Boch e kanawo’ Nrayog ni Ngan Pining e Sorok Ngak Jehovah Riy

1. Mang reb e yaram nib beech nra ayuwegdad ni nge yag ni ngad ‘pininged e sorok ngak’ Jehovah riy?

¹ Nap’an fare pul ni March ma rayog rok e pi publisher ni ngar uned ko pioneer ni ayuw ni ngar thognaged 30 e awa ko gal pul nem ni March nge April nge nap’an e pul nra lekag e circuit overseer e ulung. Faanra yib e en ma lekag e ulung u tungun reb e pul, me yan i af nga tabolngin e bin migid e pul ma piin ni yad ra un ko pioneer ni ayuw ni ngar thognaged 30 e awa e rayog ni ngar mel’eged ko bin ngan e pul e yad baadag ni ngar uned ko re maruwel ney. Gubin e pioneer ni ayuw nrayog ni ngar uned ko urngin e muulung ni yira tay ni fan ko regular nge special pioneer. Re n’ey e be yip’ fan nfaanra dabiyog ni ngad thognaged 50 e awa, maku rayog ni ngad ‘pininged e sorok ngak’ Jehovah ni gad be un ko pioneer ni ayuw ni aningeg yay u lan taareb e duw, ma kemus 30 e awa e ngad thognaged!​—Ps. 109:30; 119:171.

2. Nap’an nra yib e en ma lekag e ulung, ma mang e rayog ni nge un e pi pioneer ni ayuw ngay?

² Nap’an nra Yib e En Ma Lekag e Ulung: Ngiyal’ ney e rayog ni nge un boor e walag ko pioneer ni ayuw u nap’an nra yib e en ma lekag e ulung, ma yad ra un ko machib u taabang ma rayog ni nge bagayad me pi’ e athamgil ngak bagayad. (Rom. 1:11, 12) Boor e Pioneer ni ayuw nrayog ni ngar yarmiyed ni ngar uned ngak fare circuit overseer ko machib. Ma piin ni yad ma maruwel u lan e wik e rayog ni nga rogned ngak ni nge un ngorad ko machib u nap’an e Sabado ara Madnom. Rib gel e felfelan’ riy nrayog ni nge un e pioneer ni ayuw ko fare muulung ni ma tay e regular nge special pioneer!

3. Mang fan nrib fel’ ni ngan un ko pioneer ni ayuw u nap’an nra chugur e Puguran ngu tomuren?

³ Nap’an e Pul ni March nge April: Piin ni ur uned ko pioneer ni ayuw ni ngar thognaged 30 e awa ko pi duw ni ke yan u m’on ko fare Puguran ko Yam’ ni tay Jesus e rayog ni ngkur yoor naged e tayim rorad ni aram e “maligach” rorad ngak Got! (Heb. 13:15) Pul ni March nge April e rib fel’ ni ngad uned ko pioneer ni ayuw. Gubin e duw u nap’an e gal pul ney e gad ma wereg babyoren e Puguran ngak e girdi’. Maku, bochan ni boor e walag ni ma thognag boor e awa ni fan ko machib u m’on nge tomuren fare Puguran, ere ba thilthil e walag nrayog ni ngad maruwelgad u taabang. U tomuren fare puguran, mab fel’ ni ngan sul ngan guy e piin ni kar uned ko re madnom nem, min pi’ e athamgil ngorad ni ngar bad ngkur motoyilgad ko fare special talk. Gur, ga ra adag ni ngam un ko pioneer ni ayuw ya ke mab e kanawo’ ngom ni ngam un ngay?​—Luke 6:45.