Rogon ni Ngan Fil Murung’agen Got ko Bitir​—Mang Boch Ban’en Nra Yib Angin?

“Ri dab mu paged talin e pi thin ney ni kug pi’ ngomed e daba’. Um filed ngak pi fakmed; um weliyed murung’agen ngorad ko ngiyal’ ni gimed bay u tabinaw nge ngiyal’ ni gimed be milekag, nge ngiyal’ ni gimed be toffan nge ngiyal’ ni gimed be maruwel.”​—DEUTERONOMY 6:6, 7.

YU NGIYAL’ e bayi n’en ma daki nang e gallabthir rogon ni ngar skulnaged pi fakrad. Ma nap’an ni yad ra gay e ayuw nga bang, ma ba thilthil e n’en ni yad ma rung’ag ara yad ma beeg ni ma yoornag lanin’rad. Girdi’ rorad nge pi tafager rorad e ba ga’ ni yad ma gur ngar weliyed lanin’rad. Ma pi babyor, nge boch e web site ko Internet e yad ma pi’ boch e fonow ko gallabthir nib togopuluw reb nga reb.

Machane, Bible e gathi kemus ni be fonownag e gallabthir u rogon ni ngar skulnaged e bitir rorad, ya ku be pow’iyrad u rogon ni ngar rin’ed e re n’ey. Rogon ni be tamilangnag fare thin nu Bible aray u lang e ba t’uf ni nge gay e gallabthir rogon ni ngar weliyed murung’agen Got ngak e bitir rorad ni gubin e rran. Baaray aningeg e fonow nib puluw ko Bible ni ke ayuweg bokum biyu’ e gallabthir ni ngar filed murung’agen Got ngak pi fakrad.

1. Mu fil ban’en ngorad ko pi n’en ni ke sunmiy Got. I yoloy apostal Paul ni gaar: “Ka nap’an ni sunmiy Got e fayleng, ma fel’ngin ndabiyog ni ngan guy, ni aram gelngin ndabi m’ay biid nge rarogon ni ir Got, e kan guy nrib tamilang. Girdi’ e rayog ni nge nang fan e pi n’ey u fithik’ e pi n’en ni ke m’ay i sunumeg rok Got. Ere dakuriy e tawey rorad nga bayang!” (Roma 1:20) Rayog ni nge ayuweg e gallabthir pi fakrad ni nge riyul’ Got u wan’rad ni faan yad ra ayuwegrad ni ngar nanged me ga’ fan u wan’rad e pi n’en ni ke sunmiy Got mar nanged ko mang boch i fel’ngin ni be m’ug riy.

Ireray reb e kanawo’ ni i skulnag Jesus pi gachalpen riy. Bod ni yog ni gaar: “A mu guyed e arche’ ni yad be chachangeg: darir yunged awochngin e woldug, fa ra kunuyed e woldug ni ke el ngar tiyed nga naun; ma Chitamangimed nu tharmiy e be ayuwegrad! Gathi ka ba ga’ famed ngak e arche’?” (Matthew 6:26) Ke tamilangnag Jesus fel’ngin Jehovah ni aram e t’ufeg nge runguy u daken e re thin ney. Machane, ku bay boch ban’en ni rin’. Ke ayuweg pi gachalpen ni ngar lemnaged rogon ni i dag Got e pi fel’ngin ney ngak pi fak.

I weliy Solomon ni Pilung murung’agen e gonop ni ke pi’ Got ko apurgog, me weliy e n’en nrayog ni ngan fil rorad. I yoloy ni gaar: “Girdi’ ni yad mmalmal e susun e ngar pired ngar yaliyed e apurgog nge mit ban’en ngorad ko ngongol rok e apurgog. Dariy be’ ni be yog e thin rorad fa ir e pilung rorad, fa be gagiyegnagrad, machane ra taw ko ngiyal’ ni bay e gowel ma yad ma kunuy e ggan ngar chaariyed ni ngar kayed ko ngiyal’ ni ke yib e garbeb.” (Proverbs 6:6-8) Ireray reb e kanawo’ nib fel’ nrayog ni ngan fil riy rogon ni ngan nameg boch ban’en nra yib angin ma gad fanay gelngidad ni ke pi’ Got ni ngad rin’ed e pi n’em!

Rayog ni nge folwok e gallabthir u rogon ni i fil Jesus nge Solomon ni Pilung ban’en ni faan yad ra rin’ e pi n’en ni baaray: (1) Ngar fithed pi fakrad ko ba miti mang woldug nge gamanman e yad baadag ni ngar nanged murung’agen. (2) Ngkur filed boch ban’en u murung’agen e pi woldug nem nge gamanman. (3) Ngar filed boch ban’en u murung’agen Got ko pi n’em ni ke sunmiy.

