Mu Dag Ni Ga Be Mon’og Iyan

“Um rin’ e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.”​—1 TIMOTHY 4:15.

1. Uw rogon ni ngam nang reb e wom’engin ni ke lol’ ma rayog ni ngan kay?

MU susunnag nga reb e wom’engin e gek’iy ni ri ga baadag​—ni bod e arfath, nge ngongor, nge manga, ara yugu boch e wom’engin. Rayog ni ngam nang ko ngiyal’ ni ke lol’ ma rayog ni ngan unum boch? Ri arrogon. Bochan bon, nge ramaen, nge feni munguy ma ga nang feni fel’ lamen ma ke chuchugur ni ngam unum. Ma chingiyal’ ni kam tabab ni ngam unum ma sana rayog ni ngam filan’um ya karim falfalan’. Uw feni yoor e logowen! Uw feni rib athibthib! Bochan e re n’ey ma karim falfalan’ ma kari fel’ u wan’um.

2. Uw rogon ma rayog ni ngan guy ni ke ilal e girdi’, ma mang e ra rin’ e re n’ey ko thil u thilin e girdi’?

² Re n’eney ni kam rin’ ni kam falfalan’ ngay e bay boch ban’en ko yafas ni ba taab rogon ngay . Ya reb, e taareb rogon nga reb e wom’engin ni ke lol’, ma girdi’ ni ke ilal ko tirok Got e ku rayog ni ngan nang u boch e kanawo’ nib thilthil. Gad ra nang e girdi’ ni ke ilal nfaanra ke dag ni bay rogon ni nge poy ban’en, ma ke mom ni nge nang fan ban’en, mab gonop, nge yugu boch ban’en. (Job 32:7-9) Mmutrug ni bay e falfalan’ ni ngan chagil ma ngan un ko maruwel u taabang ngak e girdi’ ni be dag e pi felngin ni aram rogon u pangirad nge ngongol rorad.​—Proverbs 13:20.

3. Mang e n’en ni be dag ni ke ilal e girdi’ nrogon ni weliy Jesus murung’agen u nap’an ni immoy u fayleng?

³ U yu yang, e sana bay be’ ni ke ilal boch downgin, machane rogon ni ma non e be dag ni be par ni kab bitir e lem rok ma kab bitir ko tirok Got ban’en. Ni bod ni, nap’an ni be weliy Jesus Kristus murung’agen e re mfen nib kireb nem ko ngiyal’ ni immoy riy, me yog ni gaar: “Yib John, mi i par yu ngiyal’ ni ke pag e abich ma da i unum e wain, machane ke yog e girdi’ ni lungurad, ‘Ke ying e moonyan’ ngak; me yib e en ni Fak e girdi’, mi i abich ma be garbod, me yog e girdi’ ni gaar, ‘Mu guyed e re moon ney! I ir be’ nib taabich ma ma unum e wain.’” Yugu aram rogon ni pi cha’ nem e kar ilalgad ko dowef rorad, i yog Jesus ni yad bod e “piin bitir”​—ndawora ilalgad. Ere, me ulul ngay ni gaar: “Taareb rogon, gonop nib mat’aw e ra m’ug ko ngongol.”​—Matthew 11:16-19.

4. Mang boch e kanawo’ ni rayog ni ngan guy ni be mon’og e girdi’ ma ke ilal?

⁴ U daken e thin ni yog Jesus, ma kad guyed ni demtrug ko ke yog ngak be’ e llowan’ nib riyul’​—ma reb e pow ko ke ilal be’ fa dawo’—​e ra m’ug ko tin ni ma rin’ ni aram e wom’engin. Bochan e re n’ey, ngam lemnag e fonow ni ke pi’ Paul ni apostal ngak Timothy. Tomren ni ke weliy Paul ngak Timothy reb nge reb e n’en ni susun thingari rin’, me yog ni gaar: “Um rin’ e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.” (1 Timothy 4:15) Arrogon, rogon ni be mon’og reb e Kristiano nge ilal ko tirok Got e “ran guy,” ara yira nang nib tamilang. Ra yani ilal e Kristiano ko tirok Got, ma ra bod ba magal ni be mat ramaen, e gathi ban’en ni dabin gu’ ara felngin nib mith. (Matthew 5:14-16) Ere gad ra weliy l’agruw e kanawo’ nib ga’ ni rayog ni ngan guy riy nfaanra kan mon’og min ilal ko tirok Got ni: (1) ke yoor e tamilangan’, nge tin ni manang, nge llowan’; (2) ma dag wom’engin e kan ni thothup.

