni ke ognag e yafas rok ngak Jehovah. Me un ko machib u fithik’ e pasig nge yan i mada’ ko duw 1969. Machane, nap’an e re duw nem mi nin’ bayay nga kalbus min nog ngak nra par u kalbus ni dalip e duw. Machane, de tal Valentina i wereg e machib. U m’on ni yim’ ko duw ni 2001, ma ke gaman 44 e girdi’ ni ke ayuwegrad kar nanged e tin riyul’. Ma ke gaman 21 e duw nib kalbus. Ke m’agan’ ngay ni nge pag urngin ban’en, nib muun ngay e pogofan rok, ya nge yog ni nge par nib yul’yul’. U nap’an ni ke chugur ni nge yim’ me yog Valentina ni gaar: “Dariy e naun nib mil fan ngog. Urngin e chugum rog e kug tay nga lan reb e trangku, machane ku gube felfelan’ ni gu be pigpig ku Jehovah.” Rib tamilang e fulweg ni ke pi’ Valentina ngak Satan, ya ke yog Satan faram ni dabi par e girdi’ nib yul’yul’ ngak Got u nap’an nra yib e skeng ngorad! (Job 1:9-11) Gad manang ni ke felfelan’nag Jehovah ma be sap Jehovah ko ngiyal’ nra faseg Valentina nge tin ka bay e girdi’ ni kar m’ad ni yad ba yul’yul’.​—Job 14:15.

12. Uw rogon ni ma ayuweg e t’ufeg thildad Jehovah?

¹² Ra fel’ thildad Jehovah ni bochan e ba t’uf rodad. Gad baadag e pi fel’ngin Got ni bay ma gad ma guy rogon ni ngad folgad ko pi n’en nib m’agan’ ngay. Ba thil e n’en ni gad ma rin’ ko thin ni yog Moonyan’, ya gadad ma t’ufeg Jehovah ndemtrug e ngiyal’. Re t’ufeg ney ni ma yib u gum’irchadad e ma gelnagdad ni ngad pired ni gad ba yul’yul’ u nap’an e skeng. Ya Jehovah e “ma matanagiy e piin yad ma folwok rok.”​—Prov. 2:8; Ps. 97:10.

13. Uw rogon u wan’ Jehovah e n’en ni gad ma rin’ ngak?

¹³ T’ufeg e ma k’aringdad ni ngad pininged e sorok nga fithingan Jehovah u gubin ngiyal’. Manang e n’en ni gad ma lemnag ma der ma pufthinnagdad ni faanra dabiyog ni ngad rin’ed e pi n’en ni gad baadag ni ngad rin’ed. N’en nib ga’ fan e gathi kemus ko mang e gad ma rin’ machane mang fan ni gad ma rin’ fare n’em. Yugu aram rogon ni kireban’ Job machane me par ni be athamgil, ma aram me yog ngak e piin ni ur togopuluwgad ngak murung’agen e t’ufeg rok ko tin nib m’agan’ Jehovah ngay. (Mu beeg e Job 10:12; 28:28.) Bin tomur e guruy ko fare babyor ni Job, ma aram me yog Jehovah e damumuw rok ngak Elifaz, Bildad, nge Zofar ni bochan ni dar rogned e thin riyul’. Ma aram e ngiyal’ ni felfelan’ Jehovah ngak Job me yog e “tapigpig rog” ni aningeg yay ngak miki yog ngak Job ni nge yibilay e piin ni ur togopuluwgad ngak. (Job 42:7-9, NW) Ere ku arrogodad ni susun e ngad ngongolgad u rogon nib m’agan’ Jehovah ngay.

Ma Ayuweg Jehovah e Pi Tapigpig Rog nib Yul’yul’

14. Uw rogon ni ke yal’uweg Jehovah Job?

¹⁴ I par Job nib yul’yul’ ni yugu aram rogon ni de flont. Yu ngiyal’ ma ke magawon laniyan’, me lemnag ban’en ni de puluw. Bod rogon u nap’an ni non ngak Jehovah ni gaar: “Ku gu piningem, ma damur fulweg lungug . . . Ga be gad paam ngog; ga be gafgownigeg u polo’ i gelngim.” Ma ki non ni be ayuweg ir ni gaar: “Ga manang nde buch e rog,” ma ki gaar, ‘dawor gu gad paag ngak be’ ni nge buch e rog riy, ma meybil rog e ri sum u ngorongoreg.’ (Job 10:7; 16:17; 30:20, 21) Machane, ke ayuweg Jehovah Job u fithik’ e t’ufeg. Ke fith Got boch e deer nra ayuweg Job ni nge dabki lemnag ir ma ngari tamilang u wan’ ni Got e th’abi tolang ma dabiyog ni ngan taarebrogonnag e girdi’ ngak. Ma ke fel’ u wan’ Job e n’en ni ke yog Got ngak me fol riy.​—Mu beeg e Job 40:8; 42:2, 6.

