Fare Tapigpig nib Yul’yul’ nge Piin ni Owchen

“Mini’ e en ni ir fare tapigpig nib yul’yul’ ma ba gonop? I ir e en ni masta rok e tay ni nge mil fan urngin ban’en ngak, ma be ayuweg e tabinaw, ma be pi’ ngak e tin ni ka bay e tapigpig e tirorad e ggan ko ngiyal’ ni yima pi’ riy?”​—LUKE 12:42.

1, 2. Mang e deer nib ga’ fan ni ke fith Jesus u murung’agen e tin tomuren e rran?

NAP’AN ni be weliy Jesus murung’agen e pow ko tin tomuren e rran me fith ni gaar: “Mini’ e en ni ir fare tapigpig nib yul’yul’ ma ba gonop? I ir e en ni masta rok e ke tay ni nge mil fan e tin ni ka bay e tapigpig ngak, ni nge pi’ garad ko ngiyal’ ni yima pi’ riy.” Miki yog ni ir e en ni masta rok e ke tay ni nge mil fan e tin ni ka bay e tapigpig ngak, ni nge pi’ garad ko ngiyal’ ni yima pi’ riy. Ma tomur riy e yira tow’athnag e re tapigpig ney ya ke par nib yul’yul’ ma aram e ra milfan urngin ban’en ko Masta rok ngak.​—Matt. 24:45-47.

² In e pul u m’on riy me fith Jesus reb e deer ni kub chugur rogon ko biney. (Mu beeg e Luke 12:42-44.) I yog ni ‘fare tapigpig e ke milfan urngin ban’en ngak.’ Ngemu’ miki weliy murung’agen e tin ni ka ‘bay e tapigpig.’ Machane ra ni aw ni fare tapigpig ni ke milfan urngin ban’en ngak e ku ir reb e tapigpig. Ere mini’ e re tapigpig nem ma uw rogon ni be pi’ ngak e tin ka bay e tapigpig e tirorad e ggan ko ngiyal’ ni yima pi’ riy? Rib ga’ fan ni gadad gubin e ngad nanged ko mini’ e yibe fanayrad ni ngar ayuweged gadad ko tirok Got ban’en.

3. (a) Uw rogon ni i weliy e Kristiano ni googsur fan e “fare tapigpig” ni yog Jesus? (b) Mini’ e en ni “ke mil fan urngin ban’en ngak” ara “fare tapigpig” ma mini’ e “tin ni ka bay e tapigpig”?

³ Boch e girdi’ e ba ga’ ni yad ma lemnag ni thin rok Jesus e be yip’ fan e liw rok e girdi’ ni yima yog e Kristiano ngorad. Machane de yog Jesus ni bay boor e tapigpig ni yad ra sul ko teliw ni Kristiano ni googsur. Ya ke yog nib tamilang ni kemus ni taareb e tapigpig ni ir e ke milfan urngin ban’en rok ngak. Ere re babyor ney e ke weliy ni fare tapigpig ni yog Jesus e be yip’ fan fa chi ulung ni kan dugliyrad. Thin ni yoloy Luke e ku be dag ni be weliy Jesus murung’agrad. (Luke 12:32) “Tin ni ka bay e tapigpig” e ku be yip’ fan ni yad e piin ni kan dugliyrad machane re ngochol rorad ney e be gagiyelnag bagayad nge bagayad. Ba aray reb e deer, Urngin e Kristiano ni kan dugliyrad e yad ma un ko maruwel ni ngan pi e ggan ko ngiyal’ ni yima pi riy? Gad ra nang e fulweg riy ni faan gad ra fil e thin nu Bible nib fel’ rogon.

Tapigpig Rok Jehovah Kakrom

4. (a) Uw rogon ni ke non Jehovah ngak fare nam nu Israel kakrom? (b) Ma mang e n’en nib ga’ fan ni ngad nanged u murung’agen?

