Mu Gelnag e Tha’ u Thilmew e En Mabgol Rom u Daken e Numon nib Fel’
“Ri dakuriy ba felfelan’ ngay, ni ga ra pirieg e re bugithin nib mat’aw ni nga mog ko ngiyal’ ni nga mog.”—PROV. 15:23, BT.
1. Uw rogon ma numon nib fel’ e ke ayuweg boch e mabgol?
I YOG reb e walag u Canada ni gaar: “Gu baadag ni nggu chag ko ppin rog ko bin ni nggu chag ngak yugu boch e girdi’.” Miki yog nib gel e felfelan’ ni ma tay u nap’an ni yow ma chag e ppin rok u taabang, ma re n’ey e ma momnag ngorow ni ngar athamgilgow u fithik’ e pi magawon ni ma yib ngorow. Ki yoloy reb i figirngiy u Australia murung’agen e numon u thilrow leengin ni gaar: “Ke yan 11 e duw ni kug mabgolgow e ppin rog, ma da gur ma pag reb e rran ndab gu non ngak.” Ke yog ni bochan nib fel’ e numon u thilrow ma ke yag ni ngaur pirew nib pagan’row ngorow mab fel’ e mabgol rorow. I yoloy reb e walag ni ppin u Costa Rica ni numon nib fel’ u thilrow figirngin e aram e n’en ni ke yibnag e felfelan’ nga lan e mabgol rorow. I yog ni gaar: “Re n’ey e ke chugurnag e tha’ u thilmad Jehovah, ma ke ayuwegmow ni nggu siyegew e pi lem ko fayleng, ma ke gelnag e t’ufeg u thilmow, ma kki ayuwegmow ni nggu parew ni gamow ba taareb.”
2. Mang fan ni yu ngiyal’ e ba mo’maw’ ni nge fel’ rogon e numon u thilin e piin mabgol?
2 Ba fel’ e numon u thilmew e en mabgol rom, fa? Riyul’ ni yu ngiyal’ e ra mo’maw’ rogon e numon u thilmew ni bochan e gimew l’agruw ndawor mu flontgow mab thil rarogomew. (Rom. 3:23) Rayog nib thil e yalen romew ara ba thil rogon ni kan chuguliymew. Ere rayog ni nge thil rogon ni gimew ma weliy e n’en ni bay u lanin’mew. John M. Gottman nge Nan Silver ni l’agruw ni’ ni yow ma fil murung’agen e mabgol e rognew ni faanra dabun e piin mabgol ni nge wer e mabgol rorad, ma thingar ra guyed rogon ni nge fel’ e numon u thilrad.
3. Mang e ke ayuweg boch e mabgol ni nge par e mabgol rorad nib fel’?
3 Ra nge yag e felfelan’ nga lan reb e mabgol mab t’uf e maruwel nib gel. Machane, re n’ey e ra ayuweg fa wu’ i mabgol ni ngar parew ni yow ba felfelan’. (Ekl. 9:9) Am lemnag rogon e mabgol rok Isak nge Rebekah. (Gen. 24:67) Be yog e Bible ni ur gayew rogon ni nge par e t’ufeg u thilrow nib gel ni yugu aram rogon ni ke n’uw nap’an ni kar mabgolgow. Boor e mabgol e ngiyal’ ney e ke yag rorad ni ngar rin’ed e re n’ey. Mang e ke ayuwegrad? Kar filed rogon ni ngaur weliyed lanin’rad ngorad u fithik’ e yul’yul’, nge tayfan, nge sumunguy. Yad ma dag boch e fel’ngin ni bod e tamilangan’, nge t’ufeg, nge tayfan, nge sobut’an’. Ere, chiney e ngad weliyed rogon nrayog ni nge ayuweg e pi fel’ngin ney ba wu’ e mabgol ni nge fel’ e numon u thilrow.
NGE TAMILANGAN’UM
4, 5. Uw rogon nra ayuweg e tamilangan’ ba wu’ e mabgol ni ngar nangew fan lanin’row? Mu weliy rogon.
