Mini’ e Be Pow’iy e Girdi’ rok Got e Ngiyal’ Ney?

1, 2. Tomuren ni sul Jesus nga tharmiy, ma mang ban’en nsana rayog ni i lemnag e pi apostal rok?

BE SAK’IY e pi apostal rok Jesus u daken e Burey nu Olives ni yad be sap nga lan e lang. Ka fin ra guyed Jesus ni ir e masta nge fager rorad ni kan fek nga lang nga tharmiy ma ke yan i chuw nga fithik’ bangi manileng nda kur guyed. (Acts 1:9, 10) Sogonap’an l’agruw e duw ni ke skulnagrad Jesus, ma be pi’ e athamgil nga lanin’rad, ma be pow’iyrad. Machane, ngiyal’ nem e daki moy rorad. Ere, mang e ngar rin’ed?

² I tay Jesus chilen ngak pi gachalpen ni gaar: “Mi gimed weliy murung’ageg u lan yu Jerusalem, ngu lan yu Judea ni polo’, ngu lan yu Samaria, nge yan i mada’ ko yungi n’en ni yan i mus e fayleng ngay.” (Acts 1:8) Ere, uw rogon ni ngar mu’naged e re maruwel nem? Riyul’ ni ke micheg Jesus ngorad nra ayuwegrad gelngin Got nib thothup. (Acts 1:5) Machane, ba t’uf ni ngan yarmiy min pow’iy e maruwel ni machib ni yad ra tay u ga’ngin yang e fayleng. Kakrom e i fanay Jehovah boch e pumoon ni ngar pow’iyed mi yad yarmiy e girdi’ rok. Ere, rayog ni aram fan ni lemnag e pi apostal rok Jesus ko ra dugliy Jehovah be’ nib beech ni ir e nge pow’iy e girdi’ rok fa danga’.

3. (a) Tomuren ni sul Jesus nga tharmiy, ma mang ban’en nib ga’ fan ni dugliy e pi apostal rok nra pared ni yad ba yul’yul’? (b) Mang e gad ra weliy ko re article ney?

³ De gaman l’agruw e wik nga tomuren, ma aram me fal’eg i yaliy pi gachalpen Jesus e thin ni bay u lan fare Babyor nib Thothup, mar meybilgad ngak Got, ma aram mar mel’eged Matthias ni nge yan nga lon Judas Iskariot ni nge gamaneg fare 12 i apostal. (Acts 1:15-26) Mang nrib ga’ fan e re n’em u wan’rad, ma mang ni kub ga’ fan u wan’ Jehovah? Bay e maruwel nrib ga’ fan ni nge rin’ Matthias u lan e ulung rok Got.a De mel’eg Jesus e pi apostal rok ni bochan e ngaur uned ngak ko yungi n’en ni be yan riy ni be machib, ya mel’egrad ni bochan e nge skulnagrad u rogon ni ngar rin’ed ba maruwel nib ga’ fan ni fan ko girdi’ rok Got. Mang e re maruwel nem, ma uw rogon ni ayuwegrad Jehovah u daken Jesus ya nge yag nrin’ed? Mang e ka be rin’ boch e tapigpig rok Got e ngiyal’ ney ni taareb rogon ko re maruwel nem ni ur rin’ed? Ma uw rogon ni ‘ngaud tafinayniged e piin ni yad be yog e thin rodad,’ nib ga’ ni piin ni yad bang ko “fare tapigpig nib yul’yul’ ma ba gonop”?​—Heb. 13:7; Matt. 24:45.