⁴ Ke non Jehovah ngak e girdi’ rok kakrom ni aram e nam nu Israel ni bod ni be non ngak taareb e tapigpig rok. I gaar Jehovah ngorad: “‘Gimed e pi mich rog [yad boor],’ ni ‘ba tapigpig rog [taareb] ni kug mel’eg.’” (Isa. 43:10, NW) Be non Jehovah ngak piyu Israel ni bod reb e tapigpig rok. Machane gad manang ni kemus ni piin ni prist nge piyu Levite e ke mil fan ngorad ni ngar filed fare Motochiyel ngak piyu Israel.​—2 Kron. 35:3; Mal. 2:7.

5. Mang e n’en nra thil ni bod rogon ni yog Jesus?

⁵ Gur fare tapigpig ni i weliy Jesus Kristus murung’agen e be yip’ fan fare nam nu Israel? Danga’. Gad manang ni aram rogon ya i yog Jesus ngak piyu Jew ni gaar: “Ere nggog ngomed ni gagiyeg rok Got e bay ni chuweg romed ngan pi’ ngak girdien reb e nam ni yad e bay yib wom’enginrad nib fel’.” (Matt. 21:43) Ba tamilang ni ra fanay Jehovah reb e nam nib beech. Machane, tapigpig ko fare fanathin ni weliy Jesus e ra rin’ fare n’en ni yog Got ngak fare “tapigpig” rok ni aram fare nam nu Israel.

Ke M’ug fare Tapigpig nib Yul’yul’

6. Mang fare nam ni ke m’ug ni de n’uw nap’an u tomren ni ke yim’ Jesus, ma mini’ e ke mang bang riy?

⁶ Fare nam nib beech ni ka nog ni “be’ u Israel u fithik’ i laniyan’,” e yad e piin ni kan dugliyrad. (Gal. 6:16; Rom. 2:28, 29; 9:6) Ke m’ug ere ulung nem ni de n’uw nap’an u tomuren ni ke yim’ Jesus Kristus. Chingiyal’ nem ma urngin e Kristiano ni kan dugliyrad ko kan ni thothup e kar manged bang ko fare nam ni ke dugliyrad Jesus Kristus ni ngar manged tapigpig. Ra ba ga yad ma kan tay chilen ngak ni nge machibnag ma nge fil e thin rok Got ngak e girdi’. (Matt. 28:19, 20) Machane gur, yad gubin ni be’ nge be’ e nge un ko fare maruwel ni ngan pi’ e ggan ko ngiyal’ ni yima pi’ riy? Ngad guyed ko uw rogon ni be tamilangnag e Bible.

7. Mang e maruwel ko pi apostal ko som’on, ma ku mang e maruwel ni kan pi’ ngorad?

⁷ Nap’an ni ke mel’eg Jesus fa ragag nge l’agruw e apostal rok ma bin ba ga’ e maruwel ni ke pi’ ngorad e ngar machibniged fare thin nib fel’ ngak e girdi’. (Mu beeg e Mark 3:13-15.) Re maruwel ney e ba puluw ko fare thin ni Greek ni apostolos, ni be yip’ fan ni “kan l’og.” Machane nap’an ni ke yoor boch pi gachalpen Kristus ma pi apostal e kar manged e ‘piin ma ayuweg ulung.’​—Acts 1:20-26.

8, 9. (a) Mang e th’abi ga’ fan u wan’ fa 12 apostal? (b) Mini’ e ke pi’ e piin ma pow’iyey e maruwel ngorad?

