Ngada Yul’yul’gad Ngak Kristus nge Tapigpig Rok nib Yul’yul’

“Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.”​—MATTHEW 24:45-47.

1, 2. (a) Be yog e Bible ni mini’ e Tayog e Thin rodad? (b) Mang e ma tamilangnag ni ma gagiyegnag Kristus e ulung ni Kristiano?

“ARA ni pining e “Tayog e thin” ngomed, ya taabe’ e ba’ ni ir e be yog e thin romed, ni aram fare Messiah.” (Matthew 23:10) Pi thin ney, e be tamilangnag Jesus ngak pi gachalpen ni dariy be’ u fayleng ni ir e ta yog e thin rorad. Ke mus ni goo Jesus Kristus e ir e Tayog e Thin rorad ni bay u tharmiy. Bay Jesus ko re liw nem ya Got e dugliy ni nge yog e thin. Jehovah e ke “faseg Kristus ko yam’, . . . ma ke pi’ Jesus ngak e galesiya, ni ir e nge mang Pilung ni ga’ u urngin ban’en.”​—Efesus 1:20-23.

² Kristus e ‘ir e ba ga’ u urngin ban’en’ u lan e ulung ni Kristiano, ere ma gagiyegnag urngin ban’en ni yima rin’ u lan e ulung. Ma guy urngin ban’en ni yima rin’ u lan e ulung. Ma fal’eg i yaliy rarogon e michan’ rok urngin e ulung ni Kristiano. Ba tamilang ni arrogon u lan fare Revelation ni pi’ Jesus ngak apostal John u tungun e bin som’on e chibog ko C.E. Nap’an ni i non Jesus ngak girdien fa medlip i ulung, lal yay e i yog ni manang e ngongol rorad, nge fel’ngirad, nge tin ni yad mmeewar riy, me fonownagrad nrogon me pi’ e athamgil nga lanin’rad nrogon. (Revelation 2:2, 9, 13, 19; 3:1, 8, 15) Ere rayog ni nge mich u wun’dad ni ku manang Kristus rarogon e michan’ rok yugu boch e ulung u Asia Minor, ngu Palestine, ngu Syria, ngu Greece, nge Italy, nge yugu bang. (Acts 1:8) Ma ku manang rarogodad e ngiyal’ ney, fa?

Ba Tapigpig nib Yul’yul’

3. Mang fan nib puluw ni ngan taarebnag Jesus nga ba llug, ma ulung rok nga ba dowef?

³ Tomren ni fas Jesus ko yam’ ma u m’on ni yan ngak e Chitamangin u tharmiy, i yog ngak pi gachalpen ni gaar: “Kan pag fan urngin ban’en ngog u tharmiy ngu but’.” Miki gaar: “Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.” (Matthew 28:18-20) Ra i par rorad ni nge gagiyegnagrad ni ir e Pilung rorad. U lan e babyor ni yoloy apostal Paul ngak e pi Kristiano nu Efesus ngu Kolose, i taarebnag Paul e ulung ni Kristiano nga ba “dowef” ni Kristus e Llug riy. (Efesus 1:22, 23; Kolose 1:18) Fare The Cambridge Bible for Schools and Colleges (Fare Cambridge Bible ni Fan ko Skul nge Colleges) e ke weliy ni re fanathin nem e “be yip’ fan ni thingari peth e dowef ko fare Llug, maku be yip’ fan ni ma maruwel e Llug u daken yu yang i dowey. Yu yang e dowef e ir e talin e maruwel rok.” Mang ulung e be maruwel Kristus u daken ni ka nap’an ni ke gagiyeg u Gil’ilungun Got ko duw ni 1914?​—Daniel 7:13, 14.

4. Rogon ni yog Malaki ni profet, mang e ra pirieg Jehovah nge Kristus Jesus u nap’an ni yow ra yib ni ngar skengnagew fare tempel nib fanathin?

