Ba Puluw e Meybil Rom ko N’en ni Yog Jesus, Fa?

“Faani yog Jesus e pi n’ey nge mu’, me gin fapi girdi’ ni aram urngirad nga rogon e machib ni ke tay.”​—MATT. 7:28.

1, 2. Mang fan ni ke ngat e girdi’ nga rogon ni i machib Jesus?

SUSUN ni nge m’agan’dad ko pi n’en ni i yog Jesus Kristus ni Fak Got mad folgad riy. Ya dariy be’ ni ke machib ni bod ir. Ri ngat e girdi’ nga rogon e welthin ni tay u daken e burey!​—Mu beeg e Matthew 7:28, 29.

² Da i machib Jesus ni bod e pi tamachib ko motochiyel ni yad ma fanay yu bugithin nib n’un’uw ma yad ma puluwnag e machib rorad ko machib ko girdi’. I machib ni “bay gelngin e thin rok” ni bochan e thin ni i yog e yib rok Got. (John 12:50) Ere ngad guyed rogon nthingar da puluwniged e meybil rodad ko welthin rok Jesus u daken e burey.

Dab Mmeybil ni Bod e Piin Ma Madag Girdi’

3. Mog ko mang e yog Jesus ni bay ko Matthew 6:5.

³ Meybil e ba ga’ fan ko bin riyul’ e liyor ma susun e ngaud meybilgad ngak Jehovah ni gubin ngiyal’. Meybil rodad e nge puluw ko n’en ni yog Jesus ko Welthin rok u Daken e Burey. I yog ni gaar: “Faan gimed ra meybil, ma dab mu boded e piin ni yad ma madag girdi’, ni yad ba adag ni ngar sak’iygad ngar meybilgad u lan e pi tafen e muulung nge yungi n’en ni madardar ko kanawo’ ni bochan e nge gubin e girdi’ me guyrad. Dab mpaged talin, ni aram e ke m’ay i pi’ puluwon ngorad ni polo’!”​—Matt. 6:5.

4-6. (a) Mang fan ni baadag e pi Farise ni ngaur “sak’iygad ngar meybilgad u lan e pi tafen e muulung nge yungi n’en ni madardar ko kanawo’”? (b) Uw rogon ni “ke m’ay i pi’ puluwon ngorad ni polo’”?

⁴ Pi gachalpen Jesus e thingar dab ra meybilgad ni bod e pi Farise ni yad ma meybil ni bochan e nge guyrad e girdi’. (Matt. 23:13-32) Pi Farise e yad “ba adag ni ngar sak’iygad ngar meybilgad u lan e pi tafen e muulung nge yungi n’en ni madardar ko kanawo’.” Mang fan? Bochan e “nge gubin e girdi’ me guyrad.” Rogon e yalen ko piyu Jew ko bin som’on e chibog e ra taw ko ngiyal’ ni ngan pi’ e maligach ni kan urfeg mar muulunggad nga taabang nguur meybilgad u bang ko mereb e kolok ni kakadbul nge dalip e kolok ni mithigyal’. Piyu Jew ni ma par u Jerusalem e yad ma muulung ko gin ni bay e tempel riy nguur meybilgad. Ma piin ni ma par u wuru’ fare mach e yad ma yan ra sak’iygad nga “lan tafen e muulung” ngar meybilgad ni ku l’agruw yay u reb e rran.​—Mu taarebnag ko Luke 18:11, 13.

⁵ Yu ngiyal’ e boch e girdi’ e yad ba palog ko tempel fa tafen e muulung, ere ra taw ko ngiyal’ ni ngan meybil ma demtrug e gin ni yad bay riy ma rayog ni ngar meybilgad. Ere boch i yad e yad baadag ni nge taw ko ngal’an e meybil ma yad bay ko “yungi n’en ni madardar ko kanawo’.” Ya yad baadag ni ngeb e “girdi’” ma be guyrad ni yad be meybil. Pi ta dake moding nem e ‘yad ma fek e meybil nib n’uw’ ni bochan e nge yog e girdi’ e sorok ngorad. (Luke 20:47) Machane gadad e susun ndab da rin’ed ni aram rogon.

⁶ I yog Jesus ni “ke m’ay i pi’ puluwon ngorad ni polo’.” Ya n’en nib ga’ fan u wan’rad e nge yog e girdi’ e sorok ngorad ni aram puluwon ni ke yog ngorad ya Jehovah e dar ma fulweg taban e meybil ko piin ni yad ma madag girdi’. Machane rogon e n’en ni ki yog Jesus e ma motoyil Got ko meybil ko piin nriyul’ ni yad be folwok rok.

