Nge Par e Kristiano Nrogon ni ke Ognag Ir u Fithik’ e Puf Rogoy

“Piin ni bay fare kan ni thothup rok Jehovah rorad, e ke puf rogorad.”​—2 KORINTH 3:17, New World Translation.

1. Pi Mich Rok Jehovah e kar ognaged yad ngak mini’, ma mang fan ni yad ma fanay e legal agency?

KE mich u wan’ e Pi Mich Rok Jehovah ni ra par e teliw rorad ndariy n’umngin nap’an. Ere yad ma athapeg ni ngar pigpiggad ku Got u daken e ayuw “ko kan ni thothup ngu fithik’ e tin riyul’” ni manemus. (John 4:23, 24) Pi Kristiano ney e yad be par nib puf rogorad ma kar ognaged yad ku Jehovah Got ma ke mudugilan’rad ni ngar lubeged e re n’em. Ere yad ma taga’ nga daken e Thin rok Got nge kan ni thothup rok. Yad ma yan ko kanawo’ ni ngar lubeged e n’en ni kar ognaged yad ngay ko Kristiano u fithik’ e puf rogoy, ma yad ma ta’ fan e liw ko pi am ni yad e “piin ni baga’ lungurad” ma aram mi yad ma fanay e tin nib legal ban’en nge yugu boch ban’en nrogon. (Roma 13:1; James 1:25) Susun, ma fanay e Pi Mich fare Watch Tower Society ni aram ba legal instrument​–ni aram reb ko boor u boch e binaw–​ni fan ni nge yog ni ngar rin’ed e maruwel rorad ni ngar ayuweged e girdi’ ko tirok Got ban’en. Machane Pi Mich e kar ognaged yad ku Got ma gathi ngak fare legal agency, ma kar ognaged yad ku Jehovah ndariy n’umngin nap’an.

2. Mang fan ni ma tay fan e Pi Mich Rok Jehovah fare Watch Tower Society nge yugu boch e legal agency?

² Pi Mich Rok Jehovah e yad e tapigpig ni kar ognaged yad ku Got, me ere thingara folgad ko n’en ni yog Jesus ni nga ranod “ngak girdien e pi nam nga[r] pingeged yad ngar manged pi gachalpen, mi [yad] taufenagrad nga fithingan e Chitamangiy nge Fak nge fare kan ni thothup, mi [yad] fil ngorad rogon ni nguur folgad u gubin e tin ni [ke yog].” (Matthew 28:19, 20) Ra ul’ul’ iyan e re maruwel ney nge mada’ nga tomren e re m’ag ney, ya ki gaar Jesus: “Ma re thin rok Got ney nib fel’ ni morngaagen Gil’ilungun Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:3, 14) Gubin e duw ma pi naun ni yima fl’eg e babyor riy ko fare Watch Tower Society nge yugu boch e legal body e ma fl’eg bokum milyon ken e Bible nge babyor nge brochure, nge magazine ni fan ni ngan wereg e machib u ga’ngin e fayleng. Pi n’en ney ni legal entity e ri baga’ fan ya ma ayuweg e pi tapigpig rok Got ni kar ognaged yad ngak ni ngar lubeged e n’en ni kar micheged ngak.

