Nga e Par nib Fel’ e Tha’ u Thildad
“Baaray e nen ni ir e nggu ning chilen ngomed ni be lungug: nge bigimed me tuf bigimed rok.”—JOHN 15:17.
1. Mang fan ni pi Kristiano ko bin som’on e chibog e ba t’uf ni nga i par nib fel’ e tha’ u thilrad?
BIN tomur e nep’ rok Jesus u fayleng, me pi’ e athamgil nga laniyan’ e pi gachalpen ni nga ur golgad ngorad. Ma ku re nep’ nem me yog ni yira nang ni yad pi gachalpen ni bochan e t’ufeg rorad ngorad. (John 13:35) Ba t’uf ni ngki par nib fel’ e tha’ u thilrad ya nge yog ni ngar k’adedan’rad ko skeng ni ra yib ngorad, ma ku rayog ni ngar mu’naged e maruwel nra pi’ ngorad. Riyul’ ni pi Kristiano ko bin som’on e chibog e yi manang rad ni bochan e yad ba yul’yul’ ku Got nge pi walagrad.
2. (a) Mang e thingarda rin’ed ma mang fan? (b) Mang boch e deer ni gad ra weliy?
2 Ngiyal’ ney e gadad ba felfelan’ ni bochan e gadad bang u reb e ulung ni bay u ga’ngin yang u fayleng, ni girdi’ riy e yad ma fol ko n’en ni i rin’ e pi Kristiano kakrom! Ke mudugil lanin’dad ni ngaud folgad ko n’en ni yog Jesus ni ngaud t’ufeged gadad. Machane, ngiyal’ ney e yooren e girdi’ e darur yul’yul’gad ma dariy e t’ufeg rorad. (2 Tim. 3:1-3) Yad ma m’ag fager ngak boch e girdi’ ni bochan e nge yog ban’en ngorad. Yira nang ni gadad e tin riyul’ e Kristiano ni faanra ngad siyeged e ngongol ni aram rogon. Ere ngad weliyed e pi deer ni baaray: Mang e def ko tin riyul’ e fager? U rogon me yog e fager nib fel’? Mingiyal’ e dab kud chaggad ngak e en ni immoy nib fel’ e tha’ u thildad? Uw rogon ni nga i par nib fel’ e tha’ u thilin e pi fager?
Mang e Ra Ayuweg ni Nga i Par nib Fel’ e Tha’ u Thiliy?
3, 4. Mang e ra ayuweg ni nga i par nib fel’ e tha’ u thildad e pi tafager rodad, ma mang fan?
3 Rayog ni nga i par e pi tafager nib fel’ ni faanra ba t’uf Jehovah rorad. Ki yoloy Solomon ni gaar: “L’agruw ni’ e rayog ni ngar tapngiyew yow u ba cham ni ke yibnag be’ ma faanra taa bagayow ma ra wer. Ba yil’ i tal nni ngongliy u dalip yil’ e gaf e ba mo’maw’ ni nge math’.” (Ekl. 4:12) Faanra Jehovah e ir e bin dalip yil’ ko fare gaf, ma ba mo’maw’ ni nge kireb e tha’ u thilmew e fager rom.
4 Riyul’ ni mus ko piin ni de t’uf Jehovah rorad e rayog ni nga i fel’ e tha’ u thilrad, machane piin nib t’uf Jehovah rorad e ba mo’maw’ ni nge kireb thilrad. Ya nap’an ni dabi taareban’rad nga ban’en ma yad ma pithig u rogon nib m’agan’ Jehovah ngay. Faanra guy e pi toogor rogon ni ngar ruwraba’naged e tin riyul’ e Kristiano ma dabiyog. Kab kakrom i yib, ma pi tapigpig rok Jehovah e kar daged ni ba m’agan’rad ni ngar mad, ko bin ni ngar yognaged pi walagrad.—Mu beeg e 1 John 3:16.
