Faani M’ug E Yoko’, Durru’, Ara Yugu Reb E Magawon

Accra, Ghana, July 4, 1995: Ke aw e n’uw ni bin th’abi gel ni ka nap’an 60 e duw kafram me tharey e binaw. Gonap’an 200,000 e girdi’ ni kar lusgad ko gubin ban’en rorad, 500,000 e girdi’ ni dakuriy e naun rorad, ma 22 e girdi’ ni kar m’ad.

San Angelo, Texas, U.S.A., May 28, 1995: Nanyor nge ice e ke aw ko re mach ney ni ma par 90,000 e girdi’ riy, ma puluwon e pi n’en ni kan kirebnag e $120 million (U.S.).

Kobe, Japan, January 17, 1995: Ke mus 20 e second ni ke m’ug e durru’ riy ma in e biyu’ e girdi’ ni kar m’ad, bokum i biyu’ e girdi’ ni kar maadadgad, ma bokum i biyu’ e girdi’ ndariy e naun rorad.

GAD BE PAR u ba ngiyal’ nrayog ni ngan nog e ngiyal’ ko gafgow ngay. Reb e report ko United Nation e ke dag ko 30 e duw u thilin 1963–92, ni ke mun 6 percent u gubin e duw ni ke yim’ e girdi’, me maadad, ara dariy e naun rorad ni bochan e yoko’, durru’, ara yugu reb e magawon. Bochan e gafgow ni ke m’ug ko pi magawon nem me tunguy e UN e pi thin ni kan nog “the International Decade for Natural Disaster Reduction” ngay ko pi duw ni ka nap’an e 1990.

Dabi siy ni gelngin e fayleng​—ni bod e nanyor, burey ni ke chub, ara durru’​—e dabi gafgownag e girdi’ u gubin ngiyal’. Ya ke m’ug ni bokum miriay yay u gubin e duw ma dariy be’ ni ke maad’ad riy. Machane faanra ba l’ag e yafos rok boor e girdi’ riy ma rayog ni ngan nog ni aram e riya’.

Be m’ug ndabiyog ni ngan siyeg e riya’ ni ma yib u gelngin e fayleng. Be weliy e babyor ni Natural Disasters​—Acts of God or Acts of Man? ni gaar: “Be kirebnag e girdi’ e fayleng ni nge mom ni nge m’ug e riya’ riy, ma ngongol rorad e ma n’igin ni ngar awgad ko riya’.” Be tunguy e babyor e thin riy ni fan ni nge tamilangnag fan: “Ra nge m’ug e durru’ ni gathi rib gel’ u reb e mach ni yima toy e naun u barba’ e loway ma ri ra yib e riya’ e ngaram ko girdi’ ni ra maadad nge yim’.” Machane gafgow rorad e ke m’ug ni bochan e durru’ ara bochan ni ke toy e girdi’ e naun rorad u ba yang ni bay e riya’ riy?”

Machane ka bay fan ko girdi’ ni ma fil e Bible ndabra gingad ni be yoor e yoko’, durru’, nge yugu boch e magawon iyan. Gonap’an 2,000 e duw kafram, i yiiynag Kristus e pow ko “tin tomren e rran” mi weliy ni “bay yib e uyungol nge durru’ u gubin yang.” (Matthew 24:3, 6-8) Maku i tamilangnag e Bible u nap’an e “tin tomren e rran,” ma bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri baga’ farad.a (2 Timothy 3:1-5) Pi ngongol nem e ma n’igin e girdi’ ni ngar kirebnaged e fayleng, ma ra mom ni ngar gafgowgad nga gelngin e fayleng. Maku baga’ ni ma yib e gafgow ngak e girdi’ ya aram wenegan e girdi’ ni dariy e t’ufeg u thilrad ni thingar ra pired riy.

Be yoor iyan e girdi’ u daken e re fayleng ney, ma ngongolen e girdi’ e be n’igin ni nge yib e magawon ngorad, ma danir ayuweged e fayleng, ere ra ul’ul’ e yoko’, durru’, nge yugu boch e magawon ni nge gafgownag e girdi’. Ra dag e bin migid e thin ni ba mo’maw’ ni ngan pi’ e ayuw ko ngiyal’ ni bay e magawon.

[Boch e Thin nra Tamilangnag Murung’agen]

[Credit Line]

Top: Information Services Department, Ghana; right: San Angelo Standard-Times

[Credit Line]

COVER: Maxie Roberts/Courtesy of THE STATE