3. Uw rogon ni ma fanay e Pi Mich Rok Jehovah fare bugithin ni “fare Society” faram?

³ Sana ra yog be’ ni rogon ni ma weliy e Pi Mich Rok Jehovah u momgaagen fare Watch Tower Society​–fa “fare Society”–​e be m’ug riy ni gathi ke mus aram ba legal instrument. Ya gathi yad ma lemnag ni ir e baga’ lungun ko pi’ n’en ni ma sor fan ko liyor fa? Fare babyor ni Jehovah’s Witnesses​—Proclaimers of God’s Kingdom e ma tamilangnag e re n’em ni gaar: “U lan fare Wulyang Ntagil’ e Damit [ko June 1, 1938] ma kan weliy u morngaagen ‘Fare Society,’ ma ma sor fan ko fare ulung ko Kristiano ni kan dugliyrad ni kar sunumiyed e re legal entity nem mi yad maruwel u daken, ma gathi ke mus ni ma sor fan ko ba legal instrument.”a Ere re thin nem e ma sor fan ko “fare tapigpig nib yul’yul’ mab gonop.” (Matthew 24:45) Aram rogon ni ma fanay e Pi Mich fare bugithin ni “fare Society.” Machane fare legal corporation nge “fare tapigpig nib yul’yul’ mab gonop” e gathi yu bugithin ni taareb fan. Piin ni yad e director ko fare Watch Tower Society e yibe towaliyrad, machane Pi Mich ni yad fare ‘tapigpig nib yul’yul” e kan dugliyrad ko kan ni thothup rok Jehovah.

4. (a) Mang boch e thin ni ma weliy e Pi Mich Rok Jehovah ni fan ni nge dabi maathuk’ laniyan’ e girdi’? (b) Mang fan ni susun ni ngad pared nib thabthabel lanin’dad ni fan ko yu bugithin ni yima yog?

⁴ Pi Mich Rok Jehovah e yad ma ayuw ko uw rogon ni yad ra weliy u morngaagen e re n’em ni nge siy i maathuk lanin’uy. Dabi yog e Pi Mich ni gaar, “aram e n’en ni be fil fare Society,” ya yad ma yog boch e thin ni aray rogon ni gaar, “be yog e Bible” ara, “rogon ni gu manang ma ereray rogon ni be fil e Bible.” Aram rogon ma yad ma tamilangnag ni ra reb e Mich Rok Jehovah ma ir rok e ke turguy ni nge un ko machib ko Bible ma ku aram rogon ni nge siy i lemnag boch e girdi’ ni Pi Mich e ma fol ko teliw ni bod e sect. Ma dabi fel’ ni ngan tugthinnag e yu bugithin ni fithingan ban’en. Ya ke mus fan fithingan ban’en e nge siyeg e maathuk’ u laniyan’uy. Ba t’uf ni nge par e Kristiano nib thabthabel. Be yog e Bible ngodad ni “dab ku ud luaged morngaagen yu bugithin.” (2 Timothy 2:14, 15) Ku be yog e Bible ni gaar: “Ra aram rogon ma ra diin me nang be’ fan e n’en ni ga be weliy nthin ndawor ni rung’ag ma da nnang fan?”​–1 Korinth 14:9.

Bochan e Kan ni Thothup rok Got ma Daki T’uf e Motochiyel ni Beer

5. Mang fan fare thin ni bay ko 1 Korinth 10:23?

⁵ Yog apostal Paul ni gaar: “Urngin ban’en nrayog ni ngad rin’ed, machane gathi urngin ban’en ma ba fel’.” Miki gaar: “Urngin ban’en nrayog ni ngad rin’ed, machane gathi urngin ban’en ma ba fel’ ngodad.” (1 Korinth 10:23) Gathi be yog Paul ni rayog ni ngan rin’ ban’en nib togopuluw ko Thin Rok Got. Immoy 600 e motochiyel ko yu Israel kakrom, ma ri buch uw e motochiyel ko Kristiano. Ere boor ban’en ma ra be’ ma ra fol ko nangan’ rok. Be’ ni ke ognag ir ngak Jehovah e ke puf rogon ya kan ni thothup rok Got e be pow’iy. Be’ ni Kristiano ni ke un ko thin riyul’ e ra fol ko nangan’ rok ni be tor ko Bible ma ma taga’ nga daken Got ni nge pow’iy u daken e kan ni thothup rok. Aram e n’en ni ra ayuweg e Kristiano ni nge turguy ko mang e “ba fel’ ngodad” ma “ba fel’” ngak nge yugu boch e girdi’. Ya manang u wan’ ni n’en nra turguy e bay rogon u thilrow Got, ni en ke ognag ir ngak.

