Ka Chiney e Ngam Lemnag Rogon ni Ngam Yoornag e Tayim Rom ni Fan ko Machib
1. Mang nib ga’ fan e ngiyal’ ni ke chugur e Puguran ngu tomuren e puguran? Uw rogon nrayog ni ngad fal’eged rogodad ni fan ko re n’ey?
1 Nap’an nra chugur e Puguran ngu tomuren e puguran ma aram e ngiyal’ nrayog ni ngad “pininged e magar riy ngak Somol.” (Ps. 109:30) Ere, ga ra yoornag e tayim rom ni fan ko machib u nap’an e pul ni March ya nge yog ni m’ug ni ga be pining e magar ko fare biyul ni ke pi’ Got ni fan ngodad, fa? Ireray e ngiyal’ ni ngam tabab i lemnag e n’en ni ngam rin’.—Prov. 21:5.
2. Mang e kam rin’ed boch e girdi’ u nap’an ni ka nog nrayog ni ngan un ko pioneer ni ayuw ni kan lichnag e awa riy u nap’an e April ko fa binem e duw?
2 Pioneer ni Ayuw: Fa binem e duw boor e ulung ni kari felfelan’ e pi walag riy u nap’an ni kar nanged nrayog ni ngar uned ko pioneer ni ayuw u nap’an e pul ni April ni kan lichnag e awa riy. I yoloy reb e walag ni gaar: “Dawor gu chuw u high school, ma kug guy ndabiyog ni nggu un ko pioneer. Machane, nggu fal’eg e babyor rog ni nggu un ko pioneer ni ayuw ni nggu yognag 30 e awa, machane nggu nameg 50 e awa u nap’an e pul ni April.” Reb e walag nib pin ni ma maruwel u polo’ e tayim rok e yoloy ni gaar: “Rayog rog ni nggu yognag guyey e awa!” Nap’an nni weliy murung’agen e biney e yaram me yog reb e walag ni ke pag 80 e duw rok ni gaar: “Ireray e ngiyal’ i n’en ni ug sonnag! Manang Jehovah nrib gel e felfelan’ ni ug tay u nap’an ni ug pioneer!” Ma boch e walag ndabiyog ni ngar uned ko pioneer ni ayuw e kar nameged ni ngar yoornaged e tayim ni ngar ted ni fan ko machib.
3. Mang boch i fan ni ngad lemnaged ni ngad uned ko pioneer ni ayuw u nap’an e pul ni March, nge April, nge May?
3 Pul ni March e aram e ngiyal’ nib fel’ ni ngan un ko pioneer ni ayuw ni bochan e rayog ni ngan yognag 30 ara 50 e awa. Maku reb e, ra rofen ni Sabado ko March 17 ma gad ra tabab i pining e girdi’ ko Puguran ko April 5. Boor e walag ni yad ra felfelan’ ni kar yoornaged e tayim rorad ni fan ko machib, ma dabisiy ni ku yad ra adag ni ngar uned ko pioneer ni ayuw u nap’an e pul ni April, nge May ni ngar yognaged 50 e awa.
4. Uw rogon nrayog ni ngad yoornaged e tayim rodad ni fan ko machib, ma mang angin?
4 Nap’an e Fol Bible ni Tabinaw, ma mang ndab mu weliyed chon e tabinaw rom rogon nrayog ni ngam yoornaged e tayim romed ni fan ko machib u nap’an nra chugur e puguran ngu tomuren e puguran? (Prov. 15:22) Mmeybilgad ngak Jehovah ni nge tow’athnagmed ko athamgil ni gimed be tay. (1 John 3:22) Gimed ra yoornag e tayim romed ni fan ko machib, ma gathi kemus ni gimed ra pining e sorok ngak Jehovah ya ki gimed ra felfelan’.—2 Kor. 9:6.