Rogon ni Ngan Skulnag e Tin Beech e Girdi’ ni Ngar Machibgad
1. Uw rogon e yay ni som’on nim un ko machib u mit e tabinaw?
1 Ka ga manang e yay ni som’on nim un ko machib u mit e tabinaw? Dabisiy ni kam rus. Faanra kam un ngak e en ni ma fil e Bible ngom ara yugu reb e publisher, ma dariy e maruwar riy ni kam felfelan’ ni bay be’ ni be ayuwegem. Machane, chiney ni kam salap ko machib e rayog ni ngam ayuweg e piin ni ka fin ra uned ko machib.
2. Mang e ba t’uf ni nge nang e piin ni ka fin ra uned ko machib?
2 Piin ni ka fin ra uned ko machib e ba t’uf ni ngar nanged rogon ni ngar tababgad i machibnag e girdi’, nge rogon ni ngar fanayed e Bible, nge rogon ni ngar sulod ngak be’ ni kar mada’naged, nge rogon ni ngar tababgad i fil e Bible ngak be’. Kub t’uf ni ngar filed rogon e machib u yugu boch e kanawo’, ni bod e machib u kanawo’ ngu tagil’ e business. Rayog ni ngam ayuwegrad ni ngar mon’oggad ko pi n’ey u rogon e ngongol rom nge thin rom.
3. Uw rogon ni ngad ayuweged boch e walag u rogon e machib ni gad ma tay?
3 Ngan Dag Rogon: I dag Jesus ngak pi gachalpen rogon ni ngar machibgad. (Luke 8:1; 1 Pet. 2:21) Nap’an ni kam yarmiy ni ngam machibgow be’ ni ka fini un ko machib u taabang, ma ga lemnag boch ban’en ni nga mog u nap’an e machib nib mom, ni bod rogon ni bay u lan boch e babyor rodad. Ma nap’an ni kam marow ko machib ma ga non ko gal nsom’on e naun ya nge yog ni nang facha’ e n’en ni ga be yog. Mu nap’an ni kam chuwgow ko fare naun ni gimew be yan i yan nga reb, ma rayog ni ngam fith ngak ko uw rogon u wan’ e n’en ni kam weliy. Faanra aray rogon ma ra ayuweg ni nge nang feni ga’ fan ni ngaud maruwelgad u taabang u nap’an e machib ma ku ra momnag ngak ni nge motoyil u nap’an ni ke yog be’ boch ban’en ngak nib t’uf ni nge mon’og riy u nap’an e machib.
4. Uw rogon ni ngad ayuweged e pi publisher nib beech u tomren ni kad rung’aged e n’en ni ke yog u nap’an e machib?
4 Ngan Weliy Rogon ni Ngan Rin’: Ki weliy Jesus ngak pi gachalpen rogon ni ngar machibgad. (Matt. 10:5-14) Ku aray rogon nrayog ni ngam ayuweg reb e publisher nib beech. Faanra ir e nge non, ma ga fal’eg e motoyil ko n’en ni be yog. Mu tomuren ni kam chuwgow ko fare tabinaw, ma ga weliy ngak fel’ngin e n’en ni ke rin’, ni yugu aram rogon ni bay boch ban’en ni kam guy nib t’uf ni nge mon’og riy. Faanra bay ban’en ni ga be guy nib t’uf ni nge mon’og riy, ma ga son nge non ko bin migid e tabinaw mfin mu guy ko ba t’uf ni ngam weliy ngak fa danga’. Ya dabisiy ma ke rus u nap’an ni kam marow ko bin som’on e tabinaw. Maku reb e dab mu pagtalin nde taareb rogon e salap rok gubin e tamachib, ma ba ga’ ni boor kanawoen ni yima rin’ ban’en.—1 Kor. 12:4-7.
5. Mang e rayog ni nga dogned u nap’an ni gad be ayuweg be’ ni nge mon’og?
5 Yu ngiyal’ e ra ning reb e publisher nib beech e ayuw ngom. Machane faanra dabi ning, mag guy rogon ngam ayuweg. Uw rogon ni ngam rin’ e re n’ey? Boch e publisher ni kar salapgad ko machib e kemus ni yad ma gaar, “Rayog ni nggog ban’en ngom nra ayuwegem?” ara “Uw rogon u wan’um e machib ni kam tay?” Maku rayog ni ngam gaar, “Nap’an ni ka fin gu mang reb e publisher, ma ba mo’maw’ ngog ni nggu . . . , machane re n’ey e ke ayuwegneg. . . . ” Yu ngiyal’ e ba fel’ ni ngam yaliyew e thin ni bay u lan fare babyor ni Reasoning. Kemus ni taareb i kanawoen e machib e ngam ayuweg riy ya nge dabi yoor ni nge lemnag.
6. Uw rogon ni ma uthum e wasey e wasey ni bay rogon ko machib?
6 Wasey e Ma Uthum e Wasey: I pi’ Paul e athamgil nga laniyan’ Timothy, ni reb e tamachib nib salap, ni ngi i tiyan’ ko machib ya nge guy e girdi’ ni be mon’og i yan. (1 Tim. 4:13, 15) Yugu aram rogon ni ke n’uw nap’an ni kam un ko machib, machane ngkum ulul ngam guy rogon ni ngam mon’og ko machib. Mu fil ban’en rok e pi publisher ni gimed ma machib u taabang, ni mus ko piin ni gathi kari n’uw nap’an ni kar uned ko machib, mu kum gay rogon ni ngam ayuweg yugu boch e girdi’ nib ga’ ni piin ni ka fin ra uned ko machib ya nge yog nra salapgad i machibnag fare thin nib fel’.—Prov. 27:17.