7. Mang e be yip’ fan fare thin ni ngam man nga “singgil rom” ngam meybil ni goo gur?

⁷ “Faan ga ra meybil, ma ga yan nga singgil rom ngam ning e mab, ma ga meybil ko Chitamam ni be’ ndanir guy. Ma Chitamam ni be guy e n’en ni kam rin’ nde nang e girdi’ e bay pi’ puluwon ngom.” (Matt. 6:6) Fare thin ni yog Jesus ni ngam man nga singgil rom ngam ning e mab ngam meybil ni goo gur e gathi be yip’ fan ndabiyog ni nge fek be’ e meybil u nap’an e muulung. Fan e re n’em ni yog e nge dabi rin’ be’ ban’en ni nga nog e sorok riy ngak u nap’an ni be fek e meybil. Susun ndab da paged talin e re n’ey u nap’an ni ka nog ngodad ni ngad feked e meybil. Ma ku bay boch e fonow ni pi’ Jesus u rogon e meybil ni ngad ted ni ngkud folgad riy.

8. Ba miti mang meybil e dab ud uned ngay nrogon ni be yog ko Matthew 6:7?

⁸ “Faanra mmeybilgad ma dab um sulod u daken taab bugithin ni pire’ yay ni bod ni ma rin’ e piin ni yad ma meybil ngak yugu boch e kan, ni yad be finey ni yira rung’ag e tin ni yad be yog ni bochan e ba n’uw e meybil ni yad be pi’.” (Matt. 6:7) Ku reb e n’en ni yog Jesus ndabin rin’ ko meybil e dab un sul u daken. Re n’ey e gathi be yip’ fan ndab ud sulod u daken e tin ni gad be ning ngak Got nrib t’uf rodad nge n’en ni gad ma pining e magar riy ngak. Bod nnap’an ni i meybil Jesus u daken e milay’ nu gethsemane ko fare nep’ i n’em u m’on ni nge yim’ ma “fapi thin” ni i yog ko meybil rok e boor yay ni i sul u daken.​—Mark 14:32-39.

9, 10. Uw rogon ndab ud sulod u daken taab n’en u nap’an e meybil rodad?

⁹ Dab da meybilgad ni bod rogon ni ma meybil e “piin ni yad ma meybil ngak yugu boch e kan.” Yad ma “sul u daken” boch e meybil ni ke mit ngorad nib muun ngay boch e thin nde ga’ fan. De yib e ayuw ngak e piin ni ur “meybilgad ngak Baal nge mada’ ko misiw’ ni yad be tolul ni lungurad ‘Baal mfulweg taban e meybil romad!’” (1 Ki. 18:26) Bokum milyon e girdi’ e ngiyal’ ney e yad ma sul u daken bogi meybil nib n’uw ni kar filed ke mit ngorad ya yad be lemnag ni “yira rung’ag” e meybil rorad. Machane ke ayuwegdad Jesus kad nanged ni mit ney e meybil ni yima sul u daken nib “n’uw” ma boor e thin ni yima yog riy e dariy fan u wan’ Jehovah. Ki yog Jesus ni gaar:

¹⁰ “Dab mboded yad; yi Got ni Chitamangimed e manang e n’en nthingari yog ngomed u m’on ndawor mu ninged ngak.” (Matt. 6:8) Boor e pi tayugang’ ko teliw nu Jew kakrom nra boded e piin ni gathi yad piyu Jew ni yad ma yog yu bugithin nib n’un’uw u nap’an ni yad ma meybil. Meybil ni ke yib u gum’irchadad ni bod ni ngad pininged e sorok ngak Got, ara gad be og e magar, ara gad be ning ban’en ngak e bang ko liyor rodad nrib ga’ fan. (Fil. 4:6) Machane de fel’ ni nguud sulod u daken taab n’en ni gad be lemnag nri pag Got talin e n’en nib t’uf rodad. Ya nap’an ni gad be meybil ma ngad lemnaged ni En ni gad be meybil ngak e ‘manang e n’en nthingari yog ngodad u m’on ndawor da ninged ngak.’

