“Gin ni Be Yan fare Fak e Saf Ngay Ma Yad Be Un Ngak”

‘Yad fapi pumoon ni demtrug e gin ni be yan fare Fak e Saf ngay ma yad be un ngak.’​—REV. 14:4.

1. Uw feni ga’ fan u wan’ e tin riyul’ i gachalpen Jesus ni nguur folgad rok?

GONAP’AN l’agruw nge baley e duw ko machib ni tay Jesus, me machib u “lan tafen e muulung u Kapernaum.” Bochan ni kar gingad ko thin ni ke yog “ma aram e boor pi gachalpen nra paged nge dakur uned ngak.” Nap’an ni fith Jesus fa 12 i apostal rok ko ku yad ra un ngak fa danga’, me fulweg Peter ni gaar: “Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafos ndariy n’umngin nap’an ngak e girdi’.” (John 6:48, 59, 60, 66-69) Tin riyul’ i gachalpen Jesus e dar talgad i lek Jesus. Tomren ni kan dugliyrad ko fare gelngin Got nib thothup mu ur pared ni yad be fol ko thin rok Jesus.​—Acts 16:7-10.

2. (a) Mini’ “fare tapigpig nib yul’yul’ ma ba gonop”? (b) Uw rogon ma ke yog ni ngar leked fare “Fak e Saf”?

² Mang e rayog ni nga nog e ngiyal’ ney u murung’agen e piin Kristiano ni kan dugliyrad? Fare yiiy rok Jesus ni murung’agen fare pow ko “ngiyal’ ni bay [yib] riy nge ngiyal’ ni tomren e fayleng.” Re n’ey e be yog murung’agen fare ulung rok ni pi gachalpen ni yad bay u fayleng ni kan dugliyrad ni aram e “fare tapigpig nib yul’yul’ ma ba gonop.” (Matt. 24:3, 45; Luke 12:42) “Demtrug e gin ni be yan fare Fak e Saf ngay ma yad be un ngak.” (Mu beeg e Revelation 14:4, 5.) Gothon e re ulung ney e kar pared ni yad ba machalbog ya dar uned ko n’en ni ma rin’ fare “Babylon nib Gilbuguwan” ni aram e pi yurba’ i teliw ni googsur. (Rev. 17:5) “Dawor ra lifithed l’ugunrad biid; ma dariy e kireb rorad” ya de af ngorad e ngongol ko fayleng rok Satan. (John 15:19) Ra boch nga m’on, ma piin kan dugliyrad ni ka yad bay u fayleng e yad ra ‘lek’ fare Fak i Saf nga tharmiy.​—John 13:36.

3. Mang nib ga’ fan ni nge pagan’dad ngak fare tapigpig nib yul’yul’ ma ba gonop?

³ Ke tay Jesus fare tapigpig nib yul’yul’ ma ba gonop ni nge milfan e “tin ni ka bay e tapigpig” ngak ni aram e be’ nge be’ ko fare ulung ni kan dugliyrad ni nge “pi’ garad ko ngiyal’ ni yima pi’ riy.” Miki tay ni fare tapigpig nib yul’yul’ ma ba gonop e “nge mil fan urngin ban’en rok ngak.” (Matt. 24:45-47) “Urngin ban’en rok” e ba muun ngay e ‘girdi’ ni pire’’ ni aram e “yugu boch e saf.” (Rev. 7:9; John 10:16) Susun ni nge bagayad fa piin ni kan dugliyrad nge “yugu boch e saf ” e nge pagan’rad ko fare tapigpig nib yul’yul’ ma ba gonop. Boor fan ni nge pagan’dad ngorad. Gal ni th’abi ba ga’ fan riy e: Bin som’on, ma pagan’ Jehovah ngak e pi tapigpig ni ba yul’yul’ ma ba gonop. Bin migid e ku ma pagan’ Jesus ngorad. Ngada guyed e mich riy ni Jehovah Got nge Jesus Kristus e ri ma pagan’row ngorad.