5. Uw rogon ma i par nib fel’ e tha’ u thilin Ruth nge Naomi?
5 Dariy e maruwar riy ni rayog ni ngad pirieged e pi tafager nib fel’ u fithik’ e girdi’ nib t’uf Jehovah rorad. Bay boch e girdi’ u Bible nrib fel’ e tha’ u thilrad ni bod Ruth nge Naomi. Uw rogon ma i par nib fel’ e tha’ u thilrow? Kan nang e fulweg riy nnap’an ni yog Ruth ngak Naomi ni gaar: “Girdi’ rom e bayi mang girdieg; ma Got rom e bayi mang Got rog. . . . I Somol e nge pi’ e bin th’abi ga’ e gechig ngog ni faanra gu pag yugu ban’en nge deregdow ni faanra gathi yam’.” (Ruth 1:16, 17) Rib tamilang ni Ruth nge Naomi e rib t’uf Got rorow, ma aray e n’en ni ke ayuweg ni nga i par nib fel’ e tha’ u thilrow. Ma aram e ke tow’athnagrow Jehovah.
Rogon ni Nge Yog e Fager nib Fel’
6-8. (a) Rayog ni nge yog ngodad e fager nib fel’ ni bochan e mang? (b) Ma mang e ngad rin’ed?
6 Rogon e fager u thilin Ruth nge Naomi e be micheg ni fager nib fel’ e gathi yugu ma sum, ya bochan e t’ufeg ku Jehovah. Ere rib t’uf e maruwel nib elmerin nge ngad paged fadad. Ki mada’ ko girdi’ u lan e tabinaw nib t’uf ni ngar maruwelgad nib elmerin ni fan e nge fel’ e tha’ u thilrad. Ere uw rogon me yog e fager nib fel’ ngodad?
7 Ngam guy rogon. Ke pi’ apostal Paul e athamgil nga laniyan’ e pi tafager rok u lan e ulung nu Roma ni ngar ‘binged e tabinaw rorad ngak e pi milekag.’ (Rom. 12:13) Faanra ngam fol ko re thin ney, ma aram e be yip’ fan ni bay boch ban’en ni thingar mu rin’. Dariy be’ nrayog ni nge rin’ e pi n’ey ni fan ngom. (Mu beeg e Proverbs 3:27.) Reb e kanawo’ ni ngam rin’ e re n’ey riy e ngam thilthilyeg e girdi’ ni ngaum piningrad u lan e ulung ngar uned ngom ko abich u taabang. Rayog ni nguum rin’ ni aram rogon, fa?
8 Yugu reb e kanawo’ ni ku rayog ni ngam rin’ e ngkum thilthilyeg e girdi’ ni ngam piningrad ngaur uned ngom ko machib. Nap’an ni ga be rung’ag ni be weliy reb e walag e t’ufeg rok u murung’agen Jehovah ma rayog ni nge ayuweg nge chugur e tha’ u thilmew.
9, 10. Mang e rin’ Paul nib fel’ ni ngan fol riy, ma uw rogon ni ngad folwok gad rok?
9 Dabda mithaged lanin’dad ma ngad ga’naged e t’ufeg rodad. (Mu beeg e 2 Korinth 6:12, 13.) Ka am lemnag ni dariy be’ u lan e ulung nrayog ni ngam fagergow? Faanra aram rogon, ma gathi aram e ri ga be mel’eg e en ni nge mang fager rom? Ke dag Paul e kanawo’ nib fel’ u rogon ni ngan ga’nag e t’ufeg. Immoy ba ngiyal’ nde lemnag ni nge m’ag fager ngak e girdi’ ni gathi yad piyu Israel. Machane, munmun me mang “apostal ngak e piin ni gathi yad piyu Israel.”—Rom. 11:13.
