Ngad Ilalgad ko Tirok Got—‘Fare Rran rok Jehovah e Ke Chugur’
“Ngad athamgilgad ni ngad ilalgad ko tirok Got ban’en.”—HEB. 6:1.
1, 2. Uw rogon ni ke mab e kanawo’ ngak e pi Kristiano nu Jerusalem nge Judea ni “ngar milgad nga daken e burey”?
NAP’AN ni immoy Jesus u fayleng, me fith pi gachalpen ngak ni lungurad: “Mog ngomad ko wuin e ra yib urngin fapi n’en ni ka mog, nge n’en nra yib ni nge dag ni ke taw ko ngiyal’ ni bay mub [“ga bay,” NW] riy nge ngiyal’ ni tomren e fayleng.” Fulweg rok Jesus ko re deer rorad nem e ke buch ko fa bin som’on e chibog u nap’an ni ke lebug e yiiy rok Jesus ko yay ni som’on. Ke yog Jesus ni bay boch ban’en nra buch ni ngan nang ni ke chugur e tomur. Ere nap’an ni yad ra guy e pi n’em “ma piin ni yad bay u Judea e thingar ra milgad nga daken e burey.” (Matt. 24:1-3, 15-22) Ere i nang pi gachalpen Jesus e pow mar folgad ko n’en ni yog?
2 Ke chugur ko guyey e duw u tomren ni yim’ Jesus, me yoloy apostal Paul e thin ni nge fonownag e piin ni Kristiano ni Hebrew ni ma par u Jerusalem nge boch e binaw u tooben. De nang Paul nge boch e Kristiano ni lal e duw me tabab fare “gafgow” ni ba ga’. (Matt. 24:21) Gonap’an guyey nge dalip e duw u tomren ni ke yim’ Jesus, ma Cestius Gallus nge pi salthaw nu Roma e kar bad ni ngar chamgad nga Jerusalem. Machane kar chuwgad ma aram e ke yog ni nge mil boch e Kristiano ni ngar ayuweged e yafas rorad.
3. Mang fonow e pi’ Paul ngak e Kristiano ni Hebrew, ma mang fan?
3 Pi Kristiano nem e ba t’uf ni ngar nanged fan e n’en ni yog Jesus nra buch ma aram e thingar ra milgad. Machane boch i yad e ‘ba sowath ni ngar nanged fan ban’en.’ Ya yad bod e bitir nib t’uf e “milik” rorad. (Mu beeg e Hebrews 5:11-13.) Ki mada’ ko piin ni kar nanged e tin riyul’ ni boor e duw ma be m’ug ni ke chugur ni ngar ‘pied keru’rad ngak Got ni be par nib fas.’ (Heb. 3:12) Chiney ni “Chirofen ni bay yib Somol riy e be chugur” ma yima pag e muulung ni bod ni “be rin’ boch e girdi’.” (Heb. 10:24, 25) Rib puluw rogon ni fonownagrad Paul ni gaar: “Chiney ni kad paged e tin som’on e machib u murung’agen Kristus, ma ngad athamgilgad ni ngad ilalgad ko tirok Got ban’en.”—Heb. 6:1, NW.
4. (a) Mang fan nib ga’ fan ni ngari tamilang u wan’dad rogon ni ke lebug e yiiy u Bible? (b) Ma uw rogon nra ayuwegdad?
4 Gad bay ko ngiyal’ nra lebug fare yiiy rok Jesus ko yay ni tomur. ‘Fare rran rok Somol’ ni aram e n’en nra chuweg fare m’ag rok Satan e “be chugur.” (Zeph. 1:14) Thingar da tedan’dad ko pi yiiy u Bible ni ke lebug ma ngad maruweliyed ni ngari fel’ e tha’ u thildad Jehovah. (1 Pet. 5:8) Gad be rin’ e re n’ey, fa? Gad ra ilal ko tirok Got ma ra ayuwegdad ni dabda paged talin ni gad be par ko tin tomren e rran.
