Gad Ra Fel’ u Wan’ Got Ma Ra Yog e Yafas Ni Manemus Ngodad

“I Somol e ba fel’ u wan’ e girdi’ nib manigil.”—PROV. 12:2, BT.

1, 2. Mang e ning Elijah ngak fare pin nu Zarefath ni ke yim’ e pumoon rok, ma mang e micheg ngak?

FARE pin nu Zarefath ni ke yim’ e pumoon rok e kar m’ow fak ko bilig, maku er rogon Elijah ni profet rok Got. Nap’an ni be n’en ni nge k’eg fare pin e nifiy, me ning fare profet e ran nge flowa ngak. Baadag ni nge pi’ ban’en ni nge unum, machane “ke mus ni taab gogow e flowa ni bay u lan baraba’ i ban’en nge buchuuw i gapgep ko olive ni bay u lan ba rume’” e ir e bay rok. Be lemnag nde gaman e ggan ni bay rok nrayog ni nge pi’ boch ngak fare profet, ma aram me yog ngak.—1 Ki. 17:8-12.

² Machane, me gaar Elijah ngak: “Ngam fek e chuuw i flowa ni ba’ rom ngam ngongliy ba flowa riy nib achig ma ga fek i yib ngog, ma tin ni ke magey riy e ngam ngongliy rogon ngam koyew fakam. Yi Somol ni Got rok piyu Israel e ke gaar, ‘Re raba’ i n’em e dabi m’ay e flowa riy, ma re rume’ nem e dabi m’ay e gapgep riy u m’on ko rofen ni gag Somol e bay gu pi’ e n’uw nge yib.’”—1 Ki. 17:13, 14.

3. Mang e ba ga’ fan ni ngad dugliyed?

³ Fare pin e gathi kemus ni nge dugliy ko mang e nge rin’ ko fa chuuw i ggan ni ke magey rok, ya ku bay ban’en ni kab ga’ fan ni nge dugliy. Be pagan’ ngak Jehovah nra ayuwegrow fak, fa kab ga’ fan e ggan u wan’ ko bin ni nge fel’ u wan’ Got me fel’ thilrow? Ku er rogodad ni bay ban’en nib ga’ fan ni ngad dugliyed. Kab ga’ fan u wan’dad ni ngad fel’gad u wan’ Jehovah ko bin ni ngad gayed e fel’ rogon, fa? Bay fan ni nge pagan’dad ngak Got ma gad pigpig ngak. Ma bay boch ban’en nrayog ni ngad rin’ed ma gad fel’ u wan’.

‘Ba’ Rogom ni Ngan Ta’ Fam’

4. Mang fan ni bay rogon ni ngad liyorgad ngak Jehovah?

⁴ Bay mat’awun Jehovah ni nge lemnag ni nge pigpig e girdi’ ngak nrogon nib m’agan’ ngay. I micheg e pi tapigpig rok u tharmiy e re n’ey nib taareban’rad ngay ni lungurad: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunumiy urngin ban’en, yi gur e mu lemnag mi yad sum ni yad ba fos.” (Rev. 4:11) Bochan ni Jehovah e ir e ke Sunmiy urngin ban’en, ma aram fan ni bay rogon ni ngad liyorgad ngak.

5. Mang nra k’aringdad e t’ufeg rok Got ni ngad pigpiggad ngak?

⁵ Ku reb i fan ni ngad pigpiggad ngak Jehovah e bochan ni dariy be’ ni ma t’ufegdad ni bod ir. Be gaar e Bible: “Ara’ rogon ni sunumeg Got e girdi’; girdi’ e ni ngongliy ni bod yaan Got. I sunumeg be’ nib moon nge be’ ni ppin.” (Gen. 1:27) Ke sunmiy Got e girdi’ nib puf rogorad nrayog ni ngar lemgad mar dugliyed boch ban’en. Jehovah e ir Chitamangin urngin e girdi’ ni bochan e ir e ke pi’ e yafas ngodad. (Luke 3:38) Ke pi’ urngin ban’en nib t’uf rok pi fak ya ngar felfelan’gad ni bod ni ma rin’ e matam nib fel’ ngak pi fak. “Be mateg ramaen e yal’” ma “be pi’ e n’uw,” ya nge yoor e ggan u Fayleng me par nib fel’ yaan.—Matt. 5:45.