10 Mus ko girdi’ nib thil yangarrad Paul ma kar fagergad. Ni bod ni ke m’ag fager ngak Timothy ni yugu aram rogon nib thil yangarrow ma kub thilthil e n’en ni buch rorow. Ngiyal’ ney e boor e piin nib fel’ yangaren ni kar m’aged fager ngak girdien e ulung ni kar ilalgad. I Vanessa ni ka fin ni pag 20 e duw rok e yog ni gaar: “Bay e fager rog ni ke pag 50 e duw rok. Rayog ni nggog boch ban’en ngak ni kemus ni goo piin gamad taabyangar e rayog ni nggog ngorad. Ma ri ma lemnageg.” Uw rogon ni ke fel’ e tha’ u thilrow? I gaar Vanessa: “I gag e kug gay rogon ni nggu fagergow.” Me gur, gab adag ni ngam m’ag fager ngak e girdi’ nib thil yangarmed? Ra tow’athnagem Jehovah ni faan ga ra rin’.
11. Mang e gad ra fil ko n’en ni rin’ Jonathan nge David?
11 Ngam yul’yul’. I yoloy Solomon ni gaar: “Pi tafager e gubin ngiyal’ ni yad ma dag e t’ufeg rorad. Mang gam’ingin e walag ni faanra dab ra puruy’naged e gafgow rorad.” (Prov. 17:17) Nap’an ni yoloy Solomon e pi thin ney, ma sana be lemnag e tha’ u thilin David ni chitamangin nge Jonathan. (1 Sam. 18:1) Baadag Saul ni nge mang Jonathan e pilung nu Israel. Machane ke m’agan’ Jonathan ko n’en ni ke turguy Jehovah, ni David e nge mang pilung ma de awan’ ngak. Ma de damumuw u nap’an ni yog e girdi’ e sorok ngak David, ma ku de mich u wan’ e thin ni yog Saul nib togopuluw ngak. (1 Sam. 20:24-34) Ere gadad ra bod Jonathan, fa? Gadad ma felfelan’ u nap’an ni kan pi’ boch e maruwel ngak e pi fager rodad u lan e ulung? Nap’an ni keb e gafgow ngorad, gadad ma fal’eg lanin’rad mad ayuweged yad? Faanra gathibthibnag be’ e fager rodad, ba pey ni nge mich u wan’dad, fa? Fa gad ra bod Jonathan ngad ayuweged e fager rodad u fithik’ e yul’yul’?
Ngiyal’ ni Dab Kun Chag Ngak e En ni Fager Rodad
12-14. Mang boch e magawon ni ma mada’nag e piin ma fil e Bible, ma uw rogon nrayog ni ngad ayuweged yad?
12 Nap’an nra tabab e en be fil e Bible ni nge thilyeg e ngongol rok, ma sana ra mo’maw’ ngak ni nge thilyeg e pi fager rok. Sana bay boch i yad nrib adag ni nge chag ngorad machane darur folgad ko motochiyel u Bible. Kafram e sana ur chaggad ni gubin ngiyal’. Machane chiney e ke guy ni pi n’en ni yad be ngongliy e rayog ni nge magawonnag, ma ke nang nib kireb ni nga i chag ngorad ni gubin ngiyal’. (1 Kor. 15:33) Machane sana ku be lemnag ni faanra dab ki chag ngorad ma aram e daki yul’yul’ ngorad.
13 Faan mang e gur e en ga be fil e Bible e bay e magawon rom ni aray rogon, dab mu pag talin ni reb e fager nib fel’ e ra felfelan’ ni ga be gay rogon ni nge fel’ boch e yafas rom. Dabisiy ni ra adag ni nge un ngom ngam filew murung’agen Jehovah. Machane tin de riyul’ e fager e “yad be yog e thin nib kireb ngomed” ni bochan e “dakumur uned ngorad ko ngongol nib kireb ni yad be ngongliy.” (1 Pet. 4:3, 4) Ma bin nriyul’ riy e yad e darur yul’yul’gad ma gathi gur.
14 Faanra ra pagem e pi ta fager rom ni de t’uf Jehovah rorad, ma girdi’ u lan e ulung e yad ra mang fager rom. (Gal. 6:10) Ri ga manang e piin ni yad ma un ko muulung ma yad ma fil e Bible? Ga ma chag ngorad yu ngiyal’ ngam pi’ e athamgil nga lanin’rad?