15, 16. Mang boch e kanawo’ ni ma ayuweg Jehovah e tapigpig rok riy e ngiyal’ ney?

¹⁵ Ku ma pi’ Jehovah e kanawo’ nge gonop ko girdi’ rok e ngiyal’ ney nra fel’ rogodad riy. Bod rogon ni ke pi’ Jesus Kristus e biyul ya nge yog ni ngan n’ag fan e denen. Ma re maligach nem e rayog ni nge fal’eg thildad Got ni yugu aram rogon ni gadad bogi ta denen. (Jas. 4:8; 1 John 2:1) Gadad ma meybil ni ngad ninged e ayuw ngak Got ya nge pi’ gelngin ngodad nge gelnagdad u nap’an ni gad ra mada’nag e skeng. Maku bay e Bible rodad. Faan gadra beeg e Bible ma ngad lemnaged e n’en ni bay riy ma rayog ni ngad fal’eged rogodad u nap’an ni yira skengnag e michan’ rodad. Faan gad ra fil e Bible ma gad ra nang ni bay rogon Jehovah ni nge gagiyeg nge fan ni ngad pared ni gad ba yul’yul’.

¹⁶ Ku ba fel’rogodad ya gad boch e girdi’ rok Jehovah u fayleng ni be pi’ e thin rok ngodad u daken fare “tapigpig nib yul’yul’ ma ba gonop.” (Matt. 24:45-47) U lan gonap’an 100,000 e ulung ko Pi Mich Rok Jehovah, e yima tay boor e muulung ni nge ayuwegdad me skulnagdad ya nge gelnagdad u nap’an ni yira skengnag e michan’ rodad. Rayog ni ngad weliyed murung’agen e n’en ni buch rok Sheila ni ma par u Chiyamen.

17. Mu weliy ko mang fan nib fel’ ni i un Sheila ko muulung u Kingdom Hall ni gubin ngiyal’?

¹⁷ Reb e rran u skul ma dariy be’ ni nge skulnag Sheila nge bitir ni yad nga skul. Ere yog fapi bitir ni ngar gosgosgad ko Ouija board ara mit e pig ni ngan nang ko mang e bay nga m’on. Ka chingiyal’ nem me chuw Sheila rorad me yan nga wen ma boch nga tomren me rung’ag e n’en ni ke buch ko fapi bitir ma ke felfelan’ ni de un ngorad. Nap’an ni yad be gosgos ko fare Ouija board ma boch fapi bitir e ra thamiyed ni ke yib e moonyan’ ngorad ma aram mi yad rus ngar milgad. Ere mang e ke ayuweg Sheila ni nge chuw u lan fare singgil nib papey? Yog Sheila ni gaar, “U m’on ni buch e re n’ey u skul ma kug fil u nap’an e muulung u Kingdom Hall ni Ouija board e mit e pig. Ere gu manang e n’en ni nggu rin’ ni nggu felfelan’nag Jehovah, ni bod ni be yog e Proverbs 27:11.” Ere rib fel’ e n’en ni rin’ Sheila ya ke un ko muulung ma ke motoyil nib fel’ rogon!

18. Mang e kam dugliy ni ngam rin’?

¹⁸ Ra bagadad ma nge tiyan’ me fol ko kanawo’ ni be pi’ e ulung rok Got. Ra yog e fonow nge ayuw ni faan gad ra un ko muulung ni gubin ngiyal’, ngan beeg e Bible, min fil e pi babyor ni be weliy e thin ko Bible, min meybil, min chag ko pi Kristiano. Baadag Jehovah ni ngad gelgad ko skeng ma ba pagan’ ngodad ni gad ra par ni gad ba yul’yul’ ngak. Ri gad ba tow’ath ni gad ma n’uf e ngochol rok Jehovah ma gadad be par nib yul’yul’ ngak ma gadad be felfelan’nag!

Ka Ga Manang?

• Mang fapi n’en ni be buch nge fapi skeng nib milfan ngak Satan?

• Mang e n’en th’abi fel’ ni bay rodad?

• Mang e ra fal’eg thildad Jehovah?

• Mang boch e kanawo’ ni ma ayuwegdad Jehovah riy e ngiyal’ ney?

[Picture on page 14]

Ga baadag ni ngam fil ngak boch e girdi’ e tamilangan’ ni ke yog ngom?

[Picture on page 15]

Rayog ni ngad ayuweged e pi walagdad ni Kristiano ni ngar pared nib yul’yul’

[Picture on page 16]

Valentina e ba m’agan’ ngay ni nge pag fan gubin ban’en ya nge par nib yul’yul’