11. Mang e dab da paged talin u nap’an ni gad be fek e meybil u fithik’ e yoor?

¹¹ N’en ni yog Jesus u murung’agen e meybil nde puluw e be puguran ngodad nde ga’ fan u wan’ Got ni nga u dogned yu bugithin nib gagang’ ara yu bugithin nde ga’ fan u nap’an ni gad be meybil. Kub t’uf ni ngad nanged nnap’an ni gad be fek e meybil u fithik’ e yoor ma dab da gayed rogon ni nga nog e sorok ngodad fa n’uw i n’uw e meybil rodad nge dab ki motoyil e girdi’ ngay ya n’en ni yad be lemnag e ngiyal’ ni nge m’ay fare meybil. Ku de puluw ko fare welthin rok Jesus u daken e burey ni ngad uneged boch ban’en ko meybil rodad nde t’uf ni ngan weliy ko ngiyal’ nem fa da fonownaged e girdi’ u nap’an ni gad be fek e meybil.

Ke Fil Jesus Rogon e Meybil

12. Uw rogon ni ga ra weliy feni ga’ fan fapi thin ni “ngan tay fan fithingam nib thothup”?

¹² Gathi kemus ni yog Jesus e n’en ndabin rin’ u nap’an e meybil, ya ki fil ngak pi gachalpen rogon ni ngar meybilgad. (Mu beeg e Matthew 6:9-13.) Fare kenggin e meybil ni fil Jesus ngak pi gachalpen e gathi bochan e nge mit ngorad nguur sulod u daken e thin riy ni gubin ngiyal’. Ya kemus ni be dag kanawoen e meybil. Bod ni n’en ni yog Jesus ko re meybil nem nsom’on e: “Chitamangimad ni ga bay u tharmiy. Ngan tay fan fithingam nib thothup.” (Matt. 6:9) Ba puluw ni ngad pininged Jehovah ni “Chitamangimad” ni bochan e ir e Sunmiydad, ni ma par u “tharmiy.” (Deut. 32:6; 2 Kron. 6:21; Acts 17:24, 28) Fare bugithin ni “Chitamangimad” e be puguran ngodad ni gathi kemus ni goo gadad e ba fel’ e tha’ u thildad Got ya ku arrogon e piin taareb e michan’ rodad. Fapi thin ni “ngan tay fan fithingam nib thothup” e yibe wenig riy ngak Jehovah ni nge tolangnag fithingan ni kan darifannag ni ka nap’an ni tabab e togopuluw u Eden. Dabki n’uw nap’an me chuweg Jehovah e kireb u fayleng me tolangnag fithingan ni aram e fulweg ko re meybil nem.​—Ezek. 36:23.

13. (a) Uw rogon nra lebug fare thin ni mu, “par ni gur e ga be gagiyegnagmad”? (b) Mang e ba muun ko n’en nra rin’ Got ni fan ko fayleng?

¹³ “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matt. 6:10) Re ‘gagiyeg’ nem ni yog Jesus ko fare kenggin e meybil ni fil ngak pi gachalpen e be yip’ fan Gil’ilungun Kristus ni Ir nge fapi “girdi’ ko fare Got ni ir e Th’abi Tolang” e yad e yad ra gagiyeg riy. (Dan. 7:13, 14, 18; Isa. 9:6, 7) Ma fare thin ni gad be ning ni nge ‘gagiyegnagdad’ e gad be ning Gil’ilungun Got ni nge chuweg e kireb u fayleng. Dabki n’uw nap’an me buch e re n’em ma tomur riy e ra paradis ga’ngin e fayleng ma tin nib mat’aw e ngongol e bay i par riy me gapas me fel’ rogon gubin ban’en. (Ps. 72:1-15; Dan. 2:44; 2 Pet. 3:13) Chiney e yibe rin’ e tin nib m’agan’ Jehovah ngay u tharmiy. Ere fare n’en ni gad be ning ni nge rin’ e tin nib m’agan’ ngay u roy u but’ e gad be wenig ngak Got ni nge rin’ e tin nib m’agan’ ngay ni fan ko re fayleng ney nib muun ngay ni nge chuweg e piin ni yad be togopuluw ngak ni bod ni rin’ kakrom.​—Mu beeg e Psalm 83:1, 2, 13-18.