6. U lan e pi muulung ko Kristiano ma uw rogon nrayog ni ngad daged ni ke mich u wan’dad e thin riyul’?

⁶ Ra dag e Mich Rok Jehovah ni ke un ko thin riyul’ u nap’an ni ra pi’ e fulweg u nap’an e pi muulung ko Kristiano. Som’on ma sana ra yog e thin ni bay ko fare babyor ni yibe fil. Machane munmun, ma ra mon’og iyan ma rayog ni nge weliy e thin ko Bible ko thin rok. Me ere ke dag ni be mon’og iyan u rogon ni ma fl’eg i lemnag ban’en, ma gathi ke mus ni be yog e thin ni yog yugu be’. Ra weliy e thin riyul’ ko thin rok rogon ni bay u gum’ercha’en ma ra yib e falfalan’ ngak ma ra dag ni kari michan’ ko re n’em.​—Eklesiastes 12:10; mu taarebnag ko Roma 14:5b.

7. Mang boch ban’en ni ke turguy e pi tapigpig rok Jehovah ni ke puf rogorad?

⁷ Pi Mich Rok Jehovah e ba t’uf Got rorad nge yugu boch e girdi’. (Matthew 22:36-40) Rriyul’ ni yad ba chuchugur ngorad ni bochan e t’ufeg ku Kristus ni be chugurnagrad nga taabang ni yad ba ulung i walag. (Kolose 3:14; 1 Peter 5:9) Machane ra be’ mab puf rogon, me ere ra bagayad ma ir rok ni ke turguy ni nge wereg fare thin nib fel’ ko Gil’ilungun Got, ma nge par u mathilin e magawon ko pi nam, ma nge siyeg i fanay e racha’, ma nge siyeg yugu mmit e fafel nib kireb, ma nge par ni be fol ko Bible. Dan towarsariyrad ni ngar rin’ed e pi n’em. Ya aram rogon e par ko piin ni yad rorad ni kar turguyed ni ngar uned ngay u m’on ndawora ognaged yad ku Got mi yad mang Pi Mich Rok Jehovah.

Thingarni Fol ko Fare Governing Body fa?

8. Mang deer nib t’uf ni ngan tamilangnag?

⁸ Rib tamilang ni be dag e Bible ni tin riyul’ e Kristiano e gathi yibe towarsariyrad ni ngar pigpiggad ku Got. Be gaar: “Jehovah e ir fare Kan; ma gin ni bay e kan ni thothup rok Jehovah riy, e bay e puf rogon riy.” (2 Korinth 3:17) Machane uw rogon nrayog ni ngan puluwnag e re thin nem ko fare “tapigpig nib yul’yul’ mab gonop” nge fare ulung riy ni Governing Body?​—Matthew 24:45-47.

9, 10. (a) Uw rogon ni nge fol e ulung ni Kristiano ko fare thin u morngaagen lolugen e ulung? (b) Mang e ba t’uf ni nge rin’ e ulung ni Kristiano u nap’an e bin som’on e chibog ni bochan ni ngan fol ko en lolugen e ulung?

⁹ Ra ngan fulweg e re deer nem, ma thingarda lemnaged fare thin u morngaagen lolugen e ulung. (1 Korinth 11:3) U Efesus 5:21-24, ma be tamilangnag ni Kristus e ir “lolugen e ulung,” ma girdien e ulung e “yad be yan nga laniyan’ Kristus.” Manang e Pi Mich Rok Jehovah ni fare tapigpig nib yu1’yul’ mab gonop e yad ba ulung i walagen Jesus. (Hebrews 2:10-13) Kan dugliy e re ulung nib yul’yul’ ney ni ngar pi’ed e ggan ko girdi’ rok Got ni “ggan nib spiritual ko ngiyal’ nib t’uf.” Ngiyal’ ney ko tomur ma ke dugliy Kristus e re tapigpig ney ni nge “mil fan urngin ban’en rok ngak.” Ere urngin e piin ni yad ma yog ni yad e Kristiano e susun ni ngar ted fan e re liw nem.

