Ngan Fol ko Piin Ma Gafaliy e Saf u Fithik’ e T’ufeg

“Mu folgad ko thin rok e piin ni yad be yog e thin romed.”​—HEBREWS 13:17.

1, 2. Mang e thin nu Bible ni be dag ni Jehovah nge Jesus e yow ma gafaliy e saf u fithik’ e t’ufeg?

JEHOVAH GOT nge Jesus Kristus ni fak, e yow Ma Gafaliy e saf u fithik’ e t’ufeg. Ke yiiynag Isaiah ni gaar: “I Somol e be yib ni nge gagiyeg nga gelngin, bayi fek i yib e girdi’ ni ke chuwegrad u pa’ e toogor rorad. Bay i ayuweg fare ran’ i saf rok ni bod rogon be’ ni ma gafaliy e saf; bayi kunuy fapi pi fak e saf nga taabang, mi i fekrad ni ke uchuchumiyrad; pi chitiningirad e bay i pow’iyrad Somol nib saf’og.”​—Isaiah 40:10, 11.

² Fare yiiy ni ngan sulweg e tin ni ke magey piyu Israel nga taferad e ke lebug e bin som’on u nap’an nra sulod nga Judah ko duw ni 537 B.C.E. (2 Kronicles 36:22, 23) Ki lebug bayay u nap’an ni chuweg Cyrus ni Ga’ ni aram Jesus Kristus e tin ni ka bay ko fachi ulung ni kan dugliyrad u “Babylon nib Gilbuguwan” ko duw ni 1919. (Revelation 18:2; Isaiah 44:28) I ir e “pa’” Jehovah ni fan ko gagiyeg, ma be kunuy e saf nga taabang be gafaliyrad nib sumunguy. I gaar Jesus: “I gag faanem nib fel’ rogon ni gu ma gafaliy e saf. Rogon ni manangeg e en ni Chitamangiy ma gu manang e en ni Chitamangiy e ku aram rogon ni gu manang e saf rog ma yad manangeg.”​—John 10:14.

3. Uw rogon ni ma lemnag Jehovah rogon ni yima ayuweg e pi saf rok?

³ Fare yiiy ni bay ko Isaiah 40:10, 11 e be tamilangnag feni sumunguy Jehovah u rogon ni ma gafaliy e girdi’ rok. (Psalm 23:1-6) Nap’an ni i machib Jesus u fayleng, maku i dag rogon feni sumunguy ni ma lemnag pi gachalpen nge yug girdi’. (Matthew 11:28-30; Mark 6:34) Jehovah nge Jesus e kar fanenikayew e piin ni ma gafaliy e saf ara piin ma yog e thin rok piyu Israel, ni darur tamra’gad ni yad be gafgownag e yu ulung i saf rorad. (Ezekiel 34:2-10; Matthew 23:3, 4, 15) I micheg Jehovah ni gaar: “Bay gu ayuweg e saf rog ma dab kug pagrad nguun gafgownagrad. Bayi reb e saf rog mu gu turguy e n’en ni nggu rin’ ngak, ma aram mu gu chuweg e tin nib fel’ u fithik’ e tin nib kireb. Bay gu pi’ ngorad ba pilung ni bod e tapigpig rog i David nge par ni goo ir e ngi i gafaliyrad, ma bay i ayuwegrad.” (Ezekiel 34:22, 23) Ngiyal’ ney ko tomur, e Jesus Kristus, ni aram David ni Ga’, e ir e “an tagafaliy e saf” ni ke dugliy Jehovah ni nge mil fan ngak e pi tapigpig Rok ni bay u fayleng, ni pi Kristiano ni kan dugliyrad nge piin “yugu boch e saf.”​—John 10:16.

Tow’ath ni Pi’ Jehovah Ngak e Ulung

4, 5. (a) Mang tow’ath nrib fel’ ni ke pi’ Jehovah ngak e girdi’ rok u fayleng? (b) Mang e tow’ath ni ke pi’ Jesus ko ulung rok?