Me Taareban’rad ko Michan’ Nge Tin Yad Manang’

5. Uw rogon ni rayog ni ngan nog ni ke ilal be’?

⁵ Baga’ ni dictionary e be weliy murung’agen rogon ni kan ilal ni aram e kan mon’og ni polo’, me ilal e dowef, nge kan taw ko fare dodow ni un nameg. Reb e wom’engin, ni bod rogon ko n’en ni kan weliy kafram boch, e riyul ni ke el, ara ke lol’, nfaanra ke ga’ ni polo’ ga’ngin me thil yaan, nge ramaen, nge bon, nge lamen ma ke taw ko gin ni yibe lemnag. Ere rogon ni ngan ilal, e ku be yip’ fan ni kan mang e bin th’abi fel’, kan mon’og ni polo, ku kani flont.​—Isaiah 18:5; Matthew 5:45-48; James 1:4.

6, 7. (a) Mang e be dag ni ri baadag Jehovah ni urngin e pi tapigpig rok e ngar mon’oggad i yan ngar ilalgad ko tirok Got? (b) Ngan ilal ko tirok Got e rib peth ko mang?

⁶ Jehovah Got e ri baadag ni nge mon’og e pi tapigpig rok ngar ilalgad ko tirok Got. Bochan e re n’em, me pi’ boch e taw’ath nrib fel’ u lan fare ulung ko Kristiano. I yol Paul ni fan ko fapi Kristiano u Efesus, ni gaar: “Me turguy boch ni ngar manged apostal, ma boch e turguy ni ngar manged profet, ma boch e turguy ni ngar machibnaged ngak e girdi’ e thin nib fel’ ni yib rok Got, ma boch e turguy ni ngar manged ta chugul saf ma ngar filed fan e thin rok Got ngak e girdi’. I rin’ e re n’ey ni nge ngongliy rogon urngin e girdi’ rok Got ngar pigpiggad ngak Got ni aram e maruwel rok girdien Kristus, mi yad ayuweg girdien e dowef rok Kristus ngar ilalgad iyan. Ere gadad gubin ni bay da bad nga taabang ngad taab girdi’gad u daken e michan’ rodad ngak Fak Got nge murung’agen ni kad nanged; ma aram ma gadad ilal iyan nge mus rogodad ngad boded mam’ungun Kristus. Ma aram e dab kud pired ni gadad bod e bitir, ni be fekdad e nifeng i yan ni gubin yay nra n’ag e nifeng gil’, ni aram e machib rok e girdi’ ni yad be bannag e girdi’, ni piin ni yad be pow’iy boch e girdi’ ko tin ni gathi ir ko ban ni kar ngongliyed rogon.”​—Efesus 4:11-14.

⁷ U lan e pi verse ney, i weliy Paul ni reb i fan ni ke pi’ e pi taw’ath nem ni spiritual ni boor nga lan ulung ni fan ni urngin e girdi’ e thingari ‘taareban’rad u daken e michan’ rorad ngak Fak Got nge murung’agen ni kar nanged,’ nge mang ‘be’ ni kari ilal,’ ngar ‘boded mam’ungun Kristus.’ Kemus ni aram e kanawo’ ndabiyog ni nge fekdad e nifeng iyan ni bod e bitir u daken e lem nge machib nde riyul’. Ere kad guyed ni ri bay e peth u thilin e ngan mon’og nge ngan mang Kristiano ni ke ilal ko tirok nge tin baaray ni nge “taareban’dad u daken e michan’ rodad ngak Fak Got nge murung’agen ni kad nanged.” Bay boor ban’en nib fel’ ko fonow ni pi’ Paul ni susun ni ngada tedandad ngay.