4 Be gaar e Proverbs 16:20, BT: “Ngam tiyan’um [“tamilangan’um,” NW] ko tin kan fil ngom, ma ga mon’og i yan.” Thin rok Got e ma pi’ e tamilangan’ nge gonop ngodad, ma aram e n’en nra ayuweg e mabgol nge par ni bay e felfelan’ riy. (Mu beeg e Proverbs 24:3.) Bod ni be yog e Genesis 2:18 ni sunmiy Got e ppin ni nge mang taayuw ko pumoon. Re n’ey e be yip’ fan nib thil rarogon e ppin nge pumoon, ya nge yag nra ayuwegew yow. Aram fan nib thil rogon ni ma non e ppin nga rogon ni ma non e pumoon. Yooren e ppin e ba ga’ ni yad baadag ni ngaur weliyed e n’en ni bay u lanin’rad, nge n’en ni be buch ko girdi’, nge rogon e tha’ u thilin e girdi’. Ma nap’an ni yira non ngak reb e ppin u fithik’ e t’ufeg nge yul’yul’ ma ra nang ni yibe t’ufeg. Boor e pumoon e ba ga’ ndarur weliyed e n’en ni bay u lanin’rad, machane yad ma weliy e pi n’en ni be buch u toobrad, nge magawon, nge rogon ni ngan pithig e pi magawon nem. Ma piin pumoon e ku yad baadag ni ngaun tay farad.
5 I yog reb e walag ni ppin u Britain ni gaar: “Pumoon rog e baadag ni nge pithig e magawon nib papey ko bin ni nge motoyil ko n’en ni nggog u murung’agen fare magawon.” Miki yog nre n’ey e ma k’aring e kankanan’ ngak ni bochan e ri baadag ni nge motoyil figirngin ngak u nap’an ni be weliy e n’en ni be lemnag me guy rogon ni nge nang fan laniyan’ riy. Ma reb e pumoon e yoloy murung’agen leengin ni gaar: “Som’on ni gu mabgolgow e ppin rog ma gu ma guy rogon ni nggu pithig e pi magawon rok nib papey.” Tomur riy me nang ni n’en nri baadag e ppin rok e nge motoyil ko n’en nra yog. (Prov. 18:13; Jas. 1:19) Be’ ni figirngiy nib tamilangan’ e manang fan laniyan’ leengin ma ma ngongol ngak u fithik’ e t’ufeg. Ma guy rogon ni nge nang nib ga’ fan u wan’ e n’en ni ma lemnag. (1 Pet. 3:7) Ma be’ ni leengiy nib tamilangan’ e ma guy rogon ni nge nang fan laniyan’ figirngin. Ere, faanra i maruwel e en figirngiy nge en leengiy u taabang ni ngar rin’ew e n’en nib m’agan’ Got ngay ni fan ko mabgol, ma ra par e mabgol rorow ni bay e felfelan’ riy, ma rayog ni ngar dugliyew boch ban’en u taabang u fithik’ e gonop.
6, 7. (a) Uw rogon nra ayuweg fare thin ni bay ko Eklesiastes 3:7 ba wu’ e mabgol ni ngar dagew nib tamilangan’row? (b) Uw rogon ni nge m’ug nib tamilangan’ reb e ppin u nap’an ni be non ngak figirngin? Mang e thingari gay e en figirngiy rogon ni nge rin’?
6 Susun ngki nang ba wu’ e mabgol ni bay “ngal’an ni ngan th’ab gulungey nge ngal’an ni ngan welthin.” (Ekl. 3:1, 7) Reb e walag ni ppin ni ke gaman ragag e duw ni ke un ko mabgol e yog ni ke nang e ngiyal’ nib puluw ni nge weliy murung’agen boch ban’en ngak figirngin. Bod ni faanra ke magar figirngin ni bochan e ba gel e maruwel ni ka i tay ara bay ban’en ni be rin’ ma ma sonnag e ngiyal’ nib fel’ ni nge non ngak. Angin ni ke yib riy e ke fel’ rogon e numon u thilrow. Nap’an nra non e en leengiy u fithik’ e sumunguy mab m’ag ko “ngiyal’” ni nge yog ban’en riy, ma ra adag figirngin ni nge motoyil ngak.—Mu beeg e Proverbs 15:23, BT.
7 Reb i figirngiy ni Kristiano e gathi kemus ni ma motoyil ko n’en ni ma weliy leengin ngak, ya ku ma gay rogon ni nge weliy e n’en ni bay u laniyan’. Reb e piilal ni ke gaman 27 e duw ni ke un ko mabgol e gaar: “Gu ma gay rogon ni nggu weliy ngak leengig e n’en ni bay u gum’irchaeg.” Maku reb e walag ni pumoon ni ke gaman 24 e duw ni ke un ko mabgol e yog ndabun ni ma weliy murung’agen e magawon, ya ma lemnag nfaanra dabi weliy ma ra munmun me m’ay. Ki yog ni gaar: “Kug nang ni faan gu ra weliy e n’en ni bay u lanin’ug ma gathi aram e be yip’ fan ni gub meewar. Nap’an nra mo’maw’ rogon ni nggu weliy e tafinay rog, ma aram mug meybil ya nge yag ni gu nang e n’en nib fel’ ni nggog nge rogon ni nggog. Tomuren ni kug meybil, mug fil e fan rog ma aram mug tabab ko non.” Ba ga’ fan ni nge mel’eg ba wu’ e mabgol e ngiyal’ nib fel’ ni ngar nonow, ni bod rogon e ngiyal’ ni kar bow nga taabang ni ngar beegew e pi thin nu Bible ni fan ko yu rran, ara nap’an ni yow be beeg e Bible u taabang.
