Ngam Wereged Murung’agen e N’en Nrib Fel’ ni ke Ngongliy Jehovah
1. Mang e ma k’aringdad ni ngad wereged e thin u murung’agen felngin Jehovah?
1 “O Jehovah, bay rogom ni ngan pining e sorok ngom ya gur e en nth’abi gel gelngim, ma th’abi ga’ ma th’abi fel’, ma th’abi sorok, ya urngin ban’en u tharmiy ngu but’ e fanam.” (1 Kron. 29:11) Bochan ni ba t’uf Jehovah rodad ma gad ma tay fan ma mang e be k’aringdad ni ngad rin’ed? Ma k’aringdad ni ngad ‘wereged murung’agen e n’en nrib fel’ ni ke ngongliy Got, ni ir e piningdad u fithik’ e lumor ngad bad ga fithik’ e tamilang rok nrib fel’.’ (1 Pet. 2:9) Dabiyog ni ngad talgad i wereg e thin u murung’agen fare Got rodad nth’abi ga’! Rayog ni ngad wereged murung’agen e n’en nrib fel’ ni ke ngongliy Jehovah u nap’an e pi pul ko March, April, nge May.
2. Mang campaign nib ga’ fan ni yira tay ni ngan tamilangnag fare Puguran ma mini’ e rayog ni nge un ngay?
2 Ba Campaign nib Ga’ Fan ni Ngan Weliy Murung’agen fare Puguran: Montag, April 2 ma gad ra tamilangnag e pi n’en nrib fel’ ni ke ngongliy Jehovah ya gad ra madenomnag fare Abich Rok Somol. Yira tabab ko March 12 nge yan i mada’ ko April 2 ni ngan wereg e babyor ni be pining e girdi’ ngar uned ko re madenom ney nib ga’ fan. Yibe pining urngin e girdi’ ngar uned ngay. Aram e ngiyal’ nib fel’ ko tin biech e girdi’ ni ngar uned ko publisher ni faanra rayog. Faanra bay e Bible study rom ara bitir ni rayog ni ngar uned ngay ma ngam weliy ko piin piilal.
3. Mang e rayog ni ngad dogned ko girdi’ u nap’an ni gad be piningrad ngar uned ko Puguran?
3 Re campaign ney e taareb rogon ko fa bin ni kan tay ni fan ko pi District Convention ni “Deliverance at Hand!” Yira pi’ e pi babyor ni invitation nib gaman ma rayog ni ngan pi’ 50 ken e babyor ngak ra reb e publisher. Dabni weliy e thin ni boor, ma rayog ni ngam gaar: “Baaray e babyor rom ni be piningem ngam un ko reb e muulung nib ga’ fan ni yibe tay u gubin e duw. Yira pining e magar ngom ni kam un ngay. Re ke babyor ney e be weliy u murung’agen.” Ma faanra fith facha’ e deer ma ngam pi’ e fulweg ngak. Pi thin ko pages 201-202 ko fare babyor ni Rayog ni Ngam Par ni Gab Fas e be weliy ko mang fan ni baga’ fan fare Puguran. Nap’an e weekend ma yira wereg e pi magazine nge fare babyor ni invitation. Ngan yoloy nga but’ e piin ni ba adag e machib ma ngan yarmiy ni ngan sul ngorad.
4. Uw rogon ni ngan wereg e pi invitation ko Puguran?
4 Faanra rayog ma susun ni ngan pi’ e re invitation ney ngak ra reb e girdi’. Faanra de yoor e tabinaw ko territory ma ngan yoloy nga but’ e pi tabinaw ni demoy be’ riy ma ngan sul yugu ba ngiyal’. Faanra baga’ e territory ko ulung, ma pi piilal ko ulung e ra turguy ni faanra ngan tay e invitation ko pi tabinaw ni demoy be’ riy. Ngam guyed rogon ni ngam pied e invitation ngak urngin e return visit romed, nge Bible study romed, nge girdi’ romed, nge piin ni gimed ma maruwel u taabang, nge piin buguli yoror romed, nge yugu boch e girdi’.
5. Mang fan nsusun ni ngan tabab e chiney ni ngan fl’eg rogon ni ngan un ko pioneer ni ayuw?
5 Pioneer ni Ayuw: Rayog ni ngam tamilangnag felngin Jehovah nge mus rogon ngam un ko pioneer ni ayuw ko March, April nge May? Faanra ngam rin’ ma ba t’uf ni ngam thiliyeg boch ban’en ko schedule rom. (Efe. 5:15-17) Rayog ni nge mich u wan’um ni ra flaabnagem Jehovah ma ra felan’ ngom ya kam athamgil ni ngam pigpig ngak nge mus rogon. (Prov. 10:22) Be chugur iyib fare ngiyal’ ko Puguran, ma ereray e ngiyal’ ni ngan tabab i fl’eg e schedule.—Prov. 21:5.