8. Rogon ni nge “taareban’uy” ko michan’ nge tamilangan’ nib puluw ma mang e ba t’uf ni ngan rin’?

⁸ Bin Som’mon, bochan nib t’uf ni nge “taareban’’” e piin Kristiano, ma reb e Kristiano ni ke ilal ko tirok Got e thingari par ni ri taareban’ ngak e pi walagen ko michan’ rorad nge tin ni kara nanged. Dabi mon’eg ara dabi gel fen ngay ko tin ni be lemnag ara nge chaariy e lem ko girdi’ u murung’agen fan e Bible. Gathi aram rogon, ya ri ma pagan’ ko thin riyul’ ni Jehovah e ke gagiyegnag ngan nang fan u daken Jesus Kristus ni Fak, nge “fare tapigpig nib yul’yul’ mab gonop.” Gadra kay e ggan nib spiritual ni gubin ngiyal’ “ko ngiyal’ nib puluw”​—u daken e pi babyor ko piin Kristiano, ngu nap’an e muulung, ngu nap’an e pi assembly, nge convention—​ma rayog ni nge mudugil lanin’dad ni ra par ni nge “taareban’” e pi walagdad ni Kristiano ko michan’ nge tamilangan’.​—Matthew 24:45.

9. Ngam weliy fan fare bugithin ni “fare michan’” ni be fanay Paul ko babyor ni i pi’ ngak piyu Efesus.

⁹ Bin l’agruw, fare bugithin ni “fare michan’” e de yip’ fan e michan’ nib gel ni ra reb e Kristiano e bay rok, machane re n’ey e be yip’ fan e tin ni ke michan’dad ngay ni polo’, “feni ga’ radan nge feni n’uw nge feni tolang nge feni toar. (Efesus 3:18; 4:5; Kolose 1:23; 2:7) Riyul’, uw rogon ni nge taareban’ reb e Kristiano ko pi walag nfaanra kemus ni bochi yang ko “fare michan’” e ke mich u wan’? Be yip’ fan e re n’en ney ni thingar dabda paged ni kemus ni tin som’mon e machib u lan e Bible ara tamilangan ko thin riyul’ e buchuw ara maruwar u wan’dad. N’en nib fel’, e susun ni ngada adaged ni ngada fanayed urngin e taw’ath nge yaram rok Jehovah u daken e ulung rok ni fan ni ngada fal’eged i gay e Thin rok. Thingarda athamgilgad u rogon ni rayog rodad ni fan ni nge yog ngodad e tamilangan’ ko tin nib m’agan’ Got ngay nib puluw mab polo’. Ba muun ngay ni ngada dugliyed e tayim ni ngada bieged nge ngada filed fare Bible nge fapi babyor ni kan fek’ u Bible, ma ngada yibilayed ngak Got ni nge ayuwegdad nge pow’iydad, ma ngada uned ko piin Kristiano ni gubin ngiyal’, ma ngada uned ko maruwel ni ngan wereg e machib ko Gil’ilungun nge ngan pingeg e girdi’ ngar manged gachalpen ni nge mus rogodad riy.​—Proverbs 2:1-5.

10. Mang fan fare bugithin ni “mada’ ko ngiyal’ ni kad tawgad ngay ni gad gubin,” ni bay ko Efesus 4:13?

¹⁰ Bin dalip, ma thin som’mon ni yoloy Paul u nap’an ni be weliy murung’agen e n’en ni ngan nameg ni dalip yay nge “mada’ ko ngiyal’ ni kad tawgad ngay ni gad gubin.” Murung’agen fare bugithin ni “gad gubin,” ma reb e Bible handbook e ke weliy ni “gathi urngin, ara reb nge reb, ara kan dareg, ya urngin ni be yan u taabang.” Fan e re n’eney, ni ra bagadad ma thingari athamgil ni nge mang reb e Kristiano ni ke ilal ko tirok Got nrogon ni nge chag ngak urngin e pi walag. Fare The Interpreter’s Bible e be weliy ni gaar: “Rogon ni ngari mon’nog be’ ko tirok Got e dabiyog ni nge rin’ e re n’ey ni goo ir, ni bod ni bang ko dowef e rayog ni nge ilal nfaan ra urngin yang ko fare dowef e ri be ilal i yan nib fel’ rogon.” I puguran Paul ngak e piin Kristiano u Efesus ni “ngara uned ngak e piin nib thothup” nrogon ni nguura athamgilgad ni ngara nanged fan fare michan’ ni polo’.​—Efesus 3:18a.

11. (a) Rogon ni ngan mon’og ko tirok Got ma mang e de yip’ fan? (b) Mang e susun ni ngada rin’ed ni fan ni ngada mon’oggad i yan?