Ma Pagan’ Jehovah ko fare Tapigpig nib Yul’yul’ Ma Ba Gonop

4. Mang ni rayog ni nge pagan’dad ko ggan ni tirok Got ni ma pi’ fare tapigpig nib yul’yul’ ma ba gonop?

⁴ Mu lemnag rogon ni be yog rok fare tapigpig nib yul’yul’ ma ba gonop ni nge pi’ e ggan ni tirok Got ko ngiyal’ ni yima pi’ riy. Yog Jehovah ni gaar: “Bay gu fil ngom e kanawo’ ni ir e ngam man riy; bay gog ngom e tin ni ngam rin’ ma bay gu fonownigem.” (Ps. 32:8) Arrogon, Jehovah e ma pow’iyrad. Ere rayog ni nge pagan’dad ko llowan’ nu Bible ni yad ma pi’ ngodad, nge rogon ni yad ma pow’iydad.

5. Mang e be dag ni Got e be pi’ gelngin fare tapigpig nib yul’yul’ ma ba gonop?

⁵ Maku ma pi’ Jehovah gelngin nib thothup ngak fare tapigpig nib yul’yul’ ma ba gonop. Yugu aram rogon ni danir ma guy gelngin Got nib thothup, machane rayog ni ngan guy angin e maruwel ni ke rin’. Mu lemnag e n’en ni ke rin’ fare tapigpig nib yul’yul’ ma ba gonop ko machib u ga’ngin yang e fayleng ni murung’agen Jehovah nge Fak nge fare Gil’ilungun. Pi tapigpig rok Jehovah e yad be machibnag e thin rok Got u fithik’ e pasig u lan 235 e nam. (Mu beeg e Acts 1:8.a) Fare tapigpig nib yul’yul’ ma ba gonop e boor ban’en nib ga’ fan ni yad ma dugliy ni fan e nge yog ni ngar pied e ggan ni tirok Got ngak e girdi’ rok ko ngiyal’ ni ngan pi’ riy. Yad ma rin’ e re n’ey u fithik’ e t’ufeg nge sumunguy nge boch e fel’ngin ni ma yib u gelngin Got nib thothup.​—Gal. 5:22, 23.

6, 7. Uw rogon ni ma pagan’ Jehovah ngak fare tapigpig nib yul’yul’ ma ba gonop?

⁶ Pi n’en ni ke micheg Jehovah ngak fare tapigpig nib yul’yul’ ma ba gonop e yira nang riy gelngin e pagan’ rok ngorad. I yoloy apostal Paul ni gaar: “Bod machregin lan mit be’ ni talab, ko ngiyal’ ni bay non e bin tomur e rappa riy. Ya nap’an nra non, mi ni faseg e yam’ . . . ma gadad gubin ni bay nthilyeg dowdad. Ya n’en nra kireb e thingari yin’ nga daken e n’en ndab ki kireb ni bod e munmad; ya n’en ni bay yim’ e thingari yin’ nga daken e n’en ndabiyog ni nge yim’.” (1 Kor. 15:52, 53) Piin Kristiano ni kan dugliyrad, ni kar pigpiggad ku Got u fithik’ e yul’yul’ mar m’ad mi ni fasegrad ni dab kur m’ad ma kar pared ni kar tolanggad ko pi engel. U Revelation 4:4 e be weliy murung’agrad ni kar pared nga tagil’rad ma kan teeliyawnagrad ko gol ma yad ra mang pilung. Machane ka bay ban’en nib pagan’ Jehovah riy ngorad.

⁷ Revelation 19:7, 8 e be gaar: “Ke taw ko fare ngiyal’ i n’em ni nge mabgol fare Fak e Saf, ma fare pin ni ir e nge mang leengin e ke fal’eg rogon ni ngar mabgolgow. Ya ka ni pi’ mat’awun ni nge yin’ e mad nib beech ma ba wechwech ni be galgal ramaen.” Ke mel’eg Jehovah e piin kan dugliyrad ni ngar manged bpin rok Fak. Rib ga’ e tow’ath nra yog ngorad! Ya dabkur m’ad ma yad ra mang pilung ma yad ra “mabgol” fare Fak e Saf. Ireray e mich riy ni rib pagan’ Got ngak e piin ni kan dugliyrad, ni “demtrug e gin ni be yan fare Fak e Saf ngay ma yad be un ngak.”