6. Mang e rayog ni ngad filed rok fare walag ni ppin ni 90 e duw rok ni ke un ko pioneer ni ayuw fa binem e duw?
6 Bay reb e walag ni ppin ni 90 e duw rok ma ke un ko pioneer ni ayuw fa binem e duw. Ke gaar: “Ri gu ba adag ni nggu fl’eg e milay’ rog nggu yung boch ban’en, machane gu manang ni ba t’uf ni nggu rin’ e tin nib ga’ fan. Gu ba adag ni nggu m’oneg Gil’ilungun Got me ere ku turguy ni nggu un ko pioneer ni ayuw ko March.” Kan flaabnag ko athamgil ni tay? Ke gaar, “Kug chugur ko girdi’ ko ulung, ma kug chugur ku Jehovah.” Rayog ni ngad fl’eged i yaliy e tin ni gad be m’oneg ma ngad thiliyeged boch ban’en uw rogon nib t’uf?
7. Ba mo’maw ni ngan un ko pioneer ni ayuw?
7 Sana ga be lemnag nib mo’maw ni ngan tay 50 e awa ko machib ko pioneer ni ayuw machane danga’. U fithik’ e meybil ma ngam lemnag e pi n’en ni ga ma rin’ u gubin e rran ma ngam fl’eg e schedule, ma ngam tay ko calendar. Ga manang salpem. Faanra de fel’ fithik’ i dowam ma dariy gelngim, ma sana ke mus ni l’agruw e awa ni rayog ni ngam tay ko machib u ra reb e rran. Faanra ga ma maruwel nib full-time fa ga ma un ko skul, ma rayog ni ngam un ko pioneer ni ayuw ma ngam un ko machib ko balayal’ ara weekend.
8. Uw rogon nrayog ni nge un ba wu’ i mabgol ko pioneer ni ayuw?
8 Boor e tabinaw ma kar uned ko pioneer ni ayuw u taabang. Bay ba wu’ i mabgol ni dar unew ko pioneer ni ayuw faram ya kar lemnagew ni dabiyog. Mang e kar rin’ew? “Kug meybilgow ku Jehovah ni nge ayuwegmow nggu rin’ew e n’en ni gamow ba adag ni nggu rin’ew u taabang.” Kar fl’egew rogon ma aram ma kar tawgow ko n’en ni kar namegew. Kar gaargow: “Kug falfalan’gow ngay. Boor e flaab ni yib ngomow. Gamow be yog ko girdi’, ngam uned ngay. Faanra ke yog ngomow ma sana rayog romed.”
9. Mang e rayog ni ngam rin’ed u nap’an e study ko tabinaw romed ni ngam fl’eged rogon ko pi pul nga m’on nib ga’ fan?
9 Mang ni damu ted boch e tayim ko study ko tabinaw ni ngam lemnaged ko uw rogon nrayog ko urngin e girdi’ nge yoor e machib ni ngar ted ko pi pul nga m’on? Mus ni dabiyog ko urngin e girdi’ ko tabinaw rom ni ngar uned ko pioneer ni ayuw ma sana rayog ko reb e girdi’ ni nge rin’ ma tin ni ka bay e girdi’ ko tabinaw e ra pi’ e ayuw ngak. Faanra danga’ ma sana rayog ni nge nameg e tabinaw rom ni nge yoor e machib ni yad ra tay ko pi pul ney nib ga’ fan.
10. Mang fan ni susun ni ngad weliyed ko girdi’ ni gad ba adag ni ngad uned ko pioneer ni ayuw u nap’an e ngiyal’ ko Puguran?
10 Nge Bigimed e Nge Ayuweg Bigimed: Pasig e rayog ni nge af ngak e girdi’. Ngam weliy ni ga ba adag ni ngam un ko pioneer ni ayuw. Sana ra k’aring yugu boch e girdi’ ngar uned ngay. Maku, piin ni kar uned ko pioneer kafram ma sana rayog ni ngar ayuweged gur ni ngam yarmiy e schedule ni ngam taw ko n’en ni kam nameg. (Prov. 15:22) Faanra rayog ni ngam un ko pioneer ni ayuw ma mang ni damu pining reb e publisher, sana be’ ni taareb salpemew, nge un ngom ko re maruwel ney nib fel’?
