Piin nib Fel’ Yangaren​—Mu Daged ni Kam Mon’oggad ko Tirok Got

“Um rin’ e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.”​—1 TIM. 4:15.

1. Mang e baadag Got ni nge rin’ e piin ni fel’ yangaren?

“G IRDI’ ni ke taw nga yangaren, mu felfelan’gad nga yangarmed. Mu felfelan’gad e chiney ni ke taw nga gelngimed.” (Ekl. 11:9, Tanakh​—The Holy Scriptures) Ireray e n’en ni yoloy Solomon ni Pilung nu Israel kakrom. Jehovah e ir e yog e pi thin ney ya ri baadag ni ngam felfelan’gad e piin fel’ yangaren. Ma ku baadag Jehovah ni ngam felfelan’gad ngki mada’ ko ngiyal’ ni kam ilalgad. Machane nap’an ni ka yad ba bitir ma ba ga’ ni yad ma ngongliy boch e ngongol nib kireb nra magawonnag e felfelan’ rorad u nap’an ni kar ilalgad. Ku arrogon Job ni be’ nib yul’yul’ ku Got ma ke kireban’ nga wenegan e ‘pi n’en ni ke rin’ ni kab pagel.’ (Job 13:26) Reb e Kristiano ni kab pagel e susun ni thingari dugliy boch ban’en nib ga’ fan ko yafas rok. Faanra dugliy ban’en nib kireb ma aram e ra yib e magawon nge kireban’ ngak u nap’an e yafas rok.​—Ekl. 11:10.

2. Mang fonow e ba t’uf ni nge fol e piin nib fel’ yangaren riy ma rayog ni ngar siyeged e oloboch nib gel e kireb riy?

² Piin nib fel’ yangaren, ba t’uf ni ngam dugliyed ban’en nib fel’ rogon. Mu lemnag e fonow ni pi’ Paul ngak piyu Korinth. I gaar: “Dab ku um lemgad ni bod e bitir; ngam boded e piin ni bitir ndar nanged rogon i ngongliy e kireb, machane ngam lemgad nrogon e piilal.” (1 Kor. 14:20) Faanra fol e piin ni fel’ yangaren ko re fonow ney ma rayog ni ngar siyeged e oloboch nib gel e kireb riy.

3. Mang e rayog ni ngam rin’ ni nge ilal e lem rom?

³ Faanra gur be’ nib fel’ yangarem ma ngam lemnag nib t’uf ni ngam athamgil ma rayog ni nge ilal e lem rom. I yog Paul ngak Timothy ni gaar: “Dab mu pag be’ nge darifannagem ni bochan e ka gab pagel, machane ngam dag ngak e piin nib mich Kristus u wun’rad rogon e ngongol nib m’agan’ Got ngay ni ngam dag ngorad u rogon e thin ni ga ma yog, ngu rogon pangim, ngu rogon nib t’uf Got nge girdi’ rom, ngu rogon nib mich Kristus u wan’um, ngu rogon ni gab machalbog. . . . Mu tiyan’um nguum beeg e thin u lan e babyor nib thothup ngak e girdi’ ko muulung, ma ga be machib. . . . Um rin’ e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.” (1 Tim. 4:12-15) Piin Kristiano nib fel’ yangaren e ba t’uf ni ngar ilalgad ko tirok Got ban’en.

Mang Fan e Mon’og?

4. Mang e ba muun ngay ni ngan mon’og ko tirok Got?

⁴ Nge mon’og be’ e “be yip’ fan ni nge thil rarogon nge fel’ boch.” I fonownag Paul Timothy ni nge athamgil nge mon’og u rogon e thin ni ma yog nge rogon pangin nge rogon ni ma t’ufeg e girdi’ ma nge par nib machalbog mab michan’. Maku arrogon e machib ni ma tay. Ere ba ga’ fan ni nga i par nib fel’ e ngongol rok ya nge folwok e girdi’ riy. Ere rib t’uf ni nge mon’og Timothy i yan ko tirok Got.

5, 6. (a) Mingiyal’ e kan guy ni ke mon’og Timothy? (b) Uw rogon ni nge folwok e piin fel’ yangaren rok Timothy?