⁴ Bochan ni ke tolangnag be’ ni “tagafaliy saf” u fithik’ e pi tapigpig rok u fayleng​—ni aram Jesus Kristus—​ke pi’ Jehovah e tow’ath ni rib fel’ ni fan ko ulung ni Kristiano. Re tow’ath ney ni fare Pilung nu tharmiy e kan yiiynag u Isaiah 55:4 ni gaar: “Gu gagiyegnag nge yog e thin me tay murung’agen e pi nam, mu daken e gu dag ngorad riy feni sorog.” Pi Kristiano ni kan dugliyrad nge fare “ulung nib ga’” e kan kunuyrad u fithik’ urngin e nam, nge ganong, nge girdi’, nge gubin mit e thin. (Revelation 5:9, 10; 7:9) Kar fal’eged reb e ulung u fayleng, ke par ni “taab ran’ i saf,” u tan e gagiyeg rok fare pilung ni ma ‘gafaliy e saf’ ni aram Kristus Jesus.

⁵ Maku, ke pi’ Jesus reb e tow’ath nrib fel’ ko ulung rok u fayleng. Ke mel’eg boch e pumoon nib yul’yul’, ni ngar folwokgad rok Jehovah nge Jesus, nguur gafaliyed fare ulung i saf u fithik’ e t’ufeg. Ke weliy apostal Paul murung’agen e re tow’ath ney nib fel’ u lan e babyor ni ke yoloy ko pi Kristiano nu Efesus. I gaar: “‘Faani yan nga lang ko gin nth’abi tolang ma boor e girdi’ ni fekrad ni ngar uned ngak ni bod rogon e girdi’ nni kol ko mahl; me pi’ fapi girdi’ ni tow’ath.’ . . . Ke tay ni boch e apostal, ma boch e profet, ma boch e ma machibnag e thin nib fel’, ma boch e tagafaliy e saf nge sensey, ni fan ni ngan yal’uweg e piin ba thothup, ni fan nga boch e maruwel rorad, ngar gelniged fare dowef rok Kristus.”​—Efesus 4:8, 11, 12, NW.

6. Uw rogon ni kan weliy u Revelation 1:16, 20, murung’agen fa yu ulung i piilal ni kan dugliyrad, ma mang e rayog ni nga nog u murung’agen e piin piilal ni bang ko yugu boch e saf?

⁶ Ma “pi pumoon ney ni tow’ath” e yad e piin piilal, ni ke dugliyrad Jehovah nge Fak, ko kan ni thothup ni nguur gafaliyed e saf u fithik’ e t’ufeg. (Acts 20:28, 29) Pi piilal ney, e yad urngin ni Kristiano ni kan dugliyrad ko som’on. U Revelation 1:16, 20, e ‘fapi t’uf’ ara “pi engel” ni bay u lan e ba’ ni mat’aw i pa’ Kristus, e be yip’ fan e piin piilal ni yad bang ko ulung ni kan dugliyrad, ni Jesus e be gagiyegnagrad. Machane, ngiyal’ ney ko tin tomuren e rran, ma piin piilal ni kan dugliyrad ni ka yad bay u fayleng e ke buchuuw, ma yooren e piin piilal ni Kristiano ni bay ko pi ulung e aram bang ko yugu boch e saf. Bochan ni Governing Body e ke dugliyrad u daken e ayuw ko kan ni thothup, ma ku rayog ni nga nog ni yad bay u tan e ba’ ni mat’aw i pa’ (ara u tan e ayuw rok) fare Tagafaliy e Saf nib fel’, ni aram Jesus Kristus. (Isaiah 61:5, 6) Bochan e piin piilal ni bay u lan e ulung rodad ni yad be fol ku Kristus, ni ir fare Lolugen e ulung, ma bay rogon ni ngar da folgad rorad.​—Kolose 1:18.

Ngan Fol nge Ngan Sobut’an’

7. Mang fonow e ke pi’ apostal Paul ngodad u rogon e ngongol rodad ngak e piin piilal ni Kristiano?

⁷ Tagafaliy e saf rodad ni bay u tharmiy, ni Jehovah Got nge Jesus Kristus, e yow ba adag ni nguud folgad nib m’agan’dad ngay ko piin tagafaliy e saf ni kan pi’ mat’awrad ni nguur pow’iyed e ulung. (1 Peter 5:5) Kan thagthagnag nga laniyan’ apostal Paul ni nge yoloy ni gaar: “Um tafinayniged fa piinem ni yad e urogned e thin romed, ma yad e rogned e thin rok Got ngomed. Mu tafinayniged rogon ni ur pired nge rogon e yam’ nra tiyed, mi gimed fol u rogon ni ur pired nib michan’rad ngak Got. Mu folgad ko thin rok e piin ni yad be yog e thin romed. Ya yad be matanagiy lanin’med ndarir talgad, ni bochan e thingar rogned ngak Got rogon e maruwel rok ni ur ngongliyed. Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra dangay ma bay ur ngongliyed nib taganan’rad, ma aram e dabi fel’ rogomed riy.”​—Hebrews 13:7, 17.