¹¹ Ba tamilang ni yog Paul nrogon ni ngan mon’nog ko tirok Got e de yip’ fan ni kemus ni ngan suguy lanin’dad ko tamilangan’ nge tin ni kad nanged. Reb e Kristiano ni ke ilal ko tirok Got e der ma uf ngak yugu boch e girdi’ ko salap rok. Thin nu Bible e be yog ni gaar: “Fare kanawo’ ko piin nib mat’aw e ba taab rogon ko ba magal nib galgal ramaen ni be gel e tamilang riy i yan nge mada’ ko ngiyal’ ni kari tamilang.” (Proverbs 4:18, New World Translation) Arrogon, “fare kanawo’” ma gathi girdi’, e “be tamilang i yan.” Faanra nguuda athamgilgad ni ngada folgad nrogon ni be gel iyan e tamilang ko tamilangan ko thin rok Got ni be pi’ Jehovah ngak e girdi’ rok, ma gad ra mon’og ko tirok Got. U roy, ma fare bugithin ni ngan fol e be yip’ fan ni ngan yan boch nga m’on, ma aram e n’en ni gad gubin e rayog ni ngada rin’ed.​—Psalm 97:11; 119:105.

Ngan Dag “fare Wom’engin e Kan ni Thothup”

12. Mang fan ni ngan dag wom’engin e kan ni thothup e baga’fan nrogon ni gad be maruwel ni ngada mon’oggad ko tirok Got?

¹² Yugu aram rogon ni rogon ni “nge taareban’uy ko michan’ nge tamilangan’ nib puluw” e baga’ fan, maku baga’ fan ni ngada daged wom’engin e kan ni thothup rok Got u urngin yang ko yafas rodad. Mang fan? Riyul’ ni aram rogon ya bochan rogon ni ngan mon’og ko tirok Got nrogon ni kada guyed, e gathi ban’en nib mith, machane yira nang e re n’en ney u daken fapi felngin nib mom ni ngan guy ni ra ayuwegey ma ra gelnag yugu boch e girdi’. Riyul’, ni rogon ni gad be athamgil ni ngada mon’oggad ko tirok Got e gathi kemus ni gad be maruweliy ni nge m’ug nib fel’ dakendad u p’eowchen e girdi’. Tin riyul’ riy, rogon ni gad be mon’og i yan ko tirok Got, ni gad be fol uw rogon ni be pow’iydad e kan ni thothup rok Got, ma ngari thil e lem nge ngongol rodad. “Mpaged fare Kan ni Thothup nge mang ir e i gagiyegnag pangimed, ma aram e dab um marod nga ar’aren lanin’med,” aram e n’en ni yog Paul ni apostal.​—Galatia 5:16.

13. Mang e ngan thiliyeg ni be dag nib tamilang ni yibe mon’og i yan?

¹³ Me ulul Paul nge yoloy nga but’ “fapi ngongolen e dowef nde flont,” ni boor mab “tamilang.” U m’on ni ke tamilang u wan’ be’ e tin ni baadag Got ni ngan rin’, ma i par ni be fol uw rogon e par ko girdi’ nu fayleng nib sug ko ngongol ni yog Paul ni bod e: “ngongol ni darngal, nge ngongol ni golong, nge ngongol ni puwlag; nge ta’fan nge meybil ngak e liyos; nge pig; nge tathil ni be tay e girdi’, nge cham ni yad be tay, nge awan’, nge damumuw, nge athamgiliy ban’en ni fan e gur faanem e nga nog e sorok ngom. Ma yad be wer ngar yuraba’gad ara ra yu ulunggad; ma yad ba chogow, ma yad be balyang ko rrum, ma yad be ngongliy e mur ni yibe wagagey u fithik’, ma yad be rin’ boch ban’en ni bod e tiney.” (Galatia 5:19-21) Machane nap’an ni be mon’og be’ ko tirok Got, me yog rok ni nge gelnag ko pi “ngongolen dowef nde flont” ma ngan tay “fare wom’engin e kan ni thothup” nga luwan. Re thiliyeg ney nrayog ni ngan guy e aram e pow nib tamilang ni be mon’og fa cha’ i yan ma ra mang Kristiano ni ke ilal ko tirok Got.​—Galatia 5:22.