⁴ I yog Malaki ni profet ni ra yib Jehovah ni ir “Somol ni Gubin ma Rayog Rok” ni ke un e “mol’og rok” ngak ni ir Fak ni Kristus Jesus ni ka fini pilung. Ma yow ra yib ni ngar skengnagew e “tempel” rok Got nib fanathin. Ma “ngiyal’ ni kan dugliy” ni ngan ‘pufthinnag girdien e tabinaw rok Got’ e ke taw ko duw ni 1918.a (Malaki 3:1; 1 Peter 4:17) Kan skengnag e piin ni yad ma yog ni yad girdien Got. Kan n’ag e pi yurba’ i teliw nu Kristendom ya bokum miriay e duw ni ur machibniged boch e thin ni ma darifannag Got ma kan n’agrad ni bochan e ur uned i thang e fan ko girdi’ u nap’an e Bin 1 e Mahl ko Fayleng. Ma kan skengnag e tin ni bay e Kristiano ni kan dugliyrad ko kan ni thothup, ma gowa kan skengnagrad ko nifiy mar beechgad. Mar fel’ gad u wan’ Jehovah “ma aram e bay ra pied ngak Somol e mit i n’en nib mat’aw ni nga ni pi’ ngak ni maligach.”​—Malaki 3:3.

5. Chon mini’ e yad fare “tapigpig” nib yul’yul’ ni weliy Jesus murung’agen u nap’an ni weliy e pow ko “ngiyal’ ni bay”?

⁵ I weliy Jesus ban’en nib taareb rogon ko thin rok Malaki ni profet u nap’an ni pi’ e pow ni boor yu yang riy ngak pi gachalpen ni fan e nge tamilang u wun’rad ni ‘ke taw ko ngiyal’ ni bay nge ngiyal’ ni tomren e fayleng.’ Ma bang ko re pow nem e murung’agen ba “tapigpig” ni be yip’ fan boor e girdi’. I gaar Jesus: “Ere mini’ e en ni ir fare tapigpig nib yul’yul’ ma ba gonop? I ir e en ni masta rok e ke tay ni nge mil fan e tin ni ke bay e tapigpig ngak, ni nge pi’ garad ko ngiyal’ ni yima pi’ riy. Rib ga’ ba felfelan’ nra tay e re tapigpig nem ni faanra sul e masta rok nga tabinaw me pirieg ni ereray e n’en ni be rin’! Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.” (Matthew 24:3, 45-47) ‘Nap’an ni yib’ Kristus ni nge skengnag fare “tapigpig” ko duw ni 1918, i pirieg boch pi gachalpen ni yad be fanay e re babyor ney ni Wulyang Ntagil E Damit nge ku boch e babyor ni ma weliy fan e Bible ni fan e “ngar pied e ggan ko ngiyal’ ni yima pi’ riy.” Ma ur rin’ed e re n’en ney ni ka nap’an e duw ni 1879. Kar fel’ gad u wan’ Kristus me tayrad ni yad talin e maruwel rok, ara “tapigpig” rok ma ka nap’an fare duw ni 1919 me tayrad ni nge mil fan urngin ban’en rok u fayleng ngorad.

Ngar Gagiyegniged e Tirok Kristus Ban’en u Fayleng

6, 7. (a) Mang yugu reb e thin ni fanay Jesus ni nge tamilangnag fare “tapigpig” nib yul’yul’? (b) Mang fan ni fanay Jesus fare bugithin ni “tapigpig” ara steward?

⁶ In e pul u m’on ni weliy Jesus e pow ko wub rok, nib muun ngay murung’agen fare “tapigpig” ni yad owchen Jesus u fayleng, i weliy Jesus u murung’agen e re “tapigpig” nem u yugu reb e kanawo’ ya nge tamilangnag e maruwel rok fare tapigpig. I gaar Jesus: “Ere mini’ e en ni ir fare tapigpig nib yul’yul’ ma ba gonop? I ir e en ni masta rok e tay ni nge mil fan urngin ban’en ngak, ma be ayuweg e tabinaw, ma be pi’ ngak e tin ni ka bay e tapigpig e tirorad e ggan ko ngiyal’ ni yima pi’ riy. Nggog ngomed nrib mudugil nra tay fare masta fare tapigpig ni ir e nge mil fan urngin ban’en rok ngak.”​—Luke 12:42, 44.

⁷ U roy fare bugithin ni tapigpig e ka nog e steward, ba bugithin ni fek ko thin nu Greek ni be yip’ fan ni “be’ ni ma yarmiy ma be gagiyegnag e tabinaw ara binaw.” Pi ta yaram ney e gathi ke mus ni boch e girdi’ nib llowan’ ni ma weliy fan e thin ko Bible. N’en ni kub muun ko ngan pi’ e ggan ni thin rok Got “ko ngiyal’ ni yima pi’ riy” ma “fare tapigpig nib yul’yul’” e kun tayrad ni ngar ayuweged ma ra gagiyegniged “urngin ban’en rok” Kristus ni aram e ulung rok Kristus nge maruwel riy. Mang e kub muun ko urngin ban’en rok Kristus?