Mang Fan e Ngan Ilal ko Tirok Got
5, 6. (a) Mang fan e ngan ilal ko tirok Got ban’en? (b) Mang l’agruw e kanawo’ nib t’uf ni ngan mon’og ko tirok Got ban’en?
5 Gathi kemus ni ke pi’ Paul e athamgil nga laniyan’ e pi Kristiano ni Hebrew ya ki weliy fan. (Read Hebrews 5:14.) ‘Girdi’ ni ke ilal ko tirok Got’ e gathi kemus ni yad ma unum e “milik” ya yad ma kay e ‘ggan nib el.’ Ere yad manang e ‘tin som’on e thin’ nge ‘tin nib toar fan.’ (1 Kor. 2:10) Ma bochan ni yad ma fol ko n’en ni yad ma fil u Bible ma aram e kar ilal gad ko tirok Got ban’en ni rayog ni ngar nanged e tin nib mat’aw ko tin nde mat’aw. Nap’an ni ngar dugliyed ban’en ma yad manang e thin nu Bible ni ngan fanay nge u rogon.
6 I yoloy Paul ni gaar: “Thingar da chichiiyed pa’dad ko fapi thin nib riyul’ ni kad rung’aged, nge siy da man’gad riy nga orel.” (Heb. 2:1) Rayog ni ngad man’gad nga orel ni yugu aram rogon ni dab da lemniged. Rayog ni nge dabi buch e re n’ey rodad ni faan gad ra tayan’dad u nap’an ni gad be fil e Bible. Ere ra bagadad ma nge fith ir: Kemus ni gu be lemnag e tin som’on e thin? Kemus ni gu ma rin’ boch ban’en nib t’uf ni ngan rin’ machane gathi riyul’ ni gu baadag? Uw rogon ni rayog ni nggu ilal ko tirok Got ban’en? Ngan mon’og ko tirok Got ban’en e ba t’uf ni ngan fil e thin rok Got ma ngkun fol riy.
Ngari Tamilang u Wan’dad e Thin rok Got
7. Uw rogon nra fel’ rogodad ni faanra kad nanged e thin rok Got nib fel’ rogon?
7 I yoloy Paul ni gaar: “Cha’ ndabi siy ni nge unum e milik e be’ ni kab bitir, ndawori nang e tin nib mat’aw nge tin nib tagan ban’en.” (Heb. 5:13) Gad ra ilal ko tirok Got ban’en ma ba t’uf ni ngari tamilang u wan’dad e thin rok. Bochan ni thin rok Got e bay u Bible ma thingar da filed nib fel’ rogon nge pi babyor ni ke fal’eg “fare tapigpig nib yul’yul’ ma ba gonop.” (Matt. 24:45-47) Faanra gad ra fil e thin rok Got ni aray rogon ma ra ayuwegdad ni ngad nanged rogon ni ma lem Got. Am lemnag reb e piin ni Orchid fithingan.a I gaar: “N’en ni ke ayuwegeg kari thil e yafas rog e aram e thin ni kug rung’ag ni ngan fil e Bible ni gubin ngiyal’. L’agruw e duw mfin gu mu i beeg e Bible ni polo’, ma gowa kafin gu nang e en Tasunmiy. Kug nang e tin baadag nge tin dabun nge rogon feni rib gel gelngin nge rogon feni rib toar e gonop rok. Bochan ni gu ma beeg e Bible ni gubin e rran ma ka ayuwegeg ni nggu athamgil u fithik’ e pi magawon rog.”
8. Uw rogon ma gelngin e thin rok Got ni kad beeged e ra ayuwegdad?
8 Ngan fil e thin rok Got ni gubin ngiyal’ ma ‘ba’ gelngin’ nra ayuwegdad. (Mu beeg e Hebrews 4:12.) Ngan beeg e Bible ni aray rogon ma ra ayuweg lanin’dad ma gad fel’ u wan’ Jehovah. Rayog ni ngam yoornag e tayim ni ngam beeg e Bible mag fal’eg i lemnag?
