Ga Ra Un ko Pioneer ni Ayuw, Fa?
1. Mang fan nib fel’ ni ngad yoornaged e tayim rodad ni fan ko machib u nap’an ni ke chugur ara nga tomuren fare Puguran?
1 Nap’an ni ke chugur ara tomuren ni kan madnomnag fare Puguran ko yam’ ni tay Jesus mab fel’ ni ngad yoornaged e tayim rodad ni fan ko machib. Ireray e tayim ni ngad fal’eged i lemnag e t’ufeg rok Jehovah ya ke pi’ Fak ni nge mang maligach. (John 3:16) Ri gad ba felfelan’ ko n’en ni ke rin’ Jehovah, ma re n’ey e ke k’aringdad ni ngad weliyed ngak e girdi’ murung’agen nge n’en ni ke rin’ ni fan ko girdi’. (Isa. 12:4, 5; Luke 6:45) Maku, ireray e tayim ni ngaud wereg babyoren e puguran ya ngad pininged e girdi’ ni gad manang nge girdi’ u lan e pi binaw ni gad ma machib riy ni ngar uned ko fare Puguran. Ma tomuren e re madnom ney, e ngad gayed rogon ni ngad pied e athamgil nga laniyan’ e piin ni kar uned ngay. Gur, rayog ni ngam un ko pioneer ni ayuw u nap’an e pul ni March, nge April, ara May?
2. Mang fan nib fel’ ni ngan un ko pioneer ni ayuw u nap’an e pul ni March?
2 Mu Rin’ Ban’en nib Thil u Nap’an e Pul ni March: Pul ni March e aram reb e pul nib fel’ ni ngan un ko pioneer ni ayuw. Piin nra un ngay e rayog ni nge mel’eg ko nge thognag 30 ara 50 e awa. Faanra yib faen ni ma lekag e ulung ko pul ni March ma rayog ni nge un e en ni be un ko pioneer ni ayuw ko urngin e muulung ni yira tay ni fan ko regular nge special pioneer. Yira tay fare Puguran ko L’agruw Fen e Maruwel, March 26, 2013, ma yira tabab ni ngan wereg babyoren e puguran ko March 1. Re pul ney e ke yoor boch e rran ni ngan wereg babyoren e puguran riy ko pi duw ni ke yan, ma ra tabab ko March 1. Maku, bay lal e Sabado nge lal e Madnom ko re pul nem. Ere mang ni dab mu lemnag nib fel’ rogon ko rayog ni ngam pi’ e ayuw ko re maruwel ney ni yugub thil.
3. Uw rogon ni ngad fal’eged i lemnag boch ban’en ya nge yag ni nge yoor e tayim rodad ni fan ko machib?
3 Mu Fal’eg i Lemnag Ban’en e Chiney: Ireray e tayim ni ngam fal’eg i yaliy e n’en ni kam dugliy ni ngam rin’, ya nge yag ni ngam guy ko mang e n’en nib t’uf ni ngam thilyeg ya nge yag ni ngam un ko pioneer. Ba ga’ fan ni nge pi’ girdien e tabinaw e ayuw, ere ngam ted e tayim u nap’an e Fol Bible ni Tabinaw ni ngam weliyed e pi n’en ni gimed be nameg me gimed yoloy boch ban’en nrayog ni ngam rin’ed. (Prov. 15:22) Faanra dabiyog ni ngam un ko pioneer ni ayuw ma dabi mulan’um. Gur, rayog ni ngam yarmiy ni ngam par nib n’uw boch nap’an ko ngiyal’ ni ga be un ko machib? Rayog ni ngkum uneg reb e rran u lan e wik ni ngam un ko machib?
4. Mang angin nra yib nfaanra ngad yoornaged e tayim rodad ni fan ko machib ko pul ni March, nge April, nge May?
4 Nap’an ni gad ra yoornag e tayim rodad ko machib ko pul ni March, nge April, nge May, ma ra gel boch e felfelan’ rodad ni bochan ni gad be pigpig ngak Jehovah ma gad be ayuweg boch e girdi’. (John 4:34; Acts 20:35) Ma n’en th’abi ga’ fan e maruwel ni gad be tay e ra felfelan’nag Jehovah.—Prov. 27:11.