⁵ U nap’an ni yoloy Paul e re thin ney ni gonap’an 30 e duw u tomren ni yim’ Kristus, ma be pigpig Timothy ni ir reb e piilal ni ke n’uw nap’an. Gathi ka fini tabab ni nge mon’og ko tirok Got. Gonap’an reliw’ e duw rok Timothy ma “urngin e walag ni girdien Kristus ni yad ma par u lan yu Lystra ngu lan yu Ikonium e ra weliyed murung’agen Timothy ni be’ nib fel’.” (Acts 16:1-5) Ngiyal’ nem, me fek Paul Timothy nga ranow nga boch e binaw ko machib. Tomren in e pul ni ka ranow ko machib ma ke guy Paul ni ke mon’og Timothy ma aram ke l’og ni nge yan nga Thessalonika ni nge fal’eg laniyan’ e Kristiano u rom. (Mu beeg 1 Thessalonika 3:1-3, 6.) Rib tamilang ni ke ilal Timothy ko tirok Got u nap’an ni kab pagel.

⁶ Gimed e piin ni fel’ yangaren u lan e ulung, ngam athamgilgad ni nge yog ngomed e pi fel’ngin nib fel’ e chiney, ma aram e rayog ni ngam ilalgad ko tirok Got. Nap’an ni ke gaman 12 e duw rok Jesus ma ke “ga’ e gonop rok.” (Luke 2:52) Ere ngad guyed e chiney ko uw rogon ni ngam mon’oggad u dalip ban’en: (1) u nap’an ni ke yib e magawon ngom, (2) ara ga be fal’eg rogom ni ngam un ko mabgol (3) ara u nap’an ni ga be athamgil ni ngam “mang reb e tapigpig nib fel’.”​—1 Tim. 4:6.

Nge Par nib Fel’ e Lem Rom u Fithik’ e Magawon

7. Mang e ra rin’ e magawon ko piin ni fel’ yangaren?

⁷ Carol ni reb e Kristiano ni 17 e duw rok e gaar, “Yu ngiyal’ ma kari aw parawog ma ke tomal lanin’ug ndabug ni nggu od ni kadbul.”a Mang fan ni kari mochuch? Nap’an ni ke 10 e duw rok Carol, ma ke dar e gallabthir rok, ma thingari par rok e chitiningin ni dabun e thin nu Bible. Sana ke yib e magawon ngom ni be mo’maw’nag ni ngam mon’og ko tirok Got ni bod Carol.

8. Mang e magawon ni ke yib ngak Timothy?

⁸ U nap’an ni be mon’og Timothy ko tirok Got me yib e magawon ngak. Ni bod ni ke “yib e m’ar” ngak. (1 Tim. 5:23) Nap’an ni ke l’og Paul Timothy nga Korinth ya nge pithig e magawon u rom ya bochan e bay boch e girdi’ ni kar togopuluwgad nga mat’awun Paul, ma aram me fonownag Paul girdien e ulung u rom ni ngar ayuweged Timothy ma rayog ni nge par nib “pagan’.” (1 Kor. 4:17; 16:10, 11) Be m’ug riy ni Timothy e be’ nib tamra’.

9. Mang e lem nib fel’, ma mang e ba thil u thilin be’ nib fel’ e lem rok nge be’ ni ma rus?

⁹ I puguran Paul ngak Timothy ni gaar: “Gathi lem ni der rus e ke pi’ Got ngodad ya lem nib mudugil ma ma t’ufegey mab fel’.” (2 Tim. 1:7, NW) Girdi’ ni bay e ‘lem rok nib fel’’ e be yip’ fan ni rayog nge gonopiy me weliy ban’en nib fel’ rogon. Ma ku ra yog ni k’adan’ ni demtrug e magawon nra yib ngak. Boch e piin nib fel’ yangaren e yad be rus ko magawon nib gel ni ma yib ngorad ma aram e yad ma mol ara yad ma yaliy e kachido nib n’uw nap’an. Ma ku boch i yad e ma fanay e falay ni kireb ma yad ma unum e alkul ma yad ma un ko mur nib pag rogon nge ngongol ni darngal. Ere kan fonownagdad ni “ngad paged pangidad nge ngongol rodad nde m’agan’ Got ngay nge chogowen urngin ban’en u fayleng nde mat’aw u owchen Got.”​—Titus 2:12.