¹⁰ Fan ni ngan dugliy be’ ni nge mang lolugen e nge par nib taareb lanin’uy maku fan ni nge “urngin ban’en ma thingar nrin’ nib fel’ rogon ma ba yaram.” (1 Korinth 14:40) Ke yog e re n’ey u nap’an e bin som’on e chibog ya kan mel’eg boeh e Kristiano ni kan dugliyrad ni yad fare tapigpig nib yul’yul’ mab gonop ni ngar manged owchen fare ulung. Ma boch ban’en ni buch e ke micheg ni ke felan’ Jehovah ko re governing body ney u nap’an e bin som’on e chibog. Tin som’on e Kristiano e kar felan’gad ni ngar folgad ko re yaram nem. Arrogon, kar adaged e re n’em mu ur falfalan’gad nga angin ni ke yib riy.​—Acts 15:1-32.

11. Susun uw rogon u wan’uy fare Governing Body ko ngiyal’ ney?

¹¹ Kab baga’ fan e yaram ni aram rogon ko ngiyal’ ney. Fare Governing Body ko Pi Mich Rok Jehovah e bay ragag e girdi’ riy ni yad e Kristiano ni kan dugliyrad ko kan ni thothup ma byoor e duw ni kar uned ko machib. Yad ma pow’iy e Pi Mich Rok Jehovah ko tirok Got ban’en, ni bod rogon fare governing body u nap’an e bin som’on e chibog. (Acts 16:4) Bod rogon e tin som’on e Kristiano, ma ba falfalan’ e Pi Mich ni ngar folgad ko pi walag nib ilal ko fare Governing Body ni ngar pow’iyed yad u daken e Bible mi yad pi’ e fonow ko tin nib sor fan ko liyor. Girdien fare Governing Body e yad e tapigpig rok Jehovah nge Kristus, ni bod e tin ni ka bay e Kristiano ma be yog e Bible ngodad ni gaar: “Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra dangay ma bay ur ngongliyed nib taganan’rad, ma aram e dabi fel’ rogomed riy.”​—Hebrews 13:17.

12. Ra reb e Kristiano e thingari fol ku mini’?

¹² Bochan ni be yog e Bible nib mil fan ngak fare Governing Body ni ngar gegiyegnaged e ulung me ere ra reb e Pi Mich Rok Jehovah e thingari dum’ ngorad ko tin n1 nge rin’ fa? Gathi arrogon ni yog Paul ngak e pi Kristiano u Roma ni gaar: “Mang fan ni kam turguy e kireb nga daken be’ ni walagem ni girdien Kristus? Mang fan ni ga be dariy fannag walagem? Ya gadad gubin ni bay da sak’iygad u p’eowchen Got nge pufthinnagdad.”​—Roma 14:10-12.

13. Mang fan ni ma reportnag e Pi Mich Rok Jehovah e machib ni yad ma tay?

¹³ Machane gathi thingari pi’ urngin e Pi Mich e report ko machib ni ur ted? Arrogon, machane fan ko re n’em e kan weliy u lan reb e babyor ko Pi Mich ni be gaar: “Tin som’on i gachalpen Jesus Kristus e ur adaged ni ngar nanged e report ko uw rogon ni be mon’og e machib iyan. (Mark 6:30) Nap’an ni ke wer iyan e machib ma kan kunuy e report nge boch e thin u morngaagen e n’en ni be buch ko piin ni ur uned ko machib ko fare thin nib fel’. . . . (Acts 2:5-11, 41, 47; 6:7; 1:15; 4:4) . . . Rib fel’ ko pi Kristiano nib yul’yul’ ni ngar rung’aged e report ko pi n’en ni yibe rin’! . . . Ku aram rogon e ulung rok Jehovah ko ngiyal’ ney ma yad ma athamgil ni ngar nanged nri rogon, e machib ni yibe tay e be lebuguy fare thin ko Matthew 24:14.”