14. Mang fan nib puluw ni ngad ninged e ggan ni nge yog ngodad “u reb e rran ngu reb”?

¹⁴ “Mpi’ ngomad e daba’ e ggan ni nge yog ngomad.” (Matt. 6:11; Luke 11:3) Faan gad ra yog e pi thin ney ko meybil rodad ma aram e gad be ning e ggan ngak Got “u reb e rran ngu reb.” Be dag e re n’ey ni be pagan’dad ngak Jehovah nra pi’ e tin nib t’uf rodad u gubin e rran. Machane, gathi ngad ninged e pi n’ey nge pag urngin ni bod rogon e n’en ni yog Got ngak piyu Israel u rogon ni ngan kunuy e manna ni kemus ni chi ‘nap’an e tin ni ngar kayed u reb e rran’ e ngar kunuyed.​—Ex. 16:4.

15. Mang fan fare thin ni mu “n’ag fan u wan’um e kireb romad, ni bod ni kug n’iged fan u wan’mad e kireb ni ke rin’ boch e girdi’ ngomad”?

¹⁵ Ma bin migid ni bay ko re meybil nem e be tamilangnag ban’en nib t’uf ni ngad rin’ed. I gaar Jesus: “Ma ga n’ag fan u wan’um e kireb romad, ni bod ni kug n’iged fan u wan’mad e kireb ni ke rin’ boch e girdi’ ngomad.” (Matt. 6:12) Faan gad ra ‘n’ag fan u wan’dad’ e kireb ni ke rin’ be’ ngodad ma aram e ra n’ag Jehovah fan e kireb rodad. (Mu beeg e Matthew 6:14, 15.) Ere ba t’uf ni ngaud n’aged fan e kireb ko piin ni kar rin’ed e kireb ngodad.​—Efe. 4:32; Kol. 3:13.

16. Mang fan fapi thin u murung’agen e skeng nib mo’maw’ nge rogon ni nge ayuwegdad Got rok faanem nib kireb?

¹⁶ “Dab mfekmad i yan ko skeng nib mo’maw’, machane ngam ayuwegmad rok Faanem nib Kireb.” (Matt. 6:13) Mang fan e gali thin ney? Jehovah e dar ma waliydad ngad denengad. (Mu beeg e James 1:13.) Ya “Moonyan’” ni ir Faanem nib Kireb e ir e ma waliydad ko denen. (Matt. 4:3) Yu ngiyal’ e ma yog e Bible ban’en ni ke buch nib kireb ni gowa Got e ke k’aring machane bin riyul’ riy e kemus ni be pag ni nge buch e re n’em. (Ruth 1:20, 21; Ekl. 11:5) Fan fare thin ni “dab mfekmad i yan ko skeng nib mo’maw’” e yibe wenig ngak Jehovah ni nge dabi pagdad ngad awgad ko kireb u nap’an ni kan waliydad. Ma fan fare thin ni “ngam ayuwegmad rok Faanem nib Kireb” e nge dabi pag Jehovah Satan ni nge k’aringdad ngad denengad. Rayog ni nge pagan’dad ndabi ‘pag Got nge yib ngodad e pi n’en ni ma waliy e girdi’ nge denen nge pag rogon ndabiyog ni ngad taleged gadad riy.’​—Mu beeg e 1 Korinth 10:13.

‘Mu Ning, Ma Ga Be Gay, Mag Tugtuguy e Mab’

17, 18. Mang fan fapi thin ni ngan ‘ning, min gay, min tugtuguy e mab’?

¹⁷ I pi’ apostal Paul e athamgil nga laniyan’ e pi Kristiano kakrom ni gaar: “Um meybilgad ni gubin ngiyal’.” (Rom. 12:12) Kub chugur fan e n’en ni yog Jesus u nap’an ni gaar: “Mu ninged, me yog ngomed; mu gayed mi gimed pirieg; mu tugtuguyed e mab, min bing e mab ngomed. Ya urngin e piin ni yad ra ning e ra yog ngorad, ma en nra gay e ra pirieg, ma mab e yira bing ngak e en nra tugtuguy.” (Matt. 7:7, 8) Ba puluw ni ngad “ninged” e tin nib m’agan’ Got ngay. I fol apostal John ko thin ni yog Jesus me gaar: “Aram fan nib pagan’dad u p’eowchen Got; mmudugil u wan’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.”​—1 John 5:14.