10, 11. Uw rogon ni lem nib fel’ e ra ayuwegdad ngad manged Kristiano nib gel?

¹⁰ Kan pi’ e athamgil nga laniyan’ e “piin ni pagel ni ngar t’ared lanin’rad [“fel’ lanin’rad,” NW].” (Titus 2:6) Ga ra fol ko re fonow ney ma be yip’ fan ni nap’an nra yib e magawon ngom ma ga meybil ngak Jehovah me pagan’um ngak nra ayuwegem. (Mu beeg e 1 Peter 4:7.) Ma aram e ra gel e pagan’ ngom nga “gelngin ni ke pi’ Got” ngom.​—1 Pet. 4:11.

¹¹ Lem nib fel’ nge meybil e ereray e n’en ni ke ayuweg Carol. I gaar: “Nggu togopluw ko ngongol ni darngal ni ma rin’ e nina’ rog e ereray e n’en ni kug rin’ nth’abi mo’maw’, machane ke ayuwegeg Jehovah. Gu manang ni ba’ Jehovah rog ere da ku gur rus.” Dab mu pag talin ni magawon e ra ayuwegem ngam mang be’ nib fel’ ma ku ra pi’ gelngim. (Ps. 105:17-19; Lam. 3:27) Demtrug e magawon nra yib ngom ma dabi pagem Jehovah. Riyul’ ni ra ‘ayuwegem nga pa’ nib gel.’​—Isa. 41:10.

Rogon ni Nge Fel’ e Mabgol Rom

12. Mang fan ni reb e Kristiano ni baadag ni nge un ko mabgol, e thingari fol ko fonow ni bay ko Proverbs 20:25?

¹² Boch e piin ni fel’ yangaren e yad ma gurgur ngar mabgolgad ya yad ma lemnag ereray e n’en nra chuweg e kireban’ nge chalban rorad nge ku boch e magawon u tabinaw. Machane mabgol e gathi ba gosgos ya ba ga’ fan. Kakrom ma bay boch e girdi’ ni kar gurgad kar micheged ban’en ku Got nder lemnaged ko mang e magawon nra yib riy. (Mu beeg e Proverbs 20:25.) Yu ngiyal’ ma piin nib fel’ yangaren e darur ma lemnaged ni boor ban’en nib t’uf ni ngar rin’ed u nap’an ni kar mabgolgad. Ere tomren ni kar mabgolgad ma aram e kar nanged ni boor ban’en ni thingar ra rin’ed.

13. (a) Piin ni yad be lemnag ni ngar uned ko mabgol, mang boch e deer ni thingar ra fithed yad riy? (b) Ma mang fonow e rayog ni nge ayuwegrad?

¹³ U m’on ni ngam gay be’ ni ngam leay, ma ga fithem: ‘Mang fan ni gub adag ni nggu mabgol? Mang e gu be lemnag ni nge yog ngog riy? Ir be’ nib fel’ ni nge mang mabgol rog? Riyul’ ni kug fal’eg rogog ni nggu rin’ e maruwel rog u nap’an ni kug un ko mabgol?’ “Fare tapigpig nib yul’yul’ ma ba gonop” e kar fal’eged e babyor ni rayog ni nge ayuwegem u nap’an ni ga be lemnag ni ngam un ko mabgol.b (Matt. 24:45-47) Mu lemnag ni re babyor ney e aram e fonow ni ke pi’ Jehovah ngom. Mu gonopiy e pi thin ni bay riy ma ga fol riy. Dab mu pag ni ngam bod e “os ara ba gamanman ni mule fithingan ndariy e lem rok.” (Ps. 32:8, 9) Ngam athamgil ni ngam nang urngin ban’en u murung’agen e mabgol. Faanra ke taw nga nap’an ni ngam un ko mabgol, ma dab mu pag talin ni nguum par ni “gab machalbog.”​—1 Tim. 4:12.

