Ngad Mon’oggad ko Machib—Mu Ayuweg e En ni Gimew Be Machib u Taabang

Fan nib Ga’ Fan: Manang Jesus feni ga’ fan ni ngaud machibgad be’ u taabang. Aram fan nnap’an ni l’og 70 i gachalpen ni ngar m’onod rok nga boch e binaw ni ngar machibgad, me l’ograd ni nga ranod ni yad lal’agruw. (Luke 10:1) Faanra bay be’ ni be un ngom, ma rayog ni nge ayuwegem u nap’an ni kam mada’nag reb e magawon nib ga’ ara nap’an ni ke fith be’ reb e deer ngom ndam nang e fulweg riy. (Ekl. 4:9, 10) Rayog ni nge weliy boch ban’en ni ke fil ara ke buch rok, maku rayog ni nge yog boch ban’en nra ayuwegem ni ngam mang reb e tamachib nib fel’. (Prov. 27:17) Ku rayog ni nge pi’ e athamgil nga lanin’um u nap’an ni gimew be yan u reb e naun nga reb.—Fil. 4:8.

Rogon ni Ngan Rin’:

Mmotoyil u nap’an ni be non faen ni gimew be machib u taabang. (Jas. 1:19) Nap’an ni yira beeg reb e thin nu Bible, mag pithig e Bible rom ngam yaliy. Ga ra rin’ ni aray rogon, ma aram e rayog ni ngam ayuweg faen ni gimew be machib u nap’an ni ke t’uf e ayuw rok.
Mu gonopiy e ngiyal’ nib fel’ ni ngam non. (Prov. 25:11) Faanra kam un ngak be’ ko Bible study rok, ma rayog ni nga mog buchuuw ban’en. Machane, nap’an ni yibe yan ko machib u mit e tabinaw, ma faen ni gimew be machib u taabang e baadag ni ngam pag nge mang ir e non ko ngiyal’ nsusun ni ir e nge non. Faanra ir reb e tamachib ni kab beech ara de nang rogon ni nge pi’ e fulweg ko deer ni kan fith ngak, ma rayog ni ngam ayuweg. Machane, demtrug ko gimew be yan reb e walag ko machib u mit e tabinaw, ara kam sulow ni ngam guyew be’, ara kam marow ko Bible study rok, ma dab mu th’ab e thin rok u nap’an ni be non, ara mu n’igin ni nge mang gur e mu non, ara mu weliy murung’agen yugu ban’en ni gathi ir e yibe weliy.
Mu weliy boch ban’en ni ke buch rom. Faanra bay ban’en nrayog ni nga mog ko en ni gimew be machib u taabang nra ayuweg ni nge mon’og ko machib, ma gog. (Prov. 3:27) Machane, rayog ni ngam sonnag e ngiyal’ nib fel’ ni nga mog, ngemu’ me lungum ngak: “Uw rogon u wan’um e n’en ni kam rin’?” fa “Rayog ni nggog ban’en ngom ni gu be lemnag nra ayuwegem?” fa “Gag e baaray e n’en ni gu ma guy rogon ni nggu rin’.” Dab mu pagtalin ni yugu aram rogon nra adag facha’ ni nge taw nga ba ngiyal’ mag ayuweg, machane ra mulan’ ni faanra yugu mpar ma ga be yog e oloboch rok ngak.

Mu Gay Rogon ni Ngam Rin’ e Re N’ey u Lan e Re Pul Ney:

Tomuren ni kan mu’ ko machib, ma gog ngak e en ni ka um maruwelgow u taabang ban’en ni ke yog ara ke rin’ ni ke ayuwegem.