¹⁸ Fan fare fonow rok Jesus ni ngad ‘ninged ma gad be gay’ e be yip’ fan ni nguud meybilgad ni gubin ngiyal’. Kub ga’ fan ni ngad “tugtuguyed e mab” ya nge yog Gil’ilungun Got ngodad nge pi flaab riy. Rayog ni nge pagan’dad nra fulweg Got taban e meybil rodad? Rayog, ni faanra da yul’yul’ gad ngak Jehovah ya gaar Jesus: “Urngin e piin ni yad ra ning e ra yog ngorad, ma en nra gay e ra pirieg, ma mab e yira bing ngak e en nra tugtuguy.” Boor ban’en ni ke buch rok e pi tapigpig rok Jehovah ni be micheg ni Got e ma “fulweg taban e meybil.”​—Ps. 65:2.

19, 20. Uw rogon ni ke taareb rogonnag Jesus Jehovah ngak ba matam nib t’uf pi fak rok u Matt. 7:9-11?

¹⁹ I taarebrogonnag Jesus Got ngak ba matam nib t’uf pi fak rok ma ma pi’ e tin nib t’uf rorad. Mu lemnag ni um moy u nap’an ni be Welthin Jesus u Daken e Burey mag rung’ag e n’en ni yog ni gaar: “Rayog ni nge pi’ bigimed e pi matam ba malang ngak fak ni faanra ning fak e ggan ngak? Ara pi’ ba porchoyog ngak ni faanra ning e nig ngak? Yugu ereyer fanmed kireb, ma gimed manang rogon ni ngam pied e tin nib fel’ ban’en ngak pi fakmed. Ere Chitamangimed ni bay u tharmiy e ri ra pi’ e tin nib fel’ ban’en ngak e piin ni yad ra ning ngak!”​—Matt. 7:9-11.

²⁰ Ba matam e ma t’ufeg pi fak ni yugu aram rogon ndawori flont ni ku ma rin’ e “kireb.” Dabi kirebnag laniyan’ fak ma ra athamgil ni nge pi’ e “tin nib fel’ ban’en ngak.” Ere ku arrogon e Chitamangidad nu tharmiy ni ma pi’ e “tin nib fel’,” ngodad ni bod gelngin nib thothup. (Luke 11:13) Re n’ey e ra pi’ gelngidad ni ngad pigpiggad ngak Jehovah u rogon nib m’agan’ ngay, ni ir faen ni ma “pi’ urngin e tin nib fel’ . . . nge urngin e tow’ath nrib manigil.”​—Jas. 1:17.

Um Fil e Thin rok Jesus nge Yib Angin Ngom

21, 22. (a) Mang e ba t’uf ni ngan lemnag ko fare Welthin u Daken u Burey? (b) Uw rogon e pi thin rok Jesus ney u wan’um?

²¹ Dariy ba welthin nrib fel’ ni bod fare Welthin rok Jesus u Daken e Burey. Rib manigil ni bochan e n’en ni kad filed riy u murung’agen Got nge rogon fene rib tamilang e thin riy. Rogon e n’en ni kad filed ko pi thin ney e ra yib angin ngodad ni faan gad ra fol riy. Pi thin rok Jesus ney e ra mon’ognag e par rodad me yibnag e felfelan’ ngodad boch nga m’on.

²² Kari mus ni buchuuw ko fapi thin nrib ga’ fan ni yog Jesus ko Welthin rok e kad filed u lan fapi thin ni ke yan nib muun e biney ngay. Aram fan ni piin nrung’aged e re welthin nem e ra ‘gingad nga rogon e machib ni tay.’ (Matt. 7:28) Ere dabisiy ni ku arrogon e n’en ni gad ra rin’ ni faan gad ra suguy lanin’dad nge gum’irchadad nga gubin e n’en ni yog Jesus Kristus, ni fare Sensey nth’abi Fel’.

Mang e Fulweg Rom?

• Mang e yog Jesus u murung’agen e meybil ko piin ni yad ma madag girdi’?

• Mang fan ndab ud sulod u daken taab bugithin u nap’an ni gad be meybil?

• Mang e bay ko fare kenggin e meybil ni fil Jesus ngak pi gachalpen?

• Mang e be yip’ fan fapi thin ni ngad ‘ninged, mad gayed, mad tugtuguyed e mab’?

[Picture on page 19]

De m’agan’ Jesus ko piin ni ur meybilgad ni bochan e nge yog e girdi’ e sorok ngorad

[Picture on page 21]

Ga manang ko mang fan nib puluw ni ngad yibilayed e ggan ni ngad ked u reb e rran ngu reb?