Babyor ni Ke Yib ko fare Ulung ni Ma Pow’iyey

Ngak e Tin Ka Bay e Tapigpig:

Kar gu felfelan’gad ngay ni nggu pied e gi babyor ney ngomed u tabolngin e re duw ney nrib ga’ fan! Ra chugur nga tungun e re duw ney ni 2014, ma ke gaman reb e chibog n’umngin nap’an ni ke tabab Jesus Kristus ni Pilung rodad ko gagiyeg u fithik’ e pi toogor rok.​—Ps. 110:1, 2. 

Nap’an fare muulung ni tay fare Watch Tower Bible and Tract Society of Pennsylvania u tabolngin e biney e service year, ma aram me pi’ fare New World Bible Translation Committee e re ke Bible ney ni thin ni Meriken ni kun ngongliy bayay ni fan ngak urngin e girdi’. Ke fanay Jehovah pi fak ni kan dugliyrad nga gelngin nib thothup ni ngar ngongliyed fa ken nsom’on e New World Translation. (Rom. 8:15, 16) Ere, bochan e re n’ey, ma aram fan ni yugu ba thil e ken ney e Bible.

Ke yoor e duw ni ma tay fare Writing Committee ko fare Ulung ni Ma Pow’iyey nib ga’ fan fare maruwel ni ngan piliyeg e Bible. Chiney e ke gaman 121 mit e thin ni kan pilyeg fare Bible riy ni New World Translation, ni boch e thin e kan pilyeg e re ke Bible nem riy ni ga’ngin ma boch e yu yang riy. Gamad be pi’ e athamgil nga lanin’med ni ngam daged ngak Jehovah feni ga’ fan e re ke Bible ney u wun’med. Ere, ngaum beeged ni gubin e rran ma gimed be fal’eg i lemnag e thin riy. Ya faan gimed ra rin’ ni aram rogon, ma rayog ni ngari chugur e tha’ u thilmed Jehovah Got ni ir e En ni Thin Rok e bay riy.​—Jas. 4:8.

Ma kireban’mad u nap’an ni gamad ra rung’ag murung’agen boch e walag ni yad be mada’nag boch e skeng. Dariy e maruwar riy ni bay yu ngiyal’ nib mo’maw’ ni nge par e pi walag ney ni yad ba felfelan’. Bay reb e tabinaw u reb e nam u Asia ni kari thil rarogon e par rorad u nap’an ni m’ar e chitiningrad nge m’ay yilen dow ni ga’ngin, ma dabiyog ko pi togta ni ngar tafalaynaged e m’ar rok. Rib gel e kireban’ ko re n’ey! Chiney e pumoon ko re ppin ney e ir e ma ayuweg ni gubin ngiyal’. Ma bay reb e pagel nge l’agruw i ppin ni fakrow ni ku yad be athamgil ni ngar pied e ayuw ko gallabthir rorad u rogon nrayog rorad. Ma rib fel’ ni ngan folwok rorad. Ri boor e skeng ni ke mada’nag e re tabinaw ney ni ke yag ni nga ranod u fithik’ ni yad ba yul’yul’, maku dabisiy ni boor i gimed e ku er rogorad. (Jas. 1:2-4) Ke micheg Jehovah ngak e piin ni kan dugliyrad nge yugu boch e saf ni faan yad ra athamgil u fithik’ e pi skeng nge magawon ni yad ma mada’nag ma yad ra felfelan’ ni bochan e ra yag e yafas ndariy n’umngin nap’an ngorad!​—Jas. 1:12.

Fa binem e duw ma 19,241,252 e girdi’ nra uned ko fare Puguran. Dariy e maruwar riy ni kar da felfelan’gad ni kad guyed boor e girdi’ ni kar uned ko re muulung ney ni ma tay e pi tapigpig rok Got u gubin e duw ma kar pininged e sorok ngak Jehovah nge Jesus Kristus! U m’on ngu tomuren e re Puguran nem, ma bokum milyon e pi walag ni kar uned ko pioneer ni ayuw u nap’an e pul ni March nge April. Rib manigil e n’en ni kar rin’ed! Maku dabisiy ni kam felfelan’gad u nap’an ni kam nanged ni piin ni kar uned ko pioneer ni ayuw e rayog ni ngar uned ko fare muulung ni yima tay ni fan ko piin pioneer u nap’an nra yib e circuit overseer ni nge lekag e ulung, ni yugu aram rogon ndabi yib e circuit overseer u nap’an e pul ni March ara April. Piin ni yad ba gonop e yad manang feni ga’ fan ni ngaud pared ni gad ba pasig ko fare maruwel ni machib nge pi n’en ni yibe rin’ u lan e ulung. Faanra ud tedan’dad ko pi n’en ni gad be rin’ ni fan ko tirok Got ban’en ma aram e rayog ni ngad pared ni gad ba mudugil, me yag ni ngad togopuluwgad ngak Moonyan’ ni ir e en ni ma guy rogon ni nge warnag e michan’ rodad me chafegdad nga orel ko tirok Got ban’en.​—1 Kor. 15:58.

Nap’an fa binem e service year ni ke yan ma 277,344 e girdi’ ni kar ognaged e yafas rorad ngak Got, kar uned ko taufe, ma chiney e yad bay u daken fare pa’ i kanawo’ ni be sor i yan ko yafas! (Matt. 7:13, 14) Ba t’uf ni ngad ayuweged e pi walag ney ni nge ‘toar’ e michan’ rorad nga fithik’ Kristus. (Kol. 2:7) Nge bigimed mi i pi’ e athamgil nga laniyan’ bigimed ya nge yag nda athamgilgad nge mada’ ko tomur. (Matt. 24:13) Mu pied e “athamgil ngak e piin ni yad be rus, mi gimed ayuweg e piin ni yad mmeewar, mu um pired nib gum’an’med rok urngin e girdi’.” (1 Thess. 5:14) Manga yug ud “meybilgad ni gubin ngiyal’,” ni nge lungudad: “Nge yib Gil’ilungum ngomad.”​—1 Thess. 5:17; Matt. 6:10, NW.

Mu beeged e re Yearbook ney ni gimed ba felfelan’ ngay, ma ngam nanged ni gimed gubin e piin nib t’uf Jehovah romed e gimed gubin ni gimed ba t’uf romad!

Pi walagmed,

Fare Ulung ni Ma Pow’iyey ko Pi Mich Rok Jehovah