Boch Ban’en Nrayog ni Ngan Rin’ u M’on ni Nge Yib e Yoko’, ara Durru’, ara Ku Boch Ban’en ni Yima Gafgow Riy

Bochan ni ke peth peth e yoko’, nge durru’, nge ku boch ban’en ni ma yib ni yima gafgow riy, ma mang e rayog ni nge rin’ be’? Ngad weliyed boch ban’en nrayog ni ngan rin’.

Mu palog ko gin ni bay e riya’ riy. Be gaar e Bible: “Be’ nib gonop e ra guy e oloboch ni be yib me pilo’ riy, machane piin nib balyang e darir pilo’gad riy, me yan i tomur mi yad kolngan’rad.” (Proverbs 22:3) Re fonow ney e rayog ni ngan fol riy u nap’an ni ke yib e yoko’, ara durru’, ara boch ban’en ni yima gafgow riy. Faanra yibe yog ni bayi pil reb e volcano, ara bayi yib e ran nge tharey e binaw, ara bayi yib e yoko’, mab fel’ ni ngan chuw ngan yan nga bang ndariy e riya’ riy. Kab ga’ fan e yafas ko naun ara chugum.

Boch e girdi’ e rayog ni nge dab ra pared u yu yang nib gel e riya’ riy. I yog reb i girdien e am ni gaar: “Kemus ni in yang u fayleng e ba gel e riya’ riy ko yoko’, ara durru’, ara ku boch ban’en ni ma yib ni yima gafgow riy.” Riyul’ nra i buch e pi n’ey ko yungi n’en ni bay u tooben e day, ara yungi n’en nib ga’ ni ma sum e durru’ riy. Faanra rayog ni nge dab mu par ko yungi n’ey ara mu chuw ngam man mu par nga bang ndariy e riya’ riy, ma aram e rayog ni ngam palog ko riya’.

Mu dugliy e n’en ni ngam rin’. Yugu aram rogon ni ga be kol ayuw, machane ku rayog ni nge yib reb e gafgow nda mur lemnag nra buch. Rayog ni nge dabi buch ban’en rom ni faanra kam lemnag e n’en ni ngam rin’ u m’on riy. Re n’ey e ba puluw ko fare fonow ni bay ko Proverbs 22:3. Bay e emergency kit rom ara chugum ni kam fal’eg rogon kam tay nga bang ni nga yigi buch ban’en ma ga fek, fa? Ke yog reb e babyor boch ban’en ni kub t’uf ni ngan fek, ni aram e: Mam’en e tafalay, nge ran, nge ggan nib mo’maw’ ni nge kireb, nge pi babyor nib t’uf. (1-2-3 of Disaster Education) Kub fel’ ni ngam weliyed chon e tabinaw rom boch e gafgow nrayog ni nge buch nge n’en nrayog ni ngam rin’ed.

Um par nib chugur e tha’ u thilmew Got. Re n’ey e rayog ni nge ayuwegdad u gubin e magawon ni ma yib ngodad. Be yog e Bible ni Got e “ir e Chitamangiy nrib tarunguy e girdi’, ni ir faanem i Got ni urngin mit e ayuw me ir e be yib rok ngodad!” Maku reb e thin u Bible e be yog ni Got e “ma pi’ e athamgil nga laniyan’ e piin ni ke mulan’rad.”​—2 Korinth 1:3, 4; 7:6.

Arrogon, manang Got e pi n’en ni ma buch rok e piin ni ma pagan’rad ngak. Ir reb e Got ko t’ufeg ma boor kanawoen ni ma pi’ e athamgil nga lanin’dad. (1 John 4:8) Gad ra meybil, ngad ninged gelngin Got nib thothup ma rayog ni nge ayuwegdad ko pi magawon ni ma yib ngodad. Gelngin Got nib thothup e ma yibnag ngan’dad boch e thin nu Bible nrayog ni nge fal’eg laniyan’ e piin ni keb e gafgow ngorad. Riyul’ nrayog ni nge thamiy e pi tapigpig rok Got ni yad ba yul’yul’ e n’en ni thamiy David ni pilung nu Israel kakrom ni faani gaar: “Mus ni faanra yan e re pa’ i wo’ nem u fithik’ e rumug ni yam’, ma dab gu tamdag, ya ga ba’ rog! Gul rom nge sog rom ni ga ma gafaliy e saf ngay e ir e ga be yororiyeg ngay.”​—Psalm 23:4.

Piin Kristiano e yad ma ayuweged yad. Nap’an e bin som’on e chibog, me yog Agabus ni profet ni, “bay ba uyungol ni aram e nge yib nga gubin yang u fayleng. Me yib e re uyungol nem ko fa ngiyal’ nem ni Klaudias e pilung u Roma.” Boor i gachalpen Jesus u Judea nra gafgowgad ko re uyungol nem. Ere mang e rin’ e tin ka bay i gachalpen Jesus ni ma par u boch e binaw u nap’an nra rung’aged murung’agen e gafgow ni be tay pi walagrad ni Kristiano? Be gaar e Bible: “Piin ni gachalpen Jesus e ra turguyed ni nge bagayad me pi’ urngin e tin nrayog rok ngar ayuweged e piin ni walagrad ni girdien Kristus ni yad be par u Judea.” (Acts 11:28, 29) Ere kar pied e ayuw ngorad.

Nap’an nra buch boch e gafgow ni aray rogon e ngiyal’ ney, maku aray rogon e n’en ni ma rin’ e pi tapigpig rok Got. Pi Mich Rok Jehovah e yimanangrad ko ayuw ni yad ma pi’ ngak e piin ni taareb e michan’ rorad. Bod nnap’an ni aw reb e durru’ nib gel nga Chile ko February 27, 2010 ma rib papey ni rin’ e Pi Mich Rok Jehovah boch ban’en ni ngar ayuweged e piin ni kar gafgowgad. Karla ni puth e naun rok u nap’an e tsunami e yog ni gaar: “Kari fel’ lanin’ug u nap’an ni kug guy e [Pi Mich] u boch e binaw ni kar bad ni ngar pied e ayuw. Dariy e maruwar riy ni ke fal’eg Jehovah lanin’mad u daken e pi n’en ni ke rin’ e pi walag nem. Kug guy e t’ufeg nge ayuw ni kar pied.” Tutuw rok ni gathi ir reb e Pi Mich e ki guy e ayuw nni pi’. I gaar: “Rib thil e re n’ey ko n’en ni gu ma guy ni ma rin’ e girdi’ ko teliw rog.” N’en ni guy e k’aring ni nge yog ngak e Pi Mich Rok Jehovah ni ngar filed e Bible ngak.

Gad ra par e piin ni yad ba t’uf rok Got u taabang, ma rayog ni nge ayuwegdad u nap’an ni ke yib e gafgow.

[Picture on page 6]

Bay e emergency kit rom ara chugum ni kam fal’eg rogon kam tay nga bang ni nga yigi buch ban’en ma ga fek, fa?

[Picture on page 7]

Gad ra meybil ngad ninged gelngin Got nib thothup, ma rayog ni nge ayuwegdad ko pi magawon ni ma yib ngodad

[Picture on page 7]

Piin Kristiano e yad ma ayuweged yad u nap’an ni ke yib e yoko’, ara durru’, ara boch ban’en ni yima gafgow riy

[Picture on page 7]

“Kug guy e t’ufeg nge ayuw ni kar pied”