8. Mang e ra ayuweg ba wu’ e mabgol ngar adagew ni nge fel’ e numon u thilrow?
8 Rayog ni nge mo’maw’ rogon ni nge thilyeg ba wu’ e mabgol rogon ni yow ma non. Ere, ba t’uf ni ngar ningew gelngin Got nib thothup u daken e meybil ni nge ayuwegrow ngar adagew ni ngar mon’ognagew rogon e numon u thilrow. Yow ra adag ni ngar rin’ew e re n’ey ni faanra ba t’uf Jehovah rorow, ma yow baadag ni ngar rin’ew e tin nib m’agan’ ngay, mab thothup e mabgol rorow u wan’row. I yoloy reb e walag ni ppin ni ke gaman 26 e duw ni ke un ko mabgol ni gaar: “Gamow e pumoon rog e gamow ma sap ko mabgol romow nrogon ni ma sap Jehovah ngay, ere dariy ba ngiyal’ ni kug lemnagew ni nggu dargow. Aram fan ni gamow ma gay rogon ni nggu weliyew rogon ni nggu pithigew e magawon romow u taabang.” Faanra ba yul’yul’ ba wu’ e mabgol ngak Got ma yow ra felfelan’nag ma ra tow’athnagrow.—Ps. 127:1.
MU GELNAGEW E T’UFEG U THILMEW
9, 10. Mang boch ban’en nrayog ni nge rin’ ba wu’ e mabgol ya nge yag ni gel e t’ufeg u thilrow?
9 T’ufeg e aram e re fel’ngin nth’abi ga’ fan u lan e mabgol. Be yog e Bible ni t’ufeg e “ir e ma chugumiy urngin ban’en nga taabang nge par ni ke fel’ rogon.” (Kol. 3:14) Bin riyul’ e t’ufeg e ra i n’uw nap’an ma be gel. Bin riyul’ e t’ufeg e ku ma gel u nap’an nra rin’ ba wu’ e mabgol boch ban’en u taabang ni ngar felfelan’gow ngay ngu nap’an ni kar mada’nigew e magawon. Re n’ey e ra fal’eg e tha’ u thilrow mar felfelan’gow ni yow be par u taabang. Ba wu’ e mabgol ni aray rogon e darur rin’ew boch ban’en ni ke pag rogon ni bod ni yima guy yaan ko kachido ya yow ma rin’ boch ban’en nib achig ni fan ngorow. Pi n’ey e bod ni ngar gumuchmuchgow, ara nga rognew e thin nib sumunguy ngorow, ara ngar rin’ew boch ban’en ni nge m’ug riy ni yow be lemnagew yow, ara ngar siminmingow ngorow, ara ngar fithew salaprow ni bod ni nge gaar bagayow “mang e kam rin’ boch e daba’?” Nochi n’ey nib achig e ba ga’ fan u lan e mabgol. Ba wu’ e mabgol ni ke gaman 19 e duw ni kar mabgolgow e ka rognew ni yow ma call ara yow ma text nigew yow ni kemus ni ngar fithew “salaprow.”
10 Faanra en figirngiy nge en leengiy e yow ma t’ufegew yow ma ra ur guyew rogon ni ngar nangew boch ban’en u murung’agrow. (Fil. 2:4) Yugu aram rogon nra bagayow ma bay e meewar rok, ma ra i gel e t’ufeg u thilrow ni faanra yoor ban’en nra nangew u murung’agrow. Reb e mabgol ni bay e felfelan’ riy e ra be n’uw nap’an ma aram e be fel’ i yan. Ere, faanra gur be’ ni kam mabgol ma ngam fithem ni nge lungum: ‘Ri gu manang e en ni mabgol rog nib fel’ rogon, fa? Gu manang e pi n’en ndabun nge pi n’en ni baadag, fa? Ba ga’ ni gu ma lemnag e pi fel’ngin e en mabgol rog ni ir e k’aringeg ni nggu adag ko som’on, fa?’
