Dab Mu Par Ndab Mog Ban’en u Nap’an ni Gimew Be Yan Reb e Walag ko Machib u Taabang
1. Uw rogon ni ngad folwokgad rok apostal Paul u nap’an ni gad be maruwel reb e walag u taabang u nap’an e machib?
1 Ma tay apostal Paul ni tayim ni yad ma rin’ e pi walag boch ban’en u taabang e aram e ngiyal’ nrayog ni “nge be’ me pi’ e athamgil nga laniyan’ be’.” (Rom. 1:12, NW) Nap’an ni kam marow reb e walag ko machib u taabang, ma gimew ma fanay e re ngiyal’ i n’em ni ngam piew e athamgil nga lanin’mew mi gimew ayuwegew gimew, fa? Mang ndab mu weliy ngak e en ni gimew be machib u taabang e n’en ni ke ayuwegem ni ngam salap ko machib, ko bin ni ngam par ndab mog ban’en?
2. Uw rogon ni ngad pied e pagan’ ngak e en ni gad be machib u taabang, ma mang nib ga’ fan e re n’ey?
2 Mu Pi’ e Pagan’ Ngak: Boor e walag nder ma pagan’rad ngorad. Ma re n’ey e rayog ni nge m’ug u owcherad nge thin rorad. Rayog ni ngad pied e pagan’ ngorad ni faan gad ra yog ngorad boch ban’en nib fel’ ni kar rin’ed. Ku mang boch e kanawo’ nrayog ni ngad ayuweged yad ni nge pagan’rad? Reb e walag ni ma lekag e ulung e nap’an nra un reb e walag ngak ko machib ma ma weliy ngak e pi n’en ni ma rus ngay nge rogon ni ma meybil ni ngan ayuweg ni nge gel ko pi meewar rok nem. Ku baaray e n’en ni yog reb e walag ni ma ayuweg ni nge pagan’ ni gaar: “Ngam siminmin. Yu ngiyal’ e thingar gu meybil ya nge yag ni gu nang rogon ni nggu non ngak be’ u nap’an e machib.” Bay ban’en ni ke ayuwegem ni nge pagan’um u nap’an e machib, fa? Faanra bay, me ere mog ngak e en ni kam marow ko machib u taabang.
3. Mang boch ban’en nrayog ni ngam weliy ngak faen ni gimew be machib u taabang nra ayuweg u nap’an e machib?
3 Mog Ban’en Nrayog ni Nge Ayuweg Facha’: Kam pirieg ban’en nrayog ni nga mog ara reb e deer nrayog ni ngam fith ni murung’agen ban’en ni ke buch, nrayog ni nge momnag ngom ni ngam non ku be’, fa? Kam thilyeg rogon ni kam weliy ban’en ngak be’ u nap’an e machib ma ke yib angin nib fel’, fa? Mog ngak faen ni gimew be machib u taabang. (Prov. 27:17) Nap’an ni gimew be yan ni ngam guyew be’, ma rayog ni ngam weliy ngak e n’en ni ga be lemnag ni ngam rin’ u nap’an ni gimew ra mada’nag facha’ nge rogon ni ngam rin’. Tomuren ni kam mu’gow i fil e Bible ngak be’, ma rayog ni ngam weliy ngak fan ni kam mel’eg ni ngam weliy e pi n’en ni kam weliy ngak faen ni ga ma fil e Bible ngak, nge pi thin nu Bible ni kam beegew, nge rogon ni kam fil e Bible ngak facha’.
4. Mang fan nsusun e ngad adaged ni ngad ayuweged e piin taareb e michan’ rodad?
4 Pi tamachib ko bin som’on e chibog e gathi kemus ni yad baadag ni ngar ayuweged e girdi’ ndawori mich Got u wan’rad, ya ku yad manang feni ga’ fan ni nge bagayad me pi’ e athamgil nga laniyan’ bagayad. (Acts 11:23; 15:32) I skulnag apostal Paul Timothy me pi’ e athamgil nga laniyan’ ni nge weliy ngak boch e girdi’ e pi n’en ni ke fil. (2 Tim. 2:2) Faanra dab da paged talin ni ngad rin’ed e tin nib fel’ ni fan ngak pi walagdad u nap’an e machib, ma gathi kemus ni yad ra felfelan’ me yib angin e machib ni yad be tay, ya ku gad be rin’ e tin nib m’agan’ e Chitamangidad nu tharmiy ngay.—Heb. 13:15, 16.