⁸ Mange e rib ga’ fan u wan fare 12 i apostal? Rayog ni ngad nanged e fulweg riy ko n’en ni buch u tomren e Pentekost. Nap’an ni sum fare magawon u murung’agen e ggan ni ngan pi’ ngak e piin ni kem’ figirngirad ma fa 12 i apostal e kar kunuyed boch e Kristiano me lungurad: “De mat’aw ni nggu paged i machibnag e thin rok Got ngak e girdi’ mu gu tedan’mad ko tin ni nge yog ngak be’ nge be’.” (Mu beeg e Acts 6:1-6.) Ke yarmiy e pi apostal boch e walag ni pumoon ni kar ilalgad ko tirok Got ban’en ni ngar rin’ed e re “maruwel” nem. Ma aram e rayog ni nge ulul e pi apostal ko fare “maruwel ko machib.” Ma ke tow’athnag Jehovah e re yaram nem ya “i wer e thin rok Got i yan” ma ki yoor e Kristiano u Jerusalem. (Acts 6:7) Ere bin ni ba ga’ e maruwel rok e pi apostal e aram e ngar filed e thin rok Got ngak e girdi’.​—Acts 2:42.

⁹ Munmun ma boch e walag e kan pi’ boch e maruwel ngorad. Ma Gelngin Got e ke pow’iy fare ulung nu Antioch ni ngar l’oged Paul nge Barnabas ni nga ranow ko machib. Ku nog ni yow l’agruw i apostal machane gathi yow bang ko fare 12 i apostal. (Acts 13:1-3; 14:14; Gal. 1:19) Ma fare ulung ni ma pow’iyey u Jerusalem e kar rogned ni Got e ke pi’ ngorow e re maruwel ney. (Gal. 2:7-10) De n’uw nap’an nga tomren me yoloy Paul e bin som’on e babyor rok ni kan thagthagnag.

10. Urngin e girdi’ kakrom e kan fanayrad ni ngar yoloyed e babyor u Bible? Mu weliy.

¹⁰ Machane, urngin e Kristiano ni kan dugliyrad ni ngar yarmiyed rogon e machib ni yibe tay nge babyor ni yibe ngongliy ni fan ko ulung? Danga’. Yog apostal Paul ni gaar: “Gathi yad gubin ni apostal, ara pi profet, ara pi tamachib. Ma gathi yad gubin ni ba’ gelngirad nrayog ni ngar ngongliyed e maang’ang.” (1 Kor. 12:29) Yugu aram rogon ni urngin e Kristiano ni kan dugliyrad ni ngar uned ko machib ma kemus ni meruk e kan fanayrad kar yoloyed 27 e babyor u Bible ni thin nu Greek ni aram e Matthew nge mada’ ko Revelation.

Fare Tapigpig nib Yul’yul’ e Ngiyal’ Ney

11. Mang “urngin ban’en” rok Kristus ni ke milfan ngak fare tapigpig?

¹¹ Thin rok Jesus u Matthew 24:45 e be dag ni ka bay fare tapigpig nib yul’yul’ e ngiyal’ ney. Thin ni bay ko Revelation 12:17 e be yog ni yad “piin ni yad ba’” ni Owchen fare pin. Tin ka bay ko pi Kristiano ni kan dugliyrad e ke milfan urngin ban’en rok Kristus ngorad. “Urngin ban’en” rok Kristus u fayleng e ba muun ngay e girdi’ ni yad be athapeg ni ngar pired u roy u fayleng nge urngin ban’en ni yima fanay ko maruwel ni ngan wereg fare thin nib fel’.

12, 13. Uw rogon me nang reb e Kristiano ni bay e athap rok ko yan nga tharmiy?

¹² Uw rogon ni nge nang reb e Kristiano ni ir bagayad e piin ni ka bay ko piin ni kan dugliyrad? Fulweg riy e rayog ni ngan guy ko thin ni yog Paul ngak e girdi’ ni yad be athapeg ni nga ranod nga tharmiy ni gaar: “Piin ni be pow’iyrad gelngin Got e yad pi fak Got. Ya der ma taymed ni gimed e sib nguum pired ni gimed be rus; ya gelngin Got e ma ngongliymed ngam manged pi fak Got, ma gelngin e gadad ma non riy ngak Got ni ma  lungudad, ‘Chitamag! Chitamag!’ Ma Gelngin Got e ir e be micheg nga lanin’dad ni gadad pi fak Got. Ere faanra kad manged pi fak, ma rayog ngodad e flaab ni ke tay ni fan ko girdi’ rok, ma ku ra da uned ngak Kristus ngad fanayed e tin ni ke tay Got ni fen; ya faanra gadad be un ko gafgow ni tay Kristus, ma ka gadad ra un ko flaab rok.”​—Rom. 8:14-17, NW.