NGAM TEW FAMEW
11. Mang nib ga’ fan ni ngaun ta’ fay u lan e mabgol? Mu weliy murung’agen reb e mabgol u lan e Bible.
11 Dariy reb e mabgol nib flont. Bay yu ngiyal’ ndabi taareb laniyan’ ba wu’ e mabgol u ban’en. Abraham nge Sarah e immoy yu ngiyal’ nda i taareban’row u boch ban’en. (Gen. 21:9-11) Machane, re n’ey e de kirebnag e mabgol rorow. Mang fan? Ya bochan ni yow ma tew farow. Abraham e ma “wenig” ngak Sarah. (Gen. 12:11, 13) Ma Sarah e ma fol rok Abraham ma ma tay ni ir e “masta” rok. (1 Pet. 3:6) Faanra ba gel e thin ni ma yog ba wu’ e mabgol ngorow, ma aram e be m’ug riy ndarur tew farow. (Prov. 12:18) Faanra dariy e tayfan u thilin ba wu’ e mabgol ma ra magawon e mabgol rorow.—Mu beeg e James 3:7-10, 17, 18.
12. Nap’an nra mabgol l’agruw ni’, ma mang fan nsusun e ngar gayew rogon ni ngaur nonow ngorow u fithik’ e tayfan?
12 Nap’an nra mabgol l’agruw ni’ mab t’uf ni ngar athamgilgow ngaur nonow ngorow u fithik’ e sumunguy nge tayfan. Re n’ey e ra momnag ngorow ni ngaur nonow ngorow u fithik’ e yul’yul’. I yog reb i figirngiy nsom’on nra mabgolgow leengin ma da ur nangew fan lanin’row, nge pi n’en nib t’uf rok bagayow, nge pi n’en ni yow baadag. Ma yu ngiyal’ e ma kankanan’row ni bochan e pi n’ey. Machane, ke yag ni nge fel’ e tha’ u thilrow ni bochan e yow ma ngongol u fithik’ e gonop, ma yow ma guy rogon ni ngaur parew ni yow ba felfelan’. Ki yog nib ga’ fan ni nge sobut’an’uy, min k’adan’uy, me pagan’uy ngak Jehovah. Ireray e fonow nib fel’ ni fan ngodad ni gad gubin.
MU DAGEW E BIN RIYUL’ E SOBUT’AN’
13. Faanra nga i par ba wu’ e mabgol ni yow ba felfelan’, ma mang fan nib t’uf e sobut’an’?
13 Faanra ba ‘sobut’an’’ ba wu’ e mabgol, ma aram e rayog ni ngaur nonow ngorow u fithik’ e sumunguy nge gapas. (1 Pet. 3:8) Reb e walag ni pumoon ni ke gaman 11 e duw ni ke un ko mabgol e ke yog ni sobut’an’ e ma ayuweg e ba wu’ e mabgol ni ngar pithigew e magawon rorow, ya ra momnag ngorow ni nge lungurow, “Wenig ngom.” Maku reb e piilal ni ke gaman 20 e duw ni ke un ko mabgol e gaar: “Yu ngiyal’ e kab ga’ fan ni nge lunguy, ‘Wenig ngom’’ ko bin ni nge lunguy, ‘Gab t’uf rog.’” Ki yog ni meybil e ke ayuwegrow leengin ni ngar dagew e sobut’an’. I yog ni gaar: “Nap’an ni gamow ra meybil leengig ngak Jehovah u taabang ma ma yib ngan’mow ni dawor gu flontgow mab t’uf e runguy rok Got romow.” Re n’ey e ke ayuwegrow ni ngar pithigew e magawon rorow u fithik’ e gonop mar rin’ew u rogon nrayog rorow.
14. Mang e ra rin’ e tolangan’ nga ba wu’ e mabgol?
14 Machane, tolangan’ e ra mo’maw’nag ngak e en figirngiy nge en leengiy ni nge fel’ e numon u thilrow mar pithigew e magawon rorow. Be’ nib tolangan’ e dabun ara be tamra’ ni nge gaar, “Wenig ngom, mu n’ag fan e kireb rog.” N’en ni ma rin’ e ma gay e tawey ko oloboch ni ke rin’, fe yin’ e kireb riy nga daken be’. Be’ nib tolangan’ e nap’an nra yog be’ reb e thin nra kirebnag laniyan’ ma dabi gay rogon ni nge aw e gapas u thilrow faanem. Ra yog e thin nib gel ngak faen ni ke kirebnag laniyan’ fa par ndabi non ngak. (Ekl. 7:9) Arrogon, tolangan’ e ra magawonnag e mabgol. Ere, ba fel’ ndab ni pagtalin ni “Got e ma togopluw ngak e piin nib tolangan’rad, ma ma ayuweg e piin nib sobut’an’rad.”—Jas. 4:6.