8, 9. Mang e kub muun ko “urngin ban’en rok” Kristus nib mil fan ngak fare tapigpig ni ngar gagiyegniged?

⁸ Mmil fan ngak fare tapigpig ni nge gagiyegnag fapi n’en ni ma fanay pi gachalpen Kristus ni ngar rin’ed e maruwel rorad nib muun ngay e tochuch rok e Pi Mich Rok Jehovah nge pi ofis rorad nge gin ni yad ma liyor ngak Got riy​—ni pi Kingdom Hall nge pi Assembly Hall rorad u fayleng i yan. Ka ba ga’ fan boch e maruwel rorad ni yad ma yarmiy rogon e pi n’en ni yima fil ko pi muulung rorad ko yu wik nge pi n’en ni yima fil ko pi assembly nge convention rorad. U nap’an e pi muulung ney e yima fil e pi thin ko profet ni ke lebug ma ku yad ma fil boch e fonow u rogon ni ngan fol ko machib ko Bible u gubin e rran.

⁹ Kub mil fan ngak fare tapigpig ni nge gagiyegnag e maruwel rorad ni ngan machibnag fare “thin nib fel’ ni murung’agen Gil’ilungun Got” ma ngan “ayuweg girdien e pi nam u gubin yang ni ngar manged pi gachalpen Jesus.” Kub muun ko re maruwel ney ni ngan fil ngak e girdi’ rogon ni ngar folgad ko urngin ban’en ni yog Kristus ni ngan rin’ ko ngiyal’ ney ni ngiyal’ ko tomur ya ir e Llug ko ulung rok. (Matthew 24:14; 28:19, 20; Revelation 12:17) Bochan e re maruwel nem ni ngan wereg e machib ma ngan fil e machib ngak e girdi’, ke sum “ba ulung ni ba ga’” ni kar chaggad ngak e piin ni kan dugliyrad ko kan ni thothup. Pi cha’ ney ni yad e “pi n’en nib fel’ ko urngin e nam” e ku yad bang “urngin ban’en” rok Kristus nib mil farad ngak fare tapigpig.​—Revelation 7:9; Haggai 2:7.

Fare Governing Body ni Owchen fare Tapigpig

10. Mang ulung ni immoy ko bin som’on e chibog nib mil fan ngorad ni ngar turguyed ban’en, ma mang wenegan ni yib ngak urngin e ulung?

¹⁰ Mmil fan ngak fare tapigpig nib yul’yul’ ni ngar turguyed boch ban’en mab tomal e re maruwel nem. U lan e bin som’on e ulung ni Kristiano e pi apostal nge piin ni piilal nu Jerusalem e yad owchen fare ulung ma ur turguyed boch ban’en ni nge rin’ girdien urngin e ulung ni Kristiano. (Acts 15:1, 2) Ma kan weliy e pi n’en ni i turguy e governing body ngak e pi ulung u lan e pi babyor ni kan yoloy miki weliy e piin ni ur lekaged e ulung. I felfelan’ e tin som’on e Kristiano ni kan fonownagrad me sum e gapas nge taareban’ ni bochan e mm’agan’rad ngay ni ngar folgad ko fare fonow.​—Acts 15:22-31; 16:4, 5; Filippi 2:2.

11. Chon mini’ e ngiyal’ ney ni be fanayrad Kristus ni ngar gagiyegniged e ulung rok, ma susun uw rogon e pi girdi’ ney u wun’dad?

¹¹ Bay boch piin ni kan dugliyrad ko kan ni thothup ni yad e Governing Body rok pi gachalpen Kristus e ngiyal’ ney ni bod rogon ni immoy kakrom. Ma pow’iy Kristus e pi girdi’ ney ni yad ma gagiyegnag e machib. Kristus e Llug ko ulung rok ma be gagiyegnag e pi girdi’ nib yul’yul’ ney ni gowa yad bay u “ba’ ni mat’aw i pa’”. (Revelation 1:16, 20) Be’ ni Albert Schroeder fithingan ni ir girdien fare Governing Body ni ke n’uw nap’an ma ke yim’ ni dawori n’uw nap’an e chiney. I yoloy murung’agen e pi n’en ni i rin’ ni gaar: “Ma muulung fare Governing Body ni gubin e Dalip Fen e Maruwel, ma tabab e muulung ko meybil ni yima ning e kan ni thothup rok Jehovah ni nge gagiyegnagmad. Ri gamad ma athamgil ni nge puluw urngin ban’en ni gamad ra weliy ara gamad ra turguy ko Thin Rok Got u Bible.”b Rayog ni ngada pagedan’dad ngak e pi Kristiano ney ni yad ba yul’yul’. Thingar da folgad ko motochiyel rok apostal Paul u murung’agen e pi girdi’ ney ni gaar: “Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad.”​—Hebrews 13:17.