6, 7. (a) Mang gafgow e fek Adam i yib nga daken pi fak? (b) Mang e ra rin’ fare maligach ni pi’ Kristus ni fan ngak e piin ni yad ra par ni yad ba fel’ u wan’ Got?

⁶ Ki ayuwegdad Jehovah u wenegan e denen ni ke af ngodad. Denen ni tay Adam e taareb rogon nga reb e ta chingaw ni ma iring e salpiy ko tabinaw rok nga i chingaw riy. Togopuluw ni tay Adam ngak Jehovah e chuweg e felfelan’ rok pi fak. Bochan e ngongol rok ni fel’ ngak, ma aram fan ndaki flont e girdi’ ma kar manged sib ko denen nge yam’, maku aram fan ni gad ma m’ar, ma ma kireban’dad, ma gad ma yim’. Faanra ngan pag reb e sib mab t’uf ni ngan thang puluwon, ere ku aram rogon e n’en ni ke rin’ Jehovah ya nge yog nda chuwgad u wenegan e denen ni ke af ngodad. (Mu beeg e Roma 5:21.) I rin’ Jesus Kristus e n’en nib m’agan’ e Chitamangin ngay, ni aram e “pi’ e pogofan rok nge biyuliy boor e girdi’ ngay.” (Matt. 20:28) Dab ki n’uw nap’an ma piin ni yad ba fel’ u wan’ Got e ra yib angin e re biyul nem ngorad nib fel’ rogon.

⁷ Jehovah ni ir e ke Sunmiydad e ke rin’ urngin ban’en nib t’uf ni nge rin’ ya ngad felfelan’gad. Faan gad ra fel’ u wan’, ma aram e rayog ni ngad guyed rogon nra maruwel ni nge chuweg urngin e kireb ni be gafgownag e girdi’. Maku ra dag ngodad ni be’ nge be’ rogon nra “tow’athnag e piin ni yad be gayiy Got.”—Heb. 11:6.

‘Tirom e Girdi’ e Ra Bagayad me Ir e Ra Ognag Ir’

8. Mang e gad ra fil rok Isaiah u murung’agen e pigpig rodad ngak Got?

⁸ Faanra ngad fel’gad u wan’ Got ma susun ni ngad maruwelgad ko puf rogon ni bay rodad nib fel’ rogon. Re n’ey e bochan ni Jehovah e der towasariy be’ ni nge pigpig ngak. U nap’an Isaiah me fith ni gaar: “I mini’ e nggu l’og nge yan? I mini’ e nggu tay e thin nga l’ugun nge fek e thin romad nge yan?” Me fulweg Isaiah ni gaar, “Bay gu wan! Mu l’ugeg!”—Isa. 6:8.

9, 10. (a) Susun ni uw rogon ni ngad pigpiggad ngak Got? (b) Mang fan nib puluw ni ngad pigpiggad ngak Jehovah u polo’ i lanin’dad?

⁹ Girdi’ e rayog ni ngar turguyed ni ngar pigpiggad ngak Got fa danga’. Baadag Jehovah ni ngad pigpiggad ngak nib m’agan’dad ngay. (Mu beeg e Joshua 24:15.) En ndabun ni nge pigpig ngak Got e dabi fel’ u wan’ Got; maku dabi fel’ u wan’ e piin ni yad ma pigpig ngak ni bochan e ngar fel’gad u wan’ boch e girdi’. (Kol. 3:22) Faan gad ra pag e tin nu fayleng ban’en nge magawonnag e pigpig rodad, ma dab kud pigpiggad ngak u ‘polo’ i lanin’dad’, ma aram e dabiyog ni nge fel’ u wan’ Got. (Ps. 119:2) Manang Jehovah ni faan gad ra pigpig ngak u polo’ i lanin’dad ma ra fel’ rogodad riy. I tay Moses ir ngak piyu Israel ni ngar mel’eged e yafas ‘ni aram e nge t’uf rorad [Jehovah] ni Got rorad, mu ur folgad rok ma yad be par ni yad ba yul’yul’ ngak.’—Deut. 30:19, 20.