JESUS E IR E BE POW’IY FARE ULUNG NI MA POW’IYEY

4. Mang maruwel e i rin’ e pi apostal nge yugu boch e piilal u Jerusalem u nap’an e bin som’on e chibog?

⁴ Nap’an e Pentekost ko duw ni 33 C.E., ma aram me tabab e pi apostal ni nga u rogned e thin u lan e ulung ni Kristiano. Aram e ngiyal’ ni “sak’iy Peter nga lang nge fa ragag nge taareb i apostel,” ma aram me weliy Peter e tin riyul’ nra yognag e yafos ngak e pi Jew nge piin nra piggad ngar uned ko teliw rok e pi Jew ni kar muulunggad ni yad boor. (Acts 2:14, 15) Ere, boor i yad e mich e tin riyul’ u wan’rad. Tomuren ma aram mi i par e pi Kristiano nem ni yad be fol ko pi n’en ni i ‘machibnag e pi apostel’ ngorad. (Acts 2:42) Pi apostal e yad e ur gagiyegnaged rogon e salpiy ni i maruwel e ulung ngay. (Acts 4:34, 35) Ku yad e ur ayuweged e girdi’ rok Got ko tirok ban’en. I lungurad: “Ma gamad par nggu yun’uyed e meybil nge maruwel ko machib.” (Acts 6:4) Kur dugliyed boch e Kristiano ni kar ilalgad ko tirok Got ban’en ni ngar wereged e machib nga yugu boch e binaw ndawori taw e machib ngay. (Acts 8:14, 15) Munmun ma aram e immoy boch e piilal ni yad bang ko fachi ulung nra pethgad ko pi apostal nga u rogned e thin u lan e ulung. Ur maruwelgad e ngiyal’ nem ni yad fare ulung ni ma pow’iyey ma yad e ur pow’iyed e ulung rok Got e ngiyal’ nem.​—Acts 15:2.

5, 6. (a) Uw rogon ni pi’ gelngin Got nib thothup gelngin fare ulung ni ma pow’iyey? (Mu guy e sasing ni bay u tabolngin e re article ney.) (b) Uw rogon ni i ayuweg e pi engel fare ulung ni ma pow’iyey? (c) Uw rogon ni i pow’iy e Thin rok Got fare ulung ni ma pow’iyey?

⁵ Manang e pi Kristiano ko bin som’on e chibog ni Jehovah Got e ir e i fanay Jesus ni En Ta Yog e Thin rorad ni nge pow’iy fare ulung ni ma pow’iyey e ngiyal’ nem. Uw rogon ni ke yag ni ngar nanged e re n’em? Som’on e, gelngin Got nib thothup e aram e n’en ni i pi’ gelngin fare ulung ni ma pow’iyey. (John 16:13) I puog Got gelngin nib thothup nga daken urngin e pi Kristiano ni kan dugliyrad, machane kemus ni yigoo pi apostal nge yugu boch e piilal ni ur moyed u Jerusalem e aram e piin ni pi’ Got gelngin ngorad ni nga u rogned e thin u lan e ulung. Bod nnap’an e duw ni 49 C.E., ma aram me pow’iy gelngin Got nib thothup fare ulung ni ma pow’iyey ni ngar dugliyed e n’en ni ngan rin’ nga ba magawon ni ke sum u murung’agen ni ngan maad’adnagey. I fol girdien e ulung ko n’en ni dugliy fare ulung ni ma pow’iyey, ma aram “mi i gel i yan e michan’ rok girdien e galesiya ma yad be yoor i yan ni gubin e rran.” (Acts 16:4, 5) Re gi babyor ni baaram nra yoloyed ni be yog e n’en ni ngan rin’ e be tamilangnag ni i m’ug wom’engin gelngin Got nib thothup rorad nib muun e t’ufeg nge michan’ ngay.​—Acts 15:11, 25-29; Gal. 5:22, 23.

⁶ Bin migid e, i ayuweg e pi engel fare ulung ni ma pow’iyey. U m’on nni taufenag Kornelius ni ir e en som’on ni mang Kristiano ndawor ni maad’adnag maku gathi ir reb e Jew, ma aram me yog reb e engel ngak ni nge l’og be’ nge yan i pining apostal Peter nge yib i guy. Tomuren ni machibnag Peter Kornelius nge chon e tabinaw rok, ma aram me yib i ying gelngin Got nib thothup ngorad ni yugu aram rogon ndawor ni maad’adnagrad. Ireray e n’en ni ayuweg e pi apostal nge yugu boch e walag ni pumoon ni ngar folgad ko n’en nib m’agan’ Got ngay miki m’agan’rad ngay ni ngar paged e piin ni gathi yad e Jew ndawor ni maad’adnagrad ni ngar manged boch i girdien e ulung ni Kristiano e ngiyal’ nem. (Acts 11:13-18) Maku reb e, ki pow’iy ma be ayuweg e pi engel fare maruwel ni machib ni i yarmiy fare ulung ni ma pow’iyey e ngiyal’ nem. (Acts 5:19, 20) Bin dalip e, Thin rok Got e aram e n’en ni i pow’iy fare ulung ni ma pow’iyey. Gubin ngiyal’ ni i pag e pi piilal nem ni kan dugliyrad e thin ni bay u lan fare Babyor nib Thothup ni nge pow’iyrad u nap’an ni ngar dugliyed boch ban’en ni bay rogon ko machib rorad ara u nap’an ni nga rogned e n’en ni ngan rin’ u lan e ulung.​—Acts 1:20-22; 15:15-20.