14. Ra ngam athamgil ni ngam bod Kristus, uw rogon nra ayuwegem u nap’an ni kam mabgol?

¹⁴ Ngan ilal ko tirok Got e ra ayuweg ni nge fel’ e mabgol. Reb e Kristiano ni ke ilal ko tirok Got e ra athamgil ‘ma aram e ra ilal i yan nge mus rogon nge bod mam’ungun Kristus.’ (Efe. 4:11-14) Ma athamgil ni nge folwok rok Kristus ni “de yan nga laniyan’.” (Roma. 15:3) Faanra fagali mabgol e ra bagayow ma ra lemnag bagayow ma aram e bay e gapas nge pagan’ u thilrow. (1 Kor. 10:24) En ni figirngiy e ngari t’ufeg leengin, ma en ni leengin e nge athamgil nge yan nga laniyan’ figirngin, ni bod rogon e n’en ni i rin’ Jesus ni i yan nga laniyan’ e Chitamangin.​—1 Kor. 11:3; Efe. 5:25.

‘Ngam Rin’ e Maruwel Rok e Tamachib ko Thin Nib Fel’’

15, 16. Uw rogon ni ngam mon’og ko machib?

¹⁵ U nap’an ni be weliy Paul feni ga’ fan e maruwel ni kan pi’ ngak Timothy me gaar: “Ri gu be ta’ chilen ngom u p’eowchen Got nge Kristus Jesus . . . ni ngam machibnag e thin rok Got ko girdi’.” Mi ki gaar: “Ma ga ra rin’ e maruwel rok e tamachib ko Thin Nib Fel’.” (2 Tim. 4:1, 2, 5) Ba t’uf ni ngan ‘duruw’iy’ Timothy ko thin rok Got nge yog ni lebguy e maruwel ni kan pi’ ngak.​—Mu beeg 1 Timothy 4:6.

¹⁶ Uw rogon ni ngam ‘duruw’iyem’ ko thin rok Got? I yoloy Paul ni gaar: “Mu tiyan’um nguum beeg e thin u lan e babyor nib thothup ngak e girdi’ ko muulung, ma ga be machib ngorad ma ga be weliy fan e thin rok Got ngorad nge yan i mada’ ko ngiyal’ ni bay gu sul riy. Um rin’ e pi n’ey ma ga tiyan’um ngay, nge yog ni guy e girdi’ ni gubin ni ga be mon’og i yan.” (1 Tim. 4:13, 15) Ba t’uf ni nguun fil e Bible u fithik’ e pasig ma rayog ni nguun mon’og ko tirok Got ban’en. Fare bugithin ni nguun “tiyan’uy” e be yip’ fan ni ngaun tiyan’uy ko n’en ni yibe rin’. U rogon e fol Bible ni ga ma tay? Ri gab adag ni ngam fil e “tin nda nnang [“toar fan,” NW] ni ke m’ay i lemnag rok Got” fa danga’? (1 Kor. 2:10) Faan ga ra fal’eg i lemnag e n’en ni kam fil ma ra k’aringem ngam fol riy.​—Mu beeg e Proverbs 2:1-5.

17, 18. (a) Mang salap e thingar mu maruweliy? (b) Ga ra fol u rogon ni ma lem Timothy ma uw rogon nra ayuwegem ko machib?

¹⁷ Reb e pioneer nib fel’ yangaren ni Michelle fithingan e gaar: “Kug mon’og ko machib ni bochan e gu ma beeg e thin nu Bible ma gu ma un ko muulung ni gubin ngiyal’. Ma bochan e re n’ey kug mon’og ko tirok Got.” Ga ra un ko pioneer ma rriyul’ nra ayuwegem ya ga ra mon’og u rogon ni ngam fanay e Bible u nap’an ni ga be machib. Ngam athamgil ngam salap u rogon ni ngam beeg e Bible nge rogon ni ngam pi’ e fulweg u nap’an e muulung. Faanra gur reb e fel’ yangaren ni kam mon’og ko tirok Got, ma nap’an ni yira pi’ reb e welthin ngom ko Theocratic Ministry School ma susun ngam tiyan’um ngam maruweliy e n’en ni kan pi’ ngom.

