Ngam Mang Reb e Tamachib ni be Mon’og Iyan
1 Ma felfelan’ e Chitamangidad nu tharmiy u nap’an nra guy ni be mon’og iyan e pi tapigpig rok ko tirok Got ban’en. Ba muun ngay e mon’og u rogon ni yibe wereg fare thin nib fel’. I yog Paul ku Timothy ni ir reb e piilal ni ngii tiyan’ ya nge yog ni guy e girdi’ ni gubin ni be mon’og iyan. (1 Tim. 4:13-15) Gad gubin ni mus ngak e pi tamachib ni yad ba salap ko machib ma susuna ngad athamgilgad nge mon’og rogon e machib ni gad be tay.
2 Ngan Nameg Boch Ban’en: Ra ngan mon’og mab t’uf ni ngan nameg boch ban’en. Mang boch ban’en nrayog ni ngad nameged? Rayog ni ngad guyed rogon ngad salapgad i weliy e thin nu Bible, ni aram e sayden rodad ko tirok Got ban’en. (Efe. 6:17) Sana bay boch ban’en u rogon e machib nib t’uf ni ngad mon’oggad riy, ni bod rogon ni gad ma dag ngak e girdi’ ni gad be lemnagrad, ara ngad yoloyed nga but’ e pi tabinaw nde moy be’ riy ya nge yog ni kud sulod ngay. Ara sana kub t’uf ni ngad nameged ni ngad sulod ngak e girdi’. Maku reb e rayog ni ngad nameged ni ngad salapgad i tababnag e fol Bible ngak e girdi’.
3 Pi N’en Nra Ayuwegdad: Pi muulung rodad, nib ga’ ni fare Theocratic Ministry School nge Service Meeting e kan ngongliy ni fan e nge ayuwegdad ngad mon’oggad ko machib. Faan gad ra athamgil ni ngad fal’eged rogodad ni fan ko pi muulung ney ma gad fol ko pi n’en ni gad be fil riy, ma aram e ra yib angin ngodad.—2 Kor. 9:6.
4 Kub t’uf ni nge bagadad me ayuweg bagadad nge yog nda mon’oggad iyan. (Prov. 27:17) Gad ra motoyilgad ko n’en ni ma yog e piin ni gad ma machib u taabang ma ra ayuwegdad ni ngad mon’oggad. Maku faen ni ma yarmiy e muulung ko fol babyor e rayog ni nge yarmiy ni ngan pi’ e ayuw ngodad. Ri gad ba taw’ath ni nge un reb e pioneer ara publisher nib salap ko machib ngodad ngar ayuweged gadad nge yib angin e machib ni gad ma tay miki gel e falfalan’ rodad! Bay reb e publisher nib biech ko book study rodad? Sana rayog ni ngad pininged nge un ngodad ko machib.
5 Bin th’abi ga’ fan e maruwel ni yibe rin’ e ngiyal’ ney e aram e machib ni be tay e piin Kristiano. Nap’an ni gad be pi’ ngak Jehovah e “maligach rodad,” ma gad ba adag ni ngad pied e tin nth’abi fel’ rodad ni fan ngak. (Heb. 13:15) Faanra da athamgilgad ngad mon’oggad ko machib ni gad be tay, ma gad ra bod be’ ni girdien e maruwel “nder tamra’ ko maruwel rok, ni ir be’ ni ma machibnag e thin rok Got nrogon.”—2 Tim. 2:15.