Mu Fol ma Dab Mu Rus ni Bod Rogon Kristus

“Dab mu rusgad! Ya kug gel ko fayleng!”​—JOHN 16:33.

1. Uw rogon ni i fol Jesus rok Got?

GUBIN ngiyal’ ni i rin’ Jesus Kristus e tin nib m’agan’ Got ngay. Dariy bayay ni guy rogon ni nge dabi fol ko Chitamangin u tharmiy. (John 4:34; Heb. 7:26) Machane, de mom ngak ni nge fol rok Got ni bochan e pi n’en ni i buch rok u fayleng. Nap’an ni tabab Jesus ko machib ma bay e girdi’ ni i togopuluw ngak nib muun Satan ngay ni yad be guy rogon ni ngar towasariyed mar bannaged ni nge dabki par nib yul’yul’ ngak Got. (Matt. 4:1-11; Luke 20:20-25) Pi toogor rok ney e ra k’aringed e amith nga laniyan’ ma ur gafgownaged. Ma aram me tomur riy mi yad li’ ngem’ u daken fare ley i ren. (Matt. 26:37, 38; Luke 22:44; John 19:1, 17, 18) Yugu aram rogon ni un gafgownag me par Jesus ni “be fol rok Got nge yan i mada’ ko ngiyal’ ni yim’.”​—Mu beeg e Filippi 2:8.

2, 3. Mang e rayog ni ngad filed u rogon ni i fol Jesus ni yugu aram rogon ni i gafgow?

² Ke fil Jesus rogon ni nge par ni be fol rok Got u nap’an ni i yib e gafgow ngak ni dawori mada’nag biid. (Heb. 5:8) Ere be m’ug riy ni dariy ban’en u murung’agen e pigpig ngak Jehovah ni de nang. Ya immoy rok Jehovah ni bokum e duw ma ir “be’ nib salap i maruweliy ban’en” u nap’an ni i sunumiy Got urngin ban’en. (Prov. 8:30) Machane nap’an ni yib nga fayleng ma ku be guy rogon ni nge par nib yul’yul’ ngak Got. Jesus ni fak Got e ke mon’og ko tirok Got. Mang e gad ra fil u murung’agen?

³ Yugu aram rogon ni ir be’ nib flont, de guy rogon ni tin ni be lemnag e nge rin’. Ke meybil ngak Got ni be ning e ayuw ni nge par ni be fol rok. (Mu beeg e Hebrews 5:7.) Ra ngad folgad rok Got, ma ba t’uf ni ngad sobut’an’gad ma gad meybil ngak Got ni ngad ninged e ayuw ngak u gubin ngiyal’. Aram fan ni yog Paul ngak e pi Kristiano ni gaar: “Nge yog ngomed fare lem nge fare pangin ni immoy rok Kristus Jesus’ ni i ‘par nib sobut’an’ ma be fol rok Got nge yan i mada’ ko ngiyal’ ni yim’.’” (Fil. 2:5-8) Kanawo’ ni ke dag Jesus e be micheg ni rayog ni nge fol e girdi’ rok Got ni yugu aram rogon ni boor e kireb u fayleng. Jesus e ba flont, ere uw rogodad e girdi’ ni dad flontgad?

Ngad Folgad ni Yugu Aram Rogon ni Dad Flontgad

4. Mang e be yip fan ni kan sunmiydad nib puf rogodad?

⁴ Ke sunmiy Got Adam nge Efa ni bay e llowan’ rorow mab puf rogorow ni ngar dugliyew ban’en. Maku arrogodad nib puf mat’awdad ni ngad dugliyed ban’en. Mang e be yip’ fan? Be yip’ fan ni rayog rodad ni ngad turguyed ko mang e ngad rin’ed nib fel’ fa mang e ngad rin’ed nib kireb. Maku reb i fan e ke pagdad Got ni ngad mel’eged ko gad ra fol rok fa danga’. Ere ba puf rogodad ni ngad dugliyed ban’en, mab mil fan ngodad ni ngad turguyed ko mang ngad rin’ed. Ere n’en ni kad turguyed e be yip’ fan ko ra yog e yafas ngodad fa gad ra yim’. Maku n’en ni gad ma turguy e ku ra yib fan ngak e girdi’ u toobdad.