14, 15. (a) (a) Uw rogon nib sor fan e pi thin ko 2 Korinth 1:24 ko fare Governing Body? (b) U daken e mang e thingari turguy e Kristiano e n’en ni nge rin’, ma mang e thingari nang u wan’?

¹⁴ Fare Governing Body aram ba taw’ath ni kan pi’ u fithik’ e runguy ere bfel’ ni ngad folwokgad rorad. (Filippi 3:17; Hebrews 13:7) Yad ma folwok rok Kristus ma aram e rayog ni ngar rogned e pi thin ney ni yog Paul ni gaar: “Gathi gamad be guy rogon ni nggogned ngomed e n’en ni ir e thingari mich u wun’med, ya ke mudugil u wun’med e n’en ni ke michan’med ngay. Machane gamad be ayuwegmed ni fan ko felfelan’ romed.” (2 Korinth 1:24) Ra yaliy fare Governing Body e pi n’en ni be buch ma aram e yad ma tamilangnag angin ni yib ko fol Bible, ma yad ma weliy ko uw rogon nrayog ni ngan fol ko motochiyel nge fonow riy, ma yad ma ginang e girdi’ ko riya’ nib mith, ma yad ma pi’ e athamgil nga laniyan’ e “pi walag.” Ere ma rin’ e re ulung nem e tin nib mil fan ngorad, mi yad ayuweg e girdi’ ngar pared nib falfalan’, ma yad ma ubing e michan’ rorad ni rayog ni ngar pared nib mudugil.​—1 Korinth 4:1, 2; Titus 1:7-9.

¹⁵ Faanra fol reb e Mich Rok Jehovah ko fonow ni pi’ fare Governing Body u daken e Bible, ma ra rin’ ni lem rok ya ke fil e Bible me ere kari mich u wan’ ni susun ni aram rogon. Thin Rok Got e ke suwey laniyan’ ra reb e Pi Mich ni nge fol ko fonow ko Bible ni pi’ fare Governing Body, mi yad nang u wan’rad ni n’en ni ra turguy e bay rogon ko tha’ u thilrow Got, ni en ke ognag ir ngak.​—1 Thessalonika 2:13.

Pi Student nge Pi Salthaw

16. Mang fan ni yima tharbog boch e girdi’ ko ulung ni yugu aram rogon ni ra be’ ma ir rok ni nge turguy e n’en ni nge rin’?

¹⁶ Machane faanra ra be’ ma ir rok ni nge turguy e ngongol rok me ere mang fan ni yima tharbog boch e Pi Mich Rok Jehovah? Dariy be’ ni yigu ra turguy ni ngan tharbog be’ ni bochan e ke denen. Ya ngan rin’ e re n’em ni ke mus nfaanra de kalngan’ be’ u lan e ulung ko denen ni be rin’, ni bod e pi n’en ni bay ko guruy ni 5 ko Bin Taareb e Korinth. Ere rayog ni ngan tharbog e Kristiano ni ke un ko ngongol ndarngal, machane ke mus nfaanra de fel’ u wan’ facha’ e fonow nge ayuw ko pi tachugol saf ko ulung. Ma gathi ke mus ni Pi Mich Rok Jehovah e ma rin’ e re n’ey. Be weliy fare The Encyclopedia of Religion ni gaar: “Urngin e girdi’ ni be par u taabang ma bay rogorad ni ngar ayuweged yad ko piin ndubrad ni ngar folgad rorad ni ra kirebnag e ulung. Ma ma fol e teliw ko re n’ey ma kab gel ni bochan e yima lemnag ni fare gechig [ni ngan tharbog be’] e bay rogon ko tha’ u thilin be’ nge Got.”