15. Uw rogon nrayog ni nge ayuweg fare thin ni bay ko Efesus 4:26, 27 ba wu’ e mabgol ni ngar pithigew e magawon u thilrow?
15 Faanra der taareban’ ba wu’ e mabgol, ma susun e ngar sobut’nagew lanin’row mar guyew rogon ni ngar pithigew e magawon u thilrow nib papey. I yog Paul ngak e piin Kristiano ni gaar: “Dab mpired ni gimed ba damumuw nge polo’ reb e rran. Dab mu binged e kanawo’ ngak moonyan’.” (Efe. 4:26, 27) Mang e ra buch ni faanra dabi fol ba wu’ e mabgol ko re fonow ney ni bay ko Thin rok Got? I yog reb e walag ni ppin ni gaar: “Wenegan ni ma yib riy e dabi fel’ e mol rog e re nep’ nem!” Ba fel’ ni ngan gay rogon ngan pithig e magawon nib papey u fithik’ e gapas. Machane, sana ba fel’ ni nge son fa wu’ i mabgol ni nge war e damumuw rorow mfin ra weliyew rogon ni ngar pithigew e magawon rorow. Susun e ngkur meybilgow ngak Jehovah ni nge ayuwegrow ni ngar sobut’nagew lanin’row. Re n’ey e ra ayuwegrow ni ngar gayew rogon ni ngar pithigew fare magawon ko bin ni nge bagayow ma goo ir e nga i lemnag ir.—Mu beeg e Kolose 3:12, 13.
16. Uw rogon nra ayuweg e sobut’an’ ba wu’ e mabgol ni nge ga’ fan pi fel’ngirow nge tin nrayog rorow u wan’row ?
16 Sobut’an’ e ra ayuweg ba wu’ e mabgol ni nge ga’ fan pi fel’ngirow nge tin nrayog rorow u wan’row. Bod ni, sana en leengiy e bay boch i fel’ngin nra yib angin ko tabinaw. Ma be’ ni figirngiy nib sobut’an’ e der ma lemnag nib cheg u urngin ban’en ni yow ma rin’ leengin, ya ma pi’ e athamgil nga laniyan’ ni nge maruwel ko salap rok. Faanra rin’ ni aray rogon, ma aram e be dag nib t’uf leengin rok mab ga’ fan u wan’. (Prov. 31:10, 28; Efe. 5:28, 29) Be’ ni leengiy nib sobut’an’ e der ma ufanthin ara darifannag figirngin ni bochan boch ban’en ndabiyog rok ni nge rin’. Faanra ur ngongolgow ni aray rogon, ma ra magawon e mabgol rorow ni bochan e kar “taab girdi’gow.”—Mat. 19:4, 5.
17. Mang e ra ayuweg e piin mabgol ngaur pared ni yad ba felfelan’ ma yad be pining e sorok ngak Got?
17 Dabisiy ni gimew baadag e en mabgol rom ni nge par e mabgol romew ni bod e mabgol rok Abraham nge Sarah ara Isak nge Rebekah. Maku dabisiy ni gimew baadag ni nge par ni bay e felfelan’ riy, ma dabi kireb, ma yira pining e sorok riy ngak Jehovah. Ere, mu lemnagew e mabgol romew ni bod rogon ni ma lemnag Jehovah. Mu gayew e tamilangan’ ko Thin rok me ga’ fan u wan’mew pi fel’ngimew, ya aram e n’en nra gelnag e t’ufeg u thilmew. (Tng. 8:6) Mu athamgilgow ngaum parew ni gimew ba sobut’an’. Mu um tew famew. Faan gimew ra rin’ e pi n’ey ma aram e ra yib e felfelan’ nga lan e mabgol romew, maku gimew ra felfelan’nag e Chitamangidad ni bay u tharmiy. (Prov. 27:11) Reb e walag ni pumoon ni ke gaman 27 e duw ni ke un ko mabgol e gaar: “Dagnang ko mang e gu ra rin’ ni faanra demo’ e ppin rog. Gubin e rran ni be gel e tha’ u thilmow ni bochan e ba t’uf Jehovah romow mab fel’ e numon u thilmow.” Ere, ku rayog ni nge par e mabgol rom ni aray rogon!