5. (a) Mang e magawon ni bay rodad? (b) Uw rogon ni gad ra gel ngay?

⁵ Bochan ni bay e denen rodad ere mo’maw’ ni ngad folgad. De mom ni ngad folgad ko motochiyel rok Got ni gubin ngiyal’. Ku aram rogon Paul nib mo’maw’ rok ni nge fol. Ke gaar: “Reb e motochiyel ni be togopuluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen ni ir e be maruwel u fithik’ i dowag.” (Rom. 7:23) Faanra dariy ban’en ni be gafgownagdad fa be magawonnag lanin’dad mab mom ni ngad folgad. Machane, mang e gad ra rin’ ni faanra gad baadag ni ngad folgad rok Got u nap’an ni kad guyed e “tin nib tagan ban’en ni yima ar’arnag, ni tin nra guy e girdi’ ma yad ba adag ni nge yog ngorad”? Urngin e pi ney nib kireb e ma sum ni bochan e gad ba ta denen maku “lem nu roy u fayleng” e ku be af ngodad. (1 John 2:16; 1 Kor. 2:12) Faanra ngad gelgad ko pi ar’ar nib kireb ney ma som’on e thingar da ‘fal’eged lanin’dad’ ma gad turguy ni gad ra fol rok Jehovah. (Ps. 78:8) Bay boor e thin u Bible u murung’agen boch e girdi’ ni ur folgad ni bochan e kar fal’eged lanin’rad.​—Ezra 7:10; Dan. 1:8.

6, 7. Mu weliy ko uw rogon nra ayuwegem e fol Bible ni ngam gonopiy e n’en ni ngam rin’.

⁶ Reb e kanawo’ ni rayog ni ngad fal’eged lanin’dad e ngad filed e Thin nu Bible nge pi babyor ni be tamilangnag e thin nu Bible. Susun ni ke blayal ma iraram e ngiyal’ ni ngam fil e Bible rom. Kafin mu meybil ngak Jehovah ni nge pi’ gelngin ni nge ayuwegem ni ngam rin’ e n’en ni kam fil ko Thin rok. Ma ra bin migid e blayal’, ma bay reb e kachido u TV ni ga baadag ni ngam yaliy. Kam rung’ag rok boch e girdi’ nib fel’ yaan e re kachido nem; machane ga manang ni bay yaan boch e ngongol ni de yalen nge cham riy.

⁷ Ra yib ngan’um e thin rok Paul u Efesus 5:3 ni gaar: “De mat’aw ni nge un u l’ugunmed e thin ko darngal, ara thin nib golong, ara thin ko chogow, ni bochan e gimed girdien Got.” Ma sana ku ra yib ngan’um e fonow ni pi’ Paul u Filippi 4:8. (Mu beeg.) Nap’an ni ga be fal’eg i lemnag fapi thin nu Bible ma ngam fithem, ‘Mang e ra buch nga lanin’ug ni faanra gu yaliy e re kachido nem, gu be folwok u rogon ni i fol Jesus rok Got?’ Mang e ga ra rin’? Ga ra yaliy fare kachido?

8. Mang fan ni thingar da ayuweged gadad ma gad fol ko pi motochiyel rok Jehovah?

⁸ Gad ba oloboch ni faanra ngad paged gadad ni dabkud folgad ko thin rok Got, sana gad ra lemnag ni rayog ni dabda uned ko kireb ni faan gad ra un ko girdi’ ni ma rin’ e kireb fa ngad yaliyed e kachido nib kireb. Ere thingar da ayuweged gadad nge bitir rodad ni nge dabi kirebnagdad e pi n’en ni ma fanay Satan ni nge waliydad ko kireb. Piin ni ma fanay e computer e yad ma guy rogon ni nge dabi kirebnag be’ e pi n’en ni bay u lan e computer rorad. Ere faanra gad ma guy rogon ni ngad ayuweged e computer rodad, ma ri kub ga’ fan ni ngad ayuweged gadad ko “pi ban” nge pi n’en nib kireb ni ma fanay Satan?​—Efe. 6:11.