Ku Ma Pagan’ Jesus Ngorad

8. Uw rogon ni ke dag Jesus ni be pagan’ ngak e piin ni kan dugliyrad?

⁸ Mang e mich riy ni ku ma pagan’ Jesus ngorad? Bin tomur e nep’ rok Jesus u fayleng, me micheg ban’en ngak fa 11 i apostal rok nib yul’yul’. I gaar: “Urngin e gafgow ni yib ngog ma mpired rog . . . ere rogon ni ke pi’ e Chitamag mat’awug ngog ni ngug gagiyeg, e eram e n’en ni bay gu rin’ ngomed. Bay mu uned ngog ko abich nge garbod u tebel rog ko gin nsuwog, ma bay mpired nga tagil’ e pilung ngam gagiyegniged fa ragag nge l’agruw i ganong nu Israel.” (Luke 22:28-30) Fare m’ag ni fal’eg Jesus u thilrad fa 11 i apostal e ra ulul i yan nge mada’ ko fare 144,000 e piin Kristiano ni kan dugliyrad. (Luke 12:32; Rev. 5:9, 10; 14:1) Gur, rayog ni nge fal’eg Jesus ba m’ag ni ngar uned ngak ko gagiyeg ni faanra der pagan’ ngorad?

9. Mang e pi n’en nib muun ko “urngin ban’en rok” Kristus?

⁹ Maku reb, e ke tay Jesus Kristus fare tapigpig nib yul’yul’ ma ba gonop ni “nge mil fan urngin ban’en rok ngak” ni aram urngin ban’en u fayleng ni bay rogon ngak Got. (Matt. 24:47) Pi n’ey e ba muun ngay e pi talin e maruwel nge chugum ni bay u tochuch ko Pi Mich Rok Jehovah, nge pi ofis rorad ko pi nam i yan, nge pi tafen e muulung rorad u fayleng. Ku ba muun ngay fare machib nge ngan pingeg e girdi’ ngar manged pi gachalpen Jesus. Rayog ni tay be’ e tirok ni ba ga’ fan u wan’ ni nge mil fan ngak be’ ni der pagan’ ngak?

10. Mang e be dag ni ba’ Kristus rok pi gachalpen ni kan dugliyrad?

¹⁰ De n’uw nap’an u m’on ni nge yan tharmiy, me m’ug Jesus ngak pi gachalpen nib yul’yul’ me micheg ngorad ni gaar: “Gubin ngiyal’ ma gu ba’ romed, nge yan i mada’ nga tomren e fayleng.” (Matt. 28:20) Ere ke rin’ Jesus e n’en ni micheg fa danga’? Lan fa 15 e duw ni ke yan ma urngin e ulung ko Pi Mich Rok Jehovah u ga’ngin e fayleng e immoy ni gonap’an 70,000 me yoor nge yan ko 100,000 ni ke pag 40 e pasent e ke mun ngay. Ma ke uw oren e ke mun nga pi gachalpen Jesus? Ba chugur i 4 nge baley e milyon pi gachalpen Jesus ni kan taufenagrad u lan fa 15 e duw ni ke yan, ra ni aw nib pag e 800 e girdi’ ni yibe taufenag u reb e rran. Re oren ney ni ke yoor e mich riy ni be pow’iy Kristus pi gachalpen ni kan dugliyrad ko pi muulung rorad, ma be ayuwegrad ko machib ni yibe pingeg e girdi’ ngar manged pi gachalpen.

Ba Gonop Ma Ba Yul’yul’ fare Tapigpig

11, 12. Fare tapigpig e uw rogon ni ke dag ni ba yul’yul’ ma ba gonop?

¹¹ Bochan nib pagan’ Jehovah nge Jesus Kristus ngak fare tapigpig nib yul’yul’ ma ba gonop ma susun e ngki pagan’dad ngorad. Ya kar daged ni yad ba yul’yul’ ko maruwel ni kan pi’ ngorad. Bod fare babyor ni Wulyang Ntagil’ E Damit ni kan ngongliy ni ke pag 130 e duw. Pi muulung ni ma tay e Pi Mich Rok Jehovah e ma gelnag e michan’ rorad.