11. Uw rogon nrayog ko pi piilal ni ngar k’aringed e girdi’ ngar uned ko pioneer ni ayuw ko pi pul nga m’on?
11 Boor e piin piilal ma yad ma yarmiy ni ngar uned ko re maruwel ney nib ga’ fan. (Heb. 13:7) Re n’ey e ma pi’ e athamgil nga laniyan’ girdien e ulung! Piin piilal e ku rayog ni ngar k’aringed e girdi’ u fithik’ e sabethin ni ngar adaged ni ngar uned ngay. Sana ke mus ni ba t’uf ni ngan pi’ e athamgil nga laniyan’ be’ fa ngan weliy ko uw rogon nrayog ma aram e ra un ko pioneer ni ayuw. Fa en ni service overseer e ra yarmiy boch e muulung ko machib ni rayog ko urngin e girdi’ ngar uned ko machib u taabang, ni mus ko ngiyal’ ni tomren e maruwel fa skul. Susun ni ngan nog ko ulung ko mang e kan yarmiy. Maku ra guy rogon nra gaman e territory nge babyor ni ngan wereg.
12. Mang e rayog ni ngam rin’ ni faanra dabiyog ni ngam un ko pioneer ni ayuw?
12 Mus ni dabiyog ni ngam un ko pioneer ni ayuw, ma rayog ni ngam pi’ e athamgil nga laniyan’ e piin ni kar uned ngay, ma rayog ni ngam pi’ e meybil ni fan ngorad. (Prov. 25:11; Kol. 4:12) Sana rayog ni ngam un ngorad ko machib reb e rran u nap’an e wik fa ngam par nib n’uw boch nap’an ko machib.
13. Mang e ke nameg fare Guam branch, ma uw rogon nrayog ko ulung romed ni ngar pied e ayuw ngay?
13 Yibe Nameg ni Nge Un 225 e Girdi’ ko Pioneer ni Ayuw ko April: March 2004 ma tin th’abi yoor e pioneer ni ayuw ko Guram branch e 211. Ere yibe nameg ni nge un 225 e girdi’ ko pioneer ni ayuw ko April. Rayog e re n’em ni faanra 1 ko ra 5 e publisher u ra reb e ulung e ra un ko pioneer ni ayuw. Ma dabi siy ni boch e ulung ma boor e publisher ni rayog ni ngar uned ko pioneer ni ayuw. Rayog ni nge taw e pi ulung ko re n’en ney. Ngam lemnag ko uw fene gel e falfalan’ nra yib ko ulung ma ra yib angin nib fel’ ko maruwel ko machib!
14. Mang fan nib fel’ ni ngan un ko pioneer ni ayuw ko April?
14 Mang fan ni April e aram reb e pul nib fel’ ni ngan un ko pioneer ni ayuw? Ya fare Puguran e bay u tabolngin e re pul nem me ere rayog ni ngad sulod ko girdi’ ni kar uned ngay. Gad ra wereg e pi magazine ma gad ra guy rogon ni ngad pied fare babyor ni Rayog ni Ngam Par ni Gab Fas ko return visit ma ngad tababnaged e Bible study. Ere ngan un ko pioneer ni ayuw ko April ma boor rogon ni ngad tababnaged e Bible study. Maku bay lal’ e Madenom ko April ma bay reb e holiday ko fayleng me ere mom ko piin ni ma un ko maruwel ara skul ni ngar uned ngay.
15. Mang fan ni susun ni ngad lemnaged ni buch uw e tayim ni ka bay u nap’an ni be chugur iyib fare Puguran?
15 Ra reb e ngiyal’ ko Puguran ma gad be chugur iyan nga tomren e re m’ag ney. Ke lich e tayim ni ngad weliyed ko girdi’ u murung’agen e Got rodad. (1 Kor. 7:29) Tomren e re ngiyal’ ney ko Puguran ma dabkiyog ni ngad pininged e sorok ku Chitamangidad nu tharmiy ko re madenom nem. Ere ngad fl’eged rogodad e chiney ni ngad rin’ed urngin ban’en nrayog rodad ni ngad tamilangnaged murung’agen felngin Jehovah!
[Kahol ko page 4]
Rayog ni Nge Un 225 e Girdi’ ko Pioneer ni Ayuw ko April?
◼ Ngam fl’eg i yaliy ko mang e ga be m’oneg
◼ Ngam puruygad u taabang e tabinaw romed
◼ Ngam weliy ko girdi’ ko mang e kam tafiynaynag