¹⁰ David ni Pilung nu Israel kakrom e tangnag Jehovah ni gaar: “Rofen ni ga ra mahl ngak e pi toogor rom e ra un e tirom e girdi’ ngom nra bagayad me ir e ra ognag ir. Rogon e waangachal ni bay nri kakadbul, e aram rogon e piin ni pagel ni girdi’ rom ni bay ra bad ngom nga daken fapi burey nib thothup.” (Ps. 110:3) Boor e girdi’ e ngiyal’ ney ni yad ma m’oneg e fel’ rogon nge fafel. Machane piin nib t’uf Jehovah rorad e ba m’on u wan’rad e pigpig ni yad be tay ngak. Farad pasig ko machib e be micheg e n’en nib m’on u wan’rad. Ma pagan’rad ngak Jehovah nra i pi’ e tin nib t’uf rorad ni gubin e rran.—Matt. 6:33, 34.

Maligach nib Fel’ u Wan’ Got

11. Mang e i athapeg piyu Israel ko maligach ni ur ognaged ngak Jehovah?

¹¹ I ognag e girdi’ rok Got e maligach ngak u tan fare m’ag ko Motochiyel ni fan e ngar fel’gad u wan’. Be gaar e Levitikus 19:5, BT: “Faan gimed ra li’ ba gamanman ni maligach ni ma gapaseg thilin Got nge girdi’, ma ngam rin’ed gafalngin ni kug pi’ ngomed, ma ra fel’ u wan’ug e maligach ni ngam pied.” Miki gaar e re babyor ko Bible nem: “Nap’an ni ga ra pi’ ba maligach ni fan e og magar ngak Somol, mag fol ko pi gam’ing ney, ya nge fel’ u wan’ e maligach rom.” (Lev. 22:29, BT) Nap’an nra ognag piyu Israel reb e gamanman nib fel’ ni maligach ngak Jehovah u daken e altar rok, ma bon e ath riy ni ma yan nga lang e ban’en ni “rib fel’ u wan’” e bin riyul’ e Got. (Lev. 1:9, 13, BT) I m’agan’ ngay me fel’ u wan’ e t’ufeg ni i dag e girdi’ rok ngak. (Gen. 8:21) Pi Motochiyel ney e bay ban’en riy nrayog ni ngan fanay e ngiyal’ ney. Piin ni yad ma ognag e maligach nib fel’ ngak Jehovah e yad ra fel’ u wan’. Ba miti mang maligach e ba m’agan’ ngay? Am lemnag l’agruw ban’en ni aram e: ngongol rodad nge thin rodad.

12. Ba miti mang ngongol e ra ud rin’ed ma aram e dabkiyog ni ‘ngad pied gadad, ngad manged maligach’?

¹² I yoloy apostal Paul ko babyor ni pi’ nge yan ngak piyu Roma ni gaar: “Ngam pied gimed ngak Got, ngam manged maligach nib fos ngak, ni kam pied gimed ko maruwel rok ma gimed ba fel’ u wan’. Ereray e bin riyul’ e liyor ni susun e ngam pied ngak Got.” (Rom. 12:1) Faanra nge par be’ nib fel’ u wan’ Got, ma thingari par nib beech. Faanra alitnag ir ko tamagow, ara langad, ara falay ni kireb, ara alkul, ma tin ni ke ognag ngak Got e ba m’ay fan. (2 Kor. 7:1) Maku, bochan ni “cha’ nra ngongliy e ngongol ko darngal e ke denen nib togopluw ko birok e dowef,” ma aram fan ni gubin mit e ngongol nde yalen nra kirebnag e maligach ni ke ognag ngak Jehovah. (1 Kor. 6:18) Faanra nge fel’ be’ u wan’ Got, ma thingari ‘par ni ba thothup u fithik’ urngin e tin ni be rin’.’—1 Pet. 1:14-16.

13. Mang fan nib puluw ni ngad pininged e sorok ngak Jehovah?

¹³ Ku reb e maligach ni ma felfelan’ Jehovah ngay e bay rogon ko thin rodad. Piin nib t’uf Jehovah rorad e kab kafram i yib ni yad ma weliy fel’ngin u fithik’ e yoor ngu nap’an ni yad bay u tabinaw rorad. (Mu beeg e Psalm 34:1-3.) Mu beeg e Psalms 148-150 mag fal’eg i yaliy urngin yay ni be pi’ e pi tang ney e athamgil nga lanin’dad ni ngad pininged e sorok ngak Jehovah. Riyul’ ni “piin ni yad be fol rok e susun e ngar pininged e sorok ngak.” (Ps. 33:1) Ma Jesus Kristus ni ir e En ni Ngaud Folwokgad Rok e ke tamilangnag feni ga’ fan ni ngaun pining e sorok ngak Got ko machib ni i tay.—Luke 4:18, 43, 44.