¹² Fare tapigpig nib yul’yul’ e ku ba gonop ni bochan e der ma rin’ ban’en ni dawori yog Jehovah maku der ma pag e tin ni ke yog ni ngan rin’. Ni bod e pi tayugang’ ko teliw ni googsur ni yad ma pag ni nge rin’ e girdi’ e tin nib kireb, ya fare tapigpig nib yul’yul’ ma ba gonop e yad ma ginang e girdi’ ko wup rok Satan ni bay ko re fayleng ney. Ma yog rorad ni ngar ginanged e girdi’ ko tin nib kireb ya be ayuwegrad Jehovah Got nge Jesus Kristus. Ere bay rogon ni ngada pagedan’dad ngorad. Uw rogon ni ngad daged ni be pagan’dad ngorad?

13. Rogon ko yiiy rok Zekariah e mini’ e rayog ni nge pagan’ ngak fare tapigpig nib yul’yul’ ma ba gonop?

¹³ Fare babyor rok Zekariah u Bible e be yog “ragag e girdi’” ni ra bad ngak “reb e Jew” me lungurad: “Gamad baadag ni nggu uned ko gin ni ngam man ngay.” (Mu beeg e Zekariah 8:23.b) Fare thin ni “reb e Jew” u roy e be yip’ fan ba ulung e girdi’. Ngiyal’ ney, e be yip’ fan e cha’ ni ir be’ u “Israel u fithik’ i laniyan’.” (Roma 2:28, 29) Fa “ragag e girdi’” ni ra bad u urngin e pi nam e be yip’ fan fare ulung ni ba ga’ ko yugu boch e saf. Piin Kristiano ni kan dugliyrad e demtrug e gin ni be yan Jesus ngay ma yad be lek, ma be un fare ulung ni ba ga’ ngorad. Girdi’ ko re ulung ni ba ga’ nem e darur tamra’gad ni ngan nang ni bay rogorad e piin ni ke micheg Jesus ngorad ni yad ra un ngak nga tharmiy. (John 14:1-3) Ma der tamra’ Jesus ni nge yog e piin ni kan dugliyrad ni “yad pi walagen.”​—Heb. 2:11.

14. Mang e ayuw e rayog ni ngan pi’ ngak pi walagen Kristus?

¹⁴ I yog Jesus ni ngiyal’ ni gad ra ayuweg pi walagen ma bod ni kan pi’ e ayuw ngak. (Mu beeg e Matthew 25:40.) Ere mang ayuw e rayog ni pi’ e piin ni athap rorad e ngar pared u fayleng ngak e pi walagen Kristus ni kan dugliyrad? Yad ma ayuwegrad i machibnag murung’agen fare Gil’ilungun. (Matt. 24:14; John 14:12) Be yan e duw ma be lich gothon fachi ulung ni kan dugliyrad ma be yoor fapi yugu boch e saf. Ere nap’an ni ra un yugu boch e saf ko machib, ni polo’ e tayim rorad ni faan rayog, ma aram e kar ayuweged e piin ni kan dugliyrad ni nge lebug fare maruwel ni ngan fil e thin rok Got ngak e girdi’. (Matt. 28:19, 20) Maku rayog ni ngan pi’ e salpiy ni ayuw ni fan ko re maruwel ney.

15. Susun uw rogon ni nge lemnag e Kristiano e ggan ni tirok Got ban’en ni ma pi’ fare tapigpig nib yul’yul’ ma ba gonop nge tin ni kar dugliyed?

¹⁵ Uw rogon u wan’dad e ggan ni tirok Got ban’en ni ma pi’ fare tapigpig nib yul’yul’ ma ba gonop ko ngiyal’ ni ngan pi’ riy u daken e pi babyor ni kan fek e thin riy u Bible ngu daken e pi muulung rodad? Gad ma felfelan’ ni gad ma beeg e pi babyor nem ma gad be un ko pi muulung ma gad fol ko pi n’en ni kad filed, fa? Gad ma fol ko tin ni ke dugliy fare tapigpig nib yul’yul’ ma ba gonop, fa? Rogon feni gad baadag ni ngad folgad ko thin ni yad be yog e be micheg ni be pagan’dad ko yaram rok Jehovah.​—Jas. 3:17.