14. Ngam weliy e gali thin ni “ngongolen dowef nde flont” nge “fare wom’engin e kan ni thothup.”

¹⁴ Thingarda lemnaged e gali thin ney ni “ngongolen dowef nde flont” nge “fare wom’engin e kan ni thothup”. “Pi ngongol” ney e aram wenegen ko n’en ni ke rin’ be’. Fan e re n’en ney, e aram pi n’en ni ke yoloy Paul nga but’ ni pi ngongolen e dowef nde flont e aram wenegen e n’en ni kari mel’eg be’ ara bochan gelngin e araren e dowef nde flont. (Roma 1:24, 28; 7:21-25) Ma reb, fare bugithin ni “fare wom’engin e kan ni thothup” e be yip’ fan ni fapi felngin ni kan yoloy nga but’, e keb ni gathi bochan e maruwel ni tay ni fan ni nge fel’ boch daken be’, ya aram angin ko maruwel ni be tay fare kan ni thothup u daken be’. Bod rogon ba gek’iy ni kan ayuweg nib fel’rogon e ra yibnag wom’engin, ma ra yibnag e girdi’ fare wom’engin e kan ni thothup nfaanra ri be maruwel e kan ni thothup ko yafas rok.​—Psalm 1:1-3.

15. Mang fan ni baga’fan ni ngan tiyan’uy ko urngin yang ko “fare wom’engin e kan ni thothup”?

¹⁵ Maku ban’en ni kub t’uf ni ngan weliy e uw rogon ni i fanay Paul fare bugithin ni “wom’engin” nib muun ngay urngin felngin nib fel’ ni ke weliy. Fare kan ni thothup e dabi yibnag wom’engin nib thilthil ma gad ra mel’eg e tin ni gad baadag. Urngin e pi felngin ni ke yoloy Paul ni bod e​—t’ufeg, nge falfalan’, nge gapas, nge gum’an’, nge gol, nge fel’ ngak be’, nge michan’, nge sobut’an’, nge t’ar laniyan’—​e aram e n’en ni baga’fan, ma pi n’en ney ni urngin e ra yibnag pangin e Kristiano nib biech. (Efesus 4:24; Kolose 3:10) Ere, yugu aram rogon ni sana bay boch ko fapi felngin nib gagiyel ko yafas rodad nbochan pangidad nge gad baadag ni ngada rin’ed, baga’ fan ni ngada tedan’dad ko urngin ban’en ni ke weliy Paul. Ra ngan rin’ e n’en ni aram rogon, ma rayog ni ngada daged pangidad ni bod rogon Kristus ko yafas rodad ni mus rogodad riy.​—1 Peter 2:12, 21.

16. Mang e gad be nameg ma arfan ni gad be maruweliy ni ngad manged Kristiano ni ke ilal, ma uw rogon ni nge riyul’ e re n’ey?

¹⁶ Ban’en ni kada filed ko tin ni ke weliy Paul e aram nap’an ni gad be maruweliy ni ngada manged Kristiano ni ke ilal ko tirok Got, ma gathi gad be nameg ni nge yoor e tamilangan’ rodad ara ngada maruwelgad nge yog ngodad pangidad nib fel’. N’en ni gad ra nameg e aram uw rogon ni ngeb ko yafas rodad fare kan ni thothup. Uw feni gel ni be fol e lem rodad nge ngongol rodad ko uw rogon ni be pow’iydad e kan ni thothup rok Got, ku aram rogon gelngin ni ngada ilalgad ko tirok Got. Uw rogon ma ra riyul’ e re n’en ney? Thingarda binged gum’irchadad nge lem rodad ma rayog ni nge maruwel fare kan ni thothup rok Got riy. Mab muun ngay ni ngada uned ko muulung rodad u fithik’ e yul’yul’. Maku thingarda fal’eged i lemnag e Thin rok Got ni gubin ngiyal’, ma ngada paged ni fapi kenggin e motochiyel riy e ra pow’iydad u rogon ni ngada rin’ed ban’en ngak yugu boch e girdi’ nge uw rogon ni gad ma mel’eg ban’en nge uw rogon ni gad ma duguliy ban’en. Ere, ba mudugil nra gagiyel ni gad be mon’og i yan.