8. Mang e be piningdad Paul ngay ni ngada “fal’eged i lemnag,” ma u rogon ni ngada “folgad riy”?

⁸ Ga ra guy ni be piningdad Paul ni ngad “tafinayniged,” angin e ngongol ni ba yul’yul’ ni bay ko piin piilal mu un fol ko michan’ rorad. Maku, be fonownagdad ni nge m’agan’dad ngaud folgad rok e piin ni ma pow’iyey. Bible scholar ni R. T. France fithingan e weliy ni fare bugithin ni Greek, ni kan thilyeg ni “ngan fol” e gathi ‘goo fan ko fol, machane be yip’ fan e ‘kan k’aring,’ fan e re n’ey e ngar ni adag ni ngan fol ko thin ni yad ma yog.” Gadad ma fol ko piin piilal ni gathi kemus nbochan e kan pow’iydad ko Thin rok Got ni ngada rin’ed ya ku bochan ni yibe ning chilen ngodad ni yad be lemnagdad ko tirok Got ban’en nge yafas rodad. Riyul’ ni gad ra felfelan’ ni faanra m’agan’dad ni ngad folgad ko tin ni yad ma yog ngodad.

9. Mang fan ni ba ga’ fan ngodad ni “nguun sobut’an’” nge chag ko nguun fol?

⁹ Machane, u rogon e ngongol rodad ni faanra de mich u wan’dad nib fel’ e n’en ni be yog e piin piilal ni ngan rin’? Aram e ngiyal’ ni ba t’uf e sobut’an’ riy. Ba mom ni ngan fol ni faanra ba tamilang ban’en mab fel’ u wan’dad, machane gad ra dag ni riyul’ ni gad ma sobut’an’ ni faan gad ra fol ko tin ni kar rogned ni yugu aram rogon ni gathi ri gad manang fan. Peter, ni yibi mang reb e apostal, e ke dag e mit ney e sobut’an’.​—Luke 5:4, 5.

Aningeg Fan ni Nge Fel’ u Wan’uy ni Ngan Fol ko Piin Piilal

10, 11. Uw rogon e “piin piilal ni urogned e thin rok Got” ngak pi walagrad ni Kristiano ko bin som’on e chibog nge ngiyal’ ney?

¹⁰ U Hebrews 13:7, 17, ni kan yoloy er nga lang, e pi’ Paul ni apostal aningeg i fan nib t’uf ni ngad folgad ma ngad sobut’an’gad u puluwon e piin piilal ni Kristiano. Bin som’on e yad e kar “rogned e thin rok Got” ngodad. Mu lemnag ni pi “pumoon ney ni tow’ath” ni pi’ Jesus ko fare ulung ni fan e ngan “yal’uweg e piin ba thothup.” (Efesus 4:11, 12) I yal’uweg e lem nge ngongol ko tin som’on e Kristiano u daken e pi tagafaliy e saf nib yul’yul’, ni boch i yad e kan thagthagnag nga lanin’rad ni ngar yoloyed boch e babyor nge yan ko pi ulung. Ki fanay e piin piilal ney ni ke dugliyrad e kan ni thothup ngar pow’iyed mar gelniged e tin som’on e Kristiano.​—1 Korinth 16:15-18; 2 Timothy 2:2; Titus 1:5.

¹¹ Ngiyal’ ney, e be pow’iydad Jesus u daken “fare tapigpig nib yul’yul’ mab gonop,” ni fare Governing Body e owcherad maku ma fanay e piin piilal ni ngar ayuweged e ulung. (Matthew 24:45) Bochan e tay fan ngak “fa en ga’ ko tachugol saf,” ni Jesus Kristus, ma ngad folgad ko fonow rok Paul ni gaar: “Ngam tiyed fan e piin ni yad be maruwel u fithik’med, ni piin ni ke mel’egrad Somol ni ngar pow’iyed gimed mi yad fonownagmed.”​—1 Peter 5:4; 1 Thessalonika 5:12; 1 Timothy 5:17.