2. Mu folwok ko ngongol rok Jesus ngak e piin ni i fil ban’en ngorad. Jesus e th’abi ga’ fan e pi n’en ni i yog u fithik’ urngin e girdi’ ni ur moyed kakrom. Yugu aram rogon ma ba ga’ ni yugu ma fith boch ban’en, ya baadag ni nge nang e n’en ni be lemnag e piin ni be non ngorad. (Matthew 17:24, 25; Mark 8:27-29) Ku er rogon e gallabthir ni boor ban’en nib ga’ fan ni ngar filed ko bitir rorad. Machane, faanra nge yib angin, mab t’uf ni ngar folwokgad rok Jesus mar pied e athamgil nga laniyan’ pi fakrad ni ngar weliyed e n’en ni bay u lanin’rad.

Uw rogon ni faanra der fol e bitir ara ba sagaal ni nge mit e n’en ni yibe fil ngak? Mu lemnag rogon ni i fil Jesus ban’en ngak e pi apostal rok. Immoy yu ngiyal’ ni ur maluagthingad mab sagaal ni nge mit ngorad fel’ngin e sobut’an’. Yugu aram rogon ma i gum’an’nag Jesus ir u puluwrad ma i sul nga i weliy ngorad feni ga’ fan e sobut’an’. (Mark 9:33, 34; Luke 9:46-48; 22:24, 25) Gallabthir ni yad ma folwok rok Jesus e yad ra llowan’nag pi fakrad u fithik’ e gum’an’, ma faanra ba t’uf ma yad ma sul u daken taab n’en nge taw ko ngiyal’ ni ke tamilangan’rad u feni ga’ fan.a

3. Mu fil ban’en ngorad ko ngongol rom. Ba fel’ ni nge fol e gallabthir ko fare fonow ni pi’ apostal Paul ngak e pi Kristiano nu Roma. I yoloy ni gaar: “Ga be machibnag boch e girdi’ mang fan ndab mmachibnigem? Ga be machibnag ni be lungum, ‘Dab ni moro’ro’’ me gur ga ma moro’ro’ fa?”​—Roma 2:21.

Ba puluw e re fonow ney ni bochan e bitir e ka boor ban’en ni yad ma fil ko pi n’en ni yad ma guy ni ma rin’ e gallabthir ko tin ni yima yog ngorad. Bin riyul’ riy e, gallabthir ni ma rin’ e n’en ni ma yog ko bitir rok ni nge rin’ e ra i motoyil pi fakrad ngorad.

4. Mu tabab ko ngiyal’ ni kab achig fare tir. Timothy ni i un ngak apostal Paul ko milekag e ir be’ nrib fel’ thin. (Acts 16:1, 2) Reb i fan e bochan ni ‘kab bitir’ mu un fil e “thin ni bay u lan fare babyor nib thothup” ngak. Gathi kemus ni i beeg e chitiningin nge titaw rok ngak e thin ko fare Babyor nib Thothup, ya kur ayuwegew ni nga i fal’eg i lemnag e thin riy.​—2 Timothy 1:5; 3:14, 15.

Gin ni Ga Ra Pirieg e Ayuw Riy

Boor ken e babyor ni ke ngongliy e Pi Mich Rok Jehovah ni nge ayuweg e gallabthir u rogon ni ngar filed murung’agen Got ngak pi fakrad. Boch e pi babyor ney e kan ngongliy ni fan ko bitir. Ma boch e kan ngongliy ni nge ayuweg e gallabthir nge fel’ e numon u thilrad pi fakrad ko ngiyal’ ni ke fel’ yangarrad.b

Riyul’ nu m’on ni nge fil e gallabthir murung’agen Got ngak pi fakrad, ma ba t’uf ni ngar nanged e fulweg u boch e deer nib mo’maw’ e fulweg riy nrayog ni nge fith pi fakrad. Uw rogon ni ga ra fulweg e pi deer ni baaray: Mang fan ni ke pag Got e gafgow? Mang e ba m’agan’ Got ngay ni fan ko fayleng? Bay u uw e piin ni kar m’ad? Ra felfelan’ e Pi Mich Rok Jehovah ni ngar ayuweged gur ni ngam nang e fulweg ko pi deer ney nge ku boch e deer ya nge yog nim chugurgad chon e tabinaw rom ngak Got.​—James 4:8.

[Footnotes]