Fare Machib ni Ma K’aring e Girdi’ Ngar Lemnaged nib Mo’maw’ ni Ngan Nang Murung’agen Got

N’EN NIB MICH U WAN’ BOOR E GIRDI’

Pi yurba’ i teliw ni yad ma yog ni yad e Kristiano nib “muun e teliw ko Katolik, nge Eastern Orthodoxy, nge Protestant ngay e yad ma yog ni en ni Chitamangiy nge Fak nge fare Kan ni Thothupa e yad taareb: En ni Chitamangiy e Got, ma En ni Fak e Got, ma fare Kan ni Thothup e Got. Ere, rogon e machib ko pi yurba’ i teliw ney e be m’ug riy ni dalip ni’ ma taareb e Got.”​—The New Encyclopædia Britannica.

TIN RIYUL’ U BIBLE

Jesus ni Fak Got e dariy ba ngiyal’ ni ke yog ni ir nge Chitamangin e yow ba taareb. I yog ni gaar: “Bay gu wan ngak e en ni Chitamangiy, ya ir e ka ba ga’ ngog.” (John 14:28) Miki yog ngak reb i gachalpen ni gaar: “Bay gu sul nga tharmiy ngak faanem ni ir e Chitamag me ir e Chitamangimed, ni ir e Got rog me ir e Got romed.”​—John 20:17.

Fare gelngin Got nib thothup e gathi be’. Tin som’on e Kristiano e “sugnagrad gelngin Got nib thothup,” miki yog Jehovah ni gaar: “Bay gu puog gelngig nib thothup nga daken urngin e girdi’.” (Acts 2:1-4, 17, NW) Fare gelngin Got nib thothup e gathi bang ko fare Trinitas, ya aram gelngin ni ma mithmith.

FAN NIB GA’ FAN

Karl Rahner nge Herbert Vorgrimler e yow ma fil murung’agen e machib ko Katolik e kar weliyew ni fare machib ni Trinitas e: “Dabiyag ni ngan nang fan ni faanra dab ni tamilangnag fan. Gur, rayog ni ngam t’ufeg be’ nib mo’maw’ ni ngam nang murung’agen ara ngam nang rarogon? Ere, fare machib ni Trinitas e bod ba yoror ni be talegnem ni nge dab mu nang Got ma ku dabiyog ni nge t’uf rom.”

Marco ni kan weliy murung’agen ko bin som’on e article e yog ni fare Trinitas e bod ba yoror. Miki yog ni gaar: “Ug lemnag ni be mithag Got pi fel’ngin rog, ma re n’ey e ku be n’igin ni nge par nib mal’af, mab mo’maw’ ni ngan nang murung’agen ma kub mo’maw’ ni ngan non ngak.” Machane, Got e gathi reb e Got nde “yaram.” (1 Korinth 14:33) Der ma mithag murung’agen rodad, ya baadag ni ngad nanged ko ir mini’. I yog Jesus ni gaar: “Gamad manang e en ni gamad be meybil ngak.”​—John 4:22.

I yog Marco ni gaar: “Nap’an ni gu fil ni Got e gathi bang ko fare Trinitas, ma ke yag ni nge chugur e tha’ u thilmow nggu mang fager rok.” Faan gad ra guy ni Jehovah e be’ nib riyul’, ma gathi ir be’ nib mo’maw’ ni ngan nang murung’agen, ma ra mom ni ngan t’ufeg. Be gaar e Bible: “En nde t’uf Got rok nge girdi’ e be’ nde nang Got ni bochan e Got e ba t’uf e girdi’ rok.”​—1 John 4:8.