14, 15. Ba miti mang maligach e yog Hosea ngak piyu Israel ni ngar pied, ma uw rogon ni fulweg Jehovah?

¹⁴ Faan gad ra machib u fithik’ e pasig ma aram e gad be micheg nib t’uf Jehovah rodad ma gad baadag ni ngad fel’gad u wan’. Am lemnag rogon e thin ni yog Hosea ni profet ngak piyu Israel ni bochan e kar uned ko liyor ni googsur ma da kur fel’gad u wan’ Got. (Hos. 13:1-3) I yog Hosea ngorad ni ngar weniggad ni nge lungurad: “[Jehovah] mu n’ag fan urngin e denen romad, me fel’ u wan’um e meybil romad, ma gamad pining e sorok ngom ni bod ni ku gogned ngom ni gamad ra rin’.”—Hos. 14:1, 2.

¹⁵ Mang e yog Jehovah u murung’agen e piin ni kar rin’ed e re n’em? I gaar: “Bay ra pired nri yad ba t’uf rog.” (Hos. 14:4) Piin nra pininged e sorok ngak Jehovah ni aram e maligach rorad e n’ag fan e denen rorad, mar fel’gad u wan’, mar manged fager rok.

16, 17. Nap’an nra tabab be’ i machibnag fare thin nib fel’ ni bochan e michan’ rok ngak Jehovah, ma ra uw rogon u wan’ Jehovah e maligach rok?

¹⁶ Ngan pining e sorok ngak Jehovah u fithik’ e girdi’ ni yoor e aram ban’en nib ga’ fan ko bin riyul’ e liyor. Rib ga’ fan u wan’ fare psalmist ni nge pining e sorok ngak Got, ma aram fan ni gaar ngak: “Wenig ngom, nge fel’ u wan’um e magar ni gu be pining ngom u fithik’ e meybil rog ngom.” (Ps. 119:108) Ma uw rogon e ngiyal’ ney? I yiiynag Isaiah murung’agen ba ulung nib ga’ e ngiyal’ ney ni gaar: “Bay ur weliyed e thin nib fel’ ni murung’agen e tin ni ke rin’ Got. . . . [yad ra] pi’ [e tow’ath rorad] ngak Somol u daken e altar ya nge felan’ Somol.” (Isa. 60:6, 7) Bokum milyon e girdi’ ni kar lebguyed e re yiiy ney, ya yad be pining e sorok ngak Got ‘nge mang maligach rorad ngak u daken Jesus; ni aram e gubin ngiyal’ ni nguur pininged e magar nga fithingan u lungurad.’—Heb. 13:15.

¹⁷ Me gur, ga be pi’ e maligach ngak Got nib fel’ u wan’, fa? Faanra danga’, ma ga ra thilyeg boch ban’en ni fan e ngam un i pining e sorok ngak Jehovah u fithik’ e girdi’ ni yoor, fa? Nap’an nra k’aringem e t’ufeg rom ni ngam tabab i machibnag fare thin nib fel’, ma maligach rom e kab fel’ u wan’ Jehovah “ko bin ni ngan pi’ ba garbaw ngak ni maligach.” (Mu beeg e Psalm 69:30, 31.) Riyul’ nib “fel’” u wan’ Jehovah e maligach ni ga be pi’ ngak ni aram e ga be pining e sorok ngak. (Ezek. 20:41, BT) Felfelan’ ni ga ra tay e dariy ban’en ni taareb rogon ngay.

Jehovah e Ra ‘Fal’eg Waathan e Piin ni Yad Ma Fol Rok’

18, 19. (a) Uw rogon u wan’ boch e girdi’ e bin riyul’ e liyor e ngiyal’ ney? (b) Mang e ra buch rok be’ ni faanra dab ki fel’ u wan’ Got?