17, 18. Uw rogon ni ngan tamilangnag nib puluw ni ngan tharbog be’ ko ulung ni bod e (a) skul? (b) ara ba ulung i salthaw?

¹⁷ Pi Mich Rok Jehovah e gathi ke mus ni yad e student ya ku yad e salthaw rok Jesus Kristus, ni ke tay chilen ngorad ni ngar “uned ko cham ni bin th’abi fel’ e cham ko tin ni ke michan’rad ngay.” (1 Timothy 6:12, NW; 2 Timothy 2:3) Faanra un reb e salthaw ni Kristiano ko ngongol nde puluw ma yugu be rin’, ma aram e dabi felan’ Got ngak. Ra reb e salthaw ko Kristiano ma ke puf rogon me ere ir rok nrayog ni nge turguy e n’en ni nge rin’, machane bay wenegan e n’en nra turguy. I gaar Paul: “Ba salthaw ni be un ko mahl e der ma un ko tin ni be maruweliy e girdi’ ni gathi salthaw, ya ba adag ni nge yan nga laniyan’ e en ni pilungen e ba’ rok e salthaw. Be’ ni ma un ko mil ni ir girdien e sagreng e dabiyog ni nge yog puluwon ngak ni faanra dabi fol ko motochiyel ko fare mil.” (2 Timothy 2:4, 5) Pi Kristiano nib ilal nib muun ngay girdien fare Governing Body, e yad ma par u tan pa’ e Ani Ga’ rorad ni Jesus Kristus, mi yad fol ko “pi motochiyel” ni aram e rayog ni ngar thapgad ko fare taw’ath ni yafas ni manemus.​—John 17:3; Revelation 2:10.

19. Kan weliy e pi n’em u morngaagen rogon e ognagey ko Kristiano, me ere mang e rayog ni nge mudugilan’dad riy?

¹⁹ Gathi rib tamilang ni Pi Mich Rok Jehovah e yad e pi tapigpig rok Got ma gathi yad e tapigpig ko girdi’ fa? Yad e pi Kristiano ni kar ognaged yad ku Got ma ke puf rogorad ni bochan Kristus, ma yad ma pag e kan ni thothup rok Got nge Thin Rok nge gagiyegnag e yafas rorad ma yad ma pigpig u taabang rok e pi walag u lan e ulung rok Got. (Psalm 133:1) Ma rayog ni ngan guy nib riyul’ e re n’ey ma aram e susun ndabki maruwaran’uy ko mang tapgin gelngirad. Yad ma un ko fare tang ko Psalm ni be gaar: “Jehovah e ir gelngig nge manaf rog. Kug pagan’ ngak u gum’ercha’eg, ma ke ayuwegneg, ni aram e ri ma falfalan’ gum’ercha’eg, ma gu ra pining e sorok ngak u fithik’ e tang.”​—Psalm 28:7.

[Boch e thin nra tamilangnag murung’agen]

Uw Rogon ni Ga Ra Fulweg?

◻ Uw rogon ni ma ayuweg e Pi Mich Rok Jehovah fare Watch Tower Society nge yugu boch e legal agency?

◻ Mang angin ni ma yib ko pi Kristiano ni bochan fare Governing Body ko Pi Mich Rok Jehovah?

◻ Mang fan ni ma reportnag e girdi’ rok Jehovah e machib ni yad ma tay?

◻ Ra diin be’ ni Kristiano mab puluw ni ngan tharbog ko ulung?

[Sasing ko page 16]

Fare governing body u nap’an e bin som’on e chibog e kar ayuweged e machib nge par nib taareb

[Sasing page 20]

U ga’ngin e fayleng, ma ke puf rogon e Pi Mich Rok Jehovah ni bochan Kristus