12. Uw rogon ni ‘ma matanagiy[dad]’ e piin piilal?

¹² Bin migid i fan ni ngan maruwel u taabang nge piin piilal ni Kristiano e ‘yad be matanagiy[dad] ndarir talgad.’ Faanra kar guyed ko ngongol rodad nra kirebnag e michan’ rodad, ma yad ma gur ngar pied e fonow ni ngan yal’uwegdad. (Galatia 6:1) Fare bugithin ni Greek ni kan pilyeg ni “ngan matanagiy” e be yip’ fan ni “dab ni mol.” Rogon ni yog reb e Bible scholar, e be “yip’ fan ni tagafaliy e saf e nge ul’ul i gafaliy e saf.” Gathi ke mus ni yad ma ayuweg e michan’ rorad ya piin piilal e yu ngiyal’ ma dabi mol owcherad ni yad be lemnagdad ko tirok Got. Gathi ba fel’ ni ngada maruwelgad u taabang nge pi tachugol saf, ni yad be folwok rok Jesus Kristus nrogon ni ma runguy e saf ni ir e “en ni Ga’ ni ma gafaliy e saf”?​—Hebrews 13:20.

13. Piin piilal nge urngin e Kristiano e mmil farad ku mini’ ma u rogon?

¹³ Bin dalip i fan ni nge m’agan’dad ngay ni ngada maruwelgad e piin piilal u taabang e yad be matanagiydad “nbochan e thingar rogned ngak Got rogon e maruwel rok ni ur ngongliyed.” Piin piilal e ngar lemnaged ni yad e pi tachugol saf, ni yad be maruwel u tan pa’ Jehovah nge Jesus Kristus ni yow e tagafaliy e saf u tharmiy. (Ezekiel 34:22-24) Jehovah e mmil fan fapi saf ngak, ya ke “chuw’iyrad nga rachaen Fak,” ma ke lemnag ni piin piilal e ngar weliyed rogon ni ur ayuweged e pi saf Rok ni ngar rin’ed u “fithik’ e runguy.” (Acts 20:28, 29) Ere, gadad gubin ni gad ra weliy ngak Jehovah rogon ni ud folgad u rogon ni ma pow’iydad. (Roma 14:10-12) Rogon ni gadad be tay fan e piin ni piilal e be micheg ni gad be par u tan pa’ Kristus, ni ir Lolugen e ulung.​—Kolose 2:19.

14. Mang e ra buch ko piin piilal ni Kristiano ni faanra ur maruwelgad “nib taganan’rad,” ma mang angin nra yib?

¹⁴ Bin aningeg i fan ni pi’ Paul e mang fan ni ngad sobut’an’gad ngad folgad ko piin ni piilal ni Kristiano. I yoloy ni gaar: “Ya faan gimed ra fol rorad ma ra ur ngongliyed e maruwel rorad nib felan’rad ngay; ya faanra danga’ ma bay ur ngongliyed nib taganan’rad, ma aram e dabi fel’ rogomed riy.” (Hebrews 13:17) Maruwel rorad nib gel ni ngar skulnaged e girdi’, nge ngar gafaliyed e saf, ma ngar ayuweged rogon e machib, nge tabinaw rorad, nge rogon ni yad ma ayuweg boch e magawon u lan e ulung, ere piin ni piilal ni Kristiano e ba tomal e maruwel rorad. (2 Korinth 11:28, 29) Faanra dab da folgad rorad, ma ra gel e tomal ko maruwel rorad. Angin nra yib riy e ra “taganan’rad.” Ngongol rodad ni danir ma fol ko piin piilal e dabun Jehovah ma be micheg ni dabi fel’ rogodad riy. N’en ngan rin’, e ngad tayed farad ngada maruwelgad u taabang, ma piin piilal e rayog rorad ni ngar maruwelgad ni yad ba felfelan’, ma ra ayuwegey e re n’ey ni nge taareban’dad ni ngad uned i machibnag Gil’ilungun ni gad ba felfelan’.​—Roma 15:5, 6.