Ngan Mon’og ni Fan ni Ngan Nog e Sorok Ngak Got

17. Uw rogon nib peth e ngan mon’og nge nga nog e sorok ngak e Chitamangiy u tharmiy?

¹⁷ Ma munmun, rogon nra gagiyel ni gad be mon’og i yan e ra aw ni ngan pining e sorok gathi ni fan ngodad, ya ni fan ngak e Chitamangidad u tharmiy, ni Jehovah, ni ir ke ayuweged ni ngada ilalgad ko tirok Got ban’en. Fare nep’ u m’on nni li’ Jesus kem’, me yog ngak pi gachalpen ni gaar: “Ara’ rogon min ta’fan e en ni Chitamangiy ni faan ra yib wom’engimed ni pire’, ara’ kanawoen mi gimed mang pi gachalpeg.” (John 15:8) U daken wom’engin e kan ni thothup ngu daken wom’engin fare maruwel ni ngan wereg e machib, me yog rok pi gachalpen ni ngar pininged e sorok ngak Jehovah.​—Acts 11:4, 18; 13:48.

18. (a) Mang mukun woldug e be buch ko ngiyal’ ney? (b) Mang magawon ni ma yib ko re mukun woldug ney?

¹⁸ Ngiyal’ ney, ma be flaabnag Jehovah e girdi’ rok ya yad be un ko mukun woldug nib spiritual. U lan boor e duw e chiney, ma sogonapan 300,000 e girdi’ nib biech ni kara uned ko taufe ni fan ni ngara ognaged e yafas rorad ngak Jehovah. Ke falan’dad nbochan e re n’en ney maku ba mudugil nra falfalan’ gum’irchaen Jehovah. (Proverbs 27:11) Machane, rogon ni nge par e re n’en ney ni ma yibnag e falfalan’ ma yima pining e sorok ngak Jehovah riy, e urngin e girdi’ ni kefin ra tababgad ko pigpig ku Got e ba t’uf ni yad “ra par ni yad be yan ni ba taareban’rad [Kristus], ni ir likngirad me ir e def rorad min gelnagrad ko michan’.” (Kolose 2:6, 7, NW) Re n’en ney e ra yibnag l’agruw ban’en ni nge mada’nag e girdi’ rok Got. Reb, e faanra kefin mu un ko taufe, ma ga baadag ni ngam maruwel ma aram e “rayog ni nge guyem urngin e girdi’ ni ga be mon’og i yan”? Maku reb, faanra kam un ko tin riyul’ nib n’uw nap’an, ma ga ra un ko maruwel ni ngam ayuweg e girdi’ nib biech ngam ubungrad ko tirok Got? Demtrug rogon, mab tamilang nib t’uf ni ngan mon’og ko tirok Got.​—Filippi 3:16; Hebrews 6:1.

19. Mang maruwel nge taw’ath ni rayog ni ngam un ngay nfaanra ga be maruwel ni nge guy e girdi’ ni ga be mon’og i yan?

¹⁹ Boor e flaab nib fel’ e be sonnag urngin e girdi’ ni yad be maruweliy nrayog ni ngan guy ni kar mon’noggad ko tirok Got. Ngam mu lemnag e thin ni yog Paul ngak Timothy ni be pi’ e athamgil nga lanin’uy ni gaar: “Mu ayuwegem, ma ga ayuweg rogon ni ga be weliy e thin rok Got ngak e girdi’. Um rin’ e pi n’ey i yan, ya faanra mu rin’ ma ga ra ayuwegem nge piin ni yad ma motoyil ngom ngar thap ngak Got.” (1 Timothy 4:16) Ga ra maruwel nib gel nge yog ni nge guy e girdi’ ni ga be mon’og i yan, e ku rayog ni ngam un ko maruwel ni ngan pining e sorok nga fithingan Got ma ga falfalan’ ko pi flaab ni ra pi’ ngom.

Ka Ga Manang?

• Mang boch e kanawo’ nrayog ni nge guy e girdi’ ni ke mon’og ko tirok Got?

• Mit i mang tamilangan’ nge llowan’ nra dag ni ke ilal e girdi’?

• Ran dag e “wom’engin e kan ni thothup” ma uw rogon ni re n’en ney e be micheg ni kan mon’og ko tirok Got?

• Mang e n’en ni susun ni nge fel’ u wan’dad u nap’an ni gad be ilal i yan ko tirok Got?

[Picture on page 27]

Wom’engin ni ke lol’, ara ke el, e yira nang nib tamilang

[Picture on page 28]

Rayog ni ngada mon’oggad ko tirok Got nfaanra gad be fol ko thin riyul’ ni kan dag

[Picture on page 30]

Fare meybil e ra ayuwegdad ni ngada daged e “wom’engin e kan ni thothup”