7. Mang fan nrayog ni nga dogned ni Jesus e ir e i pow’iy e tin som’on e Kristiano?

⁷ Yugu aram rogon ni bay mat’awun e re ulung nem ni nga rogned e n’en ni ngan rin’ u lan e ulung u nap’an e bin som’on e chibog, machane yad manang ni Jesus e ir e En Ta Yog e Thin rorad. I yoloy apostal Paul ni gaar: “[Kristus e] turguy boch ni ngar manged apostel.” Miki ulul ngay ni gaar: “U fithik’ e t’ufeg, ma gadad ra ilal u gubin e kanawo’ ngad boded mam’ungun Kristus, ni ir e llug.” (Efe. 4:11, 15) Pi gachalpen Jesus e dar ted reb e apostal nib gilbuguwan u fithik’rad ni ir e ngaur feked fithingan, ya un “pining girdien Kristus” ngorad. (Acts 11:26) Riyul’ ni yog Paul nrib ga’ fan ni ngan ‘fol ko pi n’en ni i machibnag’ e pi apostal nge yugu boch e pumoon ni u rogned e thin ni kan fek u lan e Pi Babyor nib Thothup. Machane, ki yog ni gaar: “Gub adag ni ngam nanged fan ni Kristus e ir e lolugen urngin e pumoon [nib muun urngin i girdien fare ulung ni ma pow’iyey ngay]; . . . mi Got e lolugen Kristus.” (1 Kor. 11:2, 3) Ere, ba tamilang ni Kristus Jesus e ir e i pow’iy e ulung u tan pa’ Jehovah Got ni ir Lolugen.

“RE MARUWEL NEY E GATHI BA MARUWEL KO GIRDI’”

8, 9. Mang reb e maruwel nib ga’ fan ni i rin’ Brother Russell u tungun e bin 19 e chibog?

⁸ Nap’an ni taw nga tungun e bin 19 e chibog, ma aram me guy Charles Taze Russell nge boch e girdi’ rogon ni ngar sulweged e bin riyul’ e liyor ni ma tay e piin Kristiano nga rogon. Ere, nap’an e duw ni 1884, ma aram min sunmiy fare ulung ni ka nog e Zion’s Watch Tower Tract Society ngay ni bochan e nge yag nra wereged e tin riyul’ u Bible nga boor mit e thin, ma Brother Russell e ir e president ara en nib ga’ ko re ulung nem.b Re walag ney e ri ma fal’eg i fil e Bible nib fel’ rogon, ma da i rus ni nge gagiyelnag boch e machib nde riyul’ ni bod rogon fare machib u murung’agen e Trinitas nge yaal. I nang nnap’an nra sul Kristus ma dab ni guy, ma ra mus ngal’an e “piin ni gathi yad piyu Israel” ko duw ni 1914. (Luke 21:24) I fanay Brother Russell e tayim rok, nge gelngin, nge salpiy rok ni nge fil e pi n’ey ngak yugu boch e girdi’. Ere, ba tamilang ni i fanay Jehovah nge Jesus Brother Russell ni nge pow’iy e girdi’ rok Got u ba ngiyal’ nrib ga’ fan.

⁹ Da i guy Brother Russell rogon ni nge pining e girdi’ e sorok ngak. Nap’an e duw ni 1896, me yoloy ni gaar: “Dubmad ni ngan pining e sorok ngomad ara un n’ufmad ni bochan e pi babyor ni gamad be yoloy; maku reb e dubmad ni ngaun pining boch e ngachal ngomad ni nge dag ni gamad ba tolang. Maku reb e, dubmad ni nga i fek reb e ulung fithingmad ara un pining fithingmad ngorad.” Boch nga tomuren, me gaar: “Re maruwel ney e gathi ba maruwel ko girdi’.”

