Mu Chuchugur Ngak Got

‘Mang e Be Yog Ngomed ni Ngam Rin’ed?’

MANG e baadag Jehovah ni nge rin’ e piin ni yad baadag ni ngar liyorgad ngak nrogon nib m’agan’ ngay? Gur, be lemnag ni ngad rin’ed gubin ban’en nib fel’ rogon, ya be mo’maw’nag ngodad ni ngad felfelan’naged ni bochan ndawor da flontgad? Ara kemus ni be lemnag ni ngad rin’ed e tin rayog rodad? Rib ga’ fan e fulweg ko pi deer ney, ni faanra ngad pirieged e felfelan’ ko pigpig ni gad be tay ngak Got. Gad ra guy rogon ni ke weliy Mikah ni profet murung’agen e pi n’en nib m’agan’ ngay.—Mu beeg e Mikah 6:8.

“Gimed e girdi’. . . ke yog Somol ngomed e tin nib fel’.” Dariy fan ni nge maruwar lanin’dad ko pi n’en ni baadag Got ni ngad rin’ed. Ya ke tamilangnag ko thin rok u Bible e pi n’en ni thingar da rin’ed. Pi n’en ni be yog ngodad e ba “fel’.” Ma dabiyog ni nge thil. “Got e ba t’uf e girdi’ rok,” ere gubin ngiyal’ ni ma lemnag e tin nib fel’ ni fan ngodad. (1 John 4:8; 5:3) Faan gad ra fol ko pi motochiyel rok, ma gathi kemus ni gad ra felfelan’nag, ya ku ra yib angin ko yafas rodad.—Deuteronomy 10:12, 13.

“Tin ni ke yog ngomed ni ngam rin’ed.” Bay rogon ni nge yog Jehovah ngodad ni ngad rin’ed boch ban’en ni fan ngak, fa? Arrogon. Ya bochan ni ir e pi’ e yafas ngodad, maku ir e be taydad ni gadad ba fas, ere ba ga’ fan ni ngad folgad ko pi motochiyel rok. (Psalm 36:9) Ere, mang boch ban’en ni be yog ni ngad rin’ed? Ke weliy Mikah dalip i ban’en ni nge tamilangnag e pi n’ey. Gal nsom’on e kenggin e motochiyel e ba muun ngay e ngongol rodad ngak boch e girdi’, ma bin dalip e kenggin e motochiyel e bay rogon ko tha’ u thildad Got.

“Mu rin’ed e tin nib yal’uw.” Rogon ni be yog reb e babyor e fare bugithin ni “ngan rin’ e tin nib yal’uw” ni thin nu Hebrew e ba “muun ngay ni ngam rin’ e ngongol nib fel’ ngak gubin e girdi’ u lan binaw.” Baadag Got ni ngad ngongolgad ngak e girdi’ nrogon bay ko motochiyel rok. Ere, aram fan ni thingar da yul’yul’gad, ma nge taareb rogon gubin e girdi’ u wan’dad, ma ngkud rin’ed e ngongol nib mat’aw, ma aram e gad be dag e ngongol nib yal’uw. (Levitikus 19:15; Isaiah 1:17; Hebrews 13:18) Nap’an ni gad ra rin’ e ngongol nib fel’ ngak e girdi’, ma rayog ni ngkur rin’ed e ngongol nib fel’ ngodad.—Matthew 7:12.

“Um pired nib t’uf Got romed nge girdi’.” Ke yog Got ngodad ni gathi kemus ni ngad golgad ngak e girdi’, ya susun aram ban’en ni nge aw nrib t’uf rodad ni ngad rin’ed. Fare bugithin ni “gol” ara (cheʹsedh) ni thin nu Hebrew e ku rayog ni nga nog ni “t’ufeg ni bay e yul’yul’ riy.” Rogon ni be yog be’ ni ma fil murung’agen e Bible e gaar: “Ga ra fanay urngin e pi fel’ngin ni aram e t’ufeg, nge runguy, nge gol u taabang, ma aram e ke taareb fan ko fare bugithin ni [cheʹsedh].” Faanra gad baadag ni ngad golgad, ma aram e nge m’agan’dad ngay ni ngad golgad ngak e piin nib t’uf e ayuw rorad. Ma bochan ni gad ma ayuweg e girdi’ ma ra yib e felfelan’ ngodad.—Acts 20:35.

“Um folgad rok Got u fithik’ e sobut’an’.” Fare thin nu Bible ni be gaar ngan “fol” e be yip’ fan ni ngad rin’ed e n’en ni kan ta chilen ngodad. Ere, faanra gad ma fol rok Got, ma be yip’ fan ni gad be pag e thin rok u Bible ni nge gagiyegnag e yafas rodad. Mab t’uf ni ngad sobut’niged gadad ni faanra ngad rin’ed e re n’ey. Ni uw rogon? Gad ma rin’ e re n’ey u nap’an ni gad ma fal’eg i yaliy rarogodad nrogon ni ma guydad Got u fithik’ e yul’yul’, ma gad nang ni bay e meewar rodad. Ere, faanra ngad “folgad rok Got u fithik’ e sobut’an’” ma aram e be yip’ fan ni gad ma fal’eg i yaliy e pi motochiyel rok nib fel’ rogon, ma gad fol riy nrogon nrayog rodad.

Gad ba tow’ath ya Jehovah e der ma ning ban’en ngodad ndabiyog rodad. Ya ma felfelan’ nga rogon e athamgil ni gad ma tay ni ngad pigpiggad ngak. (Kolose 3:23) Ma manang ni gad ba meewar. (Psalm 103:14) Ma nap’an ni gad ra sobut’nag lanin’dad ngad nanged e pi meewar rodad ma aram e rayog ni ngad folgad rok u fithik’ e felfelan’. Ere, mang ndab mu fil rogon ni ngam fol rok Got e chiney? Ya nap’an ni ga ra rin’ ni aram rogon, ma ra tow’ath nigem.—Proverbs 10:22.