15, 16. (a) Mang e ngad rin’ed ni faanra reb e fager rodad e ke tal ko pigpig ku Jehovah? (b) Uw rogon ni ngad micheged nib t’uf Jehovah rodad?
15 Machane uw rogon ni faanra reb e fager rodad u lan e ulung e ke dugliy ni nge pag Jehovah, mab t’uf ni ngan tharbog ko ulung? Faanra buch ban’en ni aram rogon ma ri ma kireban’dad. Be weliy murung’agen e kireban’ ni tay reb e walag ni ppin u nap’an ni reb e fager rok e ke tal ko pigpig ku Jehovah ni gaar: “Kug gin, ya kug lemnag nib gel e michan’ rok machane danga’. Sana i pigpig ngak Jehovah ni bochan e baadag ni nge felfelan’nag girdien e tabinaw rok. Ere kug sul kug lemnag ko ri mang fan ni gu be pigpig ku Jehovah.” Ere mang e ke rin’ e re walag ney? Ke gaar: “Kug pag fan ku Jehovah. Ma kug dugliy ni nggu dag ngak nriyul’ nib t’uf rog ma gathi kemus ni bochan e ke pi’ boch e fager ngog u lan e ulung.”
16 Dabiyog ni ngad lemnaged ni ra par nib fel’ e tha’ u thildad Got, ni faanra da fagergad ko piin ni yad ma un ko ngongol ko fayleng. I yoloy James ni gaar: “Da mu nanged ni faanra mfagergad ko fayleng ma aram e kam manged toogor rok Got? Cha’ nra finey ni nge mang fager rok e fayleng e aram e ke tay ir ni ir e toogor rok Got.” (Jas. 4:4) Rayog ni ngad daged nib t’uf Got rodad ni faanra be pagan’dad ngak ni rayog ni nge ayuwegdad u nap’an ni ke sul reb e fager rodad ko ngongol ko fayleng. (Mu beeg e Psalm 18:25.) Fare walag ni kad weliyed faram e gaar: “Kug fil ni dabiyog ni ngad towasariyed be’ nge t’uf Jehovah rok ara gadad. Ra be’ ma ir rok e ra dugliy.” Mang e rayog ni ngad rin’ed ma i par nib fel’ e tha’ u thildad e pi fager rodad u lan e ulung?
Nga i Par nib Fel’ e Tha’ u Thildad
17. Uw rogon e numon u thilin e piin nib fel’ e tha’ u thilrad?
17 Numon ni gubin ngiyal’ e ra ayuweg nge par nib fel’ e tha’ u thiliy. Gad ra beeg murung’agen Ruth nge Noami, David nge Jonathan, Paul nge Timothy, u Bible ma rayog ni ngad nanged ni ke par nib fel’ e tha’ u thilrad ni bochan e ba fel’ e numon u thilrad. I yoloy Paul ni gaar: “Ma gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.” Ere ke yog apostal Paul rogon ni ngad nonad ngak e girdi’ “ndawori mich Jesus Kristus u wan’rad.” (Kol. 4:5, 6) Faanra ngad nonad ngak e girdi’ ni gathi yad bang ko ulung rodad u fithik’ e tayfan, ere ri kub ga’ fan ni ngad nonad ngak e pi walagdad u lan e ulung ni aram rogon.
18, 19. (a) Uw rogon u wan’dad e fonow ni ma pi’ e pi fager rodad ni Kristiano ngodad. (b) Mang e rin’ e piin piilal nu Efesus nib fel’ ni ngad folgad riy?