¹⁸ ‘Ngam rin’ e maruwel ko tamachib’ e be yip’ fan ni ngam rin’ nib fel’ rogon ma ngam ayuweg e girdi’ nge yog e yafas ni manemus ngorad. Ma aram e ba t’uf ni nguum “fil e thin rok Got ngorad u fithik’ e gum’an’ [“salap u rogon i fil e ban’en ku be’,” NW].” (2 Tim. 4:2) Ga ra un ko girdi’ nib salap ko machib, ma rayog nim fil boor ban’en u kanawoen e machib ni yad ma tay, ni bod Timothy ni i fil boor ban’en u nap’an ni i un ngak Paul ko machib. (1 Kor. 4:17) U nap’an ni be weliy Paul murung’agen boch e girdi’ ni ke ayuwegrad kar manged e Kristiano me yog ni gathi kemus ni i machibnag ngorad fare thin nib fel’, ya ke fanay e yafas rok ni nge ayuwegrad ya yad ba t’uf rok. (1 Thess. 2:8) Rayog ni ngam fol ko n’en ni rin’ Paul ni faanra thingar mu lem ni bod Timothy nriyul’ ni be lemnag rarogon e girdi’, ma arfan ni un ko maruwel “ni fan ko Thin Nib Fel’ ni yib rok Got.” (Mu beeg e Filippi 2:19-23.) Ga ma rin’ ni aram rogon fa?

Ngan Ilal ko Tirok Got Ma Ra Yibnag e Felfelan’

19, 20. Mang fan ni mon’og ko tirok Got ban’en e ra yibnag e felfelan’ ngom?

¹⁹ Ba t’uf e maruwel nib gel ni faanra ngan ilal ko tirok Got ban’en. Faanra ngari mu athamgil ni ngam salap ko machib ma ra yog ni ‘yoor e girdi’ ni mu fal’eg rogorad’ ma yad ra mang “l’agan’ nge felfelan’” rom. (2 Kor. 6:10; 1 Thess. 2:19) Fred ni be’ ni ma un ko machib ni gubin ngiyal’ e gaar, “Ke yoor e ngiyal’ ni gu ma un ko machib ko kafram. Ma riyul’ ni kab gel e felfelan’ ni ma yib ko ngan pi’ ban’en ngak be’ ko bin be’ e nge pi’ ban’en ngom.”

²⁰ Daphne ni reb e pioneer nib fel’ yangaren e be weliy murung’agen e felfelan’ ni yib ngak ni bochan e ke mon’og ko tirok Got ban’en. I yog ni gaar, Kari fel’ e tha’ u thilmow Jehovah u nap’an ni kug nang boor ban’en u murung’agen. Faanra ngam pi’ e tin nth’abi fel’ rom ngam felfelan’nag Jehovah ma rriyul’ ni ga ra felfelan’. Yu gu aram rogon ni gathi gubin ngiyal’ ni ma guy e girdi’ e mon’og ni ga be tay machane manang Jehovah ma ba ga’ fan u wan’. (Heb. 4:13) Dariy e maruwar riy ni gimed e Kristiano ni fel’ yangaren e rayog ni ngam pininged e sorok ngak e Chitamangidad nu tharmiy. Nap’an ni ga be athamgil ni ngam mon’og ko tirok Got ban’en ma aram e ga be felfelan’nag.​—Prov. 27:11.

[Footnotes]

Mang e Kam Fil?

• Mang e kub muun ngay ni ngan mon’og ko tirok Got ban’en?

• Uw rogon ni ngam dag ni kam mon’og ko tirok Got . . .

u nap’an ni ke yib e magawon ngom?

u nap’an ni ga be fal’eg rogom ni ngam un ko mabgol?

u nap’an ni ga be un ko machib?

[Picture on page 15]

Meybil e ra ayuwegem ngam athamgil u fithik’ e magawon

[Picture on page 16]

Uw rogon ni pi tamachib nib fel’ yangaren e ngar mon’oggad ko machib?