9. Mang fan ni ngad turguyed ni ngad folgad rok Jehovah ni gubin e rran?

⁹ Ke chugur ni gubin e rran ni gad ma turguy ko gad ra rin’ boch ban’en nib m’agan’ Got ngay fa dangay. Ra nge yog e yafas ni manemus ngodad ma thingar da folgad ko kenggin e motochiyel rok Got. Gad ra fol rok Jesus u rogon ni i par nib yul’yul’ “nge yan i mada’ ko ngiyal’ ni yim’,” ma aram e gad be dag nib gel e michan’ rodad. Ra tow’athnagdad Jehovah ni faan gad ra par nib yul’yul’. I micheg Jesus ni gaar: “En nra athamgil nge mada’ ko tomur e ra yog e yafos ngak.” (Matt. 24:13) Ba tamilang ni thingar da athamgilgad nge mudugil lanin’dad ni bod e n’en ni rin’ Jesus.​—Ps. 31:24.

Jesuse Ke Dag e Kanawo’ ni Th’abi Fel’ ni Nge Dabda Rusgad

10. (a) Mang boch e magawon ni gad ma mada’nag? (b) Mang e thingar da rin’ed?

¹⁰ Bochan ni boor e girdi’ u toobdad nib kireb e ngongol rorad, ere ba t’uf ni ngad athamgilgad ni nge dabi af e ngongol rorad ngodad. Ma yib e magawon ngak e Kristiano ni bay rogon ko ngongol ko girdi’, salpiy, nge teliw e rayog ni nge k’aringrad ngar paged e motochiyel rok Jehovah. Boor e Kristiano ni girdien e tabinaw rorad e kar togopuluwgad ngorad. Boch e nam, ni yima fil riy ni ke sum e girdi’ ko gamanman ma ku boor e girdi’ ni ke mich u wan’rad ni dariy e Got. Dabiyog ni ngad feked owchedad ko pi n’ey ya thingar da ayuweged gadad. N’en ni rin’ Jesus e be dag ko uw rogon ni ngad gelgad ko pi n’ey.

11. Uw rogon ni nge pi’ e athamgil nga lanin’dad nfaanra ngad fal’eged i lemnag e n’en ni rin’ Jesus?

¹¹ I gaar Jesus ngak pi gachalpen: “Bayi gafgownagmed e fayleng. Machane dab mu rusgad! Ya kug gel ko fayleng!” (John 16:33) I athamgil ni nge dabi af e ngongol ko fayleng ngak. De pag e girdi’ nu fayleng ni ngar taleged ni nge dabki machib ma dabki fol ko motochiyel rok Got ni bay rogon ko bin riyul’ e liyor nge ngongol nib fel’, ere ku ireray e n’en ni ngad rin’ed. U nap’an ni be meybil Jesus i yog ni gaar: “Gathi yad e girdi’ nu roy u fayleng ni bod gag ni gathi gag e girdi’ nu fayleng.” (John 17:16) Gad ra fal’eg i lemnag e n’en ni rin’ Kristus ni i dag nib mudugil laniyan’ ma ra pi’ gelngidad ni dabda uned ko ngongol ko fayleng.

Ngad Folgad u Rogon ni De Rus Jesus

12-14. Mu weliy boch e kanawo’ ni dag Jesus ni de rus.

¹² De rus Jesus u nap’an ni i machib. Me “yan Jesus nga lan e tempel me tuluf urngin e piin ni yad be chuway’ ban’en nge piin ni yad be folchuway’ nga ban’en u lan e tempel; me thikiy e tebel ko girdi’ ni be thilyeg e salpiy, nge chiya rok e piin ni yad be chuway’ ko bulogol.” (Matt. 21:12) Nap’an ni yib fapi salthaw ngar koled Jesus ma de rus me gaar ngorad: “Faanra i gag e gimed be gayeg, me ere mpaged e tin ni baaray e girdi’ nga ranod.” (John 18:8) De n’uw nap’an nga tomren, me yog ngak Peter ni nge sulweg e sayden rok nga tafen, ere be dag nib pagan’ nra pi’ Jehovah e ayuw ngak ma gathi talin e cham e ra ayuweg.​—John 18:11.

