Ngan Fil Boch Ban’en rok e Pi Walag ni Yad Ba Salap ko Machib

Rib ga’ fan u wan’dad e pi walag ni yad ba salap ko machib. Bay boch i yad ni ke yoor e duw ni kar pigpiggad ngak Jehovah. Ma sana bay boch i yad ndawori n’uw nap’an ni kar mon’oggad u rogon ni ngar machibgad. Pi walag ney e kar guyed rogon ni be pow’iy Jesus fare ulung ko Kristiano e ngiyal’ ney ko tomur ni aram e be mon’og fare maruwel ko machib. (Matt. 28:19, 20) Bochan ni yad be un ko machib, ma be yag fare ‘gelngin ni ir e ba th’abi gel’ ngorad u nap’an ni yad ra mada’nag e magawon. (2 Kor. 4:7) Boor ban’en nrayog ni ngan fil rok e pi walag ney. Faanra yira fithrad u boch ban’en ni kar rin’ed ni fan ngak Jehovah ma yad ma felfelan’ ni ngar filed e pi n’en ni kar nanged ko tin ni ka bay e walag. (Ps. 71:18) Ere, ba t’uf ni ngad gayed rogon ni ngad filed boch ban’en rorad. Uw rogon ni ngan rin’ e re n’ey?

Nap’an e Machib. Faanra ngan mon’og ko machib, mab t’uf ni ngan skulnag e pi walag ni ka fin ra uned ko machib nge piin ndawor ra salapgad ko machib. Yira un ko pi walag ni yad ba salap ko machib ma boor ban’en nrayog ni ngan fil rorad. (Mu guy fare article ni bay ko Wulyang ko Damit ko February 1, 2015 ni kenggin e “Mpar ni Gab Pasig ko Machib,” ko bin dalip e paragraph ni bay u tan fare kenggin ni “Mu Ayuweg e Piin Ndawor Ra Salapgad ko Machib.”) Bochan ni ke yag ni ngam machibgad e pi walag ney u taabang, ma uw rogon ni ke yib angin ngom?

Gur, rayog ni nga mog ngak reb e walag nib salap ko machib ni nge un ngom ko machib? Faanra ba m’ar fare walag ara ke pilibthir, ma rayog ni nge un faen ni gimew ma fil e Bible ngam marow nga tabinaw rok ngam filed e Bible u taabang. U tomuren fare study mag fith ngak ko mang boch ban’en ni ke guy nib t’uf ni ngam mon’og riy.

Mu Chag Ngorad: Boor ban’en ni ga ra nang u rarogon e pi walag ni yad ba salap ko machib ni faan ga ra chag ngorad. Rayog ni ngam pining bagayad ni nge un ko fol Bible romed ni tabinaw ma rayog ni ngam fith boch e deer ngak. Faanra fare walag e ba m’ar ara ke pilibthir me gur, dabiyog ni ngam yarmiyed chon e tabinaw rom ni ngam marod ko tabinaw rok ni ngam ted e fol Bible ni tabinaw u taabang? Rayog ni ngam fith ngak ko, uw rogon ni ke nang e tin riyul’? Mang boch e tow’ath ni ke yag ngak? Ma uw rogon ni ke guy ni be mon’og e ulung? Uw rogon e felfelan’ ni ke tay ni bochan ni be pigpig ngak Jehovah?

Ba t’uf ni ngad nanged rarogon e pi walag ney ma dab da lemnaged nri boor ban’en ni ngar ayuweged gadad riy. Pi walag ney e yad bod gadad nib thilthil e salap rorad. (Rom. 12:6-8) Sana bay boch i yad ni ke pilibthir ma daki yoor ban’en ni ku rayog ni nge rin’ u nap’an e machib. Yugu aram rogon ma rayog ni ngad filed boor ban’en rorad ni bochan ni ke n’uw nap’an ni kar pigpiggad ngak Jehovah u fithik’ e yul’yul’.