10. (a) Wuin e dugliy Jesus “fare tapigpig nib yul’yul’ ma ba gonop”? (b) Mu weliy rogon ni ke tamilang rogon nib thil fare Ulung ni Ma Pow’iyey ko fare Watch Tower Society.

¹⁰ Dalip e duw nga tomuren ni yim’ Brother Russell, ma aram me dugliy Jesus “fare tapigpig nib yul’yul’ ma ba gonop” ko duw ni 1919. Mang e nge rin’ e re tapigpig nem? Ir e nge pi’ ‘gan’ e tin ni ka bay e tapigpig ko ngiyal’ ni yima pi’ riy. (Matt. 24:45) Nap’an e pi duw nem, ma immoy bochi ulung i walag ni pumoon ni kan dugliyrad ni yad ma pigpig ko pi tochuch rodad ni bay u Brooklyn, New York, ni ur pied e tin nib t’uf rok pi gachalpen Jesus ni fan ko tirok Got ban’en. Nni tabab i tay fare thin ni “governing body” ara “fare ulung ni ma pow’iyey” nga lan e pi babyor rodad u tomuren e duw ni 1940, ya ngiyal’ nem e un tay nre ulung nem e bay rogon ko fare Watch Tower Bible and Tract Society. Machane, nap’an e duw ni 1971, ma aram me tamilang nib ki’ fare Ulung ni Ma Pow’iyey ko fare Watch Tower Society. Ya fare Watch Tower Society e yad ma rin’ boch ban’en ni bay rogon ko pi n’en ni ma rin’ e ulung rok Got u reb e rran ngu reb, ma gathi pi n’en ni bay rogon ko machib rodad. Ka aram nap’an i yib ni pi walag ni kan dugliyrad ni yad ma mang bang ko fare Ulung ni Ma Pow’iyey e darur manged boch e Society director ara piin ni yad ma yog e thin ko fare Watch Tower Society. Dawori n’uw nap’an ma pi walag ni yad ba muun nga “yugu boch e saf” ni kan guy nrayog ni ngan pag fan boch e maruwel ngorad e yima mel’egrad ni ngar manged director ara piin ni ma yog e thin ko fare Watch Tower Society nge ku boch e ulung ni ma maruwel e girdi’ rok Got ngay. Angin ni ke yib riy e ke yag ni nge tiyan’ fare Ulung ni Ma Pow’iyey ko maruwel rorad ni aram e ngaur pied e fonow nu Bible ko girdi’ rok Got ma yad be pow’iyrad. (John 10:16; Acts 6:4) Kan tamilangnag ko Fare Wulyang ko Damit ko July 1, 2013 ni “fare tapigpig nib yul’yul’ ma ba gonop” e bochi ulung ni gubin e walag riy ma kan dugliyrad, ma yima yog fare Ulung ni Ma Pow’iyey ngorad.

11. Uw rogon ni ma maruwel fare Ulung ni Ma Pow’iyey?

¹¹ Fare Ulung ni Ma Pow’iyey e yad ma dugliy boch ban’en nib ga’ fan u taabang. Ni uw rogon? Gubin e wik ni ma mada’ e re ulung ney nga taabang. Bochan e re n’ey ma aram fan nrayog ni ngar weliyed gubin ban’en u taabang mar maruwelgad nib taareban’rad. (Prov. 20:18) Ra reb e duw ma bagayad e ir e ke mang chairman ara en ni ma yarmiy e pi muulung ni yad ma tay. Fan ni yad ma rin’ ni aray rogon e bochan ndariy bagayad u fithik’rad ni kab ga’ fan ngak boch i yad. (1 Pet. 5:1) Ku aray rogon e n’en ni yad ma rin’ ko fare nel’ i ulung ni bay u tan pa’ fare Ulung ni Ma Pow’iyey. Dariy bagayad fapi walag ni yad bang ko fare Ulung ni Ma Pow’iyey ni ma lemnag ni ir e ba ga’ lungun u fithik’ e pi walag ney. Ya yad manang ni yad gubin nra bagayad ma kub muun ko “tin ni ka bay e tapigpig” ni bochan e yad gubin ni be pi’ fare tapigpig nib yul’yul’ ma ba gonop e tin nib t’uf rorad ni fan ko tirok Got ban’en ma yad be fol u rogon ni be pow’iyrad.