¹³ De rus Jesus ni nge tamilangnag e machib ni googsur ni be weliy e pi tayugang’ ko teliw. Ya gaar: “Kam gafgowgad e pi tamachib ko Motochiyel nge gimed e pi Farise! Ya gimed e piin ni gimed be dake modingniged gimed! Kam ninged mban e gagiyeg nu tharmiy nga p’eowchen e girdi’, . . . ma damur folgad ko tin ri ba ga’ fan ni be yog e Motochiyel, ni bod e mat’aw nge runguy nge yul’yul’. . . . Gimed be maluknag wuru’ e kap nge plet romed, ma ba sug lan ko pi n’en ni ke yog ngomed u fithik’ e yargel nge chogow romed.” (Matt. 23:13, 23, 25) Ba t’uf ni nge par pi gachalpen Jesus ni dabra rusgad ni bochan e ku ra gafgownagrad e pi tolang ko pi teliw ni googsur ma yad ra guy rogon ni ngar lied boch i yad.​—Matt. 23:34; 24:9.

¹⁴ Ke par Jesus ni de rus me togopuluw ngak boch e moonyan’. Bay bayay ni madaeg be’ nib moon ni ke ying e moonyan’ ngak nib gel ya dariy be’ ni rayog ni nge m’ag e chen ngak. Me chuweg Jesus fapi moonyan’ rok fare moon. (Mark 5:1-13) Ngiyal’ ney, e der ma pi’ Got gelngin e pi Kristiano ni ngar ngongliyed e maang’ang. Machane ngiyal’ ney e gad be tay reb e cham ngak Satan u nap’an ni gad be machib ma gad be fil e Bible ngak e girdi’ ya Satan e “ke ta’ lanin’rad u fithik’ e lumor.” (2 Kor. 4:4) Bod rogon Jesus ni talin e cham rodad e “gathi talin e cham nu roy u fayleng, ya talin e cham nib yargel ni yib rok Got, ni ir e ngan kirebnag ngay yungi n’en ni ke fal’eg e moonyan’ rogon ke par riy be cham ngodad.” (2 Kor. 10:4) Faanra ngad fanayed e pi talin e cham ni ke pi’ Got ngodad ma thingar da filed boor ban’en rok Jesus.

15. Mang fan ni da i rus Jesus?

¹⁵ Bochan e michan’ rok Jesus ma da i rus. Ere thingar da folwokgad rok. (Mark 4:40) Uw rogon ni nge yog e bin riyul’ e michan’ ngodad? Ke dag Jesus bayay e kanawo’ ngodad. Ke dag nib tamilang e thin u Bible ma ba pagan’ ngay. Fare talin e cham ni fanay Jesus e gathi riyul’ ni ba sayden, ya Thin rok Got. Boor yay ni i micheg ni thin ni be machibnag e bay u Bible. Ba ga’ ni ma yog ko thin rok ni gaar: “Ba’ ni kan yoloy,” ni aram e bay ko Thin rok Got.a

16. Uw rogon nra gel boch e michan’ rodad?

¹⁶ Ra ngad gelnaged e michan’ rodad ya ngad gelgad ko gubin mit e skeng ma thingar da filed e Bible nib fel’ rogon u gubin e rran, ma gad un ko gubin e muulung ma dabda paged talin ni tin riyul’ e nge mang def ko michan’ rodad. (Rom. 10:17) Thingar da fal’eged i lemnag e n’en ni kad filed ma gad pag nge yan i taw nga gum’ircha’dad. Kemus ni faanra ba gel e michan’ rodad ma aram e rayog ni nge taydad ni dabkud rusgad. (Jas. 2:17) Ma thingar kuda ninged gelngin Got nib thothup ni bochan e michan’ e aram reb ko pi fel’ngin gelngin Got.​—Gal. 5:22.

17, 18. Uw rogon ni dag reb e walag ni ppin ni de rus u skul?

