2 Nge Yog e Tamilangan’ ko Tin Riyul’ u Murung’agen Got

“Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got.”​—John 17:3.

MANG E DER TAMILANG U WAN’ BOCH E GIRDI’? Boch e girdi’ e ma yog ni dariy e Got. Boch e girdi’ e ba mich u wan’rad ni Got e gathi bod be’ ni ma thamiy ban’en machane ba gel gelngin. Boch e girdi’ nib mich u wan’rad ni bay Got e yad ma weliy boch e machib ni de puluw ko tin riyul’ u murung’agen Got.

UW ROGON NI NGE TAMILANG U WAN’UM? Reb e kanawo’ ni nge mich u wan’dad e tin riyul’ u murung’agen Got e thingar da guyed e pi n’en ni ke sunmiy. Be gaar Paul: “Fel’ngin ndabiyog ni ngan guy, ni aram gelngin ndabi m’ay biid nge rarogon ni ir Got, e kan guy nrib tamilang.” (Roma 1:20) Faan gad ra fal’eg i yaliy e pi n’en ni ke sunmiy Got, ma rayog ni ngad nanged boor ban’en u murung’agen feni rib gonop nge rogon gelngin nrib gel.​—Psalm 104:24; Isaiah 40:26.

Machane urngin e girdi’ ni ra be’ ma ba t’uf ni nge beeg e Thin nu Bible nge yog ni nge nang murung’agen Got nib fel’ rogon. Dab mu pag ni nge dugliy boch e girdi’ lanin’um. Ya ba fel’ ni ngam fol ko thin nu Bible ni be gaar: “Dab mu folgad ko ngongol ni yibe rin’ u roy u fayleng, machane mpied gimed ngak Got nge piliyegmed, ni aram e kari piliyeg lanin’med ni polo’. Ma aram e rayog ni ngam nanged e tin nib m’agan’ Got ngay ni tin nib fel’.” (Roma 12:2) Baaray boch ban’en ni be weliy e Bible u murung’agen Got.

Bay fithingan Got. Som’on ni kan yoloy e  Bible ma bokum biyu’ yay ni ke m’ug fithingan Got riy. Boor ken e Bible ni bay fithingan Got riy u Psalm 83:18, ni gaar: “Nge nang e girdi’ ni fithingam e Jehovah, ma gur e th’abi tolang u polo’ e fayleng.”​—King James Version.

Rayog ni nge kireban’ ara felfelan’ Jehovah Got ko n’en ni ma rin’ e girdi’. Tomren ni ke chuweg Jehovah piyu Israel u Egypt, ma yu ngiyal’ e ur dariyfannaged e thin rok. Togopuluw ni ur ted nge ngongol rorad nib kireb e ke ‘amithnag laniyan’’ Got.​—Psalm 78:40, 41.

Ma lemnagdad Jehovah. Be gaar Jesus ngak pi gachalpen: “Rayog ni ngan chuw’iy l’agruw chi arche’ ni sparrow fithingan nga ba salpiy nrow; machane dariy taa bagayad nra mul nga but’ nde nang e Chitamangimed. Mus nga piyan lolugmed ni ke m’ay i theeg. Ere dab mu tamdaggad; ya ka ba ga’ famed ngak fa nochi arche’ ni sparrow fithingan!”​—Matthew 10:29-31.

Taareb rogon gubin mit e girdi’ u wan’ Got. Yog Paul ko girdi’ nu Greek ni bay u Athens ni “ri taareb e pumoon ni sunumiy, me sum rok e re moon nem girdien urngin e nam, me tayrad ni ngar pired u daken e re fayleng ney ni polo.” Ma ki yog ni “dariy bagadad nib mal’af Got rok nga orel.” (Acts 17:26, 27) Be gaar Peter: “Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.”​—Acts 10:34, 35.

UW ROGON NRA FEL’ ROGOM RIY? Boch e girdi’ e “rayog ni gu mang mich rorad nri yad be tiyanrad ngak Got, machane tiyan ni yad be tay e ke thum nga wuru e wo, ya dar nanged e tin riyul.” (Roma 10:2) Faanra ga manang ko mang e ri be fil e Bible u murung’agen Got ma rayog ni ngam ayuwegem ni nge dabni bannagem ma rayog ni ngam ‘chugur ngak Got.’​—James 4:8.

Ra ga baadag ni ngkum nang boch, mag guy fare thin ni “Got—Ir Mini’?” ni bay ko guruy ni 4 ko fare babyor ni Rayog Ni Ngam Par Ni Gab Fas U Paradis U Fayleng.a

[Footnote]

[Picture on page 6]

Reb e kanawo’ ni nge yog e tamilangan’ u murung’agen Got e ngad guyed e pi n’en ni ke sunmiy