Ngada Ted Fan fare Tapigpig

12, 13. Mang boch e thin ko Bible ni ma weliy fan ni gad ma tay fan fare tapigpig?

¹² Gad ma tay fan fare tapigpig nib yul’yul’ ya aram rogon ni gad ma tay fan Jesus Kristus ni ir e Masta rok fare tapigpig. I yol Paul ngak e piin ni kan dugliyrad ko kan ni thothup ni gaar: “Be’ ni ir e mmil fan ir ngak me taw e thin rok Kristus ngak e ke mang sib rok Kristus. Yi Got e ke chuw’iymed nib tolang puluwmed ni ke pi’.” (1 Korinth 7:22, 23; Efesus 6:6) Ere nap’an ni gad ra fol ko gagiyeg rok fare tapigpig nib yul’yul’ nge fare Governing Body rok ma gad be fol rok Kristus ni ir e Masta rok fare tapigpig. Nap’an ni gad ra tay fan fare talin e maruwel ni be fanay Kristus ni nge gagiyegnag e tirok u fayleng ma aram reb e kanawo’ ni gad be “yog u fithik’ e girdi’ ni Jesus Kristus e ir e Somol, mi nog e sorok riy ngak Got ni Chitamangiy.”​—Filippi 2:11.

¹³ Yugu reb i fan ni ngada ted fan fare tapigpig nib yul’yul’ e pi Kristiano ni kan dugliyrad ko kan ni thothup u fayleng e yad be yip’ fan e “tempel” rok Jehovah ni ir e gini ma par riy u daken e ‘kan ni thothup’ rok. Ere yad ba “thothup” ni bochan e yad be yip’ fan e tempel rok Got. (1 Korinth 3:16, 17; Efesus 2:19-22) I pi’ Jesus urngin e tirok ban’en u fayleng ngak e piin ni be yip’ fan fare tempel nib thothup, ere bay boch ban’en nge boch e maruwel u lan e ulung ni Kristiano nib mil fan ngak fare tapigpig ni goo yad e mmil fan ngorad. Aram fan ni urngin girdien e ulung e ma fol rok ma yad ma tay fan e gagiyeg ni ma yib ko fare tapigpig nib yul’yul’ nge fare Governing Body rok. Ma piin ni yad “yugu boch e saf” e yad ma tay ni yad ba tow’ath ni ngar ayuweged fare tapigpig ni ngar rin’ed e maruwel rok fare Masta.​—John 10:16.

Ngada Ayuweged fare Tapigpig u Fithik’ e Yul’yul’

14. Rogon e thin rok Isaiah ni profet, uw rogon ni ma lek e piin ni yad yugu boch e saf fare tapigpig ni yad e ‘tamaruwel ni dab ni pi’ puluwrad’?

¹⁴ I weliy Isaiah ni profet rogon ni ra fol e piin ni yad yugu boch e saf ngak girdien fare Israel nib fanathin ni gaar: “I Somol e be gaar ngak yu Israel, ‘Fel’ rogon nu Egypt ngu Ethiopia e bayi mil suwon ngom, ma pumoon ni n’un’uw nu Seba e bay ra manged sib rom; bay ra leked gur ni ka nin’ e chen ngorad. Bay ra siro’gad ngom me lungurad, Got e ba’ rom, ke mus ni ir e Got.’” (Isaiah 45:14) Gowa ma lek fa tin ni yugu boch e saf e piin ni kan dugliyrad ko kan ni thothup nge fare Governing Body rok ni yad ma fol rorad. Piin ni yad yugu boch e saf e gowa yad e ‘tamaruwel nu Egypt ni dab ni pi’ puluwrad,’ ni yad ma fanay gelngirad nge tirorad ban’en ni yad ma ayuweg fare machib ni ke pi’ Kristus ngak pi gachalpen ni kan dugliyrad ko kan ni thothup ni ngar rin’ed u fayleng.​—Acts 1:8; Revelation 12:17.