¹⁷ Reb e walag ni ppin ni Kitty fithingan e ke nang ni faan ra ba riyul’ e michan’ ma rayog ni nge gelnagey. Nap’an ni kab bitir ma manang ni thingar dabi rus ni nge weliy fare thin nib fel’ u skul, ma ri baadag ni nge weliy ngak boch e bitir ni yad nga skul. (Rom. 1:16) Gubin e duw ni ma guy rogon ni nge weliy fare thin nib fel’ ngak boch e bitir u skul, machane der yog rok ni bochan e be rus. Ma boch nga tomren me yan i un nga reb e skul. Ke gaar, “Kug dugliy u wan’ ug ni yaney e aram nggu athamgil ni dabkug pag ni dabkug weliy fare thin nib fel’.” Ere ke meybil Kitty ni dab ki rus ni bod Kristus me yog e gonop ngak ma nge machibnag fare thin nib fel’ ko ngiyal’ ni ke mab e kanawo’ ngak.

¹⁸ Bin som’on e rran ni tabab e skul ma ra reb e bitir u skul ma nge yog boch e thin u murung’agen. Boch fapi bitir e be weliy ko mang e teliw ni yad ma un ngay maku rogned ni darur uned ko pi n’en ni yima rin’ u galesiya rorad. Ma aram e ke nang Kitty ni ireray e ngiyal’ ni ke taw ngay ni nge weliy fare thin nib fel’. Ere nap’an ni taw ko ngiyal’ ni nge non ma de rus ma aram me gaar, “Gag reb e Pi Mich Rok Jehovah, ma Bible e aram e n’en ni be ayuwegeg ni nge pow’iyeg ko liyor ni gu be tay nge rogon e ngongol rog.” Nap’an ni ka be ulul ko thin rok ma boch e bitir e yad be kak’aring ma yad be dag u owcherad ni dubrad e n’en ni be weliy. Machane boch e bitir e ra motoyilgad mar fithed boch e deer ngak. Ke yog e sensey rorad ni rayog ni ngan folwok rok Kitty u rogon ni ke weliy e pi n’en ni ke mich u wan’. Kari felfelan’ Kitty ni ke fol ko kanawo’ ni dag Jesus.

Nge Michan’um ma Dabmu Rus ni Bod Rogon Kristus

19. (a) Mang fan ni ngari gel e michan’ rodad? (b) Uw rogon ni ngad felan’naged Jehovah?

¹⁹ Pi apostal e ku ra nanged nib t’uf ni nge gel e michan’ rorad ya nge dabkur rusgad. Kar gaargad ngak Jesus: “Mu gelnag e michan’ romad.” (Mu beeg e Luke 17:5, 6.) Ra nge gel e michan’ ma aram e be yip’ fan ni ke mich u wan’dad ni bay Got. Ma ba t’uf ni ngad fal’eged e tha’ u thildad Jehovah ni bod reb e bitir nib fel’ e tha’ u thilrow e chitamangin ya ma t’ufeg ni gubin ngiyal’. Ki gaar Solomon: “Fakag, faan ga ra gonop, ma ra gu felfelan’. Gu ra uf ko ngiyal’ ni gu ra rung’ag ni ga be yog e thin nib gonop.” (Prov. 23:15, 16, BT) Ku arrogon gadad e ngiyal’ ney ni faanra dabda rusgad ma rayog ni ngad folgad ko motochiyel rok Jehovah, ma gad ra k’aring e felfelan’ ngak. Ere gubin ngiyal’ ni nguuda folgad ko kanawo’ ni ke dag Jesus ni aram dabda rusgad ni fan ko tin nib mat’aw ban’en!

[Footnote]

Rayog ni Ngam Weliy?

• Mang e ra ayuwegdad ni ngad folgad ni yugu aram rogon ndad flontgad?

• Mang e def ko bin riyul’ e michan’, ma uw rogon nra ayuwedad ni nge par nib mudugil lanin’dad?

• Mang angin nrayog ngodad ni faan gad ra fol ma gad dag rogon ni da i rus Kristus?

[Picture on page 15]

Kam ‘fal’eg rogon gum’irchaem’ ni ngam togopuluw ko kireb?

[Picture on page 17]

Rayog ni ngad daged ni dabda rusgad ni faanra ba gel e michan’ rodad ni bod rogon ni i rin’ Jesus