9, 10. Mang e kub muun ngay ni ngan nang e thin rok Got nib fel’ rogon? Mu weliy.
9 Ngan salap ko thin nu Bible e gathi kemus ni ngan nang e thin ni bay riy. Pi Kristiano ndawori ilal ko tirok Got ban’en u nap’an Paul e ku bay e tamilangan’ rorad ko thin nu Bible. Machane darur folgad riy aram fan ndar nanged fini ga’ fan nge angin nra yib. Der paged e thin nu Bible ni nge pow’iyrad u nap’an ni ngar dugliyed ban’en.
10 Ngan nang e thin rok Got nib fel’ rogon e be yip’ fan ni ngan nang fan e n’en ni be yog min fol riy. N’en ni buch rok reb e Kristiano ni Kyle fithingan e be dag ni riyul’ e re n’ey. Kyle nge be’ ni ppin ni yow ma maruwel u taabang e ra tugthingow. Ere mang e rin’ ni nge pithig fare magawon? I gaar: “Ke yib ngan’ug e thin nu Bible ko Roma 12:18, ni gaar: ‘Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’.’ Ere ku gog ngak ni nggu mada’gow u tomren e maruwel.” Keb angin e thin ni kug weliyew ya ke felfelan’ fare pin ko n’en ni ke rin’ Kyle. Miki ulul Kyle ngay ni gaar: “Kug nang ni fol ko thin nu Bible aram e bin th’abi fel’ e n’en ni ngan rin’.”
Nguum Fol
11. Mang e be dag nrib mo’maw’ ni ngan fol u fithik’ e magawon nib gel?
11 Yu ngiyal’ mab mo’maw’ ni ngan fol ko thin nu Bible ni kad filed. Ni bod ni de n’uw nap’an nga tomren ni chuweg Jehovah piyu Israel u Egypt mi “yad welthin nib togopluw ngak Moses” ma ku yad be “skengnag Somol.” Mang fan? Ya bochan ni dariy e ran ni ngar unumed. (Ex. 17:1-4) Dawori gaman l’agruw e pul u tomren ni kan fal’eg fare m’ag u thilrad nge Got ma ka rogned ni ngar folgad u “gubin e n’en ni ke yog Somol.” Ma aram e kar th’abed e Motochiyel rok Got kar liyor gad ko liyos. (Ex. 24:3, 12-18; 32:1, 2, 7-9) Gur kar rin’ed e re n’ey ni bochan e kar rusgad ya ke yan Moses nga daken e Burey ni Horeb ma da ka a sul ngorad? Ara ur lemnaged nra sul e pi Amalek ngar chamgad ngorad ma de moy Moses nra ayuwegrad? (Ex. 17:8-16) Sana ur lemnaged ni aram rogon, machane kar daged ni daburad ni “ngar folgad rok.” (Acts 7:39-41) Ere ke fonownag Paul e Kristiano ni ngar “athamgilyed” ni dab ra boded e n’en ni rin’ piyu Israel.—Heb. 4:3, 11.
12. Mang e ke ayuweg Jesus ni ngi i fol rok Got, ma mang angin?
12 Rogon ni ngan ilal ko tirok Got e ba t’uf ni ngad athamgilgad ngad folgad rok Jehovah. Ni bod rogon Jesus, nu daken e “gafgow ni i tay e fil rogon riy ni ngi i fol rok Got.” (Mu beeg e Hebrews 5:8, 9.) U m’on ni yib Jesus nga fayleng ma i fol rok e Chitamangin. Machane rogon ni nge rin’ e tin nib m’agan’ e Chitamangin ngay u roy u fayleng e ba muun ngay ni nge gafgow downgin nge laniyan’. Bochan ni kari fol rok e Chitamangin u fithik’ e magawon nib gel ma “ka ri fel’ rogon” ni nge mang Pilung nge Prist nib Tolang.