15. Uw rogon ni ka nog u m’on riy u Isaiah 61:5, 6 rogon thilin e piin ni yad yugu boch e saf nge girdien fare Israel nib fanathin?

¹⁵ Ma felfelan’ e piin ni yad yugu boch e saf ni ngar pigpiggad ku Jehovah u tan e gagiyeg rok fare tapigpig nge fare Governing Body rok. Ya ke tamilang u wun’rad ni yad girdien fare “Israel rok Got.” (Galatia 6:16) Gowa yad e “girdi’ nu yugu boch e nam” nge “pi wasol” ni ur chaggad ngak fare Israel nib fanathin, ma yad e “ma wolduguy e but’” ma “yad be ayuweg e yungi woldug ni grapes” u tan e gagiyeg rok e piin ni kan dugliyrad ko kan ni thothup ni yad e “prist rok Somol” nge ‘pi tapigpig rok Got.’ (Isaiah 61:5, 6) Ma yad ba pasig i machibnag fare thin nib fel’ ni murung’agen Gil’ilungun Got mi yad ma ayuweg e girdi’ ko urngin e nam ni ngar manged pi gachalpen Jesus. Mi yad ma ayuweg fare tapigpig ni ngar gafaliyed fapi saf ni ka fin ni pirieg.

16. Mang fan ni ma ayuweg e piin ni yad yugu boch e saf fare tapigpig nib yul’yul’ mab gonop?

¹⁶ Manang e piin ni yad yugu boch e saf ni ke fel’ rogorad ni bochan e ma tiyan’ fare tapigpig ni ngar pied e ggan ni machib ko ngiyal’ ni ngan pi’ riy. Yad manang ni faan manga de ayuwegrad fare tapigpig nib yul’yul’ mab gonop ma dab ra nanged e machib nriyul’ nu Bible; ma boch e pi machib ni ke tamilang u wun’rad e Jehovah e ir e Pilung, ma yira tay nib thothup fithingan Got, nge murung’agen Gil’ilungun, nge fare tharmiy nib beech nge fayleng nib beech, nge murung’agen e yaal, nge rarogon e piin ni kar m’ad, nge bin riyul’ e machib u murung’agen Jehovah, nge Fak, nge fare kan ni thothup. Piin ni yad yugu boch e saf e yad ma pining e magar ngak “pi walagen” Kristus ni kan dugliyrad ko kan ni thothup, ere yad ma ayuweg e tin ni ka bay ko pi walagen Kristus u fayleng ko ngiyal’ ko tomur.​—Matthew 25:40.

17. Mang e ke rin’ fare Governing Body, ma mang e gad ra weliy ko bin ni migid e thin?

¹⁷ Be lich i yan e piin ni kan dugliyrad ko kan ni thothup, ere dabiyog ni ngar uned ko urngin e ulung ni fan e ngar gagiyegniged e tirok Kristus ban’en. Ere ke dugliy fare Governing Body boch e pumoon u fithik’ e piin ni yad yugu boch e saf ni ngar gafaliyed e branch ofis, nge district, nge circuit nge pi ulung ko Pi Mich Rok Jehovah. Rogon lanin’dad ngak e piin ni piilal ney e be yan u rogon e tay fan ngak Kristus nge fare tapigpig rok nib yul’yul’. Gad ra weliy e re n’en ney ko bin ni migid e thin.

[Footnotes]

Ngada Sulod u Daken

• Mini’ e Tayog e Thin rodad, ma mang e ma tamilangnag ni manang e n’en ni yibe rin’ u lan e pi ulung?

• Nap’an ni yib ni ngan skengnag fare “tempel,” chon mini’ e yad be ngongol ni bod fare tapigpig nib yul’yul’, ma mang e kan tay ni nge mil fan ngorad?

• Mang boch e thin ko Bible ni be yog ni ngan ayuweg fare tapigpig nib yul’yul’?

[Pictures on page 9]

Urngin e chugum, nge machib ni ma gelnag e michan’, nge machib ni yibe wereg e kub muun ko “urngin ban’en rok” Kristus ni be gagiyegnag fare “tapigpig” ara steward

[Picture on page 11]

Piin ni yad yugu boch e saf e ma ayuweg fare tapigpig nib yul’yul’ ni yad ba pasig i wereg e machib