“MINI’ E EN NI IR FARE TAPIGPIG NIB YUL’YUL’ MA BA GONOP?”

12. Mang deer e ke sum ni bochan e de flont fare Ulung ni Ma Pow’iyey?

¹² De flont e piin ni yad bang ko fare Ulung ni Ma Pow’iyey. Ere, rayog ni nge oloboch e re ulung ney u nap’an ni yad be weliy boch e machib u lan e Bible ara nap’an ni yad be pi’ boch e fonow ni nge fol e ulung riy. Bin riyul’ riy e, bay reb e thin ko fare ke babyor ni ka nog e Watch Tower Publications Index ngay ni thin ni Meriken ni kenggin e “Boch e Machib ni Kan Tamilangnag” ni be weliy murung’agen boch e machib rodad ni kan tamilangnag ni ka nap’an e duw ni 1870. Maku reb e, de yog Jesus ni gubin ban’en nra yib ko fare tapigpig nib yul’yul’ ma ba gonop, ma dariy e oloboch riy. Ere, uw rogon nrayog ni ngad pied e fulweg ko fare deer ni fith Jesus ni gaar: “Mini’ e en ni ir fare tapigpig nib yul’yul’ ma ba gonop?” (Matt. 24:45) Mang e mich riy ni aram e n’en ni be rin’ fare Ulung ni Ma Pow’iyey? Chiney e ngad weliyed murung’agen fa dalip i n’em ni i pow’iy rogon e maruwel ni i tay fare ulung ni ma pow’iyey u nap’an e bin som’on e chibog.

13. Uw rogon ni ke ayuweg gelngin Got nib thothup fare ulung ni ma pow’iyey?

¹³ Ma ayuwegrad gelngin Got nib thothup. Gelngin Got nib thothup e aram e n’en ni ke ayuweg fare Ulung ni Ma Pow’iyey ni ngar nanged fan boch e machib u lan e Bible nda i tamilang u wan’rad kafram. Am yaliy fapi machib ni kan tamilangnag ni faan kad weliyed murung’agen ko fa bin ni ke yan e paragraph. Ba tamilang ndariy be’ nrayog rok ni nge nang fan me weliy e pi n’en “nda nnang ni ke m’ay i lemnag rok Got” ni yigoo ir rok. (Mu beeg e 1 Korinth 2:10.) Ere, taareb rogon e n’en ni ma lemnag fare Ulung ni Ma Pow’iyey ko n’en ni yog apostal Paul ni gaar: “Gathi thin ni fil e llowan’ ko girdi’ ngodad e ir e gadad be weliy, machane thin ni Kan ni Thothup [“gelngin Got nib thothup,” NW] e ke fil ngodad.” (1 Kor. 2:13) Mang fan ni boor ban’en u lan e Bible ni ke tamilang u wan’rad ni ka nap’an e duw ni 1919 ni yugu aram rogon ni ke yan bokum miriay e duw ni ke garer e machib ni googsur, ma der yag ni nge tamilang boch e machib u wan’ e girdi’ rok Got? Gad manang ni ke yag ni nge buch e re n’ey ni bochan e bay gelngin Got nib thothup ni be ayuweg fare Ulung ni Ma Pow’iyey.

14. Uw rogon ni ma ayuweg e pi engel e girdi’ rok Got e ngiyal’ ney nrogon ni bay ko Revelation 14:6, 7?

¹⁴ Ma ayuwegrad e pi engel. Fare Ulung ni Ma Pow’iyey e ngiyal’ ney e yad e yad be pow’iy rogon fare maruwel ni machib ni be rin’ e pi tamachib ko ulung rok Got u ga’ngin yang e fayleng ni ke pag meruk e milyon urngirad. Re maruwel nem ni be rin’ e re ulung ney e ba maruwel nib gel. Ere, mang fan ni be yag ni ngan rin’ e re maruwel ney nib fel’ rogon? Reb i fan e bochan ni bay e pi engel ni yad be pi’ e ayuw ko re maruwel ney. (Mu beeg e Revelation 14:6, 7.) Boor yay ni bayi n’en me yan e pi walag i machibnag boch e girdi’ ni ka fin nra meybilgad ngak Got ni nge ayuwegrad!c Maku reb e, rogon e mon’og ni be tay fare maruwel ni yibe rin’ u ga’ngin yang e fayleng ni yugu aram rogon nib gel e togopuluw ni yibe tay ko girdi’ rok Got u boch e nam e ku aram reb e mich riy ni be pi’ e pi engel e ayuw ko re maruwel ney.