¹³ Ba tamilang ni gelngin Got nib thothup e ir e ke ‘pining’ e piin kan dugliyrad ni nga ranod nga tharmiy. (Heb. 3:1) Ere Got e ke piningrad ma der rusgad ni ngar manged pi fak Got. (Mu beeg e 1 John 2:20, 21.) Ere Jehovah e ke mel’egrad me pi’ gelngin ngorad.​—2 Kor. 1:21, 22; 1 Pet. 1:3, 4.

Lem nib Puluw

14. Uw rogon u wan’ e piin kan dugliyrad e athap rorad ni nga ranod nga tharmiy?

¹⁴ Uw rogon u wan’ e piin ni kan dugliyrad fare athap rorad ni nga ranod nga tharmiy? Yad manang nrib fel’ e re athap nem machane gathi yad e kar mel’eged ya kan piningrad. Thingar ra pired nib yul’yul’ nge mada’ ko yam’ ma aram e rayog e re tow’ath nem ngorad. Yad be folwok rok Paul ni gaar: “Pi walageg, ri dagur finey ni kug taw ngay; machane re n’en ni kug rin’ e kug pag talin e n’en ni bay nga keruug, ma gu be athamgil ni nggu taw ko n’en ni ir e ba’ nga m’on rog. Ere gu be mil nib k’iy kanawoeg i yan ko n’en ni gu be nameg ni bochan e nge yog puluwon ngog, ni aram e pong ni ke ta’ Got ngodad u daken Kristus Jesus ni nga darod ko yafos ni bay u tharmiy.” (Fil. 3:13, 14) Tin ka bay ko piin kan dugliyrad e thingar ra athamgilgad ni ‘dabi mul u pa’rad e athap rorad ma nge sobut’an’rad.’​—Efe. 4:1, 2; 1 Thess. 2:12.

15. (a) Susun nge uw rogon u wan’uy e piin ma kay e flowa me unum e wain u nap’an e Puguran? (b) Ma piin kan dugliyrad e susun uw rogon ni ngar lemnaged e re tow’ath rorad nem?

¹⁵ Ma ku susun nge uw rogon u wan’uy e en ni ke unum e wain me kay fare flowa u nap’an e Puguran? Thingar dab nog nib kireb e n’en ni ke rin’ ya kemus ni ban’en u thilrow Jehovah. (Rom. 14:12) Machane piin Kristiano nriyul’ ni kan dugliyrad e susun dab ra lemnaged ni kab ga’ farad ngak e tin ni ka ba’ e girdi’. Darur ma lemnaged ni ka boor e tamilangan’ rorad ngak girdien fare ulung “ni pire’ ni pire’ [“fare ulung nib ga’,” NW].” (Rev. 7:9) Maku da rur ma lemnaged ni ka ba gel e ayuw ni ma pi’ gelngin Got ngorad ngak e piin ni “yugu boch e saf.” (John 10:16) Ma ku darur lemnaged ni yad ba tolang ngak e piin piilal u lan e ulung.

16-18. (a) Gur urngin e piin ni kan dugliyrad u ga’ngin e fayleng e yad ma weliy fan e thin nu Bible u taabang? Mu weliy. (b) Mang fan ni Piin ni Ma Pow’iyey e de t’uf ni ngar nonad urngin e piin ni kan dugliyrad u m’on ni ngar turguyed ban’en?

