Yoko’, ara Durru’, ara Boch Ban’en ni Yima Gafgow Riy​—Pi N’ey e Mich Riy ni Got e Der Ma Runguy e Girdi’, Fa?

BOCH BAN’EN NI MA YOG E GIRDI’: “Got e be gagiyegnag e fayleng ma ir e be k’aring e pi yoko’, ara durru’, ara boch ban’en ni yima gafgow riy, ere dabisiy ni ir be’ nder runguy e girdi’.”

N’EN NI BE YOG E BIBLE: “Tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Mini’ “Faanem nib Kireb”? Be yog e Bible ni ir Satan. (Matthew 13:19; Mark 4:15) Uw rogon u wan’um, ga be lemnag ma re n’ey e ban’en nde riyul’? Mu lemnag e re n’ey: Faanra Satan e ir e be gagiyegnag e re fayleng ney ma aram e be k’aring e girdi’ ni nge yag fare lem ngorad ni kemus ni yad e yad be lemnagrad, ma darur lemnaged e pi n’en ni bay nga m’on. Re n’ey e be tamilangnag fan ni be kirebnag e girdi’ e pi n’en ni bay u toobey. Boor e girdi’ ni yad be yog ni pi n’en ni be rin’ e girdi’ ni yad be kirebnag e pi n’en u toobey e be k’aring e yoko’, ara durru’, ara boch ban’en ni yima gafgow riy ara yad be tay e yafas ko girdi’ nga thatharen e riya’.

Ere, mang fan ni ke pag Got Satan ni nge k’aring e girdi’ ni ngar rin’ed e tin nib kireb? Rayog ni ngad nanged e fulweg riy ni faan gad ra lemnag e n’en ni buch ko som’on u nap’an ni togopuluw e gal som’on e gallabthir rodad ngak Got ni ir e Pilung. Gad ra lemnag e n’en ni buch ko tabolngin ni sum e girdi’, me togopuluw Adam nge Efa ngak Got ni ir e bay rogon ni nge gagiyeg. Bochan ni kar togopuluwgow nga mat’awun Got, ma aram e ke mang Satan e en ni be gagiyegnag e fayleng. Ere Jesus e ke pining Satan ni “en ni be gagiyegnag e girdi’ nu roy u fayleng.” (John 14:30) Ere gur, ra gagiyeg Satan ni manemus? Danga’!

Ere gathi ban’en nder lemnag Jehovaha e pi gafgow ni be k’aring Satan. Ya bin riyul’ riy e be runguy e girdi’ ni yad be gafgow. Ni bod ni be weliy e Bible murung’agen Got u nap’an ni ke yib e magawon ngak fare nam nu Israel ni gaar: “Me chuwegrad u fithik’ urngin e gafgow.” (Isaiah 63:9) Bochan ni be runguy Got e girdi’, ma ke yarmiy ndab ki n’uw nap’an min chuweg e gagiyeg rok Satan ndariy e runguy riy! Ma ke dugliy Jesus Kristus ni Fak nib mat’aw ni nge mang Pilung ndariy n’umngin nap’an.

ROGON NI GAB L’AG KO RE N’EY: Yugu aram rogon ni gagiyeg rok Satan e der yag ni nge ayuwegey u nap’an ni ke yib e yoko’ ara durru’ ara boch ban’en ni yima gafgow riy, machane birok Kristus e gagiyeg e ra ayuwegey. Ba’ bayay ni ke ayuweg Jesus pi gachalpen u nap’an ni yib e nifeng nrib gel. Ya yog e Bible ni gaar: “Me non ko nifeng ni gaar, ‘Mmocha’!’ Me mocha’ e nifeng, me aw e cho’.” Me yog pi gachalpen ni lungurad: “Mini’ e cha’ney? Ni mus ko nifeng nge n’ew ma be fol rok!” (Mark 4:37-41) Bochan e re n’em ma kari mudugil u wan’dad nra ayuweg Jesus urngin e girdi’ ni yad ra fol rok u nap’an nra gagiyegnagrad ni ke mang Pilung.​—Daniel 7:13, 14.