16. Mang fan ni urngin e Kristiano ma ngar motoyilgad ngak pi walagen Kristus?

¹⁶ I yog Jesus ni gaar: “Saf rog e yad ma rung’ag lungug, ma gu manangrad, ma yad ma lekeg.” (John 10:27) Aray e n’en ni ma rin’ e piin ni kan dugliyrad. Ma uw rogon e piin ni ‘ma un’ ngorad? Pi cha’ nem e ngar motoyilgad ngak Jesus, maku yad ra motoyil ngak e pi walagen. Ni bochan ni kan pag fan ngorad ni ngar ayuweged e girdi’ rok Got. Mang e muun ko ngan fol ko thin rok pi walagen Kristus?

17. Mang e be yip’ fan e ngan motoyil ko fare tapigpig nib yul’yul’ ma ba gonop?

¹⁷ Fare Governing Body e yad owchen fare tapigpig ni ba yul’yul’ ma ba gonop, ni yad e yad be yarmiy fare maruwel ni machib ko Gil’ilungun u ga’ngin yang e fayleng. Yad e piin piilal ni kar ilalgad ko tirok Got ban’en ma kan dugliyrad. Rayog ni nga nograd ‘ni yad be yog e thin rodad’. (Heb. 13:7) Pi cha’ n’ey ni kan dugliyrad e boor e “maruwel” rorad, ke pag e 7,000,000 e tamachib ko Gil’ilungun u lan boor ko 100,000 e ulung u ni yad be ayuweg u ga’ngin yang e fayleng. (1 Kor. 15:58) Gad ra motoyil ko fare tapigpig nib yul’yul’ ma ba gonop ma aram e gad be pi’ e ayuw ngak fare Governing Body.

Kan Tow’athnag e Piin Ma Motoyil Ngorad

18, 19. (a) Uw rogon ni kan tow’athnag e piin ni kar motoyilgad ko fare tapigpig nib yul’yul’ ma ba gonop? (b) Mang e susun ni ngad dugliyed ni ngad rin’ed?

¹⁸ Ka nap’an nni pi’ e maruwel ko fare tapigpig nib yul’yul’ ma ba gonop ma kar “filed ngak” boor e girdi’ ni nguur rin’ed e tin nib mat’aw. (Dan. 12:3) Pi cha’ ney e ba muun ngay e piin ni ra magey nib fas u nap’an ni yira gothey e re m’ag nib kireb ney. Ri yad ba tow’ath!

¹⁹ Boch ngaram u nap’an ni fare “binaw nib thothup” ni aram Fa Bin nib Beech e Jerusalem [ni fare 144,000] ni bay yib rok Got u tharmiy nga but’ ni ke fal’eg rogon ni bod be’ ni nge mabgol, ma mang e ra buch rok e piin ni kar motoyilgad ngak fare tapigpig nib yul’yul’ ma ba gonop? Be gaar e Bible: “Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Rev. 21:2-4) Ere ngada motoyilgad ngak Kristus nge pi walagen Kristus ni kan dugliyrad.

Mang e Kam Fil?

• Mang e mich riy ni be pagan’ Jehovah ngak fare tapigpig nib yul’yul’ ma ba gonop?

• Mang e be micheg ni kari pagan’ Jesus ngak fare tapigpig nib yul’yul’ mab gonop?

• Mang fan ni bay rogon ni nge pagan’dad ngak fare tapigpig nib yul’yul’ mab gonop?

• Uw rogon ni ngaud daged ni be pagan’dad ngak fare tapigpig nib yul’yul’ mab gonop?

[Picture on page 25]

Ga manang ko mini’ e ke mel’eg Jehovah ni nge mang ppin rok Kristus?

[Pictures on page 26]

Ke tay Jehovah ni fare tapigpig ni ba yul’yul’ ma ba gonop ni nge ayuweg “urngin ban’en rok” Kristus

[Picture on page 27]

Gad ra un ko machib ma aram e gad be ayuweg e piin Kristiano ni kan dugliyrad

[Footnotes]