13. Mang e ra dag nriyul’ ni gad ma fol?
13 Ma uw rogodad? Gad ra fol rok Jehovah ni ki mada’ ko ngiyal’ ni ke yib e magawon ngodad nib gel? (Mu beeg e 1 Peter 1:6, 7.) Ba tamilang e fonow rok Got u murung’agen e ngongol rodad, yul’yul’, rogon e thin rodad, ngan beeg e thin nu Bible, ngan un ko muulung, nge ngan un ko machib. (Josh. 1:8; Matt. 28:19, 20; Efe. 4:25, 28, 29; 5:3-5; Heb. 10:24, 25) Gur gad ra rin’ e pi n’ey ni ki mada’ ko ngiyal’ ni ke yib e magawon ngodad nib gel? Gad ra rin’ ni aram rogon ma be m’ug riy ni kad ilalgad ko tirok Got.
Ngan Ilal ko Tirok Got, Mang nib Ga’ Fan?
14. Mu weliy rogon ni ngan ilal ko tirok Got e ra ayuwegey.
14 Riyul’ ni Kristiano ni kan skulnag laniyan’ e ra ayuweg ni nge nang e tin nib mat’aw ko tin nib kireb u lan e re fayleng ney ni “kar paged yad nga pa’ e kireb.” (Efe. 4:19) James ni walagdad e ma beeg ma be tay fan e pi babyor rodad ni ma weliy murung’agen e thin nu Bible. Me un nga barba’ e maruwel ni kemus ni yigoo ir e pumoon riy. I yog James ni gaar, “Boor i yad e ba kireb e ngongol rok, machane bay bagayad ni gowa ba fel’ e ngongol rok ni baadag ni nge fil e Bible. Machane nap’an ni goo gamow u lan e singgil u tabon e maruwel ma ke tabab ni nge k’aringeg ni nggu un ngak ko ngongol ni darngal. Som’on e kug lemnag ni be gosgos machane kug guy nib mo’maw’ ni nggu taleg. Chingiyal’ nem ma ke yib ngan’ug Fare Wulyang Ntagil’ E Damit ni be weliy murung’agen reb e walag ni pumoon ni ki mada’nag e magawon ni aray rogon. Re babyor nem e be weliy murung’agen Josef nge ppin rok Potifar. Kug thuruy fare pin me mil nga wen.” (Gen. 39:7-12) Ke felfelan’ James ya de un ko ngongol ni darngal me par nib fel’ e nangan’ rok.—1 Tim. 1:5.
15. Uw rogon ma ngan ilal ko tirok Got e ra ayuweg lanin’dad?
15 Ngan ilal ko tirok Got e ku ra ayuweg lanin’dad ni dab da uned nga boch e “machib nib thil” ko machib nu Bible. (Mu beeg e Hebrews 13:9.) Gad ra athamgil ni ngad mon’oggad ko tirok Got ma aram e rayog ni ngad tedan’dad ko “tin ni ir e ba th’abi fel’.” (Fil. 1:9, 10) Ma aram e ra gel e felfelan’ rodad ngak Got nge urngin ban’en ni ke pi’ ngodad. (Rom. 3:24) Reb e Kristiano ni ma lem ni “bod e piilal” e ra fel’ e tha’ u thilrow Jehovah.—1 Kor. 14:20.