¹⁸ Boor e girdi’ e ngiyal’ ney ni yad ma lem ni bod e girdi’ u nap’an Malaki ni faani lungurad: “Mm’ay fan e pigpig ni ngan tay ngak Got.” (Mal. 3:14) Bochan ni yigoo chugum e yad ma lemnag, ma aram fan ni yad be lemnag ndabi lebug e tin nib m’agan’ Got ngay, ma motochiyel rok e daki m’ag ko ngiyal’ ney. Yad be lemnag ni gad be adbey e tayim ko machib ma yibe k’aring e chalban ko girdi’.

¹⁹ Re lem ney e tabab u lan e milay’ nu Eden. Satan e ir e waliy Efa nge darifannag fel’ngin e yafas rok ni pi’ Jehovah ma aram ma daki fel’ u wan’ Got. Ngiyal’ ney e be guy Satan rogon ni nge lemnag e girdi’ ndariy angin ni ngar rin’ed e tin nib m’agan’ Got ngay. Machane, Efa nge figirngin e kar nangew ni bochan e dakur fel’gow u wan’ Got, ma aram fan ni mul e yafas rorow u pa’row. Ku aram e n’en ni bayi buch rok e piin ni yad be folwok rorow e ngiyal’ ney.—Gen. 3:1-7, 17-19.

20, 21. (a) Mang e rin’ fare pin nu Zarefath? (b) Mang angin ni yib ngak? (c) Uw rogon ni ngad folwokgad rok fare pin nu Zarefath, ma mang fan?

²⁰ Mu lemnag e n’en nib thil u thilin e n’en ni buch rok Adam nge Efa, nge n’en ni buch rok Elijah nge fare pin nu Zarefath ni ke yim’ figirngin. Nap’an ni rung’ag e n’en ni yog Elijah ngak, ma aram me lith fa uw i flowa me pi’ e ggan rok fare profet ni som’on. Ma aram me lebguy Jehovah e n’en ni micheg u daken Elijah. Be gaar e Bible: “Yad gubin nra pired ni pire’ e rran ni ba gaman e ggan rorad. De m’ay e flowa u lan fare raba’ i n’em, ma de m’ay e gapgep u lan fare rume’, ni bod ni micheg Somol ngak fare pin u l’ugun Elijah.”—1 Ki. 17:15, 16.

²¹ N’en ni rin’ e re pin nem e ri in e girdi’ e ngiyal’ ney nrayog rok. Ri pagan’ ngak fare Got ni ma pi’ e yafas, ma de pag nde ayuweg. Re thin ney nge ku boch e thin nu Bible e be micheg ni bay rogon ni nge pagan’dad ngak Jehovah. (Mu beeg e Joshua 21:43-45; 23:14.) Rogon e par ko Pi Mich Rok Jehovah e ngiyal’ ney e be micheg ndariy ba ngiyal’ nra digey Jehovah e piin ni yad ba fel’ u wan’.—Ps. 34:6, 7, 17-19.a

22. Mang fan ni ngad guyed rogon ni ngad fel’gad u wan’ Got ni ka chiney ndawori sagaal?

²² Fare rran ko pufthin rok Got e ke chugur ni nge “taw ngak urngin e girdi’ nu fayleng.” (Luke 21:34, 35) Dariy be’ nrayog ni nge mil riy. Salpiy nge chugum e dabiyog ni nge ayuwegey u nap’an nra pong e Ta Pufthin rok Got ni gaar: “Gimed e piin ni ke fal’eg e Chitamag waathmed, mired! Mired ngan pi’ e gin nsuwon Got ngomed.” (Matt. 25:34) Arrogon, Jehovah e ra ‘fal’eg waathan e piin ni yad ma fol rok.’ (Ps. 5:12) Ere, susun ni ngad guyed rogon ni ngad fel’gad u wan’ Got.

[Footnote]

Ka Ga Manang?

• Mang fan ni bay rogon ni ngad pigpiggad ngak Jehovah u polo’ i gum’ircha’dad?

• Ba miti mang maligach e ba m’agan’ Jehovah ngay e ngiyal’ ney?

• Mang fan ni ngaud pininged e sorok ngak Jehovah nge mang maligach rodad?

• Mang fan ni ngad guyed rogon ngad fel’gad u wan’ Got?

[Picture on page 17]

Mang e yog e profet rok Got ngak reb e matin nib gafgow ni nge rin’?

[Picture on page 19]

Mang angin ni faan gad ra pining e sorok ngak Jehovah nge mang maligach rodad?

[Picture on page 21]

Ra pagan’um ngak Jehovah ma dabi pagem