15. Mang e ba thil u thilin fare Ulung ni Ma Pow’iyey nge pi tayugang’ ko teliw ko Pi Kristiano ni Googsur? Mu weliy reb e kanawo’.

¹⁵ Yad ma taga’ ko Thin rok Got. (Mu beeg e John 17:17.) Am lemnag e n’en ni buch ko duw ni 1973. Baaray reb e deer nni fith u lan Fare Wulyang ko Damit ko June 1 ni be gaar: “Faanra . . . dawori tal be’ i kay ara thoy e tamagow, ma rayog ni nge un ko taufe, fa?” Nni tamilangnag u lan e re ke babyor nem ni dabiyog ni nge un be’ ni aram rogon ko taufe ni bochan e aram e n’en ni ke tamilang ko pi kenggin e motochiyel u Bible. Tomuren ni weliy Fare Wulyang ko Damit boch e thin nu Bible ni bay rogon ko re n’ey, ma aram me tamilangnag fan nsusun e ngan tharbog be’ nder tal ko tamagow. (1 Kor. 5:7; 2 Kor. 7:1) I tamilang nre motochiyel nem e gathi ke sum ko girdi’ ya ke yib rok “Got ni ir e ke weliy laniyan’ u daken e Thin rok.” Dariy barba’ e teliw ni bod rogon e ba’ ney e teliw ni gubin ngiyal’ ni ma m’agan’rad ngay ni ngar taga’gad ko Thin rok Got ni yugu aram rogon nib mo’maw’ ngak boch i yad ni nge rin’ e re n’ey. Bay ba ke babyor ni ka fin nni ngongliy u Meriken ndawori n’uw nap’an ni be weliy murung’agen e teliw ni yog ni gaar: “Pi tayugang’ ko teliw ni Kristiano e gubin ngiyal’ ni yad ma thilyeg e machib rorad ni nge puluw ko n’en nib mich u wan’rad nge n’en ni yad be lemnag ni bochan e ngar fel’gad u wan’ e girdi’ ko teliw rorad nge yug girdi’.” Faanra be pag girdien fare Ulung ni Ma Pow’iyey e Thin rok Got ni nge mang ir e pow’iy rogon ni yad ma dugliy ban’en ko bin ni ngar paged e lem ko girdi’ ni nge pow’iyrad, ma ere mini’ e ir e be pow’iy e girdi’ rok Got e ngiyal’ ney?

‘UM TAFINAYNIGED FA PIINEM NI YAD BE YOG E THIN ROMED’

16. Mang reb e kanawo’ nrayog ni ngaud lemnaged fare Ulung ni Ma Pow’iyey riy?

¹⁶ Mu beeg e Hebrews 13:7. Fare bugithin ni kan pilyeg ni “um tafinayniged” e ku rayog ni ngan pilyeg ni “u mogned.” Ere, reb e kanawo’ nrayog ni ngaud ‘tafinayniged e piin ni yad be yog e thin rodad’ e aram e ngaud uneged fare Ulung ni Ma Pow’iyey u lan e meybil rodad. (Efe. 6:18) Ngaud lemnaged e maruwel ni yad ma rin’ ni aram e yad ma pi’ e tin nib t’uf ko girdi’ rok Got ni fan ko tirok ban’en, ma yad be yarmiy fare maruwel ni machib ni yibe tay u ga’ngin yang e fayleng, maku yad be yarmiy rogon e maruwel ni yibe tay ko pi salpiy ni ayuw ni be pi’ e girdi’ ko re maruwel ney. Ere, dariy e maruwar riy nib t’uf ni ngaud pied e meybil ni fan ngorad!