Ngad Daged e Sobut’an’

15. Uw rogon ni gad ra dag e fol nge sobut’an’?

¹⁵ Boor e kanawo’ nra yog ni ngada maruwelgad e piin piilal riy u taabang. Ni fan ni ngan puluwnag ban’en nga rarogon e tin ni fin be buch ko gin ni yima machib riy, ke yarmiy e piin ni piilal ni ngan muulung ni fan ko machib ko rorran nge ngiyal’ nib t’uf ni ngad thilyeged rarogon e maruwel ni gad ma tay, fa? Ngada athamgilgad ni ngad ayuweged fare yaram nib beech. Ma ra yog ni nge yog e tow’ath ngodad. Ma yib e service overseer ara piilal i guy e Fol Babyor ko ulung fa? Faanra rayog ma ba t’uf ni ngada uned e re wik nem ko machib ni nge mus rogodad. Kan pi’ reb e welthin ngodad ko Theocratic Ministry School fa? Ra kan pi’ ma ngada athamgilgad ngad bad ya ngada pied fare welthin. Fare piilal ko Fol Babyor e ke yog ni birodad e ulung e ra klin u Kingdom Hall fa? Ra ke yog ma thingar da pied e ayuw, nrogon nrayog ko m’ar rodad nge gelngidad. Ireray boch e kanawo’ ni gad be dag e sobut’an’ riy ko piin piilal ni ke dugliyrad Jehovah nge Fak ni ngar ayuweged fare ran’ i saf.

16. Faanra de rin’ reb e piilal ban’en ni ka nog ngak, ma mang fan ni dab da togopuluwgad?

¹⁶ Yu ngiyal’, ma rayog ni nge dabi rin’ reb e piilal e pi n’en ni ke yog fare tapigpig nib yul’yul’ nge Governing Body ni nge rin’. Faanra ul’ul ko ngongol ni aray rogon, ma ra weliy fan ngak Jehovah ni “fare tagafaliy e saf ni ma matanagiy laniyan’[dad].” (1 Peter 2:25) Machane oloboch ko piin piilal e dabi mat’awnag e ngongol rodad ni faan gad ra togopluw ngorad. Jehovah e der ma ayuweg e piin nder fol nge piin ma togopluw.​—Numbers 12:1, 2, 9-11.

Ma Tow’athnag Jehovah e Piin Ma Fol

17. Mang e ngongol rodad ko piin piilal rodad?

¹⁷ Manang Jehovah Got ni fapi pumoon ni ke dugliyrad ni ngar manged piilal e dar flontgad. Machane, be fanayrad u daken gelngin, nrogon ni ma gafaliy e girdi’ rok u fayleng. Riyul’ ni piin piilal​—nge gadad gubin—​‘ni re gelngin nem ni ir e ba th’abi gel [e] yib rok Got, ma gathi gadad e yib rodad.’ (2 Korinth 4:7) Ere thingar da pininged e magar ngak Jehovah ko pi n’en ni ke lebguy u daken e piin piilal rodad nib yul’yul’, ma gad be dag ni ke m’agan’dad ngay ni ngada maruwelgad u taabang.

18. Gad ra fol ko piin ni piilal rodad ma mang e riyul’ ni gad be rin’?

¹⁸ Piin ni piilal e yad be athamgil ni ngar folgad ko thin ni ke yog Jehovah u rogon e piin ni be gafaliy e saf rok ko tin tomren e rran, ni bay ko Jeremiah 3:15, (NW) ni gaar: “Bay gu pi’ ngomed e piin ma gafaliy e saf ni yad ba fel’ u wan’ug, mab mudugil ni ngar filed ngomed e tamilangan’ nge llowan’.” Mmutrug ni piin ni piilal ni bay u fithik’dad e yad be fil ma yad be ayuweg e pi saf rok Jehovah nib fel’ rogon. Yibe athapeg ni nguuda ul’ulgad i pining e magar ko maruwel rorad nib gel u daken ni gad be ayuwegrad, ma gad be fol rorad mab sobut’an’dad. Gad ra rin’ ni aram rogon, ma be dag ni gad be pining e magar ngak e gali Ta Chugol saf rodad u tharmiy, ni Jehovah Got nge Jesus Kristus.

Ngan Sul Nga Daken

• Uw rogon ni ke micheg Jehovah nge Jesus ni yow e Ta Chugol Saf ni ma t’ufegey?

• Mang fan ni gathi ke mus ni ngan fol, ya kub t’uf ni ngan sobut’an’?

• Mang boch e kanawo’ nrayog ni ngad sobut’an’gad riy?

[Picture on page 15]

Piin ni piilal ni Kristiano e yad ma fol u rogon ni ma pow’iyey Kristus

[Pictures on page 17]

Boor e kanawo’ ni gad ma dag rogon e sobut’an’ riy ngak e piin ma gafaliy e saf ni ke dugliyrad Jehovah