¹⁶ Gur urngin e piin ni kan dugliyrad u ga’ngin e fayleng e yad ma weliy fan e thin nu Bible u taabang? Danga’. Ya ba thilthil e maruwel rorad. (Mu beeg e 1 Korinth 12:14-18.) Taareb rogon ko n’en ni kad weliyed faram ni urngin e Kristiano kakrom e kar uned ko machib. Machane kemus ni buchuuw e girdi’ ni kar yoloyed e Bible ma ku buchuuw e piin ni ur ayuweged e ulung.

¹⁷ Ni bod ni: Thin nu Bible e be yog ni “galesiya [“ulung,” NW]” e ke rin’ ban’en ni bay rogon ko magawon u lan e ulung. (Matt. 18:17) Machane tin riyul’ riy e kemus ni piin piilal e kar pithiged e re magawon nem. De t’uf ni ngar nonad ngak urngin e girdi’ u lan fare ulung u m’on ni ngar dugliyed ban’en. Piin ni piilal e kemus ni yad be rin’ e maruwel ni kan pi’ ngorad ni yad owchen fare ulung.

¹⁸ Ma ku arrogon e ngiyal’ ney ni buchuuw ko piin ni kan dugliyrad e kan pi’ e maruwel ngorad ni yad owchen fare tapigpig. Ma yad e Piin ni Ma Pow’iyey ni Pi mich Rok Jehovah. Pi cha’ ney e yad ma ayuweg fare maruwel ko machib ma ku yad ma ayuwegdad ni ngad pired nib gel e michan’ rodad. Taareb rogon kakrom ni Piin ni Ma Pow’iyey e de t’uf ni ngar nonad ngak urngin e girdi’ ni yad bang ko fare Tapigpig u m’on ni ngar dugliyed ban’en. (Mu beeg e Acts 16:4, 5.) Machane urngin e Pi Mich Rok Jehovah ni kan dugliyrad e yad be un ko machib ni yad ba pasig. Fare Tapigpig nib yul’yul’ mab Gonop e yad ba taareb machane ra bagayad ma bay e maruwel rok.​—1 Kor. 12:19-26.

19, 20. Uw rogon u wan’ fare ulung nib ga’ “fare tapigpig nib yul’yul’ mab gonop” nge piin ni owcherad?

¹⁹ Uw rogon u wan’ fare ulung nib ga’ e pi n’en ni kan weliy? Yad ba felfelan’ ni ngar folgad ko Piin ni Ma Pow’iyey ni yad owchen “fare tapigpig nib yul’yul’ mab gonop.” Fare ulung nib ga’ e ba ga’ fan u wan’rad e pi babyor ni ma pi’ Fare Ulung ni Ma Pow’iyey. Machane yad ma kol ayuw ni dab ra tolangniged e en ni ma yog ni ir bang ko fare tapigpig. Ma ku piin ni kan dugliyrad u gelngin Got nib thothup e dab ra lemniged ni yira tolangnagrad.​—Acts 10:25, 26; 14:14, 15.

²⁰ Demtrug ko gadad bang ko “tin ni ka bay e tapigpig” ara gadad bang ko ulung nib ga’ ma ngada folgad ko piin ni ke mil fan urngin ban’en ngorad nge piin ni owcherad. Manga yugu da ‘fal’eged rogodad ngad pired’ ma ngad yul’yul’ gad nge mada’ ko tomur.​—Matt. 24:13, 42.

Ka Ga Manang?

• Mini’ “fare tapigpig nib yul’yul’ mab gonop” ma mini’ e tin ni ka bay e tapigpig?

• Uw rogon ni ra nang be’ ni bay e athap rok ni nge yan nga tharmiy?

• Mini’ e ke mil fan ngorad ni ngar pied e babyor ni be ayuwegdad ko tirok Got ban’en?

• Uw rogon u wan’ e en ni kan dugliy e re tow’ath rok ney?

[Picture on page 31]

Ngiyal’ ney ma fare Ulung ni Ma Pow’iyey e yad owchen fare tapigpig nib yul’yul’ mab gonop. Ki immoy e yaram ni aram rogon kakrom