18 Piin nib fel’ e tha’ u thilrad e ba ga’ fan u wan’rad e thin ni ma yog e pi fager rorad ngorad. Ere ba fel’ ni ngar nonad ngorad nib tamilang u fithik’ e tayfan. Solomon ni Pilung e yoloy ni gaar: “Fare gapgep nge incense e ra felfelan’nag gum’irchaey, ma ku arrogon e fager, ya ma pi’ e fonow nib fel’.” (Prov. 27:9, NW) Aram rogon u wan’um e fonow ni ma pi’ e fager rom? (Mu beeg e Psalm 141:5.) Faanra ke fonownigem e fager rom, ya ke guy ni ga be rin’ ban’en ni de fel’, mang e ngam rin’? Ga ra lemnag ni be pi’ e fonow ngom ni bochan e gab t’uf rok, fa ga ra damumuw?
19 Piin piilal u lan e ulung nu Efesus e yad e pi fager rok Paul. Sana som’on ni ngar manang e Kristiano ma manangrad Paul. Nap’an e bin tomur e muulung rorad me pi’ e fonow ngorad nib tamilang. Ere mang e kar rin’ed? Dar damumuwgad ngak Paul. Ya ke felfelan’rad ko ayuw ni ke pi’ ngorad mar yorgad, ya yad be lemnag ni dabkiyog ni ngar guyed bayay.—Acts 20:17, 29, 30, 36-38.
20. Mang e ra rin’ reb e fager nib fel’?
20 Fager nib fel’ e gathi kemus ni yima fonownag ya ku ma pi’ e fonow. Machane thingar da nanged e ngiyal’ ni ‘tirodad e maruwel e nguud lemniged.’ (1 Thess. 4:11) Ma ku thingar da nanged ni ra “bagadad ma nge weliy ngak Got e n’en ni i rin’.” (Rom. 14:12) Machane fager nib fel’ e ma puguran ngak e fager rok e motochiyel rok Got ko ngiyal’ nib t’uf. (1 Kor. 7:39) Susun, mang e ga ra rin’ ni faanra kam guy reb e fager rom ni dawori mabgol ni kari fel’ e tha’ u thilrow be’ ni ppin ara pumoon ni gathi reb e Kristiano? Dab mu pi’ e fonow ngak ya dabum ni nge kireb e tha’ u thilmew? Ara kam pi’ e fonow ma dabun ni nge fol riy, mang e ngam rin’? Fager nib fel’ e ra ning e ayuw ko piin ni piilal ni ngar ayuweged e fager rok ni ke oloboch. Machane de mom ni ngan rin’ e re n’ey. Ma faan ga rin’ ni bochan e ba t’uf Jehovah rom ma dabi kireb e tha’ u thilmew e fager rom.
21. Yu ngiyal’ ma mang e gadad ma rin’, machane mang fan ni ba ga’ fan ni ngaud gelniged e tha’ u thildad u lan e ulung?
21 Mu beeg e Kolose 3:13, 14. Yu ngiyal’ ma ba’ ‘ban’en ni ke dabuy bagadad ni ke rin’ bagadad ngak,’ ma ku arrogorad ni ku rayog ni nga dogned ara da rin’ed ban’en ni ra kirebnag laniyan’ be’. I yoloy James ni gaar: “Gadad gubin ni ba ga’ ni gadad ma oloboch.” (Jas. 3:2) Yira nang e tin nriyul’ e fager ni faanra ur n’aged fan e kireb rorad u wan’rad. Ere rib ga’ fan ni ngad gelniged e tha’ u thildad u daken e numon ni gadad ma tay, ma nge bagadad me n’ag fan e kireb rok bagadad u wan’! Faan gadad ra dag e t’ufeg ma ba ga’ fan ya ir e ma chugumiy “urngin ban’en nga taabang nge par ni ke fel’ rogon.”
Uw Rogon ni Ga Ra Fulweg?
• Uw rogon me yog e fager ngodad nib fel’?
• Mingiyal’ e dab kun chag ngak e en ni fager rodad?
• Mang e thingar da rin’ed me par nib fel’ e tha’ u thildad e pi fager rodad?
[Picture on page 24]
Mang e ke ayuweg ni nge par nib gel e tha’ u thilin Ruth nge Naomi?
[Picture on page 25]
Ga ma gol ko girdi’ ni gubin ngiyal’?