17, 18. (a) Uw rogon ni gad ma fol ko fonow ni ma pi’ fare Ulung ni Ma Pow’iyey? (b) Uw rogon ni gad ma ayuweg fare tapigpig nib yul’yul’ nge Jesus u daken e machib ni gad ma tay?

¹⁷ Bin riyul’ riy e, gathi kemus ni nge m’ug ni gad ma tafinaynag fare Ulung ni Ma Pow’iyey u daken e thin ni gad ma yog, ya kub t’uf ni ngaud folgad u rogon ni yad ma pow’iyed gadad. Fare Ulung ni Ma Pow’iyey e ir e ma pi’ e fonow ni bay u lan e pi babyor rodad nge pi fonow ni yima pi’ u nap’an e pi muulung, nge assembly, nge convention ni gad ma tay. Maku reb e, yad e yad ma dugliy e piin ni ngar manged circuit overseer ara piin ni yad ma lekag e ulung, ma piin ni yad ma lekag e ulung e aram e piin ni yad ma dugliy e piin ni ngar manged piilal u lan e ulung. Rogon ni ma dag e piin ni yad ma lekag e ulung nge piin piilal ni yad ma tafinaynag fare Ulung ni Ma Pow’iyey e aram e yad ma fol u gubin e fonow ni ma pi’ e re ulung ney ngorad ni ngar folgad riy. Gad gubin ni gad ma tayfan Jesus ni ir e En Ta Yog e Thin rodad. Ma rogon ni gad ma rin’ e re n’ey e aram e gad ma fol rok e piin ni ke tayrad ni ngaur pow’iyed gadad.​—Heb. 13:17.

¹⁸ Reb e kanawo’ ni ku rayog ni ngaud tafinayniged fare Ulung ni Ma Pow’iyey riy e aram e ngad pasiggad ko fare maruwel ni machib. Bin riyul’ riy e, pi’ Paul e athamgil nga laniyan’ e piin Kristiano ni ngar folwokgad ko michan’ rok e piin ni yad ma yog e thin rorad. Kab kafram i yib ni ke dag fare tapigpig nib yul’yul’ nriyul’ nrib gel e michan’ rorad ni bochan e yad ba pasig u rogon ni yad be machibnag fare thin nib fel’ nge rogon ni yad be mon’ognag e re maruwel ney. Gur bagayad e piin nib muun nga yugu boch e saf ni ga be ayuweg e piin ni kan dugliyrad ko re maruwel ney nrib ga’ fan, fa? Faanra gur bagayad, ma rib gel e felfelan’ ni ga ra tay u nap’an ni ga ra rung’ag laman Jesus ni ir e En Ta Yog e Thin rodad ni ke gaar: “Ngiyal’ ni um rin’ed e pi n’ey ni fan ngak bagayad e pi cha’ney nth’abi sobut’ u fithik’ e pi cha’ ni pi walageg ney e kam rin’ed ngog!”​—Matt. 25:34-40.

19. Mang fan ni kam dugliy u wan’um ni ngaum lek Jesus ni ir e En Ta Yog e Thin rodad?

¹⁹ Nap’an ni sul Jesus nga tharmiy, ma de pag pi gachalpen ndaki ayuwegrad. (Matt. 28:20) Manang ni gelngin Got nib thothup, nge pi engel, nge Thin rok Got e aram e n’en ni i ayuweg ni nge pow’iy e girdi’ rok Got u nap’an ni immoy u fayleng. Ku aram e pi n’en ni be fanay e ngiyal’ ney ni nge ayuweg fare tapigpig nib yul’yul’. Ere, aram fan ni pi Kristiano ni kan dugliyrad ni yad bang ko re tapigpig nem e “demturug e gin ni be yan fare Fak e Saf ngay ma yad be un ngak.” (Rev. 14:4) Ere, faanra ud folgad u rogon ni yad be pow’iydad, ma aram e gad be fol rok e En Ta Yog e Thin rodad ni aram Jesus. Dabki n’uw nap’an ma ra pow’iydad i yan ko yafos ndariy n’umngin nap’an. (Rev. 7:14-17) Gad manang ndariy reb e pilung u roy u fayleng nrayog ni nge rin’ e re n’ey!