16. Mang e ayuweg Louise ni nge par nib mudugilan’?
16 Reb e walag ni Louise fithingan e ke yog ni bay ba ngiyal’ u tomuren ni kan taufenag ni kemus ni be lemnag ni nge pigpig ku Got ni bochan e nge felfelan’nag e girdi’. Ki yog ni gaar, “Dariy ban’en nib kireb ni kug rin’ machane gathi ri gub adag ni nggu pigpig ku Jehovah. Kug nang nib t’uf ni nggu thilyeg boch ban’en ko yafas rog ni faanra nggu pigpig ku Jehovah nib fel’ rogon. N’en nrib t’uf ni nggu thilyeg e nggu pigpig ku Jehovah u fithik’ e yul’yul’.” Bochan ni ke rin’ Louise ni aram rogon me ‘mudugilan’,’ ma ke ayuweg e re n’em u nap’an ni keb e m’ar ngak nib gel. (Jas. 5:8) Mi ki yog Louise ni gaar, “Rib gel e gafgow ni kug tay machane ke yog ni nggu chugur ngak Jehovah.”
‘Ngan Fol u Fithik’ e Yul’yul’’
17. Mang fan nib t’uf ni ngan fol u nap’an e bin som’on e chibog?
17 Fonow ni pi’ Paul u rogon ni ngan “ilal ko tirok Got” e ke ayuweg e yafas ko Kristiano ni ma par u Jerusalem nge Judea ko bin som’on e chibog. Piin ni kar folgad riy e ke yog ni ngar guyed fare pow ni ke yog Jesus ngorad ni ngar “milgad nga daken e burey.” Nap’an ni kar guyed e “N’en ni Th’abi Dabuy ni ke sak’iy u lan fa gin’en nib thothup,” ni aram e pi salthaw nu Roma ni kar longobiyed yu Jerusalem, ma kar nanged ni ke taw ko ngiyal’ ni ngar milgad. (Matt. 24:15, 16) Ke gaar Eusebius ni ma yoloy chepin e girdi’, pi Kristiano e kar chuwgad u Jerusalem u m’on ni ngan gothey ma kar ranod nga Pella u Gilead. Ma bochan e re n’ey ma dar m’ad u nap’an ni kan gothey yu Jerusalem.
18, 19. (a) Mang fan nrib ga’ fan ni ngan fol e ngiyal’ ney? (b) Mang e yira weliy ko bin migid e thin?
18 Gad ra ilal ko tirok Got ban’en ma ku ra ayuweg e yafas rodad u nap’an nra lebug fare thin rok Jesus u murung’agen fare “gafgow” ni ba ga’. (Matt. 24:21) Gur faan ra yog fare “fare tapigpig nib yul’yul’ ma ba gonop” boch ban’en nib tomgin nthingar ni rin’ ma gadad ra fol riy? (Luke 12:42) Rib ga’ fan ni ngad ‘folgad’ rorad e ngiyal’ ney u fithik’ e yul’yul’.—Rom. 6:17.
19 Rogon ni ngad ilalgad ko tirok Got e ba t’uf ni ngad skulnaged lanin’dad. Ra riyul’ e re n’ey ni faanra ngad athamgilgad ni ngad nanged fan e thin rok Got nib tamilang ma ngad folgad riy. Ngan ilal ko tirok Got e ban’en nib mo’maw’ ngak e piin nib fel’ yangaren. Bin migid e thin e ra weliy boch ban’en nra ayuwegrad u rogon ni ngar ilalgad ko tirok Got ban’en.
[Footnote]
a Boch e ngochol e kan thilyeg.
Mang e Kam Fil?
• Mang e be yip’ fan e ngan ilal ko tirok Got ban’en, nge uw rogon?
• Faan gad ra nang fan e thin rok Got nib fel’ rogon ma ra ayuwegdad ngad ilalgad ko tirok Got ban’en?
• Uw rogon ni ngad filed rogon ni nguun fol?
• Uw rogon nra fel’ rogodad ni faanra ngad ilalgad ko tirok Got ban’en?
[Picture on page 10]
Rayog ni ngad pithiged e magawon nib fel’ rogon ni faanra ngad folgad ko thin u Bible
[Picture on page 12]
Piin Kristiano kakrom e kar mageygad nib